Galesiya 2 - Gooti Toolluro Yogalokwono

Jisasolluro kuurotokwe pworo Poolollu ilaiyo amollomaropo tovinokwono

¹ Lukomgu 14-pela kworomo tobuul me'no avlavoka toga nuuge'aro Banabaseke'aro toonal wagwolago Jeruusalem'no aikomgu avlavowolonakono. Su toro toga nuu Taitoseke amokavlavonyugono.

² Moro su toro amokavlavo tov aro tovinokwono. Gooti tool wojo to'busuko tovi'aro biyanyulo'nyuno sumaiyokwe aro anyudokaikono. “Guu wagwolago Jeruusalem tomuuno neya dovlavono.” Toro anyudoka tovino tov nuu kumuuno avlavonyugono. Toro plaino sumoneyokwe Jeruusalemda'ai Jisasolluro a'mwo yovokwe pworai kuuru'maronyugono. Toro toorai wuuru'ma'no sumoneyokwe judo tomuu su'bwo'nomwalowonogano. Toro i'bwo'nomwalno sumawoneyokwe a'mwo kuuru'maro su toorai kuuguudo sugudo tov nuu Juu miyawosunodupudo tonyu amoruudomollajo tovino kuudonyugono. Su tov aro tovinokwono. Nuuge'aro Jisasolluro a'mwo yovokwe su toorogai'aro toonol go'no go'no nomdukuu'na'jo. Nevu kuvinono amdukuu'na'ji to'gwowi moro womdo sajo tov yasuwa'no plawonokwono. Aki moro lukomguda'ai womdo sumi kun kuruv yasuwa'no plapinogano. Su toro nyumo'no'jokwe tovino tov nevu yiuwi'nokai toonol i'bwo'nomwalno sumawoneyokwe kuuguudo adomwalowonogano.

³ Su toro adomwalowo tomuu Taitosol nuuge amwalokaikono. A'mwo su tool Grikda'ai pwekono. Toro kwolluno kuruv aro madoporogano. “Kevu Grik a'mwo su toolluro lakulkulako tov neya dodeyulo.” Madoporogano.

⁴ A'mwo kuunano youkuu'nanekujo'mo pworo Jisasolluro a'mwo kuunodo toorobusuko soukuu'nugoulaporogano. Toro youkuu'nugoulno sumaveyokwe nevu i'bwo'nomwalodowore akuuto tomuu aulomwaloporogano. A'mwo soukuu'nugoulapo su tooro domokwe toorobusuko aulomuugonanekworoporogano. Aki toro tooro, nevu Krais Jisasollu uuguro'mwonyodowado tonol Moosesolluro loowo tovi dolago tomuuda'ai me'no birolo'nugolokwodowado tonolluno kamwoga aullanekuuworoporogano. A'mwo su tooro, nevu Jisasolluro a'mwo abolo tonollu Moosesolluro loowo tovi dolago tomuu aki aiko te kuulomonekumwallo'mo winodupudorogano.

⁵ Toro kuvi kuruv nevno'gwowi kemino aro kuudo saikuurowonogano. Oo Krais Jisasolluno kuuguudo sugudo su tov kevnokwe tonyuro ato tovi neya uubweyano. Toro kuubweya'ji ton Jisasolluno nebaikuuguudo su tovi yiunokuudo neya uumjungovla'mwalpinogano. Nevu kemino su toro kuudo yaikuu'no sumawoneyokwe a'mwo kuunanokwe su tooravuro yogalo dodopure tonyu yiuno puga'nodo kuruv kaduko mwiyowonogano.

