1 Joon 1 - Gooti Toolluro Yogalokwono

Aiyo mujomwekovlaiyo'moneyokwe Yogalo toolluro kuu'maiyo toru'no abiyalo'noka tovinokwono

¹ A'mwo pwol muudo'nodo togada'ai amwallajuko su toolluno nevu puukwollo sokwollaikubwemwakuuwono. Aki su tool aga kuga kuruv kuuno mujomwekovla'mdowodekono. Toro toolluro yogalo tov a'mwo abolo tonyuro poowokalago tonyu aiyo mujomwekovlaiyo'moneyokwe tov wiyodowodokwono. Aki toro toolluro yogalo tovi nevnokwe toonolluro kaduko tokwe me'no kuu'nowonogano. Aki toro toollu nevnokwenolluro sumdo togai me'no kwonowonogano. Aki toro toollu nevnokwenolluro ato tokwe me'no kuubogai'nowonogano. Toro toolluno to'no nevu moruudodowadonogano.

² A'mwo abolo tonyuro poowokalago tonyu aiyo mujomwekovlaiyo'moneyokwe wiyodowodo su tool kuu'maiyo toru'no me'no abiyalo'nokaikono. Toro biyalo'noduke toga nevnokwe toonol me'no kwonowekono. Aki toro kwonowo tovino kuu'maiyo toru'no dodoluwosodowadonogano. Aki aga nevu aiyo yiunokuudo mujomwekovlaiyo'moneyokwe tov nekullabodowodo su toolluno kemi modekumollodowadonogano. Su tool gami Ganumiyago tooke amwallajuko kwol kuruv nemi kuu'maiyo toru'no abiyanekulo'nokaikono.

³ Toro biyanekulo'noduke toollu nevu me'no kwonowekono. Aki gamoro yogalo moruudoduke kuvi kuruv nevu me'no kuu'nowekono. Toro te kevu nevuge aval'no ibwoto'nomwekovla'mwalano'moneyokwe nevu me'no kwonyajuuwo togai'aro me'no kuu'nyajuuwo togai'aro su tonyuno kemi sodekubwasumwakuuwono. Aki nevu Gooti Ganumiyago tooke'aro gamoro Kwolaiyo Jisas Kraiseke'aro toorake kuvinono me'no ibwoto'nomwalodowadorakono.

⁴ Toro te nemoro puukwollo sokwollaikubwemwakuuwo akav aro tovino'mokwono. Kevu yogalo akavi wuu'nopi kuudo kuubwepi tov nemoro poowokalago tonyu ilaiyo kuunodo tov aullo'movanekwopiyoneyokweyo'mokwono.

Nevu Gooti toolluro bako tovi anakuuto tomuu neya yomollumwalano tovinokwono

⁵ Krais Jisasolluro yogalo nekudoduke tovi nevu me'no kuu'nowonogano. Yogalo kuu'nowo su tov aga kemi aikudumwakuuwono. Su tov arokwono. Gooti tool bako to'busukekono. Aki Gooti toollu anakuuto tomuu dugumdo puru'monodo kuruv nonagutekono.

⁶ Toro tovino tov puga a'mwo punol dugumdo tomuu'aro kiroungovlavowa'ji aro ada'ji tov, “Oo Gooti tooke wobo toru mwalodowadonogano.” Nevu dugumdo tomuu'aro kiroungovlavowa'ji su toro ada'ji tov kuunano to'no youkuu'nadowa'ji nebal'no yogalo tovi ku'nono mamolludo'movlawanonogano.

⁷ Toro kuvi kuruv Gooti bako tomuu mwalodowodo toolbusuko kubalno ne kunol kuruv bako tovi anakuuto tomuu'aro neya yomjomwekovla'mwalanonogano. Nevu su toro amjomwekovlawa'ji tov Gooti toolluro a'mwo abolo togai nokwo ibwoto'nomwalmwalanonogano. Aki Gooti toolluro Kwolaiyo Jisasolluro mujako tov nemoro yiuwi'nokai ma'no ma'nodo tonyu mollol'movanekudukwopiyokweyokwono.

⁸ Nevu aro noda'jo. “Oo ma'no ma'no pasudo maiyonogano.” Punol su toro ada'ji tov kuunano tomuu'aro bwolodukwopiyowanonogano. Aki su toro ada'ji tonolluro poowokalago tovi nebal'no yogalo tov maulanekwo'dowodokwono.

⁹ Toro kuvi kuruv nevu Gooti toollu nemoro ma'no ma'no pasudo tonyuno kuu'maiyo adodowiyoku'bworosuna'ji to'gwowi Gooti tool nemoro yiuwi'nokai ma'no ma'no pasudo tonyuro kirumwallo tovi nomodukwopiyonekono. Aki yiuwi'nokai kaiya'no pasudo mollugolanekumo'mdupudo kworai kuruv nomollol'movanekudukwopiyonekono. Gooti tool pasudo idopto'nodo tovi uumjunowo'ji su toro kuvinono yonekono.

¹⁰ Nevu, “Oo ma'no ma'no pasudo maiyonogano,” ada'ji tov Gooti toollu aro mojokuu'nosanekono. “Oo guu Gooti tooku kuunanekugono.” Aki su toro amojokuu'nosa'ji tonolluro poowokalago tovi gamoro yogalo tov maulanekwo'dowodokwono.