1 Pita 1 - Gooti Toolluro Yogalokwono

Pitalluro yogalo muudu'nodo tovinokwono

¹ Nuu Pitalonyugono. Toro toonyu Jisas Kraisolluro kuurotokwe pwonyugono. Kevu Gooti gavnokwe toolluro a'mwo abolo kuunodo wimo'nyo'mo me'no jaikubweyodowodo togaikullomno nuu pas akav sokwollekwopiyamono. Kevu Jisasolluro a'mwo abolo togaikul proovins gomno gomno younopiyo'mno mwalodupudogaikikono. Proovins mwalodupudo su tomuuno yovo ton, Poontoske'aro Galesiyake'aro Kapadoosiyake'aro Esiyake'aro Bitiniyake'aro tomuu mwalodupudogaikikono.

² Jisas Kraisolluro Ganumiyago Gooti tool aiyogada'ai kemi me'no ikwono'no ajaikubweyokaikono. Aki gamoro Kuullo kuulekumwalodowodo toollu'aro kevu gamoro a'mwo abolo kuunodo wimo'nodupudogaikikono. Gooti toolluro kemi su toro saikullugoloka tov aro tovino'mokwono. Kevu Jisas Kraisolluro yogalo tovi uumjungovla'mwalpino'moneyokwe tovinokwono. Aki gamoro mujako tokwe kemi mollol'movaikudukwopiyono'moneyokwe tovinokwono. Oo Gooti tool gamoro yasuwa'wino sugumaluko ton kemi guureji nokwo ikubwemovla'mwalonekono. Aki kevu sumwoluko kavo wosungovlaiyo'moneyokwe kuruv Gooti tool nokwo ikullo'mwojumwalonekono.

Nevu Gooti tooke aiyo yiunokuudo mujomwekovlaiyo'mo tovino sogwollo to'no kingovla'mdowado tovinokwono

³ Nevu Gooti toolluno yovo tovi neya ilomoropimwolowanonogano. Gooti su tool nemi Aguto Jisas Kraisolluro Gootekono. Aki gami Ganumiyagekono. Gooti su tool nemino kalo bwotonyo manekumwonyokwekono. Toro tool Jisas Kraisollu aiyo aiko te amodukavokaikono. Toro amodukavoka su tovi'aro Gooti tool ne kunollu kuruv aiyo imo'nyo'moneyokwe me'no mollumo'nanekubweyodowodekono. Toro tovino tov nevu Gooti toolluro muunyu kai'muuda'ai nonekullabwono tonyuno sogwollo to'no kingovla'mdowadonogano.

⁴ Gooti toolluro nonekullabwono su tovi kuvinono maranonogano. Gamoro nonekullabwono su tov buuto mabuuropiyonokwono. Aki kaiyako migolamo'nyokweyokwono. Aki su tov lapullo mimo'nyokweyokwono. Toro kuvi kuruv kevu Gooti toolluro ikullabwono su tonyu yere mama'dopure toga Gooti gavnokwe tool gamoro nekullabwono su ton gami ago muunyu kai'muu pi'mwono yellukuromollomwalodowodekono.

⁵ Toro to'busuko kubalno kevu Krais toollu kuudo uubweyodupudo tovino tov Gooti tool gamoro jurogudo tokwe kemi pi'mwono yellukuromollekumwalodowodekono. Toro yellukuromollekumwalowo'ji lukomgu kevu gavuge ilaiyo mujomwekovla'mwalpino'moneyokwe ma'no ma'nodo tovuro jurogudo tovida'ai yiunokuudo nobomollurolovekumokalokwonekono. Gooti tool kemi yiuno'no bomollurolovekumokalokwono su tov aiyowo'mo toga yiuwi'nokai a'mwo abolo tonyuro sumdo tovi kuu'maiyo toru'no nobomollolupto'nosonokwono.

