1 Joon 4 - Gooti Toolluro Yogalokwono

Proofet tooravuro kuullo kuuluumwalodupudo tooraino kuunano'mdukono oo Gooti toolluroldukoneyokwe tovino iworovomallo'mo tovinokwono

¹ Mi ibwoto'nyobuuravoo, a'mwo bwotonyago tooro kuunano proofet imo'nodupudorogano. Toro tooro yiuwi'nokai kwako akavuro go'no go'nodo tomuu aro modomollodupudorogano. “Oo Gooti toolluro Kuullo toolluro yogalo anekullaboka tokwe amokamwakuuwono.” Modomollodupudorogano. Toro modomollodupudo tovino tov yiuwi'nokai su tooraino kevu kuudo nuubwemwalpiyo. Toro kuvi kuruv proofet modomollokwe su tooravuro kuullo kuuluumwalodupudo tooro kuunano'mdukono oo Gooti toolluda'aiyo'mdukoneyokwe tovino gallainyubwollo'mo tov kevu yamju neya duuwiyoganogaulo.

² Gooti toolluro Kuullo tool a'mwo toollu kuuluumwalodowodoldukoneyokwe tovino kuudo youromallo'mo puuto tov arokwono. A'mwo pwol aro amodomollo'ji tov, “Jisas Kraisol kwako akavi wolabo'no a'mwo kulakokwe kuunodo pwolbusuko abwollumo'nokaikono.” Su toro amodomollo'ji toolluno kuudo yaupinekono. Oo Gooti toolluro Kuullo tool a'mwo modomollokwe su toollu me'no kuuluumwalodowodoldeyo. Kuudo yaupinekono.

³ Toro kuvi kuruv a'mwo modomollokwe pwol Jisasolluno tov, “A'mwo kulakokwe kuunodo pwolbusuko mabwollumo'nokaikono.” Su toro adodoluwoso'ji to'gwowi kevu kuudo youromapinekono. A'mwo modomollokwe su toolluro yogalo tov Gooti toolluda'ai bodowodo'maiyo. Toro kuvi kuruv yogalo su to'gwowi Krais toollu ikomago wimo'nodowodo toolluda'ai bodowodokwono. Kevu Krais toolluro ikomago nobwono su toolluno me'no wuu'nodupudogaikikono. Aki ikomago wimo'nodowodo su toolluro kuullo tool kwako akavi me'no bomwalodowodekono.

⁴ Mi Kwoloraiyobuuravoo, kev togaikulno'gwowi Gooti toolluro a'mwo abolo kuunodo me'no wimo'nodupudogaikikono. Aki kevu kuunano proofet su toorai me'no uuwolo'mdupudogaikikono. Kevu me'no uuwolo'mdupudo su tov aro tovinokwono. Gooti toolluro Kuullo tool kemi kuulekumwalodowodekwono. Toro tool kwako akavida'ai a'mwo su tooravuro kuullo kuuluumwalodowodo toolluno'gwowi me'no uuwolo'mdowodekono.

⁵ Toro te kuunano proofet su tooro kwako akavida'aiyorogano. Toro tovino tov kuunano proofet su tooro kwako akavida'ai yogalo toorogai modomollodupudorogano. Toro modomollodopure tovi yiuno kwako akavida'ai a'mwo abolo tono kaduko wiyodupudorogano.

⁶ Toro kuvi kuruv nev tonolno'gwowi Gooti toolluronogano. Aki nemoro yogalo moruudodowa'jure tovi yiuwi'nokai a'mwo abolo Gooti toolluno kuudo youroma'dupudo ton kaduko nekuu'nodupudogano. Nevu su toro tonyuno aro iworovomallokwenogano. Oo Kuullo kuuluumwalodowodo tool nebal'nodoldeyo, iworovomallokwenogano. Toro kuvi kuruv Gooti toolluro a'mwo abolo mwimo'nodupudo tono'gwowi nemoro yogalo moruudodowa'jure tovi kaduko manekuu'nodupudogano. Toro manekuu'nodupudo su tovi'aro nevu aro iworovomallokwenogano. Oo kuullo kuunano youkuu'najokwe tool a'mwo abolo su tonyu kuuluumwalodowodoldeyo. Su toro tovi'aro iworovomallokwenogano.

