2 Pita 1 - Gooti Toolluro Yogalokwono

¹ Mino yovo tov Saimoon Pitalonyugono. Toro toonyu Jisas Kraisolluro ki'nato womdo tov yodumdonyugono. Aki gamoro kuurotokwe wimo'nodumdonyugono. Kevu nemoro kuudo uubweyodowado su tollugwoji aval'no uubweyodupudo togaikullu nuu pas akav sokwollekwopiyamono. Nemoro kuudo uubweyodowado su tov nemi Jisas Kraisolluro pasudo idopto'nodo tovi'aro ma'dowadokwono. Jisas Kraisol nemi Gootekono. Aki toro tool nemi ma'no ma'nodo tovuro kirumwallo tovida'ai bomollurolovonekumokalokwodowodo tookono.

² Oo nuu kemino tov aro nyunodowodonyugono. Kevu Gooti tooke'aro nemi Aguto Jisaseke'aro tooralluno kuudo bwotonyo nyouromo'movla'mwalpinogaikikono. Toro souromo'movlapi tovi'aro Gooti tool gamoro yasuwa'wino sugumaluko tokwe'aro sumwoluko kavo wosungovla'mwalpino tokwe'aro kemi guureji nokwo ikubwemwalonekono. Nuu kemino tov su toro nyunodowodonyugono.

Gooti tool gamoro a'mwo abolo kuunodo wimo'nyo'moneyokwe nemi adonekumaroka tovinokwono

³ Krais Jisasol Gootekono. Gooti imo'nodowodo su toolluro jurogudo tov nekullabodowodekono. Jurogudo su tovi'aro gavnokweyolluro sugupasudo tokwe'aro aiyo mujomwekovlaiyo'moneyokwe tokwe'aro toval nemi me'no anekullabokaikono. Nemoro yiuwi'nokai supto yodowado su ton me'no anekullabokaikono. Nevu kwolluno kuudo me'no youroma'dowado tovino tov su toro anekullabokaikono. Aki toro tool gamoro jurogudo bwotonyo tokwe'aro gamoro pasudo sugumaluko tokwe'aro tovake gamiyomno adonekumarokaikono.

⁴ Aki gamoro jurogudo bwotonyo tokwe'aro pasudo sugumaluko tokwe'aro su tovallu'aro gamoro subuu'yamju kuuguudo ton me'no anekullabokaikono. Subuu'yamju kuuguudo su ton ilaiyo noo'nyonmaiyo. Aguto kuunodogano. Kuuguudo su tonyu'aro kemoro kwako akavida'ai kulako tobuuravuro kaiyako i'nyo'moneyokwe pasudo tooraida'ai me'no abirolo'nugolokwopogaikikono. Aki gamoro kuuguudo su tovi'aro Gooti gavnokwe toolluro pasudo idopto'nodo to'busuko kubalno kev kugaikul kuruv pasudo idopto'nodo aval'nodo tovi nokwo mujumovla'mwalpinogaikikono.

⁵ Kavlo su tovino tov kevu Krais Jisasolluno kuudo uubweyodupudo tovi muunyu toru'aro pasudo sugumaluko tonyu mujumovlaiyo'moneyokwe womdo bwotonyo neya jogaulo. Pasudo sugumaluko su tovi muunyu toru'aro kevu Gooti toolluno kuudo purukwe'aro neya jouromarogaulo.

⁶ Aki kemoro Gooti toolluno kuudo youroma'dupudo su tovi muunyu toru'aro kevnokweyogaikulluro kulako tonyu pi'mwono neya domollomwalnogaulo. Aki pi'mwono mollomwalnodupudo su tovi muunyu toru'aro jul'nyo baiki'mo'dowo'jure toga Gooti toollu guureji neya dogudupolarogaulo. Aki Gooti toollu guureji gudupola'dupudo su tovi muunyu toru'aro kevu Gooti gavnokwe toolluro pasudo tonyuno to'no neya jomjomwekovlavogaulo.

⁷ Aki Gooti toolluro pasudo tonyu yomjomwekovla'mdupudo su tovi muunyu toru'aro kevu Jisasolluro a'mwo abolo tobuurai ibwoto'nyo neya jumo'nomollogaulo. Aki pasudo su tovi muunyu toru'aro kevu yiuwi'nokai a'mwo abolo tonyu kalo buuropino neya domollogaulo.

⁸ Kevu yiuwi'nokai pasudo su tonyu kuvinono yopi aki bwotonyo kuuno sumo'nugelapi tov kemoro Aguto Jisas Kraisolluno kuudo youroma'dupudo su tov yasuwa'no mavlawonokwono. Toro kuvi kuruv sulo bwotonyago ki'numwalonokwono.

⁹ Kuudo neya jaullulo. Kevu pugaikulno'gwowi pasudo su tonyuno nonagutokweyogaikuldeyokwe a'mwo sumnowojokwe togaikulbusuko me'no imo'nodupudogaikikono. Toro imo'nodupudo togaikul aro tovino kuudo yallulo'gwonodupudogaikikono. Gooti tool kemoro ma'no ma'no pasudo tonyu me'no amollol'movaikudukwopiyoka tovino kuudo yallulo'gwonodupudogaikikono.

¹⁰ Toro tovino tov mi avalobuuravoo, Gooti tool kevu gamoro a'mwo abolo kuunodo wimo'numwalpino'moneyokwe kemi me'no adekumarokaikono. Toro dekuma'no sumaiyokwe kemi ajaikubweyokaikono. Kemi su toro ajaikubweyoka tovino kuu'maiyo toru wuuduuwallo'moneyokwe tov kevu womdo guureji neya domjumovlavogaulo. Kevu Gooti toolluro pasudo su tonyu kuvinono kuumjungovlapi tov lukomgu mabwolorapinogaikikono.

