1 Tesaloonaika 2 - Gooti Toolluro Yogalokwono

Poolol wagwolago Tesaloonaika toru womdo sajuko tovino aki aiko te kuudo sauroka tovinokwono

¹ Nemi avalobuuravoo, kevnokwe togaikul nemino kuudo me'no youronekuma'dupudonogano. Nevu sumdomgu kemiyomno abowo toga nemoro womdo amjumovlaiyajuuwo su ton yasuwa'no mavlavopogano.

² Nevu kemi yere mabekuru'ma'dowore toga sumdomgu wagwolago Filipai toru abomwalowonogano. Su toro bomwalodowore toonollu a'mwo Filipaida'ai pworo danyu'nyuwuulo pun nekubweno sumaveyokwe kaiyako sanekullugoloponogano. Su toro sanekullugolopo tovino kevu me'no wuu'nodupudogaikikono. Ikomago tooro kaiyako toro sanekullugolopo kuvi kuruv Gooti toolluro kuuguudo sugudo tokwe kemi ikujo'moneyokwe tovino luko miyowonogano. Toro kwonol kuruv Gooti toolluro jurogudo nekubweyoduke tokwe kemi akuuto toru bomwalno sumawoneyokwe kuuguudo sugudo su tokwe guureji aikujajuwonogano.

³ Toro te nevu guureji aro adaikullajuwonogano. “Oo kevu kuuguudo sugudo akavino kuudo neya duubweyulo.” Su toro adaikullajuuwo su tov kemi youkuu'naikujo'mo'maiyo. Aki kemi kaiyako yaikullugollo'moneyokweyo'maiyo. Aki kemi molloguurekudapiyo'moneyokwe aikujajuwonolmaiyo.

⁴ Toro kuvi kuruv Gooti tool gamoro kuuguudo sugudo su tokwe moruudomollo'moneyokwe nemi me'no senyubworonekumarokanogano. Toro yenyubworonekuma'no sumaiyokwe gamoro kuuguudo sugudo su tov anekubweyokanogano. Toro te nevu kuuguudo sugudo su tokwe a'mwo abolo punyu ilaiyo igollo'moneyokwe to'no moruudomollodowadonolmaiyo. Toro kwonol kuruv nemi poowokalago tonyu kamwoga yanekwo'dowodo Gooti su toolluno'gwowi ilaiyo igollo'moneyokwe moruudomollodowadonogano.

⁵ Kevu kuudo me'no yanekuu'dupudogaikikono. Nevu kemi yiuno puga'nodo kuruv nojolukuulovekumallo'moneyokwe kuuguudo tokwe miyodekubwasajuwonogano. Aki kemoro nuugwiyo bwotonyago tonyu ki'nekumallo'mo miyajuuwonogano. Su toro tovino Gooti gavnokwe tool me'no wononekuma'dowodekono.

⁶ Kuudo neya jaullulo. Nevu Krais toolluro kuurotokwe a'mwo aguto toonolluno tov yovo aguto neya anekullabupureyokwe nokwo aikudowa'jujukonogano. Toro kwonol kuruv Gooti toolluro womdo tovi sajuuwo su tov kevudeyo oo a'mwo pworodeyo oo a'mwo abolo pundeyo tonyuro sumdo tovi yovo aguto mallo'moneyokwe sajuwonolmaiyo.

⁷ Aki Krais toolluro kuurotokwe toonolluno tov kemi guureji nokwo adaikumuurolowa'jujukonogano. Toro kwonol kuruv kemi anakuuto tomuu mwalodowa womdo sajuuwo to'gwowi yiuno kavo to'no aikubemwojajuwonogano. Su tov aro to'busukokwono. Abolo puruv gami kwolaiyo toollu amdo yausowo'ji pi'mwono mollomwallo'moneyokwe uubemwojodowodokwono. Su toro to'busuko kubalno nevu kemi telluneyago tonbusuko ikullumo'nodowa pi'mwono mollekumwallo'moneyokwe kaveno aikubemwojajuwonogano.