A'mwo pwol Gooti toolluno kalo buuropino kwino'ji tool a'mwo abolo pubuuraino kalo buuropino neya winmwalono tovinokwono

⁷ Mi ibwoto'nyobuuravoo, nevu Jisasolluro a'mwo abolo pubuuraino imgu amgu kalo buuropino neya amollogawano. Su tov aro tovinokwono. Kalo buuropino winyo'moneyokwe pasudo su tov Gooti toolluda'ai bodowodokwono. Aki yiuwi'nokai a'mwo abolo kalo buuropino winodupudo ton Gooti toolluro kwoloraiyo me'no wimo'nodupudogano. Aki toro ton Gooti toolluno kuudo me'no youroma'dupudogano.

⁸ Kuudo neya jaullulo. Gooti tool yiuwi'nokai toga yiuno kalo buuropino to'no winyokwekono. Toro tovino tov yiuwi'nokai a'mwo abolo kalo buuropino mwinpi ton Gooti su toolluno kuudo ku'nono miyouroma'dupudogano.

⁹ Toro te Gooti tool gamoro kalo buuropino nemino winodowodo su tovino kuu'maiyo toru'no nekuduuwallo'moneyokwe tov gavnokweyolluro Kwolaiyo pwolnodo toollu kwako akavino kwolomonekwopiyabokaikono. Su tov aro tovino'mokwono. Nevu gamoro Kwolaiyo su toollu'aro aiyo yiunokuudo mujomwekovlaiyo'moneyokwe kwolomonekwopiyabokaikono.

¹⁰ Kuudo neya jaullulo. Nevu Gooti toollu kalo buuropino yere mwinodowore toga Gooti toolno'gwowi sumdomgu nemino kalo buuropino me'no kwinyajukekono. Toro te Gooti su tool kalo buuropino pasudo tovino kuu'maiyo toru me'no anekuduuwallokaikono. Toro tool nemoro ma'no ma'nodo tovuro kirumwallo tovi monekudukwopiyo'moneyokwe gamoro Kwolaiyo toollu kwolomonekwopiyabokaikono.

¹¹ Mi ibwoto'nyobuuravoo, Gooti tool nemino su toro tomgu'aro kalo buuropino winodowodekono. Toro tovino tov ne kunol kuruv yiuwi'nokai Jisasolluro a'mwo abolo tobuuraino imgu amgu kalo buuropino neya amollogawano.

¹² A'mwo pwolnodo kwol kuruv Gooti toollu ku'nono mwonodowodekono. Toro kuvi kuruv nevu a'mwo abolo tobuuraino kalo buuropino anekulluno'ji to'gwowi Gooti tool nemi kuvinono nonekuguro'mwonyumwalonekono. Toro nekuguro'mwonyumwalodowo'jure tonollu'aro Gooti tool gamoro kalo buuropino pasudo tov a'mwo abolo tonyuro sumdo tovi kuu'maiyo toru'no bomollolupto'nubwemwalonokwono.

¹³ Gooti tool gavnokweyolluro Kuullo tool nemi me'no anekullabokaikono. Toro anekullaboka tovino tov nevu aro kuudo youroma'dowadonogano. Oo nevu Gooti toollu me'no uuguro'mwonyodowadonogano. Aki Gooti tool ne kunollu kuruv me'no nekuguro'mwonyodowodekono. Su toro kuudo youroma'dowadonogano.

¹⁴ Aki Gooti Ganumiyago tool yiuwi'nokai a'mwo abolo kwako akavi mwalodupudo tonyu ma'no ma'nodo tovuro kirumwallo tovida'ai bomollurolovomokalokwiyo'moneyokwe gamoro Kwolaiyo tool nemiyomno kwolomonekwopiyabokaikono. Gamoro Kwolaiyo kwolomonekwopiyaboka su toollu nevu me'no wonowono gamino kuuguudo tokwe kuu'maiyo toru'no dodoluwosodowadonogano.