⁶ Kevu Gooti tooke ilaiyo mwalmwalpino'moneyokwe mollurolovekumokalokwono su tovino kuudo yauropi ilaiyo to'no neya jogaulo. Toro togaikul aga tagunyo go'no go'nodo pworo kemi baikullumo'nodopure tooraida'ai jul'nyo pun ibwosunodupudogaikikono. Toro kuvi kuruv kevu tagunyo su toorai yiuno kula'nyo toga'gwono mokavlavopi ilaiyo nokwo yomjomwekovla'mwalpinogaikikono.

⁷ Kevu tagunyo baikullumo'nodopure toorai kula'nyo toga'gwo mokavla'mdopure su tovi'aro Gooti tool kemoro kuudo uubweyodupudo tovi yamju ikulloganyokwekono. Kevu gool tovino kuudo nyau'mwakovo. Gool tov kuunodo'mdukoneyokwe tovino yamju wiyoganyo'mo tooro gool tovi duko tokwe dovelogullumowopiyodupudorogano. Su toro to'busuko kubalno buro'nyo buro'nyo tagunyo kemi abaikullumo'nupi su tooro kemoro kuudo uubweyodupudo tov kuunodo'mdukoneyokwe tovino yamju ikulloganyo'morogano. Toro kuvi kuruv kemoro kuudo uubweyodupudo to'gwowi gool tovi uuwolo'mdowodokwono. Aki Jisas Kraisol kuu'maiyo toru'no abwiyalo'no'ji toga kemoro kuudo uubweyodupudo tovino ilomodomoropiyawo'ji gamoro jurogudo tov kemi nekubweyonekono. Aki yovo aguto nekullabwonekono.

⁸ Kevu Krais Jisasollu yere mwonodupudo kuvi kuruv kwolluno kalo buuropino ikullunodowodogaikikono. Aki kevu Krais Jisasollu yere mwonodupudo kuvi kuruv kwolluno kuudo uubweyodupudogaikikono. Aki kevu Krais Jisasolluno ilaiyo bwotonyo yodupudogaikikono. Ilaiyo bwotonyo su tov kwako akavida'ai ilaiyo tonyu uuwolo'mdowodokwono. Aki ilaiyo su tovino a'mwo pwol gamoro mago tokwe jo'moneyokwe kuruv supto yonekono.

⁹ Kevu Krais toolluno kuudo kuubwemwakopo su tovino tov Gooti tool ma'no ma'nodo tovuro kirumwallo tovida'ai yiunokuudo bomollurolovekumokalokwonekono.

¹⁰ Gooti toolluro bomollurolovekumokalokwono su tovino aiyoga proofet kworo kuruv kuudo purukwe'aro youromallo'mo kwinyajuporogano. Aiyogasuro proofet su tooro Gooti toolluro yasuwa'wino sugumaluko tov kemiyo'mo sokwollovi'mwojaikubwengiko su tovino me'no amoruujajuporogano. Toro moruujuno sumaveyokwe yogalo su tovino kavlo kuruv a'mgono bwotonyo sajuporogano.

¹¹ Aki Krais toolluro Kuullo tool proofet su toorai aulomwallajukekono. Toro aulomwallajuko su toollu'aro proofet tooro Krais toolluro danyu'nyuwuulo yere mama'duke tonyuno sumdomgu kugada'ai danyu'nyuwuulo su tonyuno kuu'maiyo toru amoruujajuporogano. Aki Krais toolluro danyu'nyuwuulo me'no marowo'ji lukomgu gami noonyumwonyu sugudo kuunodo wimo'nono kunyuno kuruv proofet yogalo me'no amoruujajuporogano. Toro kuvi kuruv yogalo amoruujajupo su tovino aro kuudo soureya'mgonyajuporogano. “Yogalo akan ala'mwolluno'mdukono? Aki su tool adoga kuvinono imo'nonoldukono?” Proofet tooro su toro tovino kuudo kuuno soureya'mgonyajuporogano.