⁸ Nevu kemino kalo buuropino nekullunodowodo tovino tov Gooti toolluro kuuguudo sugudo su tov kemi ikullabiyo'moneyokwe tovino paiko to'no ibwosunyuno sumawoneyokwe aikullabowonogano. Aki toro toonol aro kuudo saullajuwonogano. Kemi ikullo'mwojo'mo womdo yodowa'jure toga a'mwo pworo aromiyanekubwepi kuruv nokwo'mokwono. Toro kuudo saullajuuwo tov kevu nemoro poowokallumdo nekullumo'nodupudo togaikullunokwono.

⁹ Nemi avalobuuravoo, kevu aki aiko te kuudo neya jaullulo. Kemi akuuto tomuu abomwallajuuwo toga nevu dukwogulo imo'na'dowa womdo guureji sajuwonogano. Aki Gooti toolluro kuuguudo sugudo tokwe kemi modekumollodowado toga aro kuudo saullajuwonogano. Nemi mollonekumwallo'moneyokwe womdo tov a'mwo abolo akaruda'ai puru'monodo kuvi jul'nyo nuubweya'jo. Su toro kuudo yau'dowa surakuuto togake'aro iruko togake'aro toga nevnokwenolluro womdo sajuuwo tovida'ai amollomwallunyajuwonogano.

¹⁰ Su toro tovino kevu Jisasolluno kuudo uubweyodupudo togaikul nemino kuudo me'no yanekuu'dupudogaikikono. Su toro toga nevu yiuno Gooti toolluno to'no kuumjunyajuwonogano. Aki toro toonol sugupasudo to'no amjumovlaiyajuwonogano. Su toro mujumovla'mdowore toonolluno kevu aro kuudo sanekuullajupogaikikono. Oo kaiya'no miyanekullugollokwerogano. Su toro tovino kevu kuudo me'no yanekuu'dupudogaikikono. Aki su toro tovino Gooti kwol kuruv nemino kuudo me'no youronekuma'dowodekono.

¹¹ Aki kevu aka kuvino kuruv kuudo me'no youroma'dupudogaikikono. A'mwo ganumiyago pwol gami kwoloraiyo tonyu pi'mwono yogullumwojomokailabodowodo to'busuko kubalno nevu yiuwi'nokai pwolno puru'monodo togaikullu pi'mwono aro sogullumwojekwapiyajuwonogano.

¹² Kemi jurogudo dekumworaso'moneyokwe kuuguudo togai'aro nodaikumul'mwojo'moneyokwe kuuguudo togai'aro kemoro poowokalago tonyu jurogudo daikullumwojo'moneyokwe kuuguudo togai'aro su togai kemi yodekubwasodowa sodogullumwojekwapiyajuwonogano. Su tov kevu Gooti toolluro ilaiyo winodowo'jure tomgu'aro neya yomjomwekovla'mwalpino'moneyokwe tovinokwono. Kuudo neya jaullulo. Aguto kig Gooti tool gamoro mido mollomwalodowodo tovi kuulomwallo'moneyokwe kemi me'no dekuma'dowodekono. Aki gamoro bako bwotonyo tovi anakuuto tomuu kuulomwallo'moneyokwe kuruv me'no dekuma'dowodekono.

¹³ Toro te nevu yiuwi'nokai toga aro tovino, “Nenoloo,” subusu'nyogalo wuudodowadonogano. Nemoro Gooti toolluro yogalo yodekubwasodowore tovi kevu wuu'no'mno ilaiyo amollomaropogaikikono. Su toro amollomaropo toga kuuguudo tovino, Oo a'mwo pworavuro'mdeyo, kuudo miyaullajupogaikikono. Toro kugaikul kuruv aro kuudo sauropogaikikono. Oo kuuguudo su tov Gooti toolluro mago tovida'ai dobadopiyo. Su toro kuudo yau'no sumaveyokwe kuudo kuubweyopogaikikono. Toro te Gooti toolluro kuuguudo su tov kevu kuudo me'no kuubweyopo togaikulluro poowokalago tonyu womdo bekullumoulodawodokwono.

