Pilipi 1 - Pangàlu' Baru Sura'na Puang i laling sua: tu Padang

Sua: mupasakke

¹ Mampatu: nasang mantàdi:-tàdiku taunna Puang i laling Yesu Datu: Pipasalamaꞌ ung one: i Pilipi, mintama ho ti ung si mambaha jamaa pang samas. Nai koi: Paulus, sola: Timotius, kaunangna Yesu Datu: Pipasalamaꞌ.

² Na Puang Amanta‑rangmo pang Puang Yesu Datu: Pipasalamaꞌ mampasakke pang manghengi‑ingko se kabeloang.

Paulus mihaka: pàli i Puang mangkalehai tau ung mupatongang i Pilipi

³ Ìna u ku kalehai‑mo se ho, ku mukurusumangaꞌ mao i Puangta.

⁴ Pang mantumpuꞌ pusumbayangku mampatu: dio se nasang, ku musumbayang sìnang pinanaha haka:,

⁵ sàbaꞌ nai pararanna u mupatongang se deaꞌ i latenna, u pola:‑mo se i laling mampadumallaꞌ Kareba Belo: nai Puang.

⁶ Pang ku patongang teꞌ Puang, ung marrara kamaꞌang ung belo: i laling katuhoangmu se, mampatùrùnga deaꞌ tikannaꞌ tempona Àlona Yesu Datu: Pipasalamaꞌ.

⁷ Ìnang sipatu: ku haka: mantangaꞌ dio se nasang, ha umma‑i to, u ku pulemu se. Sàbaꞌ i laling te ku nipungu rante, pang i laling ku mampusuai: pang mantongàngi Kareba Belo:, u miluhali se haliꞌangku mampukauꞌ nasang tee ung na hengi‑ingnaꞌ Puang ku pukauꞌ. Nasang to, malemunna Puang.

⁸ Pang Puang mangìsang‑kaꞌ teꞌ u ku pukalela se tungka mangola: malemunna Yesu Datu: Pipasalamaꞌ.

⁹ Ku musumbayang mangking malemummu se sa: tipakànaꞌ-kànaꞌinna. Mène: ho ti kapaìsàngang pang nasang tangaꞌ ung belomu se,

¹⁰ mangking u hela se mampirarai: aka ti ung kamìnang belo: u pukauꞌ se. Ku musumbayang mène: to mangking u malìsong se pang hari: salaiangmu deaꞌ tempona Àlona Datu: Pipasalamaꞌ,

¹¹ pang tuhomu se pùno: pangae: ung tongang ung na pakihoana Yesu Datu: Pipasalamaꞌ, urungang Puang Matua nipaiaho pang nipudi-pudi.

Paulus haka: sàbaꞌ Kareba Belo: nipakareba

¹² Mantàdi:-tàdiku, ku kapelai: mangking u ìsang se teꞌ aka-aka ti ung ku ola:‑mo tee mampabùruꞌ‑da sule: sa: boso:-bosona tau ung mampisàdìngi pang mampatongang Kareba Belo:,

¹³ mambùruꞌ‑ing nasang pasukang tamming kadatuang pang nasang tau sintàna: mangìsang teꞌ ku nipungu rante sàbaꞌ ku mangulaꞌ Datu: Pipasalamaꞌ.

¹⁴ Pang mangola: ku nipungu tee, pìniꞌna tau ung mupatongang i lipu: tee miluhali làbi matotoꞌ i laling Puang, dea pùna sa: harani-raninna‑i se mampakareba suana Puang, hang mareo-reo‑i.

¹⁵ Ku ìsang moa teꞌ ara pira-pira ung mampakareba Datu: Pipasalamaꞌ na tumang tangaꞌ mapaꞌ, hampoꞌ sintàna: mampakareba Datu: Pipasalamaꞌ nai pinanaha belona.

