Filemoon 1 - Gooti Toolluro Yogalokwono

Poololluro yogalo muudu'no kuudoka tovinokwono

¹ Mino yovo tov Poololonyugono. Toro toonyu Krais Jisasollu uumjunodumdo tovino tov wuulo killo'mo ago tovi kuule'na'dumdonyugono. Aki nemi nellugwai'yago pwolbusuko nonyumo'nodowodo toolluno yovo tov Timootiyolekono. A'mwo su tooke'aro nuu kwonyuge'aro toonal guu Filemoonekujuno kalo buuropino nakullunodowo pas akav sokwollogwopiyamawolo. Guu navuge avaiwomdo yodumdekugono.

² Aki pas akav nami nallo'mwo to'busuko imo'nodowodo Apiyakwe'aro aki a'mwo Arkiposeke'aro tovakullomno sokwollekwopiyamawolo. Arkiposol navubusuko Krais toolluro mollurogudo pwolbusuko imo'nodowodekono. Aki yiuwi'nokai Jisasolluro mollu'bwoto tovida'ai a'mwo abolo gumoro ago tovi i'bwo'nodupudo kubuuraino kuruv pas akav sokwollekwopiyamawolo.

³ Toro tobuurekullu aro adekwopiyamawolo. Nemi Nellunumiyago Gooti tooke'aro Aguto Jisas Kraiseke'aro tooral yasuwa'wino sugumaluko tov kemi nokwo ikubwemwalbullunorakono. Aki kevu sumwoluko kavo wosunmwalpino'moneyokwe kuruv kemi nokwo ikubwemwalbullunorakono.

Poolol Filemoonolluro pasudo tovino ilaiyo kwinoka tovinokwono

⁴ Yiuwi'nokai toga Gooti tool gumi agujo'mwojogawoneyokwe tovino subusu'nyogalo wuudodumdonyugono. Aki su toro wuudodumdo toga mi Gooti toollu gumino, “Nenyoo,” wuudodumdonyugono.

⁵ Numoro, “Nenyoo,” wuudodumdo su tov kavlo aro tovallunokwono. Muudu'nodo tov guu Aguto Jisasolluno kuudo uubweyodore tovino nuvu me'no wuu'nodumdonyugono. Aki puruv guu Gooti toolluro yiuwi'nokai a'mwo abolo tobuuraino kalo buuropino mollodumdekugono. Kavlo su toro tovalluno nuvu Gooti toollu, “Nenyoo,” wuudodumdonyugono.

⁶ Guu Krais toolluno kuudo uubweyodumdo tovino a'mwo abolo punyu moruudodumdekugono. Toro tookujuno subusu'nyogalo aro wuudodumdonyugono. “Oo yiuwi'nokai Krais toolluro noonyumwonyu sugudo nekubweyodowodo tonyuno a'mwo Filemoonol kuudo neya youromarogawono. Su toro souromaro'ji su tokwe Krais toolluno kuudo uubweyodowodo tovi'aro womdo bwotonyo nokwo momjumovla'mwalonekono.” Nuu gumino subusu'nyogalo su toro wuudodumdonyugono.

⁷ Guu mi nyugwai'yago tookubusuko nonyumo'nodumdo tookujuro kalo buuropino gujunodowodo tovino ilaiyo bwotonyo yodumdonyugono. Aki guu Jisasolluro a'mwo abolo tobuuraino kalo buuropino gujunodowodo su tov mi jurogudo danyumwojodowodokwono. Aro tovinokwono. Gumoro pasudo yodore tovino tov Gooti toolluro a'mwo abolo tobuuravuro poowokalago tonyu paiko ibwosunodupudogano.

Filemoonol Oonesimosollu ilaiyo neya amollomaroneyokwe tovino Poolol yogalo pun adumul'mwojoka tovinokwono

⁸ Nuvu Krais toollu uuguro'mwonyodumdonyugono. Toro uuguro'mwonyodumdo toonyuro yogalo tovi guu neya uumjunbino'moneyokwe guureji nokwo adagumuurolovo'mujukonyugono.

