1 Koorin 1 - Gooti Toolluro Yogalokwono

Poololluro kuuguudo muudu'nodo tovinokwono

¹ Nuvu Poolonyugono. Toro toonyu Krais Jisasolluro kuurotokwe imo'nyo'moneyokwe Gooti gavnokwe tool ilaiyo wino'no mi me'no ajanubweyokanyugono. Aki a'mwo pwol nemi nellugwai'yago toolbusuko nonekullumo'nodowodo tool nuvuge akaru amwallo. A'mwo su toolluno yovo tov Soostenesolekono.

² Toro toonal kevu wagwolago Koorinda'ai Gooti toolluro mollu'bwoto togaikullomno pas akav saikuukwollumwakuuwolo. Krais Jisasol gavnokweyolluro a'mwo abolo sugudo wimo'nyo'moneyokwe me'no ajaikubweyokaikono. Aki yiuwi'nokai tomuuda'ai a'mwo abolo ton nemi Aguto Jisas Kraisolluno yovo tovida'ai, “Donekullo'mwojonoo,” subusu'nyogalo wuudodupudo kunyu kuruv Gooti tool gamoro a'mwo abolo wimo'nyo'moneyokwe jesodowodogano. Toro te kevuge'aro nevuge'aro yiuwi'nokai tonollu Aguto nonekullumo'nodowodo tool Krais Jisasol kwol kuunogano.

³ Toro te nemi Nellunumiyago Gooti tooke'aro nemi Aguto Jisas Kraiseke'aro tonumdalluro yasuwa'wino sugumaluko tovida'ai pun nokwo ikubwemwalbullunonumdakono. Aki kemoro sumwoluko ton kavo wosungovlaiyo'moneyokwe nekullo'mwojumwalbullunonumdakono.

⁴ Gooti tool Krais Jisasollu'aro gamoro yasuwa'wino sugumaluko ton kemi me'no aikullabokaikono. Toro tovino tov nuvu kemino Gooti toollu, “Nenyoo,” subusu'nyogalo wuudodumdonyugono.

⁵ Toro te kevu Krais Jisaseke me'no uuguro'mwonyodupudo togaikul yiuwi'nokai sugudo go'no go'nodo tollovo me'no ma'dupudogaikikono. Toro togaikul bwotonyagokwe imo'nodupudogaikikono. Kevu Jisasolluro mollu'bwoto togaikul su toro me'no ma'dupudo tovino tov kevu kuuguudo ilaiyo to'no modomollodupudogaikikono. Aki Gooti toolluro yiuwi'nokai pi'mwo kuudo judo'no judo'no ikullabodowodo kugai'aro tonyuno you'movla'mdupudogaikikono.

⁶ Kevu su toro ma'dupudo tov aro tovino kuu'maiyo toru'no ikuduuwallodowodokwono. Nuvu Krais toolluno me'no sodekubwasajo kuuguudo su tov yiuno nebal'nodokwono. Su toro tovino ikuduuwallodowodokwono.

⁷ Toro te kevu Gooti toolluro yiuwi'nokai ikullabodowodo tollovo me'no ma'dupudogaikikono. Gooti tool gamoro Kuullo toollu'aro buro'nyo buro'nyodeyo ton me'no ikullabodowodo tovino tov kevu noonyumwonyu punyuno supto mimwakovo. Kevu yiuwi'nokai ton me'no ma'dupudo togaikul aga nemi Aguto Jisas Kraisol lukomgu aki aiko te wolabwono toolluno sogwollo to'no kinodupudogaikikono.

⁸ Nemi Aguto Jisas Kraisol lukomgu aki aiko te kwolabwo'ji toga iruko su tollugwoji kevu jul'nyo nyubwosunpiyo. Toro tovino Gooti tool jurogudo daikullumwojodowodekono. Agada'ai yiuno aiyowo'mo toga'no kevu guureji daiyo'moneyokwe jurogudo tono tono daikullumwojumwalonekono.

⁹ Gooti su tool yiuwi'nokai buro'nyo buro'nyodeyo pun yo'mo ado'ji tov sukwo miyokwekono. Toro toolluno tov yiuwi'nokai su ton kuvinono yonekono. Kevu gamoro Kwolaiyo tooke ibwoto'numwalpino'moneyokwe Gooti tool kemi me'no adekumarokaikono. Gamoro Kwolaiyo su tool Jisas Kraisol kwekono. Aki toro tool nemi Agutekono.

