3 Joon 1 - Gooti Toolluro Yogalokwono

Joonolluro yogalo muudu'no kuudoka tovinokwono

¹ Nuu Jisasolluro mollu'bwoto tobuuravuro a'mwono moduvomwallokwenyugono. Mi avalo Gaiyosoloo, nuu gumino kalo buuropino kuunodo nyunodowodo tookujomno pas akav sokwollogwopiyamono.

² Mi ibwoto'nyekwonoo, nuu gumoro yiuwi'nokai mujumovla'bino tonyuno gumi ilaiyo to'no neya gujumo'numwalono'moneyokwe Gooti toollu subusu'nyogalo wuudodumdonyugono. Aki guvnokwekujuro kuullo ilaiyo me'no sumo'nyungiko toolbusuko kubalno gumoro kulako kuruv ilaiyo aval'no neya imo'nogawono. Su toro gujumo'nyo'moneyokwe tovino nuu Gooti toollu subusu'nyogalo wuudodumdonyugono.

³ Neya duu'nono. Jisasolluro a'mwo modomollodupudo pworo miyomno akawai abai'mo'mwa'juporogano. Toro tooro gumino aro adodoluvanubwemwa'juporogano. “Oo a'mwo su tool Gooti toolluro nebal'no yogalo tovi pi'mwono uumjunodowodekono.” Adodoluvanubwemwa'juporogano. Toro te nuu gumino kuuguudo su tovi wuu'nyuno sumoneyokwe aro kuudo souroguma'mwa'jonyugono. “Oo a'mwo su tool nebal'no yogalo tovi kuvinono uumjungovlaiyokweyoldeyo.” Toro kuudo yourogumarono gumino ilaiyo bwotonyo sumwa'jonyugono.

⁴ Toro te nuvu kuuguudo aro tonyu wuu'nyo'mo nyunodowodonyugono. “Oo a'mwo abolo gumoro kwoloraiyo tobuurobusuko gujumo'nodupudo ton Gooti toolluro nebal'no yogalo tovi kuvinono uumjunodupudogano.” Kuuguudo su toro tovi kuu'numi toga nuu ilaiyo bwotonyo yodumdonyugono. Aki moro ilaiyo bwotonyo yodumdo su tov moro yiuwi'nokai ilaiyo punyu muunyu toru'aro uuwolo'mdowodokwono.

Gaiyosolluro womdo sugudo amjumovlaiyajuko tovinokwono

⁵ Mi ibwoto'nyekwonoo, guu Jisasolluro a'mwo modomollokwe toorai wiyo'mwojodumdo tov womdo sugudo to'no yodumdekugono. A'mwo wiyo'mwojodumdo su tooro gumoro ibwoto'nyo magujumo'nodupudorogano. Toro kworai kuruv ilaiyo to'no wiyo'mwojodumdekugono.

⁶ Toro te Jisasolluro a'mwo womdokwe su tooro bai'movo'mno akawaida'ai Jisasolluro a'mwo abolo mollu'bwoto tobuurai gumoro kalo buuropino pasudo tovino kuu'maiyo toru adodolubwemwa'juporogano. Toro te lukomgu kuga kuruv Jisasolluro a'mwo modomollokwe gabovo pworo gumi aboguru'mapi tov a'mwo su tooro nuugollu'meyo'mo yodopure toga guu guureji neya duuwiyo'mwojogawono. Gooti toolluro ilaiyo winodowo'jure tomgu'aro uumjuno'bi a'mwo su tooro novlaiyo'mo yodopure toorai puuto tomuu nokwo iwapimwalbinekugono. Guu su toro kwiyo'mwojubi tov ilaiyo to'no yomjomwekovla'mwalbinekugono.

⁷ A'mwo womdokwe su toorai neya wiyo'mwojumwalbino tovino kavlo tov arokwono. A'mwo su tooro Jisasolluro yovo tovida'ai womdo yo'moneyokwe kemi ago kuunodo tomuu wuugollu'mo'mdupu Jisasolluro kuuguudo tokwe modomollodupudorogano. Toro modomollodupudo toga a'mwo abolo Jisasolluno kuudo muubweyodupudo tonyuro ato tovida'ai noonyumwonyu pun mama'dupudorogano.

⁸ Toro tovino tov nevu Jisasolluro a'mwo abolo tobuuronolno'gwowi a'mwo modomollokwe su toorai sobanyo neya amollodavogawano. Toro amollodawa'ji tov a'mwo su tooro a'mwo abolo punyu Gooti toolluro nebal'no yogalo tokwe yodubwasodopure su toorai avaiwomdokwe tonolbusuko nokwo wimo'numwalanonogano.