¹⁴ Miyobuuravoo, kemi jurogudo aro adaikullumwojumono. Kevnokweyogaikulluro kwako tomuuda'ai a'mwo pworo kemi kaiyako saikullugoloporogano. Su toro aikullumo'noka tov Juudiya tomuuda'ai Gooti toolluro mollu'bwoto tonyu kwimo'noka to'busuko kemi aval'no aikullumo'nokagaikikono. Kuudo neya jaullulo. Kwako Juudiyada'ai Juu pworo Juudiyada'ai Krais Jisasolluno kuudo uubweyodopure tobuurai kaiyako sugollajuporogano.

¹⁵ Juu su tooro Aguto Krais Jisaseke'aro a'mwo kuurokado mollajokwe proofet toorogai'aro toorai aromiyosajuporogano. Aki a'mwo Juu kuudo muubweyodupudo pworo ne kwonollu kuruv kaiyako sanekullugollajuporogano. Su toro yanekullugolodupudo tooro Gooti toollu ilaiyo puru'monodo kuruv migolodupudorogano. Aki yiuwi'nokai kwako akavida'ai a'mwo abolo kunyu kuruv yiuno ikomago to'no wimo'nodupudorogano.

¹⁶ A'mwo su tooro a'mwo abolo Juu tooravuro miyawosunodupudo tonyu Gooti tool kemi ma'no ma'nodo tovuro kirumwallo tovida'ai nobomollurolovomokalokwo'jokwe kuudo yau'dupudorogano. Toro te nevu Gooti toolluro kuuguudo tokwe a'mwo abolo su tobuurai nomoruudupiyokwe tovino nemi nonekumjukullo'mo womdo yodupudorogano. Su toro yodupudo tovino tov yiuwi'nokai toga kemoro ma'no ma'no pasudo tooro womilo to'busuko bwotonyo youllumelodapudorogano. Toro toorai Gooti tool gamoro surodo tov yere muuduuwallodowodekono. Toro kuvi kuruv aga'no'gwowi Gooti toolluro suroulo tov a'mwo su toorai me'no buuru'ma'dowodorogano.

Poolol wagwolago Tesaloonaikada'ai Jisasolluro a'mwo abolo tonyu aki aiko te wuuru'mallo'mo kwinoka tovinokwono

¹⁷ Nemiyobuuravoo, nevu kemi aikugollu'movowo toga gomno gomno somuudeyapinowo tovino tov kevu solkaiyo tobuurekulbusuko sumo'nopogaikikono. Kula'nyo toga'gwo kemoro sumdomago tonyu maikwonodowore kuvi kuruv nemoro poowokalago tono'gwowi kemi wobo toru wo'dupudogano. Toro te nevu kemoro sumdomago tonyu aki aiko te ikwonyo'mo muunyu toru'aro guureji nekullunodowodonogano.

¹⁸ Nevu kemiyomno plaiyo'mo kuudo saullajuwonogano. Nuu Poolonyu pugasal toga kemiyomno plaiyo'mo yamju sonyugono. Toro kuvi kuruv Satanyol nemoro puuto tovi kudo'aiko anekullukurokaikono.

¹⁹ Nemi Aguto Jisasol aikomgu kwolabwo'ji toga nevuge'aro kev kugaikike'aro tonol gamoro sumdollu toru guureji daiyo'mo tovino sogwollo kinodowadonogano. Aki guureji da'mdowa'jure kev togaikulluno ilaiyo yowa'ji aro ilomodomoropiyowanonogano. “Oo nevu kemi akuuto toru mwalodowa kuuguudo tokwe amoruudekumollajuuwo tov sulo me'no ai'nokakwono. Sulo su ton kev togaikikono.” Toro togaikulluno ilaiyo ilomodomoropiyokwenogano.

²⁰ Nebalokwono. Kevu nemi Aguto Jisasollu guureji uumjunodupudo togaikulluno tov nevu yovo sugudo ton ma'dowadonogano. Aki nemoro poowokalago togai ilaiyo yodowadonogano.