1 Joon 2 - Gooti Toolluro Yogalokwono

Krais Jisasol nemi sobanyo mollonekuda'mdowodo toollunokwono

¹ Oo moro kwoloraiyo togaikulbusukobuuravoo, kevu ma'no ma'no pasudo tonyu nyumwalpiyokwe tovino nuvu pas akav sokwollekwopiyamono. Toro kuvi kuruv nemida'ai punol ma'no ma'no pasudo sa'ji tov nevuge'aro nemi Nellunumiyago Gooti tooke'aro tonollu akuuto toru momuugurovonekubweyo'moneyokwe pwol sobanyo mollonekuda'mdowodekono. Su tool pasudo idopto'nodo to'no mujumovla'mdowodo Jisas Kraisol kwekono.

² Gooti tool nemino tov sumwoluko noullo wosunyo'moneyokwe Krais Jisasol gavnokwe su toolluro kulako tov amorubwenokaikono. Toro morubwenyuno sumaiyokwe nemoro ma'no ma'nodo tovuro kirumwallo tovi amonekudukwopiyokaikono. Aki yiuno nemoro ma'no ma'nodo tovuro kirumwallo tonyuno to'no modukwopiyo'mo'maiyo. Toro kuvi kuruv yiuwi'nokai a'mwo abolo kwako akavi mwalodupudo tonyuro kirumwallo kugai'aro modukwopiyo'mokwono.

Jisasolluro a'mwo abolo kuunodo tonol Krais toolluro pasudo amjumovlaiyajuko to'busuko kubalno aval'no mujumovla'mwalano tovinokwono

³ Nevu Gooti toolluro yogalo adanekulloka tonyu kuvinono kuumjuna'ji tov nevnokwenolluno aro kuudo nokwo youromaranonogano. Oo nevu Gooti toolluno kuudo jouroma'mwakuuwono. Kuudo nokwo youromaranonogano.

⁴ Toro kuvi kuruv a'mwo pwolno'gwowi aro donekono. “Nuu Gooti toolluno kuudo souroma'mwakono.” Toro dowo'ji Gooti toolluro yogalo adanekulloka tonyu ku'nono muumjunonekono. A'mwo su tool kuunano yogalo to'no youkuu'najunonekono. Aki a'mwo su toolluro poowokalago tovi nebal'no yogalo tov mauluuwollokweyokwono.

⁵ Toro kuvi kuruv a'mwo pwol Gooti toolluro yogalo adanekulloka tonyu kuvinono kuumjuno'ji su toolno'gwowi Gooti toolluno kalo buuropino winyo'moneyokwe pasudo tovi suuwiyo kuunodo imwoju'nonekono. Toro te nevu Gooti toolluro yogalo adanekulloka tonyu neya uumjunanonogano. Nevu kuvinono kuumjuna'ji su tovi'aro nevnokwe tonolluno aro kuudo nokwo youroma'mwalanonogano. Oo nevu Gooti toollu me'no duuguro'mwonyumwakuuwono. Youroma'mwalanonogano.

⁶ Aki a'mwo pwol aro donekono. “Nuu Gooti toollu me'no uuguro'mwonyodumdonyugono.” Su toro ado'ji tool Krais toolluro pasudo amjumovlaiyajuko tonbusuko aval'no neya amjumovlavogawono.

⁷ Miyobuuravoo, kevu kalo buuropino mollumwalpino'moneyokwe tovino loowo sokwollekwopiyamwako akav muuduko'maiyo. Toro kuvi kuruv loowo su tov uumdokwono. Muudu'nodo togada'ai loowo su tovino kevu me'no kuu'nugelabiyajupogaikikono. Toro te loowo uumdo su tov muudu'no kuu'nopo togada'ai maro'mno me'no mwora'dupudogaikikono.

