Yudas 1 - Pangàlu' Baru Sura'na Puang i laling sua: tu Padang

Sua: mupasakke

¹ Mampatu: mantàdi:-tàdiku ung nihàngo‑mo pang ung na pulemu Puang Ama:, pang ung Na parakai mampatu: Yesu Datu: Pipasalamaꞌ. Nai koi: Yudas, dea‑mo kaunangna Yesu Datu: Pipasalamaꞌ pang mantàdina Yakobus.

² Na Puang‑rangmo lupu mampakànaꞌi ti pasakke, kabeloang, pang malemunNa i katuhoangmu se.

Patuna suraꞌna Yudas

³ Mantàdi:-tàdiku ung ku pulemu, ku mangokaꞌ tungka dalang marronno: suraꞌ matung, mampatu: kasalamaꞌangta se. Pang mukaenang ti pinanahangku moa teꞌ parallu ku mampumatotoꞌ‑ko se i latenna mangola: suraꞌ tee, mangking u lupu se mampukaenàngi kapatongangang ung nipadeaꞌ‑mo mao i taunna Puang.

⁴ Ku palau mène: to, sàbaꞌ ara tau ung si missosoko i àlaꞌ-àlaꞌta se pang mampipaturo:‑ing pipaturo: ung dang tongang. Na pupissàla:‑i se ti pipaturo: mampatu: malemunna Puang mao i kìta: miluhali pingkakìniang mampukauꞌ kauꞌ ung burere. Nai pingkuheoꞌ-heoꞌna‑i se to, na pissangkaꞌ‑ing ti besa-besanna Tuangta, dea‑mo Puangta Yesu Datu: Pipasalamaꞌ. Hukungangnaa tau to‑i se ung tuho: sikeboꞌi pampuinahanna Puang ìnang nironno:‑mo nai lùlung.

Tungguru ung dang tongang

⁵ Na moi nasang to u ìsang‑mo se, ku palea: mampakalehai‑ko se, mangaka ti Puang parrara mampasalamaꞌ taunNa nai Masir, hampoꞌ hang masai‑i nai anto manghùlìngi tau ung dang mupatongang nai àlaꞌna‑i se i padang ung tunini.

⁶ Kalehai‑ko se ho ti malaikaꞌ-malaikaꞌ lùlung, ung dang mantokaꞌ pàraꞌ kakuasaangna‑i se i suruga, mambùruꞌ‑ing mampalii: pangkaoneina. Puang mampipantuyu‑ing mangking malaikaꞌ to nipungu rante i makarinningna, ung makarinning potoꞌ. One: i anto nipipàraꞌi‑i se nipasumpu deaꞌ niparessa i Àlona Puang.

⁷ Kalehai‑ko se ho ti lipu: Sodom pang Gomorra sìnang lipu:-lipu: sidungkuꞌna, ung miluhali pipakainaꞌ mao i nasang tau, sibali to tu Israel pang malaikaꞌ-malaikaꞌ. Ampu lipu: i anto mampukauꞌ‑i se ung malahang mallola pangkapelai: kalae: ung missàla:, mambùruꞌ‑ing nikeneꞌ-keneꞌ‑i se i api ung deaꞌ tùrungna.

⁸ Mène:‑da ho ti tungguru ung dang tongang to. Mangulaꞌ pangipinna‑i se, mamburerei kalaena‑i se pang harani ho mantumpaꞌ kamakuasaangna Puang pang mampusua: kadetu ung si makuasa.

⁹ Dukanna Mikael ung mampungkabai malaikaꞌ-malaikaꞌ, hari:‑da sule: na mampukauꞌ ung mène: to. Tempona sisala:‑i se Datuna dihata bulituku mampatu: isai ti ung mangalaa hatang puntinna Musa, Mikael hang manghala buu:‑ida musua:-sua: kadetu i laling mantannaꞌ Datuna dihata bulituku. Sangadinna, na konai: teng moa teꞌ, “Na Puang‑rangmo marràho‑ko.”

¹⁰ Hampoꞌ tungguru ung dang si tongang to, mampusua: kadetu aka-aka ung dang na pahang‑i se, urungang makedo oloꞌ-oloꞌ lampung‑i se, ung mampukauꞌ aka-aka ung dang na tangaꞌ. Pang deanna‑mo nasang to, puntai: se.

