1 Pita 2 - Gooti Toolluro Yogalokwono

Nevu Gooti toolluro yogalo tovi'aro a'mwono abewalo tonolbusuko neya yogullumelamwalano tovinokwono

¹ Kevu aiyo me'no sumo'nopo tovino tov kevnokweyogaikulluro yiuwi'nokai ma'no ma'no pasudo toorai neya domodukwopiyogaulo. Kemoro magu'nyo toorogai'aro kuunano yogalo toorogai'aro kuunano pasudo toorogai'aro kwekuullu kuudo toorogai'aro yiuwi'nokai bwolomorumwogapiyo'mo yogalo toorogai'aro pasudo su toro toorai neya domodukwopiyogaulo.

² Kevu kwolaiyo muudoga pwol amuunallo nonyo'mo winodowodo to'busuko kubalno kemoro kuullo tobuuravuro amuunallo kuunodo tovino'gwowi neya aikullunogawono. Gooti toolluro yogalo tov amuunallo su to'busukokwono. Toro te Gooti toolluro yogalo tovi'aro kevu a'mwono abewalo togaikulbusuko yogullumovla'mwalpinogaikikono. Su toro yogullumovla'mno yogullumovla'mno yopi lukomgu iruko pullugwoji Gooti tool kemi ma'no ma'no pasudo tooravuro jurogudo tovida'ai yiunokuudo mollurolovekwapiyonekono. Toro amollurolovekwapiyo'ji toga'no'gwowi a'mwono kuunodo togaikulbusuko nyumo'nupinogaikikono.

³ Aki kevu Aguto toolluro ilaiyo yaikullugolodowodo tonyu me'no kwonoma'mwakopogaikikono. Toro kwonoma'mwakopo togaikul aro kuudo youroma'dupudogaikikono. Oo Aguto tool ilaiyoldeyo. Youroma'dupudogaikikono.

Aguto tool sulo aiyokwe pwolbusuko imo'nodowodo tovinokwono

⁴ Kevu Aguto Jisasollomno me'no abumwakopogaikikono. Su tool sulo aiyokwe pwolbusukekono. Sulo su toollu kwako akavida'ai a'mwo abolo ton biyolsumdo uu'mwojodupudogano. Toro kuvi kuruv Gooti toolno'gwowi sulo su toollu senyubworomarokaikono. Toro te sulo su tool Gooti toolluro sumdo tovi nuugwiyo bwotonyo togai biyoma'dupudo pwolbusuko sugumaluko kuunodo wimo'nyokwekono.

⁵ Aki kevu Jisasolluro a'mwo abolo kugaikul kuruv sulo aiyokwe togaikulbusuko wimo'nodupudogaikikono. Kevu sulo togaikulbusuko wimo'nodupudo togaikike Gooti tool gamoro Kuullo tool kuulekumwallo'moneyokwe ago to'busuko modumelabodowodekono. Toro modumelabodowo'jure tovi'aro kevu Gooti gavnokwe toolluro ago to'busuko mujumo'nugelabodupudogaikikono. Aki kevu Gooti toolluro pris womdokwe togaikulbusuko wimo'nodupudogaikikono. Aki pris kwiroudapiyajupo to'busuko kubalno kevu Gooti toolluro Kuullo tool jurogudo ikubweyodowo'jure tokwe kemoro sugupasudo ton aval'no wiyodupudogaikikono. Kemoro pasudo wiyodupudo su tonyu Gooti tool Jisas Kraisolluro amomuugurovonekubweyoka tovi'aro ilaiyo mollomallokwekono.

⁶ Su toro tovino Gooti toolluro yogalo puruv aro sakwollungikokwono. “Kevu duu'nyulo. Nuu moro a'mwo pwollu nomoropiyamekono. Toro amoropiyami su tool ago mojo'moneyokwe sulo pwollubusuko wagwolago Jeruusalem tovi akuuto toru molludapimekono. Sulo su toollu Gooti tool me'no senyubworomarokaikono. Aki Gooti gavnokwe toolluro sumdo tovi sulo su tool nuugwiyo bwotonyo togai biyoma'dupudo pwolbusuko sugumaluko kuunodo wimo'nyokwekono. Toro wimo'nodowodo su toolluno a'mwo abolo kuudo kuubwepi tonyu Gooti tool kuvinono nuuwiyo'mwojonogano. Yiuwi'nokai a'mwo abolo kuudo kuubwepi su ton wogulo mibwosunpinogano.” Gooti toolluro yogalo puruv su toro sakwollungikokwono.

