Yakobus 1 - Pangàlu' Baru Sura'na Puang i laling sua: tu Padang

Yakobus mampadeaꞌ salamaꞌna

¹ Mampatu: mantàdi:-tàdiku, taunna Puang* ung nipasisara-saraka pai lìliꞌna lino. Nai koi: Yakobus, kaunangna Puang Matua pang Puang Yesu Datu: Pipasalamaꞌ. Salamaꞌ!

Kamaparriꞌang pang kapinumpuang

² Mantàdi:-tàdiku, ìna u na leo: se rupa-rupa kamasussaang, àna:‑ko se ti to ung nipusannang teng,

³ pang ìsang‑ko se moa teꞌ tempona u mangola: kamasussaang hampoꞌ u lupu se misasare mao i Puang, manghoa:‑ing kapinumpuang.

⁴ Pang patùrung‑ko se ti kapinumpuangmu deaꞌ kànaꞌ i pinanahammu, mangking u miluhali se kànaꞌ pang hang kakurangang‑ko se.

⁵ Ìna ara nai àlaꞌmu se ung dang kànaꞌ pantangaꞌ belona, parallu mampalau mao i Puang pang nihengiing, sàbaꞌ Puang lupu mampusalainaha‑ke. Tau ung mampalau, ha Na salai:‑i.

⁶ Hampoꞌ tempona mampalau, parallu na patongang. Hau na bata-bata. Sàbaꞌ tau ung bata-bata, mène: balumba i tasiki, ung pàli mène: pàli mai teng na baha pasaui.

⁷ Tau to, hau na marranung mantarimaa aka-aka nai Puang,

⁸ sàbaꞌ muringkèla:‑da pang ha minumpu‑i i nasang dalang katuhoangna.

⁹ Taunna Puang ung mase-mase parallu mampirerèngi aka ti ung na pukauꞌ‑mo Puang, ung mampaiaho‑i.

¹⁰ Pang tau ung sukiꞌ parallu ho mampirerèngi kamaꞌangna Puang, ung mantampa‑mi hela na ìsang moa teꞌ kalaena malammaꞌ, sàbaꞌ hùlìnga‑da sìnang kaaraangna mène: bunganna làmaka.

¹¹ Sòhongna‑i ti kùlaꞌ, làmaka to miluhali malaso nai pikehiꞌna, mambùruꞌ‑ing marèneꞌ ti bunganna pang hùling‑mo ti matairingna. Mène:‑mo ho to ti tau ung sukiꞌ. Tarrang mangkamaꞌ puokaꞌangna, hùlìnga.

¹² Maupaꞌ ti tau ung minumpu tempona mangola: kamasussaang, sàbaꞌ na ita Puang ti pinumpunna to. Pang tau to, mangkoraia tali kapataloang, dea‑mo katuhoang, ung na àluꞌ‑mo Puang mao i tau ung mampulemu‑I.

¹³ Isai-sai ti ung masussa pang na baha tangaꞌ pangkapelaina ung dang tongang, hau na mangkonai: teꞌ, “Ku na kakaꞌi Puang.” Sàbaꞌ Puang ha na baha‑ida pangkapelai: ung kadetu pang ha mambaha‑Ida tau i pangkapelai: ung kadetu.

¹⁴ Sangadinna, pantang tau na baha pangkapelaina kalenanna.

¹⁵ Na baha pangkapelai: pinanahanna to, deaꞌ manghoa:‑ing dosa, pang ìna dosa to tùrung miluhali kabiasaang, manghoa:‑ing kamateang.

¹⁶ Mantàdi:-tàdiku ung ku pulemu, hau na u nipahùling se mampatu: Puang.

¹⁷ Nasang ung bùruꞌ nai Puang dea‑mo pihea ung belo: pang kànaꞌ. Mantampa‑Da kùlaꞌ, hulang pang anaka hulang.* Pampana: dea to, ara mabàlina, hampoꞌ dea ti Puang, ha mabàli:‑Ida pang hari: makarinningNa.

¹⁸ Nai pampuinahanNa, ta Na hengi‑ming se katuhoang ung màle mangola: suaNa ung tongang. Na pukauꞌ ti to mangking ta miluhali taunNa ung niàna: sala:, mène: hoa: ung parrara nipinomba‑ing mao i Puang nai àlaꞌna nasang ung Na tampa.

Mampisàdìngi pang mampukauꞌ suana Puang

¹⁹ Mantàdi:-tàdiku ung ku pulemu, ìsang‑ko se ti tee. Pantang tau parallu pakaraꞌ mampisàdìngi, hampoꞌ hau na masàraꞌ musua: pang masàraꞌ lalaka.

²⁰ Sàbaꞌ kalalàkang hang mampabùruꞌ‑ida kedo ung tongang i heleꞌna Puang.

²¹ Deanna‑mo to, palii:‑ko se nasang ti ung burere pang ung kadetu, pang tarima sìnang pinanaha ung manuruꞌ ti suana Puang ung nilamung i pinanahammu se. Sàbaꞌ sua: to, hela‑da mampasalamaꞌ‑ko se.

²² Hampoꞌ parallu u toroꞌi se tùrung ti sua: to. Hau na u mampisàdìngi se teng. I da mène:‑i to, u mampatiulu se teng kalaemu.

²³ Sàbaꞌ, tau ung mampisàdìngi suana Puang pang ha na pukauꞌ‑i, mène: teng tau ung mampumahele silanna i bayoang,

²⁴ hampoꞌ tùrung malai pang na pakaliung teng mangaka ti silanna.

²⁵ Hampoꞌ ha mène:‑i to ti tau ung mampikurui pang mampusalainaha atorangna Puang ung kànaꞌ, ung mi salokaꞌi. Tau to, na pasakkea Puang i laling aka ti ung na pukauꞌ, sàbaꞌ ha na pakaliung‑i ti pipaturo: to, sangadinna miluhali‑mo tau ung tuho: manuruꞌ.

²⁶ Ìna ara tau ung mangkonai: kalaena manuruꞌ i laling mualuku, hampoꞌ hang mangkuasai‑i lilana, tau to mantangkasi: teng kalaena pang hari: palleona mualuku.

²⁷ Mualuku ung malìsong pang hari: salaiangna i heleꞌna Puang Amanta dea‑mo mangìsang tuhona anaka ung si heong pang bahine ung si pali: i laling kamasussaangna‑i se, pang mangkuyaꞌ kalae: nai kalinoang.