¹¹ Na masolang‑rangmi se! Sàbaꞌ mantoroꞌi‑i se dalang ung na ola: Kain. Pola:‑i se ho sahe: i kasalaangna Bileam, ung mio: marrèneꞌ‑ing tau sàbaꞌ sarambang seeng. Mangeba‑i se mène: Kora, mambùruꞌ‑ing na papuntaa‑da ho Puang mène: ung jadi mao i Kora pang tanandapoꞌna.*

¹² Tempona u sola: se manne: mène: ung sampantaladiang, tau to‑i se u na burerei i àlaꞌ-àlaꞌmu se. Sàbaꞌ dei: se, dea‑mo pikuyaꞌ ung mampadiokoꞌ teng kalaena, padodo:‑i se, hari: madia:-diana. Mène:‑i se kahung ung na doloꞌ‑ing pasaui, hampoꞌ hang mampabùruꞌ‑i urang. Mène:‑i se ho lòpo: ung dang hoa:, na moi tempona hoa:. Pang lòpo: ung si mate‑mo, nisongka sule:.

¹³ Mène: balumba ung pàli mène: pàli mai i tasiki mampatiburaꞌ saho-saho ti kauꞌna‑i se ung mi dia:-dia:. Mène:‑i se anaka hulang ung kalao-lao. Na patokana‑ming Puang kaoneang ung dang makàdaꞌ makarinningna deaꞌ tùrungna.

¹⁴ Henok, ale: ung kapitu nai Adam, ara ho na pupihuyang‑i nai lùlung ti mampatu: tau to‑i se. Na konai: moa teꞌ, “Kalehai‑ko se! Bùruꞌa ti Puang sìnang masàbu-sàbu malaikaꞌNa ung malìsong

¹⁵ mamparessa nasang tulino. Puang manghukùnga tau ung dang si manuruꞌ, sàbaꞌ nasang ung na pukauꞌ‑i se sikeboꞌi pampuinahanNa. Pang, manghukùnga tau ung si mabussung, sàbaꞌ nasang suana‑i se ung makarraꞌ, ung mampusua: kadetu Puang.”

¹⁶ Tau to‑i se mutuntu: pang mampuroa: musalai:. Katuhoangna na kuasai pangkapelai: pinanahanna‑i se teng, pang musua:-sua: ung maranga, mampumaruo:-ruo:‑ing tau mangking mangkorai: ung na kapelai:‑i se.

Pipakainaꞌ pang pipaturo:

¹⁷ Hampoꞌ dio se mantàdi:-tàdiku ung ku pulemu, kalehai‑ko se ti aka ung na padeaꞌ ung na tonnoꞌ Puangta Yesu Datu: Pipasalamaꞌ.

¹⁸ U na pakainaꞌ‑mo se mène: tee, “Tempo i tampakàna tee, araa ti tau ung mingaro mampatahai Puang pang dio se. Tuho:‑i se teng siulaꞌ pangkapelai: ung sikeboꞌi pampuinahanna Puang.”

¹⁹ Tau te‑i se mampabùruꞌ kasisara-saràkang i jamaa. Na kuasai pòteng pangkapelai: kalaena, pang hang mangampui‑i se Pinanaha Malìsong.

²⁰ Hampoꞌ dio se, sola: dalangku ung ku pulemu, sipumatotoꞌ‑ko se i laling kapatongangangta ung malìsong. Musumbayang‑ko se i laling Pinanaha Malìsong.

²¹ Pang tuho:‑ko se lupu i laling malemunna Puang, i laling u mangahong katuhoang ung deaꞌ tùrungna, ung na hengiing‑ko se Puangta Yesu Datu: Pipasalamaꞌ sàbaꞌ malemunNa.

²² Mao i tau ung dang si matotoꞌ‑kang, parallu u mampupiita se kamalemuang.

²³ Esing‑ko se ti tau sintàna: nai laling api, mangking salamaꞌ‑i se. Mao i tau sintàna: kang ho, parallu u mampupiita se kamalemuang, hampoꞌ silentong pinanaha ung mariaꞌ. Pukàrang ti pangae: ung mantoroꞌi tungguru to‑i se, deaꞌ mao i ung na pakena, ung na burerei‑mo nai pampuinaha tulino.

Sua: ung mantampàki

²⁴ Puang hela mangkuyaꞌ‑ko se mangking hang minaho:‑ko se, pang hela mambaha‑ko se i laling kamasannàngang ung kànaꞌ, pang dang ara salaiangna tèdeꞌ i heleꞌNa, Ung Malabiꞌ.

²⁵ Dea‑moda ti besa-besanna Puang ung mampasalamaꞌ‑ke, mampupaneteang Puangta Yesu Datu: Pipasalamaꞌ. Na pàli i Dea‑rangmo ti kamalabiꞌang pang kaiahoang, kaparentaang pang kamakuasaang nai aranna lino, i latenna, pang deaꞌ tùrungna. Amin. Sama‑mo to. Passangadingku, Yudas