⁷ Kevu su to kwolluno kuudo me'no kuubwemwakopo togaikul sulo su toolluno aro kuudo youroma'dupudogaikikono. Oo Krais tool sulo nuugwiyo bwotonyo tokwe biyoma'dupudo toolbusukoldeyo. Kevu su toro kuudo youroma'dupudo kuvi kuruv a'mwo abolo kuudo muubweyodupudo punyuno'gwowi Gooti toolluro yogalo puruv aro sakwollungikokwono. “Sulo pwollu a'mwo sulago mojokwe tooro biyolsumdo ino sumaveyokwe amodukwopiyopekono. Toro amodukwopiyopo kwollu kuruv Gooti tool sulo su toollu malluno yodowo ago tov kwollu muunyu toru amodumokaikono. Toro te aga'no'gwowi sulo su tool yiuwi'nokai ago mojo'mo punyu kuuwolo'mwallo.” Sakwollungikokwono.

⁸ Aki Gooti toolluro yogalo puruv aro sakwollungikokwono. “Nuu moro a'mwo pwollu nomoropiyamekono. Toro amoropiyami su tool sulo pwolbusuko da'mdowo'jure toollu a'mwo abolo kuudo muubwepi ton kwollu sulo pwollubusuko bomunyukuuromaropi wolapinogano.” Sakwollungikokwono. Toro te a'mwo abolo su ton Gooti toolluro yogalo tovi kisuvolo wiyodupudo tovino tov kuvinono bomunyokuuromapinogano. Gooti tool a'mwo abolo su tonyuro nobomunyukuuromapino tovino sumdomgu me'no ajesoka tovi kuvinono bomunyokuuromapinogano.

⁹ Toro kuvi kuruv kemino'gwowi Gooti tool me'no ajaikubweyokaikono. Toro togaikul kemi aguto kig Gooti toolluro pris womdokwe wimo'numwalpino'moneyokwe me'no imo'nodupudogaikikono. Aki a'mwo abolo pun kemi aguto kig toolluro kantri toru mwalodupudo tonbusuko kubalno kevu Gooti gavnokwe tooke mujomwekovla'mwalpino'moneyokwe gamoro a'mwo abolo wimo'nodupudogaikikono. Aki kevu Gooti toolluro me'no ajaikubweyoka togaikul yiuno gavnokweyolluro a'mwo abolo wimo'nugovla'mdupudogaikikono. Toro tovino tov kevu Gooti toolluro pasudo sugumaluko yaikullugolodowodo tonyuno a'mwo abolo punyu nokwo moruudumwalpinogaikikono. Gooti su tool kevu dugumwuulo tomuu amwallajupo togaikullu bomollurolovekumokalokwiyo'moneyokwe dekuma'no sumaiyokwe gamoro bako sugumaluko tomuuno amogaibworekumokaulokaikono.

¹⁰ Aki sumdomgu kevu Gooti toolluro a'mwo abolo mwimo'nyajupo kugaikul kuruv aga'no'gwowi gamoro a'mwo abolo kuunodo me'no wimo'nodupudogaikikono. Aki kevu sumdomgu Gooti toolluro kemino kalo mamwonyo'moneyokwe tov mamallajupogaikikono. Toro kugaikul kuruv aga'no'gwowi kuvinono me'no ma'dupudogaikikono.

Nevu Gooti toolluro ki'nato womdokwe neya wimo'numwalano tovinokwono

¹¹ Mi ibwoto'nyobuuravoo, kevu kwako akavida'aiyogaikulmaiyo. Toro te kevu kwako akavi mwalopi toga yiuno kwako pumuuda'ai a'mwo bomwallo togaikulbusuko to'no imo'nugovla'mdupudogaikikono. Toro tovino tov nuu duudapi yogalo guureji aro ikudumo'mokwono. Kevu kemi kwako akavida'ai kulako tonyuro buro'nyo buro'nyo ilaiyo igollunyo'mo ikullunodowodo su toorai nuumjunmwalpiyo. Pasudo su tooro kemoro poowokalago tobuurai molo bwotonyo wiyodupudorogano.