⁶ Su toro ino sumawoneyokwe a'mwo aguto su'bwo'nomwalowo su tooraida'ai pworo Jisasolluro mollu'bwoto go'no go'nodo tobuurai yovo agutokwe kwimo'nyajuporogano. Su toro tooro moro kuuguudo amoruudomollajo tovi muunyu toru kevnokweravuro kuuguudo pugai'aro ku'nono madanubweyajuporogano. Toro kworo kuruv moro kuuguudo tovino ilaiyo to'no subwosunyajuporogano. A'mwo aguto su tooraino Jisasolluro a'mwo abolo pun yovo aguto kwiyajupogano. Toro kuvi kuruv nuvnokwenyuro kuudo tovino'gwowi yovo agutokwerodeyo oo yovo nonagutorodeyo yiuwi'nokai tooraino aval'no kuudo yaullokwenyugono. Kevu kuudo jaullulo. Gooti tool yiuno a'mwo pwolluro yovo aguto tovi'aro kinamjowo'ji aro muudonekono. “Oo guu moro kuu'dello kuunodo nyumo'nodumdekugono.” Muudonekono. Su toro to'busuko kubalno nuu a'mwo yovo maiyokwe toorogai'aro yovokwe toorogai'aro yiuwi'nokai tooraino aval'no kuudo yaullokwenyugono.

⁷ Toro te a'mwo aguto su tooro moro kuuguudo amoruudomollajo tovi muunyu toru kevnokweravuro kuuguudo pugai'aro madanubweyajuporogano. Toro kworo kuruv aro kuudo saullajuporogano. Oo Gooti tool Juu a'mwo abolo tonyu kuuguudo sugudo tokwe moruudomollo'moneyokwe tov Pitallu ajesokaikono. Toro to'busuko kubalno Poololluno'gwowi a'mwo abolo Juu miyawosunodupudo tonyu kuuguudo sugudo tokwe moruudomollo'moneyokwe tov Gooti tool kwollu me'no kuubweyokaikono. Su toro kuudo me'no saullajuporogano.

⁸ Neya duu'nyulo. Gooti tool Pitallu jurogudo uubweyoduke tokwe Juu a'mwo abolo tonyu kuurotokwe womdo tov wiyodowodekono. Su toro to'busuko kubalno nuu kwonyu kuruv kuurotokwe womdo tov aval'no mujumovla'dumdonyugono. Toro toonyu Gooti avalo su toolluro jurogudo nubweyoduke tokwe a'mwo abolo Juu miyawosunodupudo togai to'gwowi kuurotokwe womdo mujumovla'dumdonyugono.

⁹ Aki Jemseke Pitaike Jooneke tooro Jisasolluro mollu'bwoto tovuro anyutuko toorobusuko imo'nodupudo su to kworo kuruv mino aro kuudo sanuuroporogano. Oo Gooti tool Poolollu yasuwa'wino sugumaluko tov uubweyoduke tovida'ai womdo yodowodoldeyo. Kuudo sanuuroporogano. Toro kuudo yanuu'no sumaveyokwe a'mwo su tooro nuuge'aro Banabaseke'aro toonallu ato amonakubwo'noporogano. Ato amonakubwo'nopo su tov aro tovino anakuduuwallopokwono. Oo nevuge'aro kev toorakike'aro yiuwi'nokai toonol avaiwomdo yodowadonogano. Toro tovino anakuduuwallopokwono. Ato me'no bwo'nyuno sumawoneyokwe aro anakudoporogano. “Ilaiyokwonoo. Kevu a'mwo abolo Juu miyawosunodupudo tonyomno plavo'bullu kuuguudo sugudo tokwe nokwo moruudomollumwalbullunorakikono. Kevu su toro moruudomollodo'bule toga nevno'gwowi Juu a'mwo abolo tonyomno plavowa'ji kuuguudo sugudo tokwe kuuno moruudomollumwalanonogano.”

¹⁰ Toro nakujuno sumaveyokwe nami donakumul'mwojo'moneyokwe yogalo yiuno puru'mono aro anakudoporogano. “Kevu a'mwo abolo apoo'nyaiyo tobuurai wiyo'mwojo'moneyokwe tovino kuudo nyallulo'gwonmwalbullo.” Yogalo adonakumul'mwojopo su tovi nuu kuvinono uumjungelabiyo'moneyokwe guureji me'no amjumovlaiyajonyugono.

