1 Tesaloonaika 4 - Gooti Toolluro Yogalokwono

Jisasolluro a'mwo abolo ton Gooti toolluro ilaiyo winodowodo pasudo togai neya yomjomwekovla'mwalpino tovinokwono

¹ Nemi avalobuuravoo, aga kuuguudo purukwe'aro ikullabwanonogano. Kevu Aguto Krais Jisasolluro a'mwo abolo me'no wimo'nodupudogaikikono. Toro togaikulluno tov Gooti toollu ilaiyo igollo'moneyokwe to'no neya domjumovlavogaulo. Su toro tovino nevu sumdomgu me'no sodekubwasowonogano. Toro sodekubwasowo su to kuvi, “Oo me'no uumjunodupudodeyo,” kemino su toro kuudo me'no yaikuu'dowadonogano. Kevu ilaiyo uumjunodupudo su tovi muunyu toru'aro guureji mujumovla'mwalpino tovino'mo aga jurogudo adaikullumwojumwakuuwono.

² Aki nevu Aguto Jisasolluro yogalo jurogudo adanekulloka tokwe kemi me'no sodekubwasowonogano. Su toro sodekubwasowo tovino kevu kuudo nyau'mwakovo.

³ Gooti tool kemino tov aro tovino winyokwekono. Kevu gamoro ilaiyo winodowo'jure tonyuno to'no uumjunopi yiuwi'nokai kwonyalpasudo toorai mamjumovlapinono.

^4-5 Aki kwako akavida'ai a'mwo pworo Gooti toolluno kuudomaiyorogano. A'mwo su tooro kwonyalpasudo yo'mo tooraino kwanyu sumdo kinuwiyodupudorogano. Su toro kinuwiyodupudo toorobusuko kubalno kevu aval'no nomjumovla'mwalpiyo. Toro kuvi kuruv kevno'gwowi Gooti toolluro ilaiyo winodowo'jure tovi uumjunopi yiuno sugupasudo to'no mujumovla'mwalpinorekikono. Kevu yiuwi'nokai pwolno pwolnodo toorekul kwonyalo pasudo toorai dugobiyoso'moneyokwe kevnokwerekulluro kulako tonyu po'dogalo neya domollomwalnogaulo.

⁶ Toro te pweku Jisasolluro a'mwo gumi jugwai'yago toolbusuko gujumo'nodowodo tekwoji kaiyako nyugolbiyokwe gamoro abolo tokwe kwonyalo mibinono. Su tov aro tovinokwono. Ma'no ma'no pasudo su tonyu Aguto tool kirumwallodowodekono. Su toro tovino kevu wako neya kuu'numwalpino'moneyokwe nevu sumdomgu duudapi yogalo me'no adaikullowonogano. Su toro adaikullowo tovi kevu kaduko neya duuwiyogaulo.

⁷ Kevu neya duu'nyulo. Gooti tool nemi adonekumaroka su tov nevu kaiya'no pasudo toorai kiroungovlaiyo'moneyokwe adonekumarokalmaiyo. Toro kuvi kuruv gamoro ilaiyo winodowodo pasudo tollovogai neya yomjomwekovla'mwalano'moneyokwe adonekumarokanogano.

⁸ Toro te kemida'ai pugaikul yogalo akavi kisuvolo supi tov yiuno kwako akavida'ai a'mwo pwolluro yogalo tovi kisuvolo mwipinogaikikono. Toro kugaikul kuruv Gooti toolluno'gwowi kisuvolo wipinogaikikono. Kuullo nekullabodowodo Gooti su toollu kisuvolo nuuwipiyo.

⁹ Kevu Jisasolluro a'mwo abolo tobuuraino kalo buuropino imgu amgu inyo'moneyokwe tov Gooti gavnokwe tool kemi me'no yekubwasodowodekono. Toro yekubwasodowodo togaikul supto mimwakovo. Toro tovino tov pasudo su tovino nevu pas akavi'aro aki aiko te miyodekubwasanonogano.

