Hibruu 13 - Gooti Toolluro Yogalokwono

Gooti toollu kwiroudapiyajupo to'busuko kubalno nevu pasudo idopto'nodo tollovai neya uumjunmwalano tovinokwono

¹ Kevu Jisasolluro a'mwo abolo tobuurekul kemi tellugwai'yago tello'mwo tonbusuko ikullumo'nodupudo Jisasolluro a'mwo abolo tobuuraino kalo buuropino imgu amgu me'no ikullunodowodo su tov kuuno domollogaulo.

² Aki kevu a'mwo abolo pumuuda'ai ton abekuru'mapi tonyu kemoro ago tonyu mollomwallo'mo pasudo tovino kuudo nyallu'gwonmwalpiyo. Aiyoga a'mwo abolo pun pasudo su tovi amolludo'movlavopo toga ensel pworai kemoro ago tonyu me'no amollomwalopogano. Toro amollomwalopo kuvi kuruv a'mwo abolo su ton aro kuudo miworovomallajupogano. Oo nevu ensel toorai domollomwakuuwono. Kuudo miworovomallajupogano.

³ Aki kevu Jisasolluro a'mwo abolo wuulo killo'mo ago tovi kuule'na'dupudo tobuuraino kuudo nyallulo'gwonmwalpiyo. Kevnokwe togaikul wuulo killo'mo ago tovi aule'naropujuko togaikulbusuko a'mwo abolo kuule'na'dupudo su tobuuraino kuudo nyallulo'gwonmwalpiyo. Aki kevnokweyogaikulluro kulako tonyu danyu'nyuwuulo subwosunopujuko to'busuko a'mwo abolo danyu'nyuwuulo ibwosunodupudo su tobuuraino kuudo nyallulo'gwonmwalpiyo.

⁴ Aki kevu a'mwo kwolabolo yoma'nodupudo tovino aro kuudo neya jaurogaulo. Oo kwolabolo yoma'nyo'moneyokwe pasudo tov ilaiyo'mdeyo. Kuudo jaurogaulo. Aki yiuwi'nokai kwolabolo su teyaul kwonyalo yasuwa'no miyomollubullunono. Su tov aro tovinokwono. Gooti tool yiuwi'nokai kwonyalo yodupudo togai'aro abekuuko'mdeyo oo a'mwo kuuko'mdeyo yodupudo togai'aro tonyu kooti yogalo wiyowo'ji nerumwallonekono.

⁵ Kevu nuugwiyo bwotonyo ki'nomallo'mo tovino nekullunumwalpiyo. Aki, Oo nuu noonyumwonyu kuto ivito pugai'aro neya ama'mo, kuudo nyau'mwalpiyo. Toro kuvi kuruv kemi kuto ivito me'no mwora'dupudo su tonyuno, Oo su ton nokwo'modeyo, kuudo to'no neya jaurogaulo. Su toro tovino Gooti tool aro adokaikono. “Nuu gumi magugollu'mo'monyugono. Aki gumi miyogwapimonyugono.” Adokaikono.

⁶ Gooti toolluro yogalo danekullumwojodowodo su tovino tov nevu pwolno puru'monodo tonol aro neya adogawano. “Oo Gooti Aguto tool mi nonyo'mwojokwekono. Toro te kwako akavida'ai a'mwo abolo pun mi kaiyako ku'nono miyanyugolpinonyugono. Toro te nuu luko mimwalmonyugono.” Nevu su toro to'no neya adogawano.

⁷ Aki kevu Jisasolluro mollu'bwoto tovida'ai a'mwo mido amollekumwallajupo tooraino kuudo nyallulo'gwonmwalpiyo. A'mwo su tooro Gooti toolluro yogalo tovino sodekubwosumelabiyajuporogano. Aki toro tooro yere mabolodopure toga Gooti toollu kuudo uubweyodupudo tovi gudupola'no gudupola'no yodupu somjomwekelabiyajuporogano. Toro tooro kemi kuudo uubweyodupudo su tovi guureji agudupolallajupo tovino kevu kuudo neya you'movlavopi aval'no neya duumjunogaulo.

⁸ Jisas Kraisol yiuwi'nokai toga aval'no imo'nyokwekono. Sumdomgu togake'aro agake'aro lukomgu yiunokuudo mujomwekovlawono togake'aro yiuwi'nokai toga yiuno aval'no imo'nyokwekono.