⁹ Toro kuvi kuruv nuu guureji dagumuuroleyo'mo manyunadopiyo. Nuu gumino kalo buuropino nyunodowodo tovida'ai to'gwowi yiuno gudoganyo'mo to'no anyunadopiyo. Nuu Poolonyu yadaiyo imo'nodumdonyugono. Aki toro toonyu Krais Jisasollu uumjunodumdo tovino tov wuulo killo'mo ago tovi kuule'na'dumdonyugono.

¹⁰ Toro toonyu a'mwo Oonesimosolluno gudoganumo'monyugono. Oonesimosol moro kwolaiyo kuunodo pwolbusuko nonyumo'nodowodekono. Aro tovinokwono. Nuu wuulo killo'mo ago tovi kuule'na'dumdo toga Krais Jisasolluno kuuguudo sugudo tokwe moruudodumdonyugono. Su toro moruudodore tovida'ai Oonesimosol kuudo kuubweyokaikono. Toro kuubweyoka su toollu nuvu ganumiyago toolbusuko wimo'nodumdonyugono.

¹¹ Nuu a'mwo su toolluno kuudo me'no youroma'dumdekono. Muudu'nodo toga a'mwo su tool guu Filemoonekuji pi'mwono magujo'mwojajukekono. Toro kwol kuruv aga'no'gwowi kuudo me'no kuubwengiko toolluno tov guuge'aro nuuge'aro yiuwi'nokai toonallu nokwo nakullo'mwojumwalonekono.

¹² Toro te a'mwo moro poowokallumdo mollodumdo su toollu gumiyomno aikomgu amogwopiyamono.

¹³ A'mwo su tool nuuge kuuno amwalowo'jujuko'mno'juki nuu ilaiyo so'mujukonyugono. Su tov aro tovinokwono. Oonesimosol amwalowo'jujuko'mno'juki nuu kuuguudo sugudo tokwe moruudodumdo tovida'ai wuulo killo'mo ago tovi kuule'na'do'mure toonyu nonyo'mwojono'moneyokwe gumoro aiko toru nokwo amarowo'jujukekono.

¹⁴ Toro kuvi kuruv aga guu, Yowa'noganoo, yere madodo'bure to'gwowi Oonesimosol ku'nono manyo'mwojumwalonekono. Su tov aro tovinokwono. Guu mi anyo'mwojoneyokwe tovino nuu jurogudo madagumuurolo'monyugono. Toro kuvi kuruv guvnokwe tookujuro ilaiyo gujunodowo'jure tovi uumjuno'bi anyo'mwojubi to'gwowi ilaiyo nyunononyugono.

¹⁵ Sumdomgu Oonesimosol gumi manyu toru me'no agugollu'movokaikono. A'mwo su tool kula'nyo toga'gwo pumuu amwaloka tovino kavlo tov arokwono. A'mwo su tool gumiyomno aikomgu abai'mowo'ji toga guuge yiunokuudo nokwo mujomwekovla'mwalonekono. Kavlo tov su toro'mdukono.

¹⁶ Muudu'nodo toga a'mwo su tool ki'nato womdokwe kuunodo agujumo'nyajukekono. Toro kuvi kuruv aga'no'gwowi a'mwo su tool Aguto Jisasolluno kuudo me'no kuubwengiko tovino tov gumi jugwai'yago toolbusuko gujumo'nodowodekono. Aki toro toolluno kalo buuropino neya agujunogawono. Nuu kwonyu kuruv a'mwo su tool nyugwai'yago toolbusuko nyumo'nodowodo toolluno kalo buuropino nyunodowodonyugono. Toro te a'mwo su tool ki'nato womdokwe yasuwa'nodo pworai uuwolo'mdowodekono. Ki'nato womdokwe yasuwa'nodo pworai uuwolo'mdowodo tov kavlo puruval tovallunokwono. Puruv gamoro kulako tokwe gumoro womdo tovi pi'mwono gujumwalonekono. Aki puruv Aguto Jisasolluno kuudo kuubwengiko tovi'aro gumi jugwai'yago toolbusuko gujumo'numwalonekono. Kavlo su toro tovalluno tov gumoro sumdo tovi Oonesimosol ki'nato womdokwe yasuwa'nodo pworai uuwolo'mdowodo toolbusuko nokwo gujumo'numwalonekono.