⁸ Loowo su tov uumdo kuvi kuruv aiyo kuuno imo'nodowodokwono. Loowo su tovi Krais tool kuvinono kuumjunyajukekono. Toro toolbusuko kubalno kev kugaikul kuruv kuvinono uumjunodupudogaikikono. Kevuge'aro Krais tooke'aro togaikul loowo aiyo su tovino kuu'maiyo wuuduuwallunodupudo tov aro tovinokwono. Dugumwuulo tov nyovlaiyo'mo sadopiyo. Aki bako kuunodo pwopiyodowodo tov me'no abai'mo'mwallukokwono.

⁹ A'mwo pwol aro donekono. “Nuu Gooti toolluro bako tovi anakuuto tomuu me'no kuulomwalodumdonyugono.” Toro dowo'ji kwol kuruv Jisasolluro a'mwo abolo gami gadai'yagorovobusuko jo'mwovobusuko wimo'nodupudo pubuuraino surodo kuuno'ji to'gwowi a'mwo su tool dugumwuulo toollu anakuuto tomuu kuuno kuullomollokwekono.

¹⁰ Toro kuvi kuruv a'mwo pwol Jisasolluro a'mwo abolo gami gadai'yagorovobusuko jo'mwovobusuko wimo'nodupudo pubuuraino kalo buuropino amollo'ji su toolno'gwowi bako tovi anakuuto tomuu me'no kuullomollodowodekono. Aki toro toolluro pasudo molludo'mdowo'jure tovi a'mwo abolo pubuuro muugonaropi toga yello miye'namo'mdupudobuurogano.

¹¹ Toro kuvi kuruv a'mwo pwol Jisasolluro a'mwo abolo gami gadai'yagorovobusuko jo'mwovobusuko wimo'nodupudo pubuuraino surodo kuuno'ji tov a'mwo su tool dugumwuulo toollu anakuuto tomuu mwallokwekono. Aki toro tool dugumwuulo toollu anakuuto tomuu kuullomollodowodekono. Dugumwuulo juna'dowo'jure tovida'ai a'mwo su tekwo sumnowojokwe toolbusuko imo'nodowodekono. Toro tovino tov a'mwo su tool buko buko to'no yowo'ji puuto nuumjunyo'moneyokwe tovi ku'nono miyo'mgonomallokwekono.

¹² Kwoloraiyobuuravoo, Gooti tool kemoro ma'no ma'nodo tovuro kirumwallo tovi Krais toolluro yovo tovida'ai me'no amaikudukwopiyokaikono. Toro tovino tov nuu kemiyomno yogalo akav sokwollekwopiyamono.

¹³ Aki kuunumiyagoravoo, aiyoga Gooti tool muudu'nodo togada'ai aga kuga kuruv kuuno mujomwekovla'mdowodekono. Kevu Gooti su toolluno kuudo me'no souromaroporekikono. Toro tovino tov nuu kemiyomno yogalo akav sokwollekwopiyamono. Aki muugunyoravoo, kevu kirovanyuvanyokwe Satanyollu me'no kuuwolovoporekikono. Toro tovino tov nuu kemiyomno yogalo akav sokwollekwopiyamono.

¹⁴ Aki kwoloraiyobuuravoo, kevu kemi Tellunumiyago Gooti toolluno kuudo me'no souromaropogaikikono. Toro tovino tov nuu kemiyomno yogalo akav sokwollekwopiyamono. Aki kuunumiyagoravoo, aiyoga muudu'nodo togada'ai aki aga kuga kuruv kuuno mujomwekovla'mdowodo Gooti su toolluno kevu kuudo me'no souromaroporekikono. Toro tovino tov nuu kemiyomno yogalo akav sokwollekwopiyamono. Aki muugunyoravoo, kemoro poowokalago ton jurogudo me'no sumo'noporekikono. Aki Gooti toolluro yogalo tov kemoro poowokalago tonyu kuulaikwo'dowo'jure su tovi kevu guureji gudupola'dupudorekikono. Aki toro toorekul kirovanyuvanyokwe Satanyollu me'no kuuwolovoporekikono. Toro tovino tov nuu kemiyomno yogalo akav sokwollekwopiyamono.

