Pilemon 1 - Pangàlu' Baru Sura'na Puang i laling sua: tu Padang

Sua: mupasakke

^1-2 Mampatu: mantàdiki Pilemon, sola: pingkamaꞌki ung ki pulemu, pang Appia, mantàdiki bahine, pang Arkipus, solaki i laling to ung ki pukaenàngi, pang jamaa ung mukobu: i tammingmu. Nai koi: Paulus, ung nitarungkuꞌ sàbaꞌ Yesu Datu: Pipasalamaꞌ, pang nai mantàdita Timotius.

³ Na Puang Amanta‑rangmo pang Puang Yesu Datu: Pipasalamaꞌ mampasakke pang manghengi‑ingko se kabeloang.

Kapatongangangna pang malemunna Pilemon

⁴ Mantumpuꞌ pusumbayangku mampatu: dio se, ku mukurusumangaꞌ mao i Puangta

⁵ sàbaꞌ ku sàding‑moko ti kareba mampatu: malemummu pang pinumpummu mao i Puang Yesu pang mao i taunna Puang.

⁶ Kapatongangangmu manghoa:‑ming pangae: ung malemu. Pang u ku pusumbayang‑ing mangking u tùrung mampukauꞌ ung malemu sàbaꞌ u mangìsang nasang ung belo: i laling pinanahanta. Pang nasang to mampaiaho Datu: Pipasalamaꞌ.

⁷ Mantàdiku, ku haka: tungka manghele malemummu, pang pinanahangku matana, sàbaꞌ pinanahanna taunna Puang miluhali‑mo matana mangola: dio.

Pampalaunna Paulus mao i Pilemon mampatu: Onesimus

⁸ Deanna‑mo to, moi na mène: to moa teꞌ i laling Datu: Pipasalamaꞌ mading teng ku massuo:‑ko aka ti ung sipatu: u pukauꞌ,

⁹ hampoꞌ manghele malemummu, belo: sule: ku mingkalemu matung. Deaa‑mo kang tiꞌ, ku matua:‑moko pang i latenna ku nitarungkuꞌ ho sàbaꞌ Yesu Datu: Pipasalamaꞌ.

¹⁰ Dea‑mo to, ku mingkalemu tungka matung mampatu: besa tau ung ku àna:‑mo anakàku. Miluhali‑mo anakàku i laling kapatongangang, te ku nitarungkuꞌ e. Onesimus konana,

¹¹ ung dolung hang kipuhaliangna‑ida mao i dio, hampoꞌ i latenna kipuhaliangna‑da,* belo: mao i dio, belo: mao i koi:.

¹² I latenna, ku pantuyu‑mo sumule: matung, pambàtiꞌ na putìmi‑ko pinanahangku.

¹³ Sitongangna, ku kapelai:‑ko ti àla: mangapuꞌ‑i inne: miluhali angkeleꞌmu mandului‑kaꞌ, te ku nitarungkuꞌ sàbaꞌ Kareba Belo:.

¹⁴ Hampoꞌ ha mio:‑kaꞌ mampukauꞌ ti to i dang nu kasitoroꞌi‑i. Ku kapelai: moa teꞌ kabeloangmu hang na tumang‑i kaparalluang, sangadinna nai pinanaha mabusamu‑ra:.

¹⁵ Pang, màka: dea‑mo to ti dalangna pu nisaràki‑i nai dio pira-pira masainna, mangking u tarima pole u pasola: deaꞌ tùrungna.

¹⁶ Pang i latenna ha miluhalii: teng hura: kaunangmu, sangadinna miluhali‑moda mantàdita ung nipulemu. Ku karaꞌi tungka, hampoꞌ làbi u karaꞌia, belo: i laling kasiumpuꞌang tulino, belo: i laling Puang Yesu.

¹⁷ Jadiꞌ, i u àna:‑kaꞌ to‑ko sola: dalangmu pang sola: pingkamaꞌmu, ku palau tarima belo:‑i sibali u mi tarima.

¹⁸ Ìna ara kasalaangna mao i dio, dea‑raka indangna, eloꞌna‑mo koi: ti mangkoha: nasang to.

¹⁹ Kangkangku kalenanna ti ung marronno: tee miluhali pintokaꞌang teꞌ, Ku bayaꞌa‑ko. Ha parallu‑iko ku moa teꞌ sitongangna u kiindang mao i koi:, sàbaꞌ katuhoangmu ung màle.

²⁰ Jadiꞌ, mantàdiku, ku ranung u mi panghengi‑ing ung kipuhaliangna i laling Puang. Nai anto, u mampakatanaa pinanahangku i laling Datu: Pipasalamaꞌ.

²¹ I laling marronno: suraꞌ tee matung, ku patongang‑ko moa teꞌ u mampukauꞌa aka ti ung ku palau. Mala, ku ìsang moa teꞌ u mampukauꞌa làbi nai pampalaungku.

²² Sintàna: nai anto, ku palau ho u patokana‑ingnaꞌ kaoneang i rasangmu, sàbaꞌ ku ranung mangola: pampalaummu se i heleꞌna Puang, Na hungkai‑ràngingnaꞌ dalang mubela mao i dio se.

Sua: ung mantampàki

²³ Epapras, solaku nitarungkuꞌ sàbaꞌ Yesu Datu: Pipasalamaꞌ, mampadeaꞌ salamaꞌna matung.

²⁴ Mène: ho Markus, Aristarkus, Demas, pang Lukas, dea‑mo sola: pingkamaꞌku inne:, mampadeaꞌ‑da ho salamaꞌna‑i se.

²⁵ Na malemunna‑rangmo Puang Yesu Datu: Pipasalamaꞌ manterei‑ko se. Sama‑mo to. Passangadingki, Paulus