¹⁶ Tau te‑mi se ti mampukauꞌ nai malemunna‑i se, sàbaꞌ na ìsang‑i se teꞌ ku nipantuyu mampusuai: Kareba Belo:.

¹⁷ Hampoꞌ to tau sintàna: mampakareba Datu: Pipasalamaꞌ, lasìsikìna‑da pang hang tongang‑i ti patuna. Na konai:‑i se teꞌ hela massussai‑kaꞌ i laling kanipunguangku.

¹⁸ Hampoꞌ hang mangaka‑ida, sàbaꞌ moi mangaka dalangna ti mampakareba Datu: Pipasalamaꞌ, ku haka:‑ko. Pang ku lupua‑ko haka:,

¹⁹ sàbaꞌ ku ìsang teꞌ i laling nasang ung tarrang ku ola: tee, ku nipasalamaꞌa, ha umma‑i to, u mi pusumbayang‑ing se pang ku nikinalloi leleng Pinanahanna Yesu Datu: Pipasalamaꞌ.*

²⁰ Dea‑mo to, ku ranung tungka teꞌ ha nidia:-diaa‑kaꞌko, sangadinna ku lupu harani mampusua: pang mampukauꞌ ung tongang. Nai anto, Datu: Pipasalamaꞌ nipalammuꞌa tùrung i kalaeku, belo: mangola: katuhoangku dea‑raka mangola: kamateangku.

²¹ Mao i koi:, patuna tuhoku pàli i Datu: Pipasalamaꞌ teng. Pang kamateang dea‑mo kamaupaꞌangku.

²² Hampoꞌ ìna ku tùrung tuho: i lino tee, baꞌ ku hela‑ko mangkamaꞌ kamaꞌang ung kibuaꞌna. Jadiꞌ, umma ti ung parallu ku pirarai:, hang hela‑kaꞌ massùmui.

²³ Muringkèla: ti pinanahangku. Ku kapelai: tungka ti mampalii: lino tee mao leta: sola: Datu: Pipasalamaꞌ, sàbaꞌ dea‑mo to ti ung kamìnang belo:.

²⁴ Hampoꞌ làbi parallu ti leta: i lino tee sàbaꞌ dio se.

²⁵ Ku patongang ti aka to, urungang ku ìsang teꞌ ku letaa pang tùrung sola: dio se nasang mangking u miluhali sa: matotoꞌ-totoꞌna pang sa: haka:-hakana i laling kapatongangangmu se,

²⁶ pang u haka: se tungka i laling Yesu Datu: Pipasalamaꞌ sàbaꞌ manghungkai‑ingnaꞌ dalang sumule: matung.

Taunna Puang parallu matotoꞌ pang mamesa mampukaenàngi Kareba Belo:

²⁷ Ung kamìnang parallu i latenna dea‑mo u tuho: se ung siulaꞌ Kareba Belo: nai Datu: Pipasalamaꞌ, mangking ìna ku bùruꞌ matung, ku ita, pang ìna ha bùruꞌ‑maꞌ, ku sàdìnga teꞌ u matotoꞌ se i laling besa Pinanaha pang mamesa mampukaenàngi kapatongangang ung siulaꞌ Kareba Belo:,

²⁸ pang ku sàdìnga teꞌ hang mariaꞌ‑ko se mao i aka-aka teng nai tau ung mamponi:‑ko se. Kamatotoꞌangmu se to miluhali butti moa teꞌ dei: se nihukùnga, hampoꞌ dio se nipasalamaꞌa. Nasang tee nai Puang,

²⁹ sàbaꞌ u nihengi‑ing se mupatongang mao i Datu: Pipasalamaꞌ, pang handei:‑da teng to, hampoꞌ u nihengi‑ing se ho maparriꞌ sàbaꞌ Dea.

³⁰ I latenna u mampukaenàngi se Kareba Belo: sibali koi:, mène: to dolung u ita se ku pukaenàngi,* pang i latenna u sàding se teꞌ ku tùrung mampukaenàngi.