Poolol Pitallu yogalo amojurugoloka tovinokwono

¹¹ Toro kuvi kuruv lukomgu Pital wagwolago Antiyook toru bino sumaiyokwe pasudo kaiya'nodo puruv sokaikono. Toro soka tovino tov nuu gamoro sumdomago tovi kuu'maiyo toru'no yogalo amojurugolonyugono.

¹² Gamoro kaiya'no pasudo soka su tov arokwono. Pital muudu'no Antiyook toru abai'movoka toga a'mwo abolo Juu miyawosunodupudo Jisasolluro a'mwo abolo tobuurogai wosamujuko anomwallajukekono. Toro kuvi kuruv lukomgu Jemsolluro a'mwo amoropiyaboka pworo me'no abai'movopo toga'no'gwowi Pital a'mwo abolo Juu miyawosunodupudo su tobuurogai manyu toru'aro yeru'mdeyapinyuno sumaiyokwe aki aiko te wosamujuko maulonomwallajukekono. Pital a'mwo abai'movopo su tooraino luko soka tovino tov kuunano pasudo su tov sokaikono. A'mwo abopo su tooro aro kuudo tovi guureji gudupola'dupudorogano. Juu miyawosunodupudo tooro Jisasolluno kuudo kuubwepi toga kemi lakulkulako tonyu neya ado'nupuro. Su toro tovi guureji gudupola'dupudorogano. A'mwo su toro tooraino Pital luko ino sumaiyokwe kuunano pasudo su tov sokaikono.

¹³ Aki Pitalluro kuunano pasudo soka su tov wagwolago Antiyookda'ai Jisasolluro a'mwo abolo Juu kun kuruv uumjunyuno sumaveyokwe aval'no sajupogano. Aki kuunano pasudo su tov Banabas kwollu kuruv ki'nomaro'no aval'no sajukekono.

¹⁴ Toro te a'mwo abolo su tonyuro kuunano pasudo yodopure su tovi wonyuno sumoneyokwe nuu aro kuudo sauronyugono. Oo kemoro pasudo sadokwopo su tov Jisasolluno kuuguudo sugudo nebal'nodo su tovi suvlo to'busuko julomaveku'mwakovo. Su toro kuudo yau'no sumoneyokwe Jisasolluro a'mwo abolo kuunano pasudo sajupo su ton muugona'dopure toru nuu Pitallu yogalo aro amojurugolonyugono. “Guu Juu a'mwo kweku kuruv Juu miyawosunodupudo toorobusuko yomjomwekovla'mdumdekugono. Toro tovino tov a'mwo Juu miyawosunodupudo toorai Juu toorobusuko neya imo'nyo'moneyokwe guu nodumuurolo'mwalbiyo.” Toro amojurugolonyugono.

A'mwo pwol Jisasolluno kuudo kuubweyo'ji tovi'aro Gooti toolluro sumdo tovi sugudo wimo'nodowodo tovinokwono

¹⁵ Nuuge'aro kevuge'aro nevu yiuwi'nokai Juu tonol nemi nellunum kwolabolo tonyuro yonekuuwosungelabodopure tovida'ai imo'nodowadonogano. Toro tonolluno tov a'mwo abolo Juu miyawosunodupudo tonbusuko mimo'nodowadonogano. A'mwo abolo su tobuuraino nevu aro dodowadonogano. “Moosesolluro loowo maiyo imo'nugelabodupudo su ton ma'no ma'no yomjomwekelabodupudogano.” Nevu Juu tonol su toro dodowadonogano.