Jisasolluro mollu'bwoto ton go'no go'no seru'mdeyapinopo tovinokwono

¹⁰ Miyobuuravoo, nemi Aguto Jisas Kraisolluro yovo tovida'ai kemi guureji aro aikudumono. Kevu gomno gomno nyeru'mdeyapinpiyokwe tovino yogalo miyoullajunpinono. Toro kuvi kuruv kevu yiuwi'nokai togaikul guureji neya guro'mwonyopi avaikuudo to'no neya jou'movlavogaulo. Aki kevu Gooti toolluro ilaiyo winodowo'jure tonyu aval'no neya duumjungovlavogaulo.

¹¹ Miyobuuravoo, kemoro yogalo youllajunodupudo tonyuno a'mwo abolo pun mi me'no anyudopokwono. A'mwo abolo su ton abolo puvuro ago tovida'ai mwalodupudogano. Abolo su tovino yovo tov Kloowiyovokwono.

¹² Toro te kevu pugaikul aro dodupudogaikikono. “Oo nuvu Poolollu kuumjunmwakono.” Aki pugaikul, “Oo nuvu Apoolosollu kuumjunmwakono.” Aki pugaikul, “Oo nuvu Pitallu kuumjunmwakono.” Aki pugaikul, “Oo nuvu yiuno Krais toolluno kuumjunmwakono.” Dodupudogaikikono.

¹³ Kevu buro'nyo kuudo jukiyau'mwakovo? Kevu Krais toollu go'no go'no nokwo molloru'mdowapipinogaikuldukono? Awiyo. Kevu ku'nono mamolloru'mdowapipinogaikikono. Kevu kuudo neya jaullulo. Krais tool kemi ikullo'mwojo'moneyokwe amovoromiyoguroptowosopekono. Nuu Poolonyuno'gwowi kemi ikullo'mwojo'moneyokwe i'noguropte tovi mabolonyugono. Aki moro yovo tovida'ai kevu wonyo muuvollunodupudogaikikono.

¹⁴ Nuu yiuwi'nokai togaikullu wonyo amogalaikuvollo'mujuko'mno'juki kevu bwotonyago togaikul aro adopujukogaikikono. “Oo nuu Poololluro yovo tovida'ai kuuvollunonyugono.” Su toro nokwo adopujukogaikikono. Toro kuvi kuruv nuvu kemida'ai a'mwo yiuno pworal tooralluno wonyo amogaluvollonyugono. A'mwo su tooralluno yovo tov Krisposeke Gaiyoseke toorakono. Toro tooralluno to'no amogaluvollo tovino nuu Gooti toollu, “Nenyoo,” wuudodumdonyugono.

¹⁵ Moro su toro wuudodumdo tov aro tovinokwono. Kevu aro madumwalpinogaikikono. “Oo nuvu Poololluro yovo tovida'ai wonyo kuuvollunonyugono.” Madumwalpinogaikikono.

¹⁶ Oo nebalokwono. A'mwo Stefanasolluro ago tovida'ai mwalodupudo kugai'aro tonyu wonyo amogaluvollonyugono. Aki su tonyu muunyu toru a'mwo abolo pugai'aro wonyo amogaluvollonyudukono oo mamogaluvollonyudukono? Su toro tovalluno kuudo miyau'mwakono.

¹⁷ Toro te kevu kuudo neya jaullulo. Krais tool mi amonuwopiyaboka tov a'mwo abolo tonyu wonyo mogaluvollo'moneyokwe amonuwopiyabokalmaiyo. Toro kuvi kuruv kuuguudo sugudo tokwe moruudomollo'moneyokwe amonuwopiyabokanyugono. Krais toolluro i'noguropte tovi aboloka su tov jurogudo kuunodokwono. Toro te jurogudo su tov piyarupto imo'nowo'ji wollainyo nyumo'numwalo'jokwe nuu kuuguudo sugudo tokwe amoruudomollumi toga a'mwo pi'mwo kuudokwe pworavuro yogalo sugumaluko togai nomoruudomollumiyo.