¹² Kevu a'mwo abolo Jisasolluno kuudo muubweyodopure tonyuro akuuto tomuu amwalpi toga yiuno sugupasudo tollovogai to'no jogaulo. Su tov aro tovinokwono. A'mwo abolo Jisasolluno kuudo muubweyodupudo ton kemi bwolomekumwogapiyo'mo winodopure toga kemoro sugupasudo su tollovai wonopi lukomgu Gooti tool kuu'maiyo abiyalo'no'ji toga gamino yovo tov nyulomoropiyapinogano.

¹³ Kevu Aguto toolluro ilaiyo winodowo'jure tovi uumjunyo'mo ikullunodowodo togaikul yiuwi'nokai gavman a'mwo aguto jesodupudo toorai kwako tomuu'aro neya duuwiyogaulo. Yiuwi'nokai a'mwo abolo tonyuro a'mwo aguto kig jurogudo bwotonyokwe tooldeyo oo

¹⁴ a'mwo aguto gavona toorodeyo yiuwi'nokai su toorai kwako tomuu'aro neya duuwiyogaulo. A'mwo aguto kig tool gamoro gavona jesodowodo su tooro a'mwo kirovanyuvanyu supi toorai kuudo wuuteyo'moneyokwe moropiyabodowodorogano. Aki gavona su tooro a'mwo abolo sugupasudo supi tonyuno'gwowi yovo aguto wiyo'moneyokwe moropiyabodowodorogano.

¹⁵ Toro te Gooti toolluro ilaiyo winodowodo tov arokwono. Kevu a'mwo aguto su toorai kwako tomuu'aro neya duuwimovlavogaulo. Kemoro sugupasudo yodopure su tovi a'mwo abolo kuudo maiyokwe ton aikwonpi toga kemi bwolomekumwogapiyo'moneyokwe junoru'yogalo madumwalpinogano.

¹⁶ Aki kevu ki'nato womdo tovida'ai me'no birolo'nugolokwodupudo togaikulbusuko imo'nodupudogaikikono. Toro togaikul yiuno a'mwo me'no birolo'nugolokwodupudo tooravuro pasudo to'busuko to'no neya domjumovlavogaulo. Aki aro kuudo nyau'mwalpiyo. Oo nuu ki'nato womdo tovida'ai me'no birolo'nugolokwodumdo toonyu kirovanyuvanyu pasudo toorai yasuwa'no nokwo mujeroungovla'mwalmonyugono. Su toro kuudo nyau'mwalpiyo. Toro kuvi kuruv kevu Gooti toolluro ki'nato womdokwe togaikulbusuko imo'nodupudo tovino tov gamoro womdo tovino'gwowi neya domomjumovlavogaulo.

¹⁷ Kevu yiuwi'nokai a'mwo abolo tonyu ilaiyo to'no jugologaulo. Kevu yiuwi'nokai Jisasolluro a'mwo abolo tobuuraino kalo buuropino domollogaulo. Kevu Gooti toolluno luko yopi kwako tomuu'aro duuwimovlavogaulo. Aki kemi kwako akavida'ai a'mwo aguto kig toolluno yovo kuruv neya julomodomoropiyogaulo.

Krais tool danyu'nyuwuulo tonyu amaroka toolluro suvlomuujuko tovi neya uumjungovla'mwalano tovinokwono

¹⁸ Kevu ki'nato womdokwe togaikul kemi kwako akavida'ai a'mwo mido mollomwalokwe toorai ilaiyo to'no neya jugologaulo. Aki kemoro yogalo ikudodopure tonyu neya duumjunogaulo. A'mwo mido mollomwalokwe su tooro kemi yiuno pasudo ilaiyo tokwe kavo ikubemwojodopure toga'no kevu nuumjunmwalpiyo. Toro kugaikul kuruv a'mwo mido mollomwalokwe su tooro kemi magu'nyo saikullugolpi kuga kuruv neya duumjunogaulo.

