Filipai 3 - Gooti Toolluro Yogalokwono

Yiuno Krais toollu kuudo kuubwepi tovi'aro Gooti toolluro sumdo tovi sugudo wimo'nodupudo tovinokwono

¹ Miyobuuravoo, nuu yogalo aiyowo'mo pun ikudumo'mokwono. Kevu Aguto toollu me'no uuguro'mwonyodupudo togaikulluno tov ilaiyo to'no neya jogaulo. Nuu yogalo aval'nodo akan kemi aki aiko te yokwollekwopiyabiyo'mo tovino burawo manyunyokwenyugono. Aki yogalo su ton sokwollekwopiyami tov kemi yellukuromollekumwallo'moneyokweyogano.

² Kemi akuuto toruda'ai a'mwo kirovanyuvanyu tooraino kevu wako neya dou'nogaulo. A'mwo su tooro kuullujuluko toorobusukorogano. Toro tooro kwa'mgu kulako tovi kaiyako mollugolameyo'mo aro dumuurolo'mdupudorogano. “Kevu Gooti toolluro a'mwo kuunodo wimo'nyo'mo tov lakulkulako ton neya dodo'nogaulo.” Dumuurolo'mdupudorogano.

³ Lakulkulako do'nodupudo pasudo su tov aguto'maiyo. Toro kuvi kuruv Krais Jisasolluro womdo sopiyoka su to'gwowi agutokwono. Lakulkulako ado'nupi toga kulako pwekwo modovodukwopiyodupudorogano. Su toro to'busuko kubalno Gooti tool nemoro kuudo uumdo toorai amodovonekudukwopiyokaikono. Su toro tovino tov nevnokwenolluro kwa'mgu kulako tovuro jurogudo tovino mavorugwo'mo'na'dowadonogano. Toro kunol kuruv Gooti toolluro Kuullo tool jurogudo nekubweyodowo'jure su tovino'gwowi guureji porugwo'mo'na'dowadonogano. Toro tonol Kuullo su toollu'aro Gooti toolluno ilomodomoropiyodowadonogano. Aki Krais Jisasolluno yovo kuruv ilomodomoropiyodowadonogano.

⁴ Neya duu'nyulo. Nevnokwenolluro kwa'mgu kulako tov nokwo nonekullo'mwojo'mo'mno'juki nuu moro kulako tovuro jurogudo tovino nokwo avorugwo'mo'naro'mujukonyugono. Toro te a'mwo pwol gavnokweyolluro kulako tovuro jurogudo tovino porugwo'mo'naronekono. Toro porugwo'mo'nallo'mo kavlo puruv kurukweyo'mno'juki nuu kwonyu kuruv moro kulako tovino porugwo'mo'nallo'moneyokwe kavlo bwotonyago ton kurukweyonyugono. Moro kavlo su ton a'mwo pworavuro kavlo punyu nokwo kuuwolovopujukogano.

⁵ Neya duu'nyulo. Mi nyuneyago tov sonumaroka toga 7-pela iruko tobuul me'no bawino sumaveyokwe iruko 8 tollugwoji moro lakulkulako tov amanyudovopokwono. Nuu Isuraiyolda'ai a'mwo abolo kuunodo tonyuro sanuwosunoponyugono. Toro toonyu Bejamenolluro iko tovasuda'ai abonyugono. Aki toro toonyu Hibruu a'mwo kuunodo pwonyugono. Aki Moosesolluro loowo tovi uumjunyo'moneyokwe tovino nuu Farasi pwonyugono.

⁶ Aki toro toonyu Gooti toolluro womdo tovi guureji wimovlaiyo'moneyokwe anyunyajuko tovino tov Jisasolluro mollu'bwoto tobuurai kaiyako bwotonyo sugollajonyugono. Aki a'mwo idopto'nodo imo'nyo'moneyokwe anyunyajuko tovino tov Moosesolluro loowo tonyu kuumjunyajonyugono. Toro toonyu a'mwo kaiya'nodomaiyokwe sumo'nyajonyugono.

