1 Timooti 5 - Gooti Toolluro Yogalokwono

Timootiyol Jisasolluro a'mwo abolo tonyu gami julkwolaiyo kuunodo tonyubusuko neya dumul'mwojumwalono'moneyokwe tovinokwono

¹ Guu a'mwono toorai yogalo nomojurugolmwalbiyo. Toro kweku kuruv guvnokwekujuro junumiyago kuunodo toollu dumul'mwojodumdo to'busuko kubalno a'mwono su toorai aval'no neya dodumul'mwojogawono. Aki a'mwo muugunyo kworai kuruv gumi jugwai'yago kuunodo toorai dumul'mwojodumdo to'busuko kubalno aval'no neya dodumul'mwojogawono.

² Aki abewalo tonyu guvnokwekujuro juneyago tovi dumul'mwojodumdo to'busuko kubalno abewalo su tonyu aval'no neya dodumul'mwojogawono. Aki abolo sujuraiyo kunyu kuruv gumi jo'mwo kuunodo tonyu dumul'mwojodumdo to'busuko kubalno aval'no neya dodumul'mwojogawono. Aki sujuraiyo su tonyu Gooti toolluro sumdo tovi kaiyako nomollugolamo'biyokwe guvu ilaiyo to'no neya jugolmovlavogawono.

Abekanyo tobuurai mollomwallo'moneyokwe tovinokwono

³ Abekanyo pubuuro a'mwo nomollomwallo'moneyokwe puru'monodo kuruv nonaguto'mdeyokwe kanyu kuunodobuurogano. Abekanyo su tobuurai kevu neya domollomwalogawono.

⁴ Toro kuvi kuruv abekanyo pubuul gami kwoloraiyodeyo oo kwikweyagodeyo pun kurukweyo'mdeyokwe su ton yere nuuwiyo'mwojubiyo. Aro tovinokwono. Nomollomwallo'moneyokwe womdo su tov Gooti tool kemi kwoloraiyodeyo oo kwikweyagodeyo tonyu me'no kuubwengikokwono. Sumdomgu kanyo su tobuulluro womdo bwotonyo me'no kwimelabiyajuko tonyuno aki aiko te uubiyo'moneyokwe kwoloraiyo su ton kemi kanyo su tobuullu neya wiyo'mwojumwalpinogano. Kanyo su tobuullu toro amollomwalpi tov Gooti kwolluda'ai ilaiyo igolpinogano.

⁵ Aki abekanyo pubuullu a'mwo pwolnodo kwol kuruv mamollomwalo'ji to'gwowi Gooti toolluno to'no sogwollo kinmwalonokwono. Aki yiuwi'nokai surakuuto togake'aro iruko togake'aro toga Gooti toollu deko wuudoganowo'ji subusu'nyogalo wuudumovla'mwalonokwono. Su tov mimwogapimwalonokwono. Abekanyo su tobuul kanyo kuunodokwono.

⁶ Toro kuvi kuruv abekanyo puru'gwowi yiuno gami kulako tovuro ilaiyo winodowo'jure tovi uumjunonokwono. Toro kuumjuno'ji su tovuro kwa'mgu kulako tov aiyo mwalowo'ji kuvi kuruv poowokalago to'gwowi me'no abollungiko to'busuko imo'nonokwono.

⁷ Toro te a'mwo abolo pun kevu Jisasolluro mollu'bwoto togaikullu kaiya'no yogalo nobwolomekumwogapiyapiyokwe tov guu yogalo akagai guureji neya doduwiyogawono.

⁸ Neya duu'nyulo. Jisasolluro a'mwo pwol gavuge avaimujako tonyu neya mollomwalmwalonekono. Aki toro tool gami julkwolaiyo tonyu mollomwallo'mo tov aguto kuunodokwono. Toro kuvi kuruv a'mwo pwol gami avalo su tonyu po'dogalo mamollomwalo'ji to'gwowi gamoro Jisasolluno kuudo me'no kuubwengiko tovi kisuvolo wiyonekono. Aki a'mwo abolo Jisasolluno kuudo muubweyodupudo tonyuro ma'no ma'nodo tovi nuuwolowonekono. Toro tool kaiya'no kuumwiyo bwollumo'nawonekono.

⁹ Kevu Jisasolluro mollu'bwoto togaikul abekanyo tobuurai mollomwallo'moneyokwe yovo ton yakwollodupudo kuvi kuruv yiuwi'nokai kanyo tobuuraino yovo ton nyakwollumwalpiyo. Abekanyo yiuno 60-pela kworomo tobuullu me'no kuuwolo'nyungiko tobuuraino yovo to'no neya jakwollogaulo. Toro kuvi kuruv abekanyo su ton kwolo yiuno pwolnodo toorogai soma'nyungopo tonyuno to'no jakwollogaulo.