¹⁰ Nebalokwono. Kevu yiuwi'nokai proovins Masedooniyada'ai Jisasolluro a'mwo abolo tobuuraino kalo buuropino kuvinono winodupudogaikikono. Su toro me'no yodupudo kuvi kuruv kemi jurogudo daikullumwojo'moneyokwe nevu guureji aro aikudumwakuuwono. Kevu kemi avalo Jisasolluro a'mwo abolo tobuuraino kalo buuropino me'no ikullunodowodo kuvi kuruv muunyu toru'aro guureji neya domollogaulo.

¹¹ Aki kevu yiuno kaveno to'no yobemwojomwekovlavopi kevnokweyogaikulluro womdo tonyuno to'no neya jainyubwo'nogaulo. Aki kevnokweyogaikulluro womdo su tonyu kemi ato togai to'no neya domjumovlavogaulo. Su toro tovino nevu sumdomgu me'no adaikullajuuwo tomgu'aro kuvinono neya uumjunopi domjumovlavogaulo.

¹² Kevu su toro tomgu'aro womdo ilaiyo somjumovlapi tov kevu noonyumwonyu punyuno supto miyopi a'mwo pworai miwosuna'mwalpinogaikikono. Kevu su toro somjomwekovlapi tovi a'mwo abolo Jisasolluro mollu'bwoto kwa'mguda'ai mwalodupudo pun ikwonopi kemino aro kuudo yaikuupinogano. Oo po'dogalo yomjomwekovla'mdupudodeyo. Kuudo yaikuupinogano.

Aguto tool aki aiko te kwolabwo'ji toga nemi mollu'bworonekumwallono tovinokwono

¹³ Nemi avalobuuravoo, a'mwo abolo pun Jisasolluno sogwollo mainodupudo su ton a'mwo abolo bolodopure tonyuno kalo'mo yopi kumdato deraunodupudogano. Toro kuvi kuruv kevu Jisasolluro a'mwo abolo togaikulno'gwowi kwa'mguda'ai su tonbusuko kumdato guureji nodumwalpiyo. Kevu Jisasolluro a'mwo abolo me'no bolodupudo tonyuno kuudo neya jouromarogaulo.

¹⁴ Nevu aro kuudo uubweyodowadonogano. Oo Jisasol bolo'no aiyo aiko te me'no adukavokaldeyo. Nevu su toro tovino kuudo me'no uubweyodowado tonol, “Nebalo'mdeyo,” dodowadonogano. Toro te a'mwo abolo Jisasolluno kuudo uubweyopi bolodupudo su tonyu Gooti tool lukomgu aki aiko te nomodukawonekono. Toro amodukawo'ji su tonyu Jisaseke muunyu kai'muuno nomokailawonekono.

¹⁵ Aguto toolluda'ai yogalo bodowodo akav ikudumo'mokwono. Aguto tool aki aiko te kwolabwo'ji toga nevu punol aiyo kuuno amwala'ji tov Jisasollu sumdomgu yere muuru'maranonogano. Toro kuvi kuruv Krais toolluro a'mwo abolo me'no abollungopo ton a'mwo buuso tovi wo'dupudo su tono'gwowi sumdomgu kunda'ai ilapi wuuru'mapinogano.

¹⁶ Aguto gavnokwe tool Gooti toolluro ago muunyu i'muuda'ai wolabodowo'jure toga Gooti toolluro deko bwotonyo puruv guureji kila'bworonokwono. Ensel mido mollomwalokwe pwolluro yogaimaguurai dodowo'jure tovi wuu'nopi aki Gooti toolluro biugel kuruv ki'nugwolabodowo'jure tovi nuu'nupinogano. Su toro kuu'nupi toga sumdomgu Krais toolluro a'mwo abolo me'no abollungopo ton aiyo aiko te noduko'melapinogano.

¹⁷ Su toro me'no aduko'melapi toga'no'gwowi lukomgu nevu aiyo kuuno amwala'ji tonol sulu'wo tomuuno ilowanonogano. Toro tonol a'mwo abolo me'no aduko'melapi su togai Aguto toollu sulugumdo tomuu illuru'maranonogano. Toro me'no sulluru'mara'ji tonol Gooti Aguto tooke yiunokuudo mujomwekovla'mwalanonogano.

¹⁸ Toro tovino tov yogalo akagai kevu Gooti toolluro a'mwo abolo pubuurai jurogudo doduuwimwojogaulo.