⁷ Muudu'nodo toga nuu su toro tonyuno aro kuudo saullajonyugono. Oo yiuwi'nokai su ton mi nokwo nonyo'mwojupinogano. Su toro kuudo saullajo kuvi kuruv aga Krais toollu uumjunodumdo toonyuno'gwowi aro kuudo yau'dumdonyugono. Oo moro yiuwi'nokai sumdomguda'ai pasudo su tooro ku'nono manyo'mwojo'mno yasuwa'no to'no sovlavoporodeyo. Kuudo yau'dumdonyugono.

⁸ Nebalokwono. Yiuwi'nokai kwako akavida'ai ton aguto manyumo'nodupudogano. Nuu mi Aguto Krais Jisasolluno kuudo youroma'dumdo su to'gwowi aguto kuunodo nyumo'nodowodokwono. Toro toonyu Krais toollu uumjunyo'mo nyunodowodo tovino tov yiuwi'nokai kwako akavida'ai tonyu wuugollu'mo'mdumdonyugono. Aki aga'no'gwowi noonyumwonyu kwako akavida'ai su ton yaiyo tonbusuko nyumo'nodupudo tonyuno tov yiuno biyolsumdo to'no uu'mwojodumdonyugono. Su tov aro tovinokwono. Nuu Krais toollu guureji gudupolallo'moneyokwe to'no nyunodowodonyugono.

⁹ Aki Krais toollu yiuno'no uuguro'mwonyo'moneyokwe to'nodonyugono. Toro te nuvnokwe toonyu Moosesolluro loowo tovi'aro Gooti toolluro sumdo tovi sugudo wimo'nodumdonyumaiyo. Toro kuvi kuruv nuu Krais toollu kuudo kuubweyo tovi'aro Gooti toolluro sumdo tovi sugudo wimo'nodumdonyugono. Kuudo neya jaullulo. Yiuno Krais toolluno kuudo uubweyodowa'jure tovida'ai to'no nevu Gooti toolluro sumdo tovi sugudo wimo'nodowadonogano.

¹⁰ Toro te nuu Krais toolluno kuudo youromallo'moneyokwe nyunodowodonyugono. Aki jurogudo puvino kuudo youromallo'mo nyunodowodonyugono. Jurogudo su tov Krais toollu aiyo aiko te me'no amodukavokakwono. Aki Krais toolluro tagunyo amallajuko to'busuko kubalno nuu kwonyu kuruv tagunyo aval'nodo ton mallo'mo nyunodowodonyugono. Aki Krais tool aboloka to'busuko kubalno nuu kwonyu kuruv aval'no bollo'mo nyunodowodonyugono.

¹¹ Su tovino aro kuudo yau'dumdonyugono. Nuu abolmi kuruv Gooti tool lukomgu aiyo aiko te nomonyudukawononyugono. Su toro kuudo yau'dumdonyugono.

A'mwo pwol resis tovi kano kano plavowo'ji gami kuuwolowo'ji tovuro mubiyo tov ma'dowodo tovinokwono

¹² Nuu aro maikujokwenyugono. “Oo nuu Krais toolbusuko yiunokuudo me'no imo'nopiyodumdonyugono. Aki nuu jurogudo yiunokuudo me'no gullopiyodumdonyugono.” Nuu su toro maikujokwenyugono. Toro kwonyu kuruv muudu'nodo toga Krais Jisasol gavnokweyollu kuunodo wimo'nyo'moneyokwe mi me'no anumarokaikono. Toro anumaroka su toolbusuko nuu jurogudo imo'nyo'mo tovino guurejuno movomjai'nodumdonyugono.

¹³ Mi avalobuuravoo, nuu aro kuudo sau'mwakonyugono. Nuu Krais toolluro pasudo ton yiunokuudo yere mamoropimwakono. Toro kwonyu kuruv moro yiuwi'nokai sumdomguda'ai somjomwekovlaiyajo tonyuno aki aiko te gunyubwosumdo miyodumdonyugono. Toro kwonyu kuruv yiuwi'nokai lukomgu noma'mo tonyuno'gwowi nuu muugonaro'mi nomallo'moneyokwe kano kano pla'mdumdonyugono.