¹⁷ Toro te guu mino aro kuudo sau'bi tov, Oo Pooleke avaiwomdo yodowolonaldeyo, kuudo sau'bi tov numi ilaiyo mollonuma'dumdo to'busuko kubalno a'mwo Oonesimosollu aval'no neya domollomarono.

¹⁸ Aki guu Oonesimosolluno aro kuudo sau'bi tov, Oo a'mwo su tool numi kaiya'no me'no sanyugollajukoldeyo, kuudo sau'bi tov gamoro buro'nyo buro'nyo kaiya'no pasudo sagujugollajuko tokwe'aro dinau agujajuko tokwe'aro tonyuno jul'nyo su tov mi donubweyono. Nuvnokwe toonyu gumi po'dogalo nokwo gubimonyugono.

¹⁹ Pas akav nuvnokwe Poolonyuro ato tokwe sokwollogwopiyamono. Toro te nebal'no gudumo'mokwono. Oonesimosolluro dinau agujajuko su ton nuvnokwe toonyu aikomgu nogubimonyugono. Guu aro tovino kuudo neya jaurogawono. Sumdomgu nuvu kuuguudo sugudo tokwe moruudodore tovida'ai guvu wuu'nono guvnokwekujuro poowokalago tov aiyo sumo'nokakwono. Su toro sumo'noka tovino tov guu numi dinau bwotonyo to'gwowi guuwo'dowodekugono. Gumi dinau guuwo'dowodo su tovino nuu kuuguudo bwotonyago gujo'mo manyunadopiyo. Toro kweku kuruv Oonesimosolluro jul'nyo su tovino'gwowi neya domodukwopiyono.

²⁰ Nebalokwono, guu Aguto toollu me'no uuguro'mwonyodumdo tovino tov mi nyugwai'yago tookubusuko nyumo'nodumdekugono. Toro tooku mi neya donyo'mwojogawono. Aki guuge'aro nuuge'aro yiuwi'nokai toonal Krais toollu aval'no me'no uuguro'mwonyodowolonakono. Toro tovino tov guu moro poowokalago tovi jurogudo danyumwojo'moneyokwe moro yogalo akavi neya duumjunono.

²¹ Nuu pas akavi puukwollo yakwollodumdo toga gumino aro kuudo saguu'mwakono. Oo Filemoonol moro yogalo tovi kuvinono uumjunonoldeyo. Aki toro tool moro yogalo tovi uumjunowo'ji Oonesimosollu mollomwallo'moneyokwe pasudo bwotonyago kugai'aro nokwo yonoldeyo. Su toro kuudo saguu'mwakono.

²² Aki nuu aro kuudo sau'mwakonyugono. Nuu gumi iru'mato gujo'mo nyunodowodonyugono. Aki Gooti tool puuto tovi ausosoneyokwe tovino guvu Gooti toollu subusu'nyogalo wuudoganodumdekugono. Toro wuudoganodumdo su tovi Gooti tool kaduko kuvinono nogujonekono. Nuu su toro tovino sogwollo kinodumdonyugono. Toro te nuu guuge iru'mato'moneyokwe ago adovarojungiko puruv neya jovrowosogawono.

Poololluro aiyowo'mo yogalo kuudoka tovinokwono

²³ A'mwo pwolluno yovo tov Epafrosolekono. A'mwo su tool Krais Jisasollu uumjunyokwekono. Toro tool nuvubusuko Krais Jisasollu uumjunoduke su tovida'ai wuulo killo'mo ago avalo tovi kuule'na'dowolonakono. Toro tool gumi, “Ilaiyokwono,” agwopiyamokaikono.

²⁴ Aki Makeke'aro Aristakoseke'aro Demaseke'aro Luukeke'aro tooro nuuge avaiwomdo yodowadorogano. A'mwo su to kworo kuruv gumi, “Ilaiyokwono,” agwopiyamavo.

²⁵ Oo Aguto Jisas Kraisolluro yasuwa'wino sugumaluko tov kemi kuullo tobuurai nokwo ikubwemovla'mwalonekono.