1 Tesaloonaika 5 - Gooti Toolluro Yogalokwono

Aguto toolluro iruko nobai'mowono tollugwojunokwono

¹ Nemi avalobuuravoo, su toro tov adoga imo'nono'mdukoneyokwe tovino jokwollaikubweyo'mo kevu supto mimwakopogaikikono.

² Su tov aro tovinokwono. Kevnokwe togaikul aro kuudo me'no yovo'dogallouroma'dupudogaikikono. Aguto toolluro wolabwono iruko su tollugwo aro to'busuko imo'nonokwono. Surakuuto pullugwoji a'mwo abolo pun aro kuudo miyouromapinogano. Oo kuuko pwol nobwonoldeyo. Kuudo miyouromapinogano. Toro kuvi kuruv kuudo miyau'dopure su tollugwoji a'mwo kuuko tool nobai'mowonekono. Su toro to'busuko kubalno a'mwo abolo ton kuudo miyau'dopure su toga Aguto tool nobai'mowonekono.

³ Toro te puga a'mwo abolo ton aro dupinogano. “Oo nevu sumwoluko kavo to'no wosunodowado tonollu kaiyako yanekullugollo'mo pworo nonagutomuugono.” Toro dodopure kuvi kuruv su toro toga kaiyako mollounapiyo'moneyokwe tov yere nobai'mowonogakono. Su tov aro to'busukokwono. Abolo kwolaiyo sumwolukokwe puruv kwolaiyo nyomallo'mo toga guno yere mollodowodo to'busuko kubalno kaiyako mollounapiyo'moneyokwe tov yere nobai'mowonokwono. Su toro abai'mowo'ji toga a'mwo abolo ton morumoukuropiyopi ku'nono mirukuruwolopinogano.

⁴ Aguto toolluro iruko bai'mowono su tollugwo aro to'busuko imo'nonokwono. Dugumdo toga a'mwo kuukokwe pwol bai'mo'mdowo'jure toolluno a'mwo abolo dugumwuulo tomuu mwalodupudo ton noo'nookwo yopi luko morumoukuropipinogano. Toro kuvi kuruv nemiyobuuravoo, kevno'gwowi dugumwuulo tomuu mamwalodupudogaikikono. Toro togaikulluno tov Aguto toolluro iruko su tollugwo bai'mo'mdowo'jure tovino luko mamorumoukuropipinogaikikono.

⁵ Su tov aro tovinokwono. Kevu yiuwi'nokai togaikul bako tooke'aro iruko togake'aro tovalluro kwoloraiyogaikikono. Toro tovino tov nevu surakuuto togasuronolmaiyo. Aki dugumwuulo tovronolmaiyo.

⁶ Toro te nevu a'mwo abolo sa wo'dupudo punbusuko kubalno sa noo'mwala'jokwe wako neya au'nogawano. Aki kuudo po'dogalo tollovo yaurowa'ji nevnokwe tonol neya amollomwalnogawano.

⁷ Kevu kuudo neya jaullulo. Surakuuto toga a'mwo abolo sa wollokwe ton sa wo'dupudo togakono. Aki su toro toga a'mwo abolo wain wonyo bwotonyo nopi amomo yodupudo togakono.

⁸ Toro kuvi kuruv nevno'gwowi iruko togasuro tonolluno tov kuudo ilaiyo to'no yovo'dogallourowa'ji nevnokwe tonol neya amollomwalnogawano. Toro te nevu Krais toolluno kuudo uubweyodowado tokwe'aro a'mwo abolo punyuno kalo buuropino nekullunodowodo tokwe'aro su toval neya amollosano. Pasudo su toval a'mwo mollurogudo tooravuro kupolmdo toruda'ai youro jurogudo mollosodupudo to'busuko neya nekullumo'numwalbullunovakono. Aki nemi ma'no ma'nodo tovuro kirumwallo tovida'ai Gooti tool nobomollurolovonekumokalokwono tovino sogwollo to'no neya kinmwalanonogano. Pasudo su tov a'mwo mollurogudo tooravuro miguto jurogudo yesodupudo to'busuko neya nekullumo'numwalonokwono.

⁹ Gooti tool nemi ajanekubweyoka tov nevu gamoro suroulo tovi ibwosunyo'moneyokwe ajanekubweyokalmaiyo. Toro kuvi kuruv nemi Aguto Jisas Kraisollu'aro nemi ma'no ma'nodo tovuro kirumwallo tovida'ai nobomollurolovonekumokalokwiyo'moneyokwe ajanekubweyokaikono.

¹⁰ Nemi Aguto Krais Jisas su tool nemi nekullo'mwojo'moneyokwe abolokaikono. Toro tovino tov nevu aiyo kuuno amwala'jo'mdeyo oo a'mwo buuso tovi kwora'jo'mdeyo kuruv yiuno kweke aiyo kuuno mujomwekovla'mwalanonogano.

¹¹ Su toro ikullumo'nono tovino tov kevnokwe togaikul imgu amgu jurogudo duuwimwoju'nopi aki aguto neya jogullumwoju'nugovlavogaulo. Su toro tov kevu me'no yodupudo tomgu'aro kuuno domjumovlavogaulo.