⁹ Toro te a'mwo pworavuro ibwasodupudo kavlo go'no go'no muuduko pun kemi nomollubworekumokavla'mwalpiyo. Wosamujuko punyuno kumako mwallo'mo loowo tooro kemi jurogudo ku'nono madaikullumwojodupudorogano. Toro kuvi kuruv Gooti toolluro yasuwa'wino sugumaluko to'gwowi kemi poowokalago tonyu jurogudo daikullumwojodowodokwono. Wosamujuko kumako mwallo'mo loowo su tooro a'mwo abolo uumjunodupudo tonyu ku'nono mwiyo'mwojodupudorogano.

¹⁰ Pris womdo yodupudo tooro Gooti toollu ilomoropiyo'moneyokwe sel ago tovuro dukwagupto tovida'ai wosamujuko ton nokwo anyajuporogano. Toro kuvi kuruv nevu romiroudapiyo'moneyokwe dukwagupto puru'gwowi kurukwenogano. Dukwagupto su tovida'ai wosamujuko to'gwowi pris womdokwe tooro ku'nono mamanupinorogano. Wosamujuko su tov Jisasolluno yovekurajo'mokwono.

¹¹ Aiyoga pris aguto tool ma'no ma'no pasudo tonyu bu'duvoloso'moneyokwe sipsip meme tooravuro mujako tov Gooti toollu ilomoropiyo'moneyokwe ago tovuro pwekwapto kuunodo toru'no amokaullajukekono. Aki sipsip meme su tooravuro kulako bwiyo tooro a'mwo abolo tonyuro woromollo'moneyokwe sel ago tonyu kwa'mgu tomuu bomokalokwodupu duko tokwe amollurowopiyajuporogano.

¹² Toro te Jisas kwol kuruv wagwolago tovi kwa'mgu tomuu danyu'nyuwuulo ibwosuno'no abolokaikono. Jisasolluro bolo'no mujako abwoloka su tov a'mwo abolo ton Gooti toolluro sumdo tovi sugudo wimo'nupino'moneyokweyokwono.

¹³ Toro tovino tov Jisasol wagwolago tovi kwa'mgu tomuu kuugollu'movoka to'busuko kubalno ne kunol kuruv Juu tooravuro woromollo'mo sel ago tomuuda'ai wuugollu'movowa'ji Jisasol kwa'mgu tomuu mwallokwe toollomno neya avlavogawano. Aki Jisasol a'mwo abolo tonyuro gami bwolomorumwogapiyodopure tovino jul'nyo tov kaveno amokovlaiyajuko to'busuko kubalno nevu Jisasolluro a'mwo abolo kunol kuruv a'mwo abolo punyuro nemi bwolomonekumwogapiyodopure tovino jul'nyo tov kaveno to'no amokavlavogawano.

¹⁴ Nevu kwako akavida'ai wagwolago puvi yiunokuudo mwallo'moneyokwe nonagutonogano. Toro kuvi kuruv nemoro wagwolago muunyu kai'muu wo'dowodo su to'gwowi lukomgu Gooti tooke mujomwekovla'mwalano tovino sogwollo kinodowadonogano.

¹⁵ Toro tovino tov nevu Jisasollu'aro Gooti toolluno yovo tovi yiuwi'nokai toga ilomoropimwolowanonogano. Nevu Gooti toolluno yovo tovi ilomoropiyo'moneyokwe nemi mago tovida'ai Jisasolluno kuu'maiyo adodowiyoku'bworosa'ji tov Gooti tool yovo aguto nomaronekono. Su tov Gooti toollu kwiroudapiyajupo to'busuko wimo'nonokwono. Su toro tomgu'aro nevu Gooti toolluno yovo tovi yiuwi'nokai toga neya ilomoropiyogawano.

¹⁶ Aki kevu a'mwo abolo punyu sugupasudo neya igolopi noonyumwonyu supto yodopure tobuurai wiyo'mwojo'mo tovino kuudo nyallulo'gwonmwalpiyo. Gooti tool pris tooravuro kwiroudapiyajupo tonyuno ilaiyo kwinyajukekono. Toro to'busuko kubalno nevu a'mwo abolo tonyu sugupasudo igolodowa'jure su tonyuno ilaiyo winyokwekono.