¹⁴ A'mwo pwol resis tovi kano kano plavowo'ji aiyowo'mo tomuu ai'mowo'ji toga gami kuuwolovowo'ji tovino mubiyo tov ma'dowodekono. Su toro to'busuko kubalno nuu muunyu kai'muuda'ai mubiyo tovi yere mallo'moneyokwe womdo guureji yomjumovla'mwalmonyugono. Muunyu kai'muuda'ai mubiyo su tov arokwono. Nevu gavuge ilomwallo'moneyokwe tov Gooti tool Krais Jisasollu'aro nemi donekuma'dowodekono. Mubiyo su tovi yere mallo'moneyokwe nuu guurejuno movomjai'numwalmonyugono.

¹⁵ Kevu pugaikul Gooti toolluro Kuullo toolluro yogullumwojekwapiyoduke tovida'ai aguto me'no imo'nodupudogaikikono. Kevu su toro imo'nodupudo togaikul nuuge avaikuudo neya jaurogaulo. Toro kuvi kuruv pugaikul avaikuudo miyaupi to'gwowi lukomgu Gooti tool kemoro kuudo kaiya'nodo tovi nomollaikudo'mowonekono.

¹⁶ Neya duu'nyulo. Nevu Krais toolluro sugupasudo punyu me'no yomjomwekovla'mdowadonogano. Pasudo su tonyu guureji neya gudupola'mwalanonogano.

¹⁷ Mi avalobuuravoo, kevu moro pasudo yomjumovla'mdumdo tonyu neya duumjunogaulo. Aki a'mwo pworo nemi anekumjunpi su tooravuro pasudo yomjomwekovla'mdopure kunyu kuruv kevu po'dogalo neya denomarogaulo.

¹⁸ Kevu kuudo neya jaullulo. A'mwo bwotonyago tooro kevnokweravuro pasudo tovi'aro kuu'maiyo toru'no wuuduuwallunodupudorogano. A'mwo su tooro Krais toolluro i'noguropte tovi aboloka tovino kuuguudo su tovi ikomago wimo'nugovla'mdupudorogano. A'mwo su toro tooraino nuu go'no go'nodo toga me'no adekudapiyajonyugono. Toro toonyu aga kuga kuruv moro kumdaluko tov bwoloduke tokwe kemi kuuno adekudapiyadokwono.

¹⁹ A'mwo su tooro kevnokweravuro kulako tonyuro ilaiyo igollunyo'mo pasudo toorai uumjungovla'mdupudorogano. Pasudo su tooro kemi gooti toorobusuko wimo'nodupudorogano. Aki kemoro wogulo'mo pasudo tooraino ilaiyo bwotonyo yodupudorogano. Aki a'mwo su tooro kemoro kuudo toorogai noonyumwonyu kwako akavida'ai tonyuno to'no porugwo'mo'na'dupudorogano. Aiyowo'mo toga a'mwo su tooro kaiyako yiunokuudo nyu'nopipinorogano.

²⁰ Toro kuvi kuruv nevno'gwowi Gooti toolluro ago muunyu kai'muu me'no sulomwallunguuwo tonolbusuko imo'nodowadonogano. Toro tonol muunyu kai'muuda'ai wolonekumorabwono toolluno sogwollo to'no kinodowadonogano. Sogwollo kinodowado su tool nemi ma'no ma'nodo tovuro kirumwallo tovida'ai bomollurolovonekumokalokwiyokwe Aguto Jisas Kraisol kwekono.

²¹ Krais su tool gavnokweyolluro jurogudo tokwe yiuwi'nokai noonyumwonyu tonyu gami dolago tomuu me'no bomorosodowodekono. Aki gamoro jurogudo su tokwe nemoro kulako wollainyo tobuurai judo pumgu'aro mollumo'nanekubweyowo'ji gavnokweyolluro kulako jurogudo to'busuko nomoropiyanonogano.