Jisasolluro a'mwo abolo ton neya uumjunmwalpino'moneyokwe kuuguudo tonyunokwono

¹² Nemi avalobuuravoo, kemida'ai pworo ikullo'mwojo'mo womdo yodupudorogano. Toro tooro mido mollekumwalmwalpino'moneyokwe Aguto toolluro molludapiyoduke tovida'ai imo'nugovla'mdupudorogano. Su toro imo'nugovlavopi kemi daikumul'mwojodupudorogano. Su toro yodupudo toorai kevu ilaiyo to'no neya domollomarogaulo.

¹³ Aki womdo ilaiyo yodupudo su tooraino tov kevu a'mwo su to kworaino kuudo aguto tokwe aro neya juworovomarogaulo. “Oo a'mwo akaro Aguto toolluro womdo ilaiyo yodupudo toorodeyo.” Juworovomarogaulo. Aki toro tooraino kevu kalo buuropino neya domollogaulo. Aki kevnokwe togaikul imgu amgu sumwoluko puru'mono neya wosunmwalpinobuurekikono.

¹⁴ Nemiyobuuravoo, aro daikullano'monogano. Kevu a'mwo abolo burawo yodupudo tonyu duudapi yogalo neya duuwiyogaulo. Aki a'mwo abolo il'nyuno yodupudo tonyu jurogudo neya doduuwimwojogaulo. Aki a'mwo abolo jurogudo mimo'nodupudo kunyu kuruv duuwiyo'mwojogaulo. Toro te kevu yiuwi'nokai a'mwo abolo tonyuno biyolo nodou'mwonyopimwalpiyo.

¹⁵ Kemida'ai pugaikul Jisasolluro a'mwo abolo kaiya'no saikullugolpi tonyu kevu mido mallo'moneyokwe kaiyako nyugolpiyo. Toro kugaikul kuruv yiuwi'nokai toga kevuge avalo Jisasolluro a'mwo abolo su tobuurogai imgu amgu ilaiyo neya jungovlavogaulo. Aki yiuwi'nokai a'mwo abolo kwa'mguda'ai kunyu kuruv aval'no su toro neya jugolmovlavogaulo.

¹⁶ Aki yiuwi'nokai toga kemi poowokalago togai ilaiyo to'no neya jumovlavogaulo.

¹⁷ Aki yiuwi'nokai toga subusu'nyogalo neya domwalopi nyuu'dapimwalpiyo.

¹⁸ Buro'nyo buro'nyodeyo pun aikullumo'no'ji kuga kuruv, “Nenoloo,” to'no subusu'nyogalo neya duudumovlavogaulo. Kevu Krais Jisasolluro a'mwo abolo wimo'nodupudo togaikul su toro neya mujumovla'mwapino'moneyokwe tovino Gooti tool winodowodekono.

¹⁹ Kevu Gooti toolluro Kuullo toollu uumjungovlaiyo'moneyokwe kuudo tovi nebuulowosumwalpiyo.

²⁰ Aki proofet yogalo ikudodopure tonyuno biyolo'mo aro nodupiyo. “Oo yogalo su tov kuunanokwono.” Nodupiyo.

²¹ Toro kugaikul kuruv yiuwi'nokai yogalo tonyuno nebalo'mdukoneyokwe tovino gallenyubworomallo'mo tov kevnokwe togaikul po'dogalo neya domojagilogaulo. Toro mojagilopi, “Oo akan sugudo'mdeyo,” adupi tonyuno to'no neya dogudupolarogaulo.

²² Aki toro togaikul yiuwi'nokai ma'no ma'no pasudo judo'no judo'nodo tonyu manyu toru'aro neya delpolodavogaulo.

Aiyowo'mo kuuguudo tovinokwono

²³ Oo kemino tov aro anekullunadopiyo. Gooti sumwoluko kavo wosunyo'moneyokwe tool kemi womdo nekullumwalonekono. Toro ikullodowo'jure tovida'ai kemoro yiuwi'nokai somjomwekovlapi tomgu'aro Gooti gavnokwe toolluro kuunodo nokwo wimo'numwalpinogaikikono. Toro wimo'nugovlavopi nemi Aguto Jisas Kraisol abwo'ji toga kevu a'mwo abolo kaiya'nodomaiyokwe to'no neya imo'nupinogaikikono. Su toro kuvinono ikullumo'nyo'moneyokwe Gooti tool pi'mwono nomollekumwalonekono. Kemoro poowokalago togai'aro kuudo togai'aro kulako togai'aro tonyu nokwo mollekumwalmwalonekono. Su toro tovino anekullunadopiyo.

²⁴ Kemi su toro tomgu'aro ikullumo'nyo'moneyokwe tov Gooti tool kuvinono ikullo'mwojumwalonekono. Su tov aro tovinokwono. Kemi dekuma'dowodo Gooti su tool buro'nyo buro'nyodeyo pun yo'mo ado'ji tov kuvinono yokwekono.

²⁵ Nemiyobuuravoo, Gooti tool nemi anekullo'mwojoneyokwe tovino kevu subusu'nyogalo neya duudumovlavogaulo.

²⁶ Kevu Jisasolluro a'mwo abolo tobuurekul imgu amgu iru'mato sungovlapi toga kemi poowokalago togai wiyo'mo tov molluduuduulo neya junogaulo.

²⁷ Nuu Aguto toolluro yovo tovida'ai kemi guureji aro adaikubwemono. Yiuwi'nokai nevuge avalo Jisasolluro a'mwo abolo pubuuro su'bwo'nupi toru kevu pas akavi neya domojagilogaulo.

²⁸ Oo nemi Aguto Jisas Kraisolluro yasuwa'wino sugumaluko tov kemi nokwo ikubwemwalonekono.