Gooti toolluro jurogudo tov Krais Jisasollu wo'dowodo tovinokwono

¹⁸ A'mwo abolo pun kaiyako i'nyo'moneyokwe puuto tovi pla'mdupudogano. Toro pla'mdupudo su ton i'noguropte tovi aboloka Jisasolluno kuuguudo tovino aro dodupudogano. “Oo kuuguudo su tov junorukuudokwono.” Dodupudogano. Toro dodupudo kuvi kuruv Gooti tool nemi du'muudo tovida'ai amollurolovonekuma'mwalluko tonolno'gwowi junorukuudo manekullumo'nodowodokwono. Toro kuvi kuruv Jisasolluro i'noguropte tovi aboloka tovino kuuguudo su tov aro bomollolupto'nanekubweyodowodokwono. “Oo Gooti tool jurogudoldeyo.” Bomollolupto'nanekubweyodowodokwono.

¹⁹ Su toro tovino Gooti toolluro yogalo puruv aro sakwollungikokwono. “Nuvu a'mwo abolo kuudo do'moptokwe tonyuro pi'mwo kuudo tovi kaiyako nomolloujulowapimonyugono. Aki toro tonyuro kuudo yovo'dogallau'dopure kullovai kuruv yiunokuudo nuumjuku'monyugono.” Sakwollungikokwono.

²⁰ Toro te Gooti toolluro yodowo'jure tovida'ai kwako akavuro a'mwo pi'mwo kuudokwe tooro junorukuudokwe toorobusuko imo'nodupudorogano. Aki Moosesolluro loowo tovino pi'mwo kuudokwe kworo kuruv junorukuudokwe toorobusuko imo'nodupudorogano. Aki kwako akavida'ai a'mwo yogalo youllajunyo'moneyokwe kuudo kuural'moptokwe imo'nodupudo kworo kuruv junorukuudokwe toorobusuko imo'nodupudorogano. Gooti toolluro yodowo'jure tovida'ai yiuwi'nokai kwako akavida'ai a'mwo tooravuro pi'mwo kuudo su ton a'mwo junoruko tooravuro yasuwa'yogalo to'busuko imo'nodupudogano.

²¹ Gooti tool pi'mwo kuudokwekono. Toro tool aro kuudo yau'dowodekono. Kwako akavida'ai a'mwo abolo ton kevnokwenyuro pi'mwo kuudo tokwe mino kuudo ku'nono miyouronumapinonyugono. Gooti tool su toro kuudo yau'dowodo kuvi kuruv gamino kuudo youromallo'moneyokwe puuto to'gwowi aro tomgu'aro soulosokaikono. Jisasol i'noguropte tovi abolokaikono. Su toro aboloka tovino nevu moruudomollodowa'jure tovida'ai a'mwo abolo pun wuu'nopi aro dodupudogano. “Oo kuuguudo su tov junoruko tooravurokwono.” Su toro dodupudo kuvi kuruv Gooti toolno'gwowi kuuguudo sugudo su to kuvi'aro a'mwo abolo kuudo uubweyodopure tonyu ma'no ma'nodo tovuro kirumwallo tovida'ai mollurolovoma'dowodekono.

²² Juu tooro Gooti toolluro kuuguudo tovino aro dodupudorogano. “Oo nevu duuwallo jurogudo punyu kwona'ji toga'no danonogano. “Kuuguudo su tov nebalokwono.” Danonogano.” Aki Juu tooravuro miyawosunodupudo ton aro dodupudogano. “Kuuguudo puruv nemoro pi'mwo kuudo tovi kuumjuno'ji tov, “Oo nebalo'mdeyo,” nokwo danonogano.” Dodupudogano. Toro kuvi kuruv Gooti toolluro kuuguudo to'gwowi kemoro pi'mwo kuudo tovi muumjunodowodokwono. Toro tovino tov aro dodupudogano. “Oo Gooti toolluro kuuguudo tov yiuno junoruko tooravuro'mdeyo.” Dodupudogano.

²³ Toro te Krais tool i'noguropte tovi aboloka tovino kuuguudo su tokwe nevu moruudomollodowadonogano. Toro moruudomollodowa'jure toga Juu tooro kuuguudo su tovi wuu'nyo'mo kwoda'molo to'no yodupudorogano. Aki Juu tooravuro miyawosunodupudo kun kuruv aro dodupudogano. “Oo Gooti toolluro kuuguudo tov yiuno junoruko pworavuro yasuwa'yogalokwono.” Dodupudogano.