Daiyootrofisol kaiya'no pasudo amjumovlaiyajuko tovinokwono

⁹ Nuu gumoro ago towaida'ai Jisasolluro a'mwo abolo mollu'bwoto tonyomno pas puruv me'no sokwollopiyabonyugono. Toro kuvi kuruv a'mwo pwol kisuvolo yodowodekono. Toro toolluno yovo tov, Daiyootrofisolekono. A'mwo su tool yiuwi'nokai Jisasolluro a'mwo abolo tobuurai a'mwo aguto wimo'nyo'mo winyokwekono. A'mwo su tool ilomoropunyu yodawo nevu a'mwo mido mollomwalokwe toonolluro yogalo tovi muu'nyubusuko to'no yokwekono.

¹⁰ Toro te nuu gumoro ago toru abai'mo'mi toga Jisasolluro a'mwo abolo mollu'bwoto tonyu a'mwo su toolluro pasudo yodowodo punyuno kuu'maiyo toru nobomollolupto'naikubwemonyugono. A'mwo su tool a'mwo abolo punyu nemino kaiya'no yogalo toorogai bwolomonekumwogapiyodawodekono. Aki yiuno kaiya'no yogalo tokwe to'no bwolomonekumwogapiyodawodolmaiyo. Toro kwol kuruv Jisasolluro a'mwo modomollokwe toorai ilaiyo mamolloma'dowodekono. Aki a'mwo abolo pun a'mwo modomollokwe su toorai nuuwiyo'mwojupiyokwe aro duumjuku'dowodekono. “Kevu a'mwo modomollokwe su toorai mwiyo'mwojupinono.” Duumjuku'dowodekono. Aki toro tool a'mwo abolo nuuwiyo'mwojodopure tobuurai i'bwo'nyago tovida'ai kwa'mgu tomuu bilomovomjopiyodowodekono.

Demitriyosol sugupasudo amjumovlaiyajuko tovinokwono

¹¹ Mi ibwoto'nyekwonoo, guu a'mwo su toolluro kaiya'no pasudo guduuwallodowo'jure toorai nuumjunmwalbiyo. Toro kuvi kuruv guu sugupasudo tonyuno'gwowi neya duumjungovlavogawono. Aki aro tovino kuudo nyallulo'gwonmwalbiyo. A'mwo sugupasudo mujumovla'mdowodo pwol Gooti toolluda'ai billumo'nodowodekono. Toro kuvi kuruv a'mwo ma'no ma'no kiroungovla'mdowodo pwolno'gwowi Gooti toollu miyouroonomallokwekono.

¹² Toro kuvi kuruv a'mwo gabovo pwolluno yovo tov Demitriyosolekono. A'mwo su toolluno yiuwi'nokai a'mwo abolo ton dodupudogano. “Yiuno sugudo to'nodekono.” Dodupudogano. Aki a'mwo su tool nebal'no yogalo tovi uumjunodowodo toolluno tov ilaiyo to'no youroonodowadekono. Aki nev kwonol kuruv a'mwo su toolluno kuu'maiyo toru aval'no adodoluwosumwakuuwono. “Oo a'mwo su tool sugupasudo to'no mujumovla'mdowodekono.” Adodoluwosumwakuuwono. Aki guu kweku kuruv nemoro dodoluwosodowado tovino aro kuudo youronekuma'dumdekugono. “Oo kemoro kuuguudo dodoluwosodupudo tov yiuno nebal'nodo'mdeyo.” Youronekuma'dumdekugono.

Yogalo aiyowo'mo tovinokwono

¹³ Nuu kuuguudo bwotonyago pugai'aro gumi yokwollogwopiyabiyo'mo anyunadopiyo. Toro kuvi kuruv nuu kuuguudo su ton pas akavi'aro puukwollo yokwollogwopiyabiyo'mo manyunadopiyo.

¹⁴ Nuu wobo toga gumi boguru'mallo'mo tovino sogwollo ainadokwono. Aki nuu kuvinono aboguru'ma'mi toga navu imgu amgu sumdomago tokwe yainyunowosi kuuguudo nokwo dosunonakono.

¹⁵ Oo gumoro sumwoluko tov kavo nokwo wosunmwalbinekugono. Aki akawaida'ai gumoro ibwoto'nyo tobuuro, “Ilaiyokwono,” agwopiyamavo. Aki numoro ibwoto'nyo guuge mwalodupudo tobuurai moro, “Ilaiyokwono,” tov kuuwopiyamono. Toro te guu moro mago tovida'ai mollodavo'bi yiuwi'nokai ibwoto'nyo pwolno puru'monodo tobuurai, “Ilaiyokwono,” duudono.