¹¹ Aki aguto kig Jisas Kraisolluro mido mollomwalo tovi anakuuto tomuu kuulomwallo'moneyokwe kudo'aiko me'no kuusaikubweyodowodekono. Gamoro mido mollomwalo su tov yiunokuudo mujo'movla'mwalonokwono. Toro tovi kuulomwalodopure toga Gooti tool kemino ilaiyo bwotonyo nomollekumaronekono. Krais Jisas su tool nemi Agutekono. Aki toro tool nemi ma'no ma'nodo tovuro kirumwallo tovida'ai bomollurolovonekumokalokwodowodo tookono.

¹² Kevu su toro tovino kuudo me'no youroma'dupudogaikikono. Aki nebal'no yogalo ma'dupudo tovi kuuno agudupola'mwakopo kuvino kuruv kevu kuudo nyallulo'gwonmwalpiyokwe tovino tov nuvu yiuwi'nokai toga jurogudo daikullumwojumwalmonyugono.

¹³ Nuvu moro kulako akakwe kuuno amwalmi toga kemi jurogudo daikullumwojo'mo yogalo tov aki aiko te ikudumwalmonyugono. Su toro ikudumwalmo tovino nuvnokwe toonyu, Ilaiyo'mdeyo, kuudo sau'mwakono.

¹⁴ Aki puruv aro kuudo sau'mwakono. Oo wobo toga moro kwa'mgu kulako tovi nuugollu'mo'monyudeyo. Moro su toro kuudo yau'dumdo tovino nemi Aguto Jisas Kraisol kuu'maiyo me'no anyuduuwallokaikono.

¹⁵ Toro te kevu nebal'no yogalo su tovino kuudo pi'mwono yau'mwalpino'moneyokwe tov nuu yere mabolodo'mure toga kemi jurogudo kuuno daikullumwojumwalmonyugono. Tono tono daikullumwojo'mi nuu me'no abolmi kuga kuruv kevu nebal'no yogalo su tovino kuudo kuuno you'movla'mwalpinogaikikono.

Kuurotokwe tooro Gooti toolluro bako tov Krais toollu'aro pwopiyodowodo tovi me'no kwonopo tovinokwono

¹⁶ Neya duu'nyulo. Nevu nemi Aguto Jisas Kraisol gamoro jurogudo bwotonyo kuunodo tovuro bako tokwe aikomgu nobwono tovino nevu me'no sodekubwasowonogano. Toro sodekubwasowo toga nevu jupweyo kuuguudo pugai miyodekubwasajuwonogano. Toro kuvi kuruv Aguto Jisas Kraisolluro jurogudo bwotonyo tovuro bako su tollugwoji nevnokwenolluro sumdo togai me'no wonyuno sumawoneyokwe sodekubwasajuwonogano.

¹⁷ Aki gami Ganumiyago Gooti tool gami Kwolaiyo su toolluno yovo aguto wiyo'no sulomoropiyokaikono. Aki Aguto Kig Kuunodo toolluro jurogudo tovida'ai bako bwotonyo tovi anakuuto tomuuda'ai gamoro yogaimaguurai tov aro alokabokakwono. “Akal moro Kwolaiyo kalo buuropino nyunodowodo tookono. Toro toolluno ilaiyo kuunodo anyunumaiyoo.” Alokabokakwono.

¹⁸ Krais tool Gooti toolluro muumuudo toollu muunyu toru mwaloduke toga nevu kweke amwalowonogano. Toro tovino tov Gooti toolluro ago muunyu kai'muuda'ai yogaimaguurai su tov lokaboduke tovi nevnokwe toonol kuu'nowokwono.

¹⁹ Toro te proofet tooravuro yogalo ajakwollajupo tovino nevu kuudo noullo maullo miyaullokwenogano. Toro kuvi kuruv nevu, Oo nebalo'mdeyo, guureji to'no yau'dowadonogano. Proofet tooravuro yogalo amoruujajupo su tov dugumdo tomuuda'ai lamwo tovuro bako pwopiyowodo to'busukokwono. Bako su tov lomwo iru'mago tov yere millourosodowo'jure toga kuuno pwopimwalonokwono. Su toro to'busuko kubalno Krais tool lomwo iru'mago togasuro sulludo kabwo tollugwobusuko imo'nodowodekono. Toro tool iruko tollugwoji kuu'maiyo toru bowo'ji pwopiyodowo'jure toga kemoro poowokalago kuunodo togai noonpinekono. Toro tovino tov kevu proofet su tooravuro yogalo tovi pi'mwono neya duumjunogaulo.

²⁰ Kuudo aguto kuunodo puvino sumdomgu kuudo neya jouromarogaulo. Kuudo aguto su tov arokwono. Gooti toolluro yogalo sakwollungiko tovino mollajo'moneyokwe tov proofet pwol gavnokweyolluro kuudo tovida'ai to'no mamollajajukekono.

²¹ Aki proofet su tooravuro yogalo puru'monodo kuruv kevnokwe tooravuro kuudo tonyuda'ai amollajajuporomaiyo. Toro kworo kuruv yiuno Gooti toolluro Kuullo tool proofet su toorai amollubworomokavlaiyajukekono. Toro mollubworomokavla'mduke tovi proofet su tooro uumjunodupu Gooti toolluro yogalo tokwe to'no amollajajuporogano.