¹⁹ Kevu pugaikul Gooti toolluno kuudo yauropi gamoro pasudo tonyu uumjunodopure togaikulluno tov kemi mido mollekumwalokwe su tooravuro ato tovida'ai danyu'nyuwuulo pun yasuwa'no nomapinogaikikono. Danyu'nyuwuulo amapi su toga kavo nokwo mokavla'mwalpinogaikikono. Kevu danyu'nyuwuulo yasuwa'no amapi su toorai kavo amokavlapi to'gwowi Gooti tool kuudo yaikuurowo'ji kemoro pasudo su tovino ilaiyo to'no winonekono.

²⁰ Kevnokweyogaikulluro kaiya'no pasudo yodopure tovino danyu'nyuwuulo amapi tov Gooti tool ilaiyo kuudo miyaikuuronekono. Toro kuvi kuruv kevu sugupasudo yodopure tovino danyu'nyuwuulo maropi kavo amokavlapi su to'gwowi Gooti tool kemoro pasudo su tovino ilaiyo to'no winonekono.

²¹ Krais tool kemi ikullo'mwojo'moneyokwe danyu'nyuwuulo ton me'no amarokaikono. Su tov kevu gamoro suvlomuujuko tovi kinomjumovla'mwalpino'moneyokwe aikuduuwallokaikono. Toro tovino tov gamoro aikuduuwalloka to'busuko pasudo aval'nodo ton neya domjumovlavogaulo. Gooti tool kevu sugupasudo su tonyu kuvinono mujumovla'mwalpino'moneyokwe me'no adekumarokaikono.

²² Kuudo neya jaullulo. Krais tool ma'no ma'no puru'monodo kuruv miyajukekono. Aki kuunano yogalo puru'monodo kuruv miyoukuu'najajukekono.

²³ Aki a'mwo pworo Krais su toollu kaiya'no yogalo bwolomorumwogapiyodopure kuga kuruv Krais toolno'gwowi a'mwo su toorai nobwolomorumwogapiyo'moneyokwe kaiya'no yogalo muujajukekono. Aki danyu'nyuwuulo amaroka toga luko aro majurugollajukekono. “Nuu mido nekuma'mo toonyuno luko neya jogaulo.” Majurugollajukekono. Toro kwol kuruv gavnokwe tool Gooti pi'mwono to'no jainyubwo'dowodo toolluro ato tovi amorubwenyajukekono.

²⁴ Krais su tool nemoro ma'no ma'nodo ton gavnokweyolluro kulako tovi ilomolloulloso'no amokavlavokaikono. Toro mokavla'mno sumaiyokwe i'noguropte tovi muunyu toru sulejuku'narokaikono. Nemoro ma'no ma'nodo ton gamoro kulako tovi sulomolloullosoka su tov aro'mokwono. Nemoro ma'no ma'no yo'moneyokwe kuudo tooro yiunokuudo neya bolopipinorogano. Aki nevu aiyo sumo'na'ji tovi'aro gamoro sugupasudo tonyuno'gwowi neya mujumovla'mwalano tovino'mokwono. Kuudo neya jaullulo. Krais toollu iwago aromiyopo tovida'ai imuulo amaroka su tovi'aro kevu ikulnodupu ilaiyo aiko te imo'nodupudogaikikono.

²⁵ Kevu sipsip tobuurobusuko imo'nodupudogaikikono. Sipsip su tooro kemi kuudo tovida'ai gomno gomno younopiyodupudo to'busuko kubalno kev kugaikul kuruv sumdomgu ma'no ma'no kuudo toorai airoungovlaiyajupogaikikono. Toro kuvi kuruv aga'no'gwowi kevu kemi Sipsip Duuwatokwe toolbusuko ikullumo'nodowodo toollomno aikomgu me'no buuru'ma'dupudogaikikono. Duuwatokwe su tool sipsip toorai yellukuromollomwalodowodo to'busuko kubalno kemoro kuullo tobuurai pi'mwono yellukuromollekumwalodowodekono.