Nevu noonyumwonyu kwako akavida'ai pasudo tooraino kalo buuropino nonekullunumwalo'jokwe tovinokwono

¹⁵ Kevu noonyumwonyu kwako akavida'ai pasudo toorogai'aro kuto ivito toorogai'aro tooraino kalo buuropino nekullonumwalo'jo. Kevu kwako akavida'ai su tooraino kalo buuropino aikulluno'ji tov nemi Nellunumiyago Gooti toolluno kalo buuropino ku'nono maikullunumwalonorekikono.

¹⁶ Kuudo neya jaullulo. Kwako akavida'ai pasudo tooro arorogano. Kulako tobuuravuro ilaiyo igollunyo'mo pasudo tokwono. Aki kwanyu sumdo kinuwiyo'mo pasudo tokwono. Aki ilomoropunyo'mo pasudo tokwono. Yiuwi'nokai pasudo su toro tooro nemi Nellunumiyago Gooti toolluda'ai mabodupudorogano. Toro kuvi kuruv yiuwi'nokai pasudo su tooro kwako akavida'ai bodupudorogano.

¹⁷ Kwako akakwe'aro kwako akavida'ai a'mwo abolo tonyuro ilaiyo igollunyo'mo pasudo toorogai'aro tooro nyovlapinorogano. Toro kuvi kuruv a'mwo abolo Gooti toolluro ilaiyo winodowo'jure tovi kuumjunpi tono'gwowi aiyo yiunokuudo mujomwekovla'mwalpinogano.

A'mwo Krais toollu ikomago wimo'nodupudo tooro me'no bai'mo'mdupudo toorainokwono

¹⁸ Moro kwoloraiyobusukobuuravoo, sumdomgu kevu kuuguudo aro tovino me'no kuu'nyajupogaikikono. “Lukomgu a'mwo Krais toollu ikomago wimo'nono pwol nobiyalo'nonekono.” Kuu'nyajupogaikikono. Toro kuu'nyajupo su tov aga kuvinono abai'mo'mwallo. Toro te a'mwo Krais toollu ikomago wimo'nodupudo bwotonyago tooro me'no abiyalo'nadokwoporogano. Toro tovino tov nevu aro kuudo souroma'mwakuuwono. Oo aga aiyowo'mo tov me'no dobai'mo'mwallo. Kuudo souroma'mwakuuwono.

¹⁹ A'mwo Krais toollu ikomago wimo'nodupudo su tooro nemi akuuto tomuuda'ai anekugollu'movoporogano. Su toro anekugollu'movopo kuvi kuruv a'mwo su tooro nemida'ai kuunodoromaiyo. A'mwo su tooro nemida'ai kuunodo sumo'nopujuko'mno'juki nevuge kuuno amwalopujukorogano. Toro kuvi kuruv a'mwo su tooro nemi akuuto tomuuda'ai anekugollu'movoporogano. Toro anekugollu'movopo su tov a'mwo su tooraino aro kuudo youroma'dowadorogano. Oo yiuwi'nokai su tooro nemida'ai kuunodoromaiyo. Kuudo youroma'dowadorogano.

²⁰ Toro kuvi kuruv kemino'gwowi Gooti toolluro Kuullo kuulemovaikubweyoduke toollu me'no maro'mno aga yiuwi'nokai togaikul nebal'no yogalo tovino kuudo youroma'dupudogaikikono.

²¹ Toro te nuu kemi puukwollo sokwollekwopiyamwako tov kevu nebal'no yogalo tovino kuudo maiyokwe togaikulluno'mo'maiyo. Toro kugaikul kuruv kevu nebal'no yogalo su tovino'gwowi me'no youroma'dupudo togaikullomno nuu pas akav sokwollekwopiyamwakono. Aki nebal'no yogalo su tovi akuuto tomuuda'ai kuunano yogalo puru'monodo kuruv malokabodowodokwono.

²² Kuunano yogalo youkuu'nadodupudo tooro ala'mworovodukono? A'mwo pwol aro dodowodekono. “Oo Jisasol Gooti toolluro amonekwopiyaboka Krais toolmaiyo.” Su toro dodowodo tool nemi Nellunumiyago Gooti tooke'aro gamoro Kwolaiyo Jisaseke'aro toorallu buulo uugunyumopiyodowo Krais toolluro ikomago wimo'nodowodekono.