¹⁰ Aki abekanyo su tobuuro womdo sugudo aro tonyu neya yodupudodeyokwe kemino yovo tov nokwo yakwollupinokwono. Abekanyo su tobuuravuro pubuul gami kwoloraiyo tonyu yiuno ilaiyo to'no mollumwojumelabodowodobuukono. Aki a'mwo abolo pun gamoro ago tovi buuru'ma'dopure tonyu ilaiyo mollomarowo'ji po'dogalo mollomwalodowodobuukono. Toro tobuul Gooti toolluro a'mwo abolo abuuru'mapi su tonyu kwako tomuu'aro wiyowo'ji kemoro suvlo tonyu wonyo tokwe mollal'mo'mdowodokwono. Aki a'mwo abolo jul'nyokwe tonyu po'dogalo wiyo'mwojodowodokwono. Aki toro tobuul sugupasudo go'no go'nodo ton mujumovla'mdowodobuukono. Abekanyo womdo su toro mujumovla'mdupudodeyo adupi tobuuraino yovo tov kevu nokwo yakwollumwalpinogaikikono.

¹¹ Toro kuvi kuruv kevu abekanyo muugunyunodo tonyu mollomwallo'moneyokwe yovo tov mamollokwollosumwalpinogaikikono. Su tov aro tovinokwono. Abekanyo su ton sumdomgu yiuno Krais toollu uumjunyo'mo winodupudo kun kuruv lukomgu aki aiko te kwolo muuduko toorai uuma'nyo'mo winodupudogano.

¹² Su toro sumo'no'ji tov abekanyo muugunyunodo su ton yiuno Krais toollu uumjunyo'moneyokwe subuu'yamju sumdomguda'ai sopo tovi nomodukwopipinogano. Toro ton kemi subuu'yamju amodukwopipi su tovino kuudo wuuteyo'moneyokwe jul'nyo pun nomapinogano.

¹³ Aki puruv abekanyo muugunyunodo su ton burawo imo'nopi womdo po'dogalo mipinogano. Toro ton ago go'no go'nodo tonyu yomollopi puu'yogalo togai'aro buulo yogalo togai'aro bomjodumoulapinogano. Yogalo su toro tooro nevu mamollajo'moneyokwe kworai kuruv kuvinono bomjodumoulapinogano.

¹⁴ Su toro tovino tov nuu guureji aro daikumul'mwojumo'mokwono. Abekanyo muugunyunodo ton kemi kwolo muuduko toorai yere neya yo'mgonoma'mwalpinogano. Toro ton kwoloraiyo yawosunopi kemi ago tonyu kuulomwalodopure tobuurai nokwo mollomwalmwalpinogano. Su toro supi tov ikomago pwol kemi bwolomorumwogapiyo'moneyokwe kaiya'no yogalo wuujo'mo kuruv ku'nono madonekono.

¹⁵ Moro su toro aikudumo tov aro tovinokwono. Abekanyo muugunyunodo pun muudu'nodo toga puuto sugudo tovi ilaiyo to'no kuumjunyajupogano. Toro kun kuruv aga Satanyollu uumjunodupu me'no bwolodukwopiyodapudogano.

¹⁶ Toro te Jisasolluno kuudo me'no kuubwengiko abolo puruv kanyo yere mimo'nodowodo su tov gavuge avaimujako abekanyo gabovo pubuuro kurukweyo'mdeyokwe abolo su tov kanyo su tobuurai neya mollomwalmwalonokwono. Kanyo su tobuurai mollomwallo'moneyokwe womdo tov Jisasolluro mollu'bwoto togaikullu nekubwemwalpiyo. Su tov aro tovinokwono. Kevu Jisasolluro mollu'bwoto togaikul yiuwi'nokai abekanyo tonyu amollomwalpi tov jul'nyo bwotonyo nekullumo'no'jo. Toro tovino tov Jisasolluro mollu'bwoto togaikul abekanyo yiuno judo'no mwalodupudo tobuuraino to'no domollomwalogaulo.

Nevu Jisasolluro a'mwo abolo tonol nemi moduvomwallokwe toorai neya mollomwalmwalano tovinokwono

¹⁷ A'mwono moduvomwallokwe tooro womdo ilaiyo supi tooraino yovo aguto wiyopi aki noonyumwonyu nyonugovlaiyo'moneyokwe togai neya duubiyogaulo. Aki a'mwo su tooraida'ai pworo Gooti toolluro yogalo tokwe modomollopi yodubwasodopure tooraino'gwowi kevu muunyu toru'aro neya duubiyogaulo.

