Roma 1 - Pangàlu' Baru Sura'na Puang i laling sua: tu Padang

Sua: ung na pupidolung Paulus

¹ Mampatu: nasang mantàdi:-tàdiku ung one: i Roma, ung na pulemu pang ung na hàngo‑mo Puang miluhali taunNa.* Nai koi: Paulus, dea‑mo kaunangna Yesu Datu: Pipasalamaꞌ. Ku Na hàngo miluhali ung Na tonnoꞌ mampatu: teng mampakareba Kareba Belo: nai Puang.

² Kareba Belo: to, na àluꞌ‑moda ìnang Puang nai lùlung mangola: nabi-nabinNa i laling Suraꞌna Puang.

^3-4 Kareba Belo: to, mampatu: Anakàna Puang, dea‑mo Puangta Yesu Datu: Pipasalamaꞌ. I laling katulinoangNa, hatiꞌna‑Da Daud, hampoꞌ i laling kapuàngangNa, Anakàna‑Da Puang. Mampatu: aka dea to, nipupiita ti kuasanNa mangola: katuhoangNa pole nai kamateang.

⁵ Pang mangola: Dea, Puang manghengi‑ingnaꞌ kalàbiang miluhali ung Na tonnoꞌ, mangking ku marrannang tau nai lìliꞌna lino mangking mupatongang pang manuruꞌ, pang mangking konana Datu: Pipasalamaꞌ nipalammuꞌ.

⁶ Ung nipatu: nai lìliꞌna lino, mintama ho ti dio se, sàbaꞌ dio se ho nihàngo‑mo miluhali taunna Yesu Datu: Pipasalamaꞌ.

⁷ Na Puang Amanta‑rangmo pang Puang Yesu Datu: Pipasalamaꞌ mampasakke pang manghengi‑ingko se kabeloang.

Paulus mangkapelai: mao i Roma

⁸ Ku padolung ti mukurusumangaꞌ mao i Puangta mangola: Yesu Datu: Pipasalamaꞌ, ha umma‑i to, dio se nasang, sàbaꞌ tau i lìliꞌna lino mangìsang‑mo moa teꞌ u mupatongang‑mo se.

⁹ Ìna ku musumbayang, u ku kalehai se leleng. Na sabii Puang moa teꞌ aka ti ung ku pusua: to, tongang. Dea‑mo ti Puang ung tongang-tongang ku layani mangola: mampakareba Kareba Belo: mampatu: AnakàNa.

¹⁰ Ku mingkalemu tungka mao i Puang, Na kanàhai:‑kaꞌ mampubelai‑ko se.

¹¹ Sàbaꞌ ku kapelai: tungka ti mampampasikorai:‑ingko se mangking ku mangkàlaꞌ kalàbiang nai Pinanaha Malìsong, ung mampumatotoꞌo: se.

¹² Ung ku patu: dea‑mo mangking ni sipumatotoꞌ i kapatongangangta se tempona ku one: i àlaꞌ-àlaꞌmu se.

¹³ Mantàdi:-tàdiku, ku kapelai: mangking u ìsang se moa teꞌ nene‑mo ti àla: ku mampubelai‑ko se, hampoꞌ lupu teng ara sangkàlàngang. Ku kapelai: mangking i àlaꞌ-àlaꞌmu se ho, ara haseleꞌna kamaꞌangku, sibali ung ara‑mo i àlaꞌ-àlaꞌna tau ung dang dea tu Yahudi i kaoneang-kaoneang sintàna:.

¹⁴ Sàbaꞌ ara kohaangku, belo: mao i tu Yunani, belo: mao i tau sintàna:, belo: mao i ung ara sikolana, belo: mao i ung dang ara sikolana.

¹⁵ Dea‑mo to ti sàbaꞌna ku kapelai: tungka ti mampakareba Kareba Belo: to mao i dio se ho ung leta: i Roma.

Kuasanna Kareba Belo:

¹⁶ Hang ku pudia:‑i ti mampakareba Kareba Belo: to, sàbaꞌ dea‑mo to ti dalang kuasanna Puang mampatu: kasalamaꞌangna nasang tau ung mupatongang, na rara nai tu Yahudi deaꞌ mao i tau ung dang dea tu Yahudi.

¹⁷ Sàbaꞌ mangola: Kareba Belo: to, Puang mampupiita mangaka ti dalangna tulino miluhali tongang i heleꞌNa. Dalang to dea‑mo mangola: teng mupatongang mao i Puang. Sibali ung nironno: i Suraꞌna Puang moa teꞌ, “Tau ung tongang, tuhoa mangola: teng mupatongang.”*

Kasalaangna tulino

¹⁸ Nasang tau parallu mampisàdìngi Kareba Belo:, sàbaꞌ Puang i suruga mampatèse: kalalàkangNa mao i nasang tulino ung mampukauꞌ ung sikeboꞌi pampuinahanNa pang kakadetuang, sàbaꞌ mangola: pangaena‑i se ung kadetu to, mantumpaꞌ‑i se aka ti ung tongang mampatu: Puang.