¹² Gooti tool aiyoga proofet su toorai aro tovino me'no kuuduuwallokaikono. “Kemoro proofet yogalo moruudodupudo womdo su tov kevnokweraiyo'mo'maiyo. Toro kuvi kuruv yogalo amoruujajupo su tov a'mwo abolo lukomguda'ai billumo'nupino tonyo'mokwono.” Gooti tool proofet su toorai kuu'maiyo me'no kuuduuwallajukekono. Toro te proofet yogalo su tokwe a'mwo kuurotokwe tooro modomollodupudorogano. Toro modomollodupudo su tov kev togaikullo'mokwono. Aki Gooti tool aiyogasuro su toorai gamoro Kuullo tool muunyu kai'muuda'ai kwolomoropiyabokaikono. Toro toolluro jurogudo tokwe Krais toolluno kuuguudo sugudo tov amodekumollajuporogano. Aki ensel kworo kuruv proofet tooravuro yogalo su tovino kavlo tov kuudo youromallo'mo winodupudorogano.

Nevu sugupasudo tollovogai yomjomwekovlaiyo'moneyokwe Gooti tool me'no donekuma'dowodo tovinokwono

¹³ Toro tovino tov kevnokweyogaikulluro kuudo tonyu neya jovraimwonyogaulo. Aki kevnokweyogaikulluro pasudo kunyu kuruv pi'mwono neya domollomwalnogaulo. Toro togaikul Jisas Kraisolluro kuu'maiyo biyalo'nono toga Gooti toolluro yasuwa'wino sugumaluko tov nekubweyonogaikikono. Gooti toolluro yasuwa'wino sugumaluko ikubweyono su tovino kemoro yiuwi'nokai kuullutago tokwe po'dogalo gudupolaropi sogwollo to'no denomwalogaulo.

¹⁴ Sumdomgu kevu kuudo maiyo imo'nodupu kevnokweyogaikulluro kulako tonyu ilaiyo igollunyo'mo to'no amjumovlaiyajupogaikikono. Toro kuvi kuruv aga'no'gwowi kevu pasudo uumdo su tovi dukwopiyopi kwoloraiyo ton kemi kuunumiyago toollu uumjunodupudo togaikulbusuko neya jomjomwekovlavogaulo.

¹⁵ Gooti tool kemi me'no adekumarokaikono. Gooti adekumaroka su tool yiuno sugudo to'nodekono. Toro te kevu kemi me'no adekumaroka su toolbusuko neya imo'nopi gamoro sugupasudo tollovogai yiuwi'nokai toga neya jomjomwekovlavogaulo.

¹⁶ Gooti toolluro yogalo puruv aro sakwollungikokwono. “Nuu Gooti toonyu yiuno sugupasudo to'no yodumdonyugono. Nuu su toro yodumdo tovino tov kev kugaikul kuruv nuvnokwenyuro sugupasudo togai to'no neya jomjomwekovlavogaulo.” Toro sakwollungiko tovino tov kevu gamoro sugupasudo su tollovogai to'no neya jomjomwekovlavogaulo.

Gooti tool nemi mubiyo bwotonyo tokwe abiyonekumaroka tovinokwono

¹⁷ Kevu Gooti toollu, Oo mi Nyunumiyagoloo, subusu'nyogalo wuudodupudekono. Gooti su tool a'mwo abolo tonyu jainyubwollo'mo tool yiuno avalo punyuno to'no kuu'dello muubweyokwekono. Toro kwol kuruv kevu yiuwi'nokai pwolno puru'monodo tobuurekulluro pasudo tonyu ikwonowo'ji yiuno pi'mwono to'no jainyubwollokwekono. Toro te kevu kwako akavi bomwallo togaikulbusuko mwalopi toga Gooti su toollu kwako tomuu'aro neya wiyopi jomjomwekovlavogaulo.