Jisasolluro mujako abwoloka tovi'aro subuu'yamju muuduko tov sumo'noka tovinokwono

¹⁷ Kevu Jisasolluro mollu'bwoto togaikulluro mido mollekumwalokwe toorai kaduko neya wimovlavopi kemoro yogalo tonyu duumjunogaulo. Aro tovinokwono. A'mwo su tooravuro womdo tov kemoro poowokalago tonyu moduvomwallo'moneyokweyorogano. Womdo su tovi pi'mwono yodupudorodukono oo miyodupudorodukoneyokwe tovino Gooti toollu lukomgu kuu'maiyo toru nodelukuulludapipinorogano. Kevu a'mwo mido mollomwalokwe su tooravuro yogalo tovi biyolo uu'mwojopi kaduko mwipi tov jul'nyo nyubwosunmwalpiyo. Su tov kemi ku'nono maikullo'mwojonokwono. Toro kuvi kuruv kevu kaduko kwipi to'gwowi a'mwo mido mollomwalokwe tooro kemi moduvekumwallo'moneyokwe womdo tovino ilaiyo ibwosunopi yomjomwekovla'mwalpinorogano.

¹⁸ Gooti tool nemi anekullo'mwojoneyokwe tovino kevu subusu'nyogalo neya duudogaulo. Aki Gooti toolluro sumdo tovi nevu aro me'no yainyunodowadonogano. Oo nemi poowokalago tovi kuulanekwo'dupudo tonyu kuvinono uumjunodowadonoldeyo. Yainyunodowadonogano. Aki nevu yiuwi'nokai toga pasudo idopto'nodo tonyu mujumovlaiyo'mo nekullunodowodonogano.

¹⁹ Aki nuu kemi aikomgu yere bekuru'mallo'mo kuvino kuruv kevu Gooti toollu subusu'nyogalo guureji neya duudogaulo.

²⁰ Gooti su tool sumwoluko kavo wosunyo'moneyokwekono. Toro tool nemi Aguto Jisasollu aiyo aiko te me'no amodukavokaikono. Jisasol nemi nekullo'mwojo'moneyokwe gamoro mujako tov me'no abwoloka tovino tov sipsip moduvomwallokwe aguto toolbusuko anekullumo'nokaikono. Aki gamoro mujako abwoloka su tovi'aro subuu'yamju muuduko tov me'no sumo'nokakwono. Subuu'yamju su tov aiyo yiunokuudo mujo'movlaiyo'moneyokweyokwono.

²¹ Toro te kevu Gooti toolluro ilaiyo winodowo'jure tovi uumjunmwalpino'moneyokwe yiuwi'nokai supto supi ton Gooti su tool kemi nomollovrovaikubwemwalonekono. Aki Gooti tool Jisas Kraisollu'aro nemoro poowokalago tovi anakuuto tomuu womdo jurogudo noulanekullonekono. Womdo jurogudo nekullodowo'jure su tov nevu Gooti toolluro pasudo ilaiyo winodowodo tonyu yomjomwekovlaiyo'moneyokwe nomollerovonekudapiyonekono. Toro te nevu Gooti su toolluno yovo tovi yiunokuudo ilomoropino ilomoropino neya imwolowanonogano. Nebal'nodokwono.

Pas akavuro aiyowo'mo yogalo tovinokwono

²² Miyobuuravoo, nuu guureji aro ikudumo'mokwono. Nuu kemi jurogudo daikullumwojo'moneyokwe yogalo su'mnodo akav sokwollaikubwemono. Toro tovi kevu kaduko neya duuwiyogaulo.

²³ Aki kevu aro tovino kuudo youromapino'moneyokwe nyunodowodonyugono. A'mwo nemi nellugwai'yago toolbusuko nonekullumo'nodowodo pwollu wuulo killo'mo ago tovida'ai me'no surolowapiyopekono. Wuulo killo'mo ago tovida'ai a'mwo abirolo'nugwolokwoka su toolluno yovo tov Timootiyolekono. Toro te Timootiyol wobo toga miyomno nobonyuru'maronekono. Toro bonyuro'marowo'ji nuuge'aro yiuwi'nokai toonal bowosi kemi ikwonyo'moneyokwe nobekuru'marosunonakono.

²⁴ Kevu a'mwo mido mollomwalokwe toorogai'aro kemoro ago towaida'ai yiuwi'nokai Gooti toolluro a'mwo abolo togai'aro tonyu, “Ilaiyokwono,” neya duujulo. Aki kantri Italida'ai Jisasolluro a'mwo abolo ton kemiyomno, “Ilaiyokwono,” aikwopiyamavo.

²⁵ Gooti toolluro yasuwa'wino sugumaluko tov kemi nokwo ikubwemovla'mwalonekono.