¹⁵ Toro dodoluwosodowa'jure tovi a'mwo pwol wuu'nowo'ji aro dodowiyoku'bworosonekono. “Oo nebalo'mdeyo. Jisasol Gooti toolluro Kwolaiyekono.” Dodowiyoku'bworosonekono. Gooti tool a'mwo su toro adodowiyoku'bworoso'ji toollu nuuguro'mwonyonekono. Aki a'mwo su to kwol kuruv Gooti toollu nuuguro'mwonyonekono.

¹⁶ Toro te Gooti toolluro nemino kalo buuropino winodowodo su tovino nevu kuudo me'no youroma'dowadonogano. Aki su to kuvino kuudo uubweyodowadonogano. Kalo buuropino pasudo su tov Gooti toollu uuwo'dowodokwono. Toro te a'mwo pwol kalo buuropino winyo'moneyokwe pasudo su tovi amjumovlawo'ji tool Gooti toollu me'no uuguro'mwonyodowodekono. Aki Gooti tool a'mwo su to kwollu kuruv me'no uuguro'mwonyodowodekono.

¹⁷ Toro te nevu Gooti toollu uuguro'mwonyodowa'jure toga Gooti toolluro kalo buuropino pasudo tov nemoro poowokalago tonyu jurogudo yogullumwojonekwapimwalonokwono. Aki nevu a'mwo abolo punyuno kalo buuropino kuvinono amolla'ji tov Gooti toolluro aiyowo'mo togasuro kooti yogalo tovino luko mimwalanonogano. Luko mimwalano su tov aro tovinokwono. Krais tool kwako akavi mwalo'no toga kalo buuropino kwinyajuko su toolbusuko kubalno nevu kwako akavi mwalodowado kunol kuruv Krais toolbusuko kalo buuropino pasudo tokwe aval'no molludo'mwalanonogano. Toro tovino tov nevu Gooti toolluro aiyowo'mo kooti yogalo tovino luko mimwalanonogano.

¹⁸ A'mwo pwol kalo buuropino winodowodoldeyokwe luko yo'moneyokwe pasudo tov nonagutekono. Aki kalo buuropino winyo'moneyokwe pasudo su tov a'mwo toolluro poowokalago tovi neya kuullo'mowopiyonokwono. Kalo buuropino pasudo su tokwe aullo'mowopiyo'ji tov luko yo'moneyokwe pasudo tovino'gwowi bilomelpolodukwopiyonokwono. Luko yo'moneyokwe pasudo su tov arokwono. A'mwo pwol ma'no ma'no so'ji tool kirumwallo tovino luko imwalonekono. Toro tovino tov nevu a'mwo luko yodowo'jure su toollu kwona'ji toga aro kuudo youroonanekono. Oo a'mwo su tekwo Gooti toolluro kalo buuropino winyo'moneyokwe pasudo tov gamoro poowokalago tovi po'dogalo maullo'mowopiyodowodo'mdeyo. Su toro kuudo nokwo youroonanekono.

¹⁹ Nevu a'mwo abolo punyuno kalo buuropino nekullunodowodo su tov sumdomgu Gooti tool nemino kalo buuropino me'no kwinyajuko tovida'aiyokwono.

²⁰ Toro te Jisasolluro a'mwo pwol aro donekono. “Oo nuu Gooti toolluno kalo buuropino nyunodowodonyugono.” Toro dowo'ji kwol kuruv gami avalo Jisasolluro a'mwo abolo pubuuraino suroguudo sauro'ji to'gwowi a'mwo su tool yiuno kuunano yogalo to'no youkuu'nadonekono. Su tov aro tovinokwono. A'mwo su tool gami avalo Jisasolluro a'mwo abolo pubuurai me'no wonodowodekono. Toro wonodowodo kwol kuruv su tobuuraino kalo buuropino mwino'ji to'gwowi Gooti mwonodowodo kwolluno kuruv kalo buuropino ku'nono mwinonekono.

²¹ Toro te Krais toolluro loowo adonekullaboka tov arokwono. Yiuwi'nokai a'mwo abolo Gooti toolluno kalo buuropino winodupudo ton gamoro a'mwo abolo kubuuraino kuruv kalo buuropino neya winogapuro. Krais toolluro loowo adonekullaboka tov su torokwono.