¹⁶ Toro kuvi kuruv nevu Jisasolluro a'mwo abolo tonolno'gwowi aro kuudo me'no youroma'dowadonogano. A'mwo pwol Moosesolluro loowo tovi kuumjuno'ji tovi'aro Gooti toolluro sumdo tovi sugudo ku'nono mwimo'nonekono. Toro kuvi kuruv yiuno Jisas Kraisolluno kuudo kuubweyo'ji su tovi'aro to'gwowi Gooti toolluro sumdo tovi sugudo kuvinono wimo'nonekono. Su toro tovino tov nevu Juu kunol kuruv Krais Jisasolluno kuudo me'no uubweyodowadonogano. Nemoro kuudo uubweyodowado su tov aro tovinokwono. A'mwo pwolnodo kwol kuruv Moosesolluro loowo kuumjuno'ji tovi'aro Gooti toolluro sumdo tovi sugudo ku'nono mwimo'nonekono. Su toro tovino tov ne kunol kuruv Moosesolluro loowo tovi kuumjuna'ji tovi'aro Gooti toolluro sumdo tovi sugudo mwimo'nanonogano. Toro kunol kuruv yiuno Krais toolluno kuudo kuubweya'ji tovi'aro to'no Gooti toolluro sumdo tovi sugudo wimo'nanonogano.

¹⁷ Nevu Juu punol Gooti toolluro sumdo tovi sugudo wimo'nyo'moneyokwe tov yiuno Krais toolluno to'no uuguro'mwonyowadonogano. Toro uuguro'mwonyodowado tonolluno Juu pworo aro dodupudogano. “Oo a'mwo abolo loowo tovi molluduvolodupudo su ton ma'no ma'nodokwe imo'nodupudogano.” Toro dodupudo tovino Krais toolluno kaiya'no kuudo aro nyaupiyo. Oo a'mwo abolo su ton ma'no ma'no pasudo tovi yogapureyokwe Krais tool sobanyo bwolomolloda'mdowodekono. Kuudo nyaupiyo. Krais toolluno su toro kuudo saupi tov kaiya'no kuunodokwono. Kuudo neya jaullulo. Krais tool kaiya'no pasudo tovi sobanyo ku'nono mamolloda'mdowodekono.

¹⁸ Neya duu'nyulo. Nuu Moosesolluro loowo tonyu uumjunyo'mo pasudo tovi me'no molluduvolodumdonyugono. Toro kwonyu kuruv lukomgu loowo su tonyu uumjunyo'mo pasudo tovi aki aiko te amoduka'bwo'mi to'gwowi nuvnokwe toonyuno aro wuuduuwallunumonyugono. Oo nuu ma'no ma'nodokwenyugono. Wuuduuwallunumonyugono.

¹⁹ Neya duu'nyulo. Sumdomgu nuu loowo tovuro puuto tovi kuumjungovlaiyajo tovi'aro loowo su tovuro sumdo tovi a'mwo me'no abollungiko pwolbusuko kwimo'nyajonyugono. Su tov aro tovino'mokwono. Nuu Gooti toolluro sumdo tovi aiyo wimo'nyo'moneyokwe toonyu loowo su tovi a'mwo me'no abollungiko pwolbusuko kwimo'nyajonyugono.

²⁰ Toro te Krais toollu i'noguropte tovi amovoromiyoguroptowosopo toga nuu kweke me'no abolonyugono. Aki toro toonyu Krais toollu'aro aiyo mujomwekovla'mdumdonyugono. Toro te moro aiyo mujomwekovla'mdumdo tov nuvnokwenyuro'maiyo. Toro kuvi kuruv Krais toolno'gwowi moro poowokalago tovi aiyo kuulonumwalodowodo su toolluro aiyo tovida'ai mujomwekovla'mdumdonyugono. Aki aga nuu kulako akakwe mwalodumdo kwonyu kuruv moro aiyo to'gwowi Gooti toolluro Kwolaiyo toolluno kuudo uubweyodumdo tovi'aro mujomwekovla'mdumdonyugono. Kwolaiyo su tool mino kalo buuropino winodowodo tovida'ai mi nyo'mwojo'mo amorubwenokaikono.

²¹ Toro tovino tov nuu Gooti toolluro yasuwa'wino sugumaluko su tovi mamolluduvolmonyugono. Su tov aro tovinokwono. A'mwo abolo ton Moosesolluro loowo tovi'aro Gooti toolluro sumdo tovi sugudo kuvinono wimo'nyo'mo'mno'juki Krais toolluro aboloka tov yasuwa'no to'no imo'numwalonokwono.