Titus 1 - Pangàlu' Baru Sura'na Puang i laling sua: tu Padang

Paulus mampadeaꞌ salamaꞌna

¹ Mampatu: anakàku Titus, i libùkang Kreta. Nai koi: Paulus, dea‑mo kaunangna Puang pang ung na tonnoꞌ Yesu Datu: Pipasalamaꞌ. Ku nipantuyu mangking mampumatotoꞌ kapatongangangna‑i se taunna Puang, dea‑mo tau ung Na pirarai:‑mo miluhali taunNa. Parallu ho ku paturo:‑i se mangking mangìsang pipaturo: ung tongang siulaꞌ tuho: ung mantoroꞌi pampuinahanna Puang.

² Kapatongangang pang pipaturo: to, manghoa:‑ing ranùngang moa teꞌ ta mantarimaa katuhoang deaꞌ tùrungna. Ha nitampa‑mi ti lino, na àluꞌ‑moda Puang ti katuhoang to, pang ha balle‑i ti ung Na pusua:.

³ Tòna bùruꞌ‑mo ti tempo ung na patantu Puang, Na pusua:‑mo ti dalang mangkorai: katuhoang to. Mampadeaꞌ Kareba Belo: to dea‑mo ti kamaꞌang ung na patongang‑ingnaꞌ pang na pakohai:‑mingnaꞌ Puang Pipasalamaꞌta.

⁴ Titus, u ku àna: kàle: anakàku i laling kapatongangangta ung sibali. Na Puang Ama:‑rangmo pang Yesu Datu: Pipasalamaꞌta mampasakke pang manghengi‑ingko kabeloang.

Titus nipantuyu manturo: penatua pang mampakahulo: aka ti ung dang tongang

⁵ U ku palii: i Kreta mangking mampatùrung mampakahulo: aka ti ung dang sileo:‑kang pang manturo: penatua-penatua pai lipu:-lipu:. Kalehai ti pasakiꞌku tee, moa teꞌ

⁶ penatua parallu tau ung dang ara salaiangna, minumpu mao i bahinena,* ana-anakàna mupatongang‑mo pang handei: ung lao sala pang ung dang paturoang.

⁷ Ung mambaha jamaa parallu‑da tau ung dang ara salaiangna, sàbaꞌ nipatongang‑ming ti kamaꞌangna Puang, dea‑mo mamparakai jamaa. Ha mading‑i mampatongang teng kalaena, pang katàpu, pang pungenung, pang lantudaang, dea‑raka burorang seeng.

⁸ Sangadinna, parallu masannang mantarima tau i tammingna, mamparakai nasang kabeloang, mantangaꞌ ung baraꞌ, mahulo:, minumpu mao i Puang, pang mangìsang mangimping‑ing pangkapelai: ung dang sipatuna.

⁹ Parallu mantokaꞌ pàraꞌ pipaturo: ung tongang, mène: to ung nipipaturo:‑ming, mangking hela na pipaturo:‑ing mao i tau, pang mampakahulo: tangaꞌna tau ung mantumpaꞌ pipaturota.

¹⁰ Sàbaꞌ boso: ti tau ung patòkoꞌ, làbi-làbi nai tu Yahudi ung mupatongang‑mo. Musua:‑i se ung dang ara palleona pang ung dang tongang, ung mampahùling teng tau.

¹¹ Tau ung si mène: to parallu nisimping ti takona, sàbaꞌ mampahùling teng boso: tanandapoꞌ mangola: pipaturo: ung dang tongang. Hang tongang‑i ti patuna‑i se mupaturo:, sàbaꞌ na tumang‑i se teng burorang seeng.

¹² Neꞌo:, ara besa tau, singka: dei: se teng tu Kreta, ung na àna: nabinna‑i se. Ara na musua: teꞌ, “Tu Kreta ìnang nai lùlung si kabuto, pang mène: oloꞌ-oloꞌ ung harani. Salli anne:‑i se ho pang lose.”

¹³ Aka ti ung na pusua: to, ìnang tongang‑da. Deanna‑mo to, parallu nene u pakahulo:‑i se mangking mantokaꞌ pàraꞌ pipaturo: ung tongang

¹⁴ pang hang mampangorei:‑i hura: patidoluangna tu Yahudi ung dang tongang dea‑raka atorang-atorang ung na babe teng tau ung missàla: nai pipaturo: ung tongang to.

¹⁵ Mao i tau ung malìsong‑mo pinanahanna, hari:‑da ung nipimalii. Hampoꞌ mao i tau ung burere pinanahanna pang hang mupatongang‑i, hari:‑da ung malìsong. Ìnang matengko: ti tangaꞌna‑i se pang hang na ìsang‑i ti mampasisala: umma ti ung tongang pang umma ti ung kadetu.

¹⁶ Na konai:‑i se teꞌ mangìsang‑i se Puang, pambàtiꞌ hang siulaꞌ‑i pingkedoangna‑i se. Ha masannang‑i ti Puang manghele, sàbaꞌ hang manuruꞌ‑i se, pang hang na hela‑i se mampukauꞌ aka ti ung belo:.