²³ Yiuwi'nokai a'mwo abolo Gooti toolluro Kwolaiyo toollu buulo uuguunyumopiyodupudo su ton gami Ganumiyago Gooti kwollu kuruv buulo me'no uugunyumopiyodupudogano. Toro kuvi kuruv a'mwo abolo puno'gwowi Gooti toolluro Kwolaiyo toolluno kuu'maiyo toru'no aro dodowiyoku'bworosupinogano. “Oo Jisasol Gooti toolluro Kwolaiyo tool kwoldeyo.” Yiuwi'nokai toro adodowiyoku'bworosupi su ton Ganumiyago Gooti kwolluno kuruv kuu'maiyo toru'no dodowiyoku'bworosupinogano.

Gooti toolluro Kuullo tool nemi yonekubwasodowodo tovinokwono

²⁴ Toro te kemi aro ikudumo'mokwono. Kevu muudu'nodo togada'ai kuuguudo sugudo tovi me'no kuu'nopogaikikono. Kuuguudo kuu'nopo su tov kemoro kuudo tonyu yiunokuudo neya aulaikworogawono. Kuuguudo su tov yiunokuudo kuvinono aulaikworo'ji tov kevu Gooti toolluro Kwolaiyo tooke'aro gami Ganumiyago Gooti tooke'aro toorallu yiunokuudo nokwo uuguro'mwonyumwalpinogaikikono.

²⁵ Aki kuudo neya jaurogaulo. Krais toolluro subuu'yamju adanekulloka tov arokwono. Kevu aiyo yiunokuudo mujomwekovlaiyo'moneyokwe tov nomapinogaikikono. Adanekullokaikono.

²⁶ Toro te nuu kemi duudapi yogalo aro ikullumo'monyugono. A'mwo pworo kemi kuunano yogalo youkuu'naikujo'mo winodupudorogano. Toro tooro kemi kuunano yogalo nyoukuu'naikudumwalpiyo.

²⁷ Kev togaikulno'gwowi Krais toolluro ato tovida'ai gamoro Kuullo aikullaboka toollu me'no amaropogaikikono. Kuullo su tool kemoro poowokalago tonyu kuulemovaikubweyodowodo tovino tov kevu kemi yekubwaso'moneyokwe a'mwo pwolluno supto mimwakovo. Toro kuvi kuruv Kuullo su toolno'gwowi kemoro yiuwi'nokai supto yodopure tonyuno kuvinono yekubwasokwekono. Aki gamoro yekubwasodowodo su ton kuunanonmaiyo. Yiuno nebal'nodogano. Kuullo su toolluro yekubwasodowodo tonyu kevu neya uumjungovlavopi Krais toollu guureji nokwo uuguro'mwonyumwalpinogaikikono.

Aga nevu Gooti toolluro kwoloraiyo wimo'nodowado tonolluro mujumovla'mwalano tovinokwono

²⁸ Moro kwoloraiyobusukobuuravoo, aga kevu Krais toollu guureji neya duuguro'mwonyogaulo. Su tov aro tovinokwono. Lukomgu Krais tool kuu'maiyo abiyalo'no'ji toga nevu yiuwi'nokai tonol luko nya'jo. Aki wogulo nyubwosuna'jo. Kevu su toro nyubwosunpiyokweyo'mo Krais toollu guureji neya duuguro'mwonyogaulo.

²⁹ Kevu aro kuudo souromapi tov, Oo Krais tool pasudo idopto'nodo to'no yokweyoldeyo, kuudo souromapi tov yiuwi'nokai a'mwo abolo pasudo idopto'nodo mujumovla'mdupudo tonyuno aro kuudo nokwo youroma'mwalpinogaikikono. Oo a'mwo abolo su tobuuro Gooti toolluro kwoloraiyo me'no wimo'nodupudodeyo. Su toro kuudo nokwo youroma'mwalpinogaikikono.