¹⁹ Sipatu: nihukung, sàbaꞌ aka ti ung hela na ìsang tulino mampatu: Puang makàso:‑mo mao i dei: se, sàbaꞌ Puang kalenanna ti mampupiita mao i dei: se.

²⁰ Songka: Puang mantampa lino, aena Puang ung dang niita, dea‑mo kuasanNa ung deaꞌ tùrungna pang kapuàngangNa, hela‑mo na pahang tulino mangola: mangita nasang ung Na tampa‑mo. Jadiꞌ, tulino hari:‑da tungka pingkakìniangna missangkaꞌ moa teꞌ, “Hang ku ìsang‑i ti Puang.”

²¹ Sipatu: nihukung, sàbaꞌ moi na ìsang‑mi se mangaka ti Puang, hampoꞌ hang mampaiaho‑I miluhali Puang pang hang musumbayang‑i ho mukurusumangaꞌ, sangadinna mantangaꞌ ung dang ara palleona. Pantangaꞌna‑i se ung bebe mène: to miluhali makarinning.

²² Na akui‑i se ti kalaena kitangaꞌ belo:, pambàtiꞌ bebe‑mi se.

²³ Handei:‑da Puang ung Malabiꞌ ti ung na pinombai‑i se, sangadinna rapang-rapangang ung sikantereang tulino ung mate pòteng, pang kudaꞌ, oloꞌ-oloꞌ ung ùpaꞌ kokoꞌna, oloꞌ-oloꞌ ung manangkaꞌ.

²⁴ Deanna‑mo to, Puang mampatatang‑i se na kuasai pangkapelai: pinanahanna‑i se mampukauꞌ ung burere, dea pùna mampukauꞌ‑i se aka ti ung nipudia: i àlaꞌ-àlaꞌna‑i se.

²⁵ Aka ti ung tongang mampatu: Puang, na pasònoꞌi‑i se ung dang tongang. Handei:‑da to Ung Mutampa, sangadinna to ung nitampa sule: ti ung na pinombai‑i se pang na toroꞌi, pambàtiꞌ to Ung Mutampa‑da ti ung sipatu: nipudi deaꞌ tùrungna! Amin.

²⁶ Hampoꞌ tiꞌ ha na pukauꞌ‑i tulino ti ung mène: to, baꞌ na patatang Puang mantoroꞌi pangkapelaina‑i se ung nipudia:. Bahine-hinena‑i se ho le, hang mangkapelai:‑i hura: muane mène: biasanna mao i tulino, sangadinna mangkapelai: sule: sambahinena.

²⁷ Mène:‑da ho mao i muane, hang sileona‑i hura: ti pisingalunna mao i bahine, sangadinna mangkapelai: pòteng sammuanena. Muane mampukauꞌ kauꞌ ung mi dia:-dia: mao i sammuanena, dea pùna mantarima‑i se pibalaꞌi ung sipatu: mao i kalaena sàbaꞌ kauꞌna‑i se ung kadetu to.

²⁸ Tulino to‑i se hang mangàna:‑i parallu ti mangakui Puang, mambùruꞌ‑ing na patatang Puang ti tangaꞌna‑i se miluhali hang mahulo:‑i, dea pùna mampukauꞌ‑i se aka ti ung dang sipatu: na pukauꞌ.

²⁹ Pinanahanna‑i se pùno: nasang ung dang tongang, ung kadetu, lammuꞌ inaha, bulituku, pùno: pinanaha ung mapaꞌ, pangkapelai: mupatei, sisala:, mutangkèdaꞌ pang miàmaꞌ. Na puroa:‑i se ti mampusua:-sua: tau sintàna:,

³⁰ mampusua: kadetu konana tau, mampukàrang Puang, mampaiaho‑i se kalaena, papenge: pang mampikiaꞌ‑ing kapahelaangna. Manarang‑i se mangokaꞌ dalang ung màle mampukauꞌ kakadetuang, hang manuruꞌ‑i se mao i tudolunna.

³¹ Hang mangìsang‑i se tangaꞌ ung belo:, hari: pinumpunna‑i se, ha sipulemu‑i se pang hari: malemunna.

³² Na ìsang‑i dasse: ti parentanna Puang teꞌ tau ung mampukauꞌ ung mène: to, sipatu: nihukung mate. Na moi mène: to, na pukauꞌ‑i se teng ti aka to, pang na kasitoroꞌi parodo‑i se ti tau sintàna: ung mampukauꞌ.