²⁴ A'mwo abolo pun su toro dodupudo kuvi kuruv Gooti toolluro me'no doma'dowodo Juuwodeyo oo a'mwo abolo Juu miyawosunodupudodeyo yiuwi'nokai su tonyuno'gwowi kuuguudo su tov Krais toolluno yodubwasodowodokwono. Gooti toolluro jurogudo tokwe'aro pi'mwo kuudo tokwe'aro toval Krais toolluda'ai lokabodubulovakono.

²⁵ Gooti toolluro pi'mwo kuudo su tovino kwako akavida'ai a'mwo pworo aro kuudo yau'dupudorogano. Oo junorukuudokwono. Toro kuudo yau'dupudo tov kuvimaiyo. Gooti toolluro pi'mwo kuudo su to'gwowi kwako akavida'ai a'mwo tooravuro pi'mwo kuudo tonyu uuwolo'mdowodokwono. Aki Gooti toolluro jurogudo tovino a'mwo pworo aro kuudo yau'dupudorogano. Oo wollainyokwono. Toro kuudo yau'dupudo tov kuvimaiyo. Gooti toolluro jurogudo su to'gwowi kwako akavida'ai a'mwo tooravuro jurogudo tonyu uuwolo'mdowodokwono.

²⁶ Nuugeravoo, kevu kuudo pun jaullulo. Gooti tool kemi adekumaroka toga kevu kwako akavida'ai a'mwo tooravuro sumdo tovi pi'mwo kuudo tokwe mwimo'nyajuporekikono. Toro kworekullu kuruv Gooti tool adekumarokaikono. Aki kevnokwe toorekul jurogudo maiyokwe imo'nodopure kworekullu kuruv Gooti tool adekumarokaikono. Aki kevu kemi iko tovasuda'ai gapwogullo toorekulbusuko imo'nodopure kworekullu kuruv Gooti tool adekumarokaikono. Kevu su toro sumo'nyajupo tonyuno kuudo nyallulo'gwonmwalpiyo.

²⁷ Kwako akavida'ai a'mwo tooravuro sumdo tovino'gwowi aro kuudo yaikuu'dupudorogano. Oo junorukuudokwerogano. Aki, Jurogudo maiyorogano, kuudo yaikuu'dupudorogano. Toro kuudo yaikuu'dopure kugaikul kuruv Gooti tool kwako akavida'ai pi'mwo kuudokwe su toorai kuudo wuuteyo'moneyokwe kemi adekumarokaikono. Toro me'no adekumaroka togaikul kwako akavida'ai a'mwo su toorai uuwolovopi wogulo nyuwo'galpinogaikikono.

²⁸ Aki kwako akavida'ai tooravuro sumdo tovi yovo aguto imo'nodupudo toorai bwolomorumwogapiyo'moneyokwe Gooti tool kevu kwako akavida'ai yovo nonaguto imo'nodopure tobuurekullu adekumarokaikono. Toro adekumaroka tovino tov kwako akavida'ai yovokwe imo'nodupudo su ton a'mwo yasuwa'nodo toorobusuko imo'nodupudorogano.

²⁹ Toro te a'mwo pwolnodo kwol kuruv Gooti toolluro sumdo tovi ilomoropunyu nyawo'jokwe Gooti gavnokwe tool su toro toorai bwolomorumwogapiyodawodekono.

³⁰ Yiuno Gooti judo toolluro kemi ilaiyo yaikullugoloduke tovida'ai kevu Krais Jisaseke me'no uuguro'mwonyodupudo togaikul kweke mujomwekovla'mdupudogaikikono. Toro mujomwekovla'mdupudo su toollu'aro Gooti tool gamoro pi'mwo kuudo ton nekuduuwallodowodekono. Aki Krais Jisas su toollu'aro nevu Gooti toolluro sumdo tovi sugudo imo'nodowa gamoro a'mwo abolo kuunodo wimo'nodowadonogano. Aki toro toollu'aro Gooti tool nemi mobiyonekuma'dowodekono.

³¹ Nevu Gooti toolluro yogalo su tovi neya uumjunmwalano'moneyokwe puukwollo puruv aro sakwollungikokwono. “Punol nevnokwenolluno ilomoropunyu nyumwala'jo. Toro kunol kuruv yiuno Aguto toolluro womdo sopingiko tovino'gwowi neya ilomoropimwolowanonogano.” Sakwollungikokwono.