¹⁸ Neya duu'nyulo. Gooti toolluro yogalo puruv aro sakwollungikokwono. “Buulmokau pwol wit sulo tollovai lojodavowo'ji nomjonugovlaiyo'mo yodowo'jure toollu gamoro mago tovi mamoweyopipinono.” Sakwollungikokwono. Aki puruv aro sakwollungikokwono. “A'mwo womdo yodupudo tooro kemi mubiyo tov neya amapuro.” Sakwollungikokwono.

¹⁹ A'mwo pwol a'mwono moduvomwallokwe pwolluno kuu'maiyo toru aro adodoluvagubweyo'ji tov, “Oo a'mwo su tool kaiya'no yodowodekono.” Su toro adodoluvagubweyo'ji tovi guu kaduko yere nuuwibiyo. Toro kuvi kuruv a'mwo abolo puruvalo'mdeyo oo puruvapuruvodeyo ton kuu'maiyo toru adodoluvagubwepi to'gwowi kaduko nokwo wibinekugono.

²⁰ Aki a'mwono moduvomwallokwe pwol ma'no ma'no kuuno mujumovla'mdowo'jure toollu yiuwi'nokai Jisasolluro mollu'bwoto tonyuro sumdo tovi neya jovo'dogalogawono. Su toro tovi a'mwono moduvomwallokwe pworo kwonpi tov ma'no ma'no yo'mo tovino luko imwalpinorogano.

Timootiyol gavnokweyolluro pasudo tovino neya yaguulu'mwonyumwalono tovinokwono

²¹ Nuu Gooti tooke'aro Krais Jisaseke'aro gamoro ensel toorogai'aro tooravuro muugonanuwo'dopure toru gumi guureji aro adagujumono. Moro yogalo me'no adagubwemwako akanyu guu neya duumjunogawono. Toro tooku a'mwo abolo pun gomno gomno somuudeyapinpi tov guu a'mwo abolo yiuno avalo punyuno kuu'dello nuubwemwalbiyo. Toro kweku kuruv yiuwi'nokai tonyu yiuno aval'no neya jugologawono.

²² Aki Gooti toolluro womdo tovi wimovlaiyo'moneyokwe a'mwono moduvomwallokwe toorai jeso'mo tooku yere majesubinekugono. Su tov aro tovinokwono. Guu gumi ato tokwe a'mwo moduvomwallo'moneyokwe pwollu yere ajesubi tov a'mwo su tool lukomgu ma'no ma'no nyo'jo. Lukomgu ma'no ma'no kuvinono so'ji tov guu a'mwo su to kwolluro ma'no ma'nodo tov gumi nyagu'mullo'jo. Toro te guu ma'no ma'nodo tovi manyu toru'aro neya domwalogawono.

²³ Oo Timootiyoloo, guu yiuwi'nokai toga nobollo pun ma'dumdo tov ilaiyo'maiyo. Toro tovino tov guu luko miyo'bi yiuno wonyo to'no nonumwalbiyo. Toro kweku kuruv gumoro sumwol'nobollo tovi gujukullo'moneyokwe wain wonyo pwekwogai'aro nokwo numwalbinekugono.

²⁴ Aki a'mwono moduvomwallokwe toorai jeso'mo tooku aro tovino kuudo nyallulo'gwonmwalbiyo. A'mwo pworavuro ma'no ma'no pasudo yodupudo tovino Gooti tool kooti yogalo yere maduuwiyodowo'jure kuvi kuruv ma'no ma'no pasudo su tonyu a'mwo abolo pun kuu'maiyo toru'no kinodokwopiyoma'dupudogano. Toro kuvi kuruv a'mwo pworavuro yiulo tomuuda'ai ma'no ma'no pasudo yodupudo tonyuno'gwowi yiuno Gooti toolluro kooti yogalo adapi toga'no kemoro ma'no ma'no pasudo yodupudo su tonyu kuu'maiyo toru nobomollolupto'nosonogano.

²⁵ Su toro to'busuko kubalno a'mwo abolo punyuro sugupasudo yodupudo pun kuu'maiyo toru me'no bomollolupto'nosodupudogano. Toro kuvi kuruv a'mwo abolo punyuro sugupasudo yiulo tomuu yodupudo puno'gwowi su tomuu kuuno kupuu'na'dupudogano. Su toro ton lukomgu kuu'maiyo toru nobomollolupto'nosupinogano.