¹⁸ Kevu aro tovino kuudo me'no youroma'dupudogaikikono. Sumdomgu toga kevu kemi tellukweyago tooravuro kaiya'no pasudo somjomwekovlaiyajupo su toorai uumjunodupu yiuno aval'no somjomwekovlaiyajupogaikikono. Pasudo su tooro ikulsulo ilaiyo mai'nyokweyorogano. Kevu kaiya'no pasudo su toorogai kwa'mgu tomuu yomjomwekovla'mdopure togaikullu Gooti tool kemi mollurolovekumallo'moneyokwe me'no abiyekumarokaikono. Su toro abiyekumaroka tov kaiyako i'nopiyodupudo goolodeyo oo silvadeyo togai abiyekumarokalmaiyo.

¹⁹ Toro kuvi kuruv mubiyo bwotonyo tokwe to'gwowi kemi abiyekumarokaikono. Mubiyo bwotonyo su tov Krais toolluro mujako abwoloka tokwe abiyekumarokaikono. Krais su tool Gooti toolluro sipsip muugunyo kaiya'no puru'monodo kuruv migolamo'nyungiko toolbusukekono.

²⁰ Aiyoga kwako akav yere mimo'nyoduke togada'ai Gooti tool Krais su toolluro mujako abwolawo'ji tokwe kemi mobiyekumallo'moneyokwe Krais toollu me'no ajesokaikono. Toro te aiyowo'mo akaga Gooti tool Krais su toollu kemi kuu'maiyo toru'no me'no abomollolupto'naikubweyokaikono.

²¹ Toro te kevu Krais su toollu'aro Gooti toollu kuudo me'no kuubwemwakopogaikikono. Aki Gooti su tool Krais toollu aiyo aiko te moduka'mno sumaiyokwe gamoro bako bwotonyo toru me'no amorumwallokaikono. Toro tovino tov kevu Gooti su toolluno kuudo uubweyodupudogaikikono. Aki Gooti su toolluno sogwollo to'no kinodupudogaikikono.

Nevu Jisasolluro a'mwo abolo pubuuraino kalo buuropino neya mollumwalano tovinokwono

²² Kevu Gooti toolluro nebal'no yogalo tovi kuumjunopo tovino tov kemi ma'no ma'no pasudo tooraida'ai me'no yal'mo'no'mno sugudo kwimo'nopogaikikono. Toro te kevu Jisasolluro a'mwo abolo tobuurekul kevuge avalo tellugwai'yago tello'mwo kuunodo tonbusuko ikullumo'nodupudo pubuuraino kalo buuropino mollodupudogaikikono. Toro te kemida'ai avalo su tobuuraino kemi poowokalago kuunodo tokwe kalo buuropino pasudo su tokwe imgu amgu guureji muunyu toru'aro neya domollogaulo.

²³ Kemoro aiyo tov kulako yere buuropiyodowodo tovi'aro sumo'nopogaikulmaiyo. Toro kuvi kuruv Gooti toolluro yogalo tovi'aro aiyo sumo'nopogaikikono. Yogalo su to'gwowi kaiyako mabuuropiyokweyokwono. Aki yogalo su tov a'mwo abolo tonyu aiyo yiunokuudo mujomwekovlaiyo'moneyokwe tov wiyodowodokwono. Gooti toolluro yogalo su tov yiunokuudo mujo'movla'mwalonokwono.

²⁴ Su toro tovino Gooti toolluro yogalo sakwollungiko puruv aro dodowodokwono. “Yiuwi'nokai a'mwo abolo ton gwo'gwopto to'busukogano. Aki a'mwo abolo su tonyuro sugumaluko tov gwo'gwopto tovuro pwopto ki'nodowodo to'busukokwono. Gwo'gwopto tov nobuukuropiyokweyokwono. Aki pwopto kuruv buukuropiyowo'ji bwolo'dawodokwono.

²⁵ Toro kuvi kuruv Aguto toolluro yogalo to'gwowi yiunokuudo mujo'movla'mwalonokwono.” Sakwollungikokwono. Toro te Aguto toolluro yogalo su tov gamoro kuuguudo sugudo me'no amodekumollopo su tov kurukwono.