Matius 1 - Pangàlu' Baru Sura'na Puang i laling sua: tu Padang

Toroꞌna ampe-ampena Yesu Datu: Pipasalamaꞌ

¹ Toroꞌna ampe-ampena Yesu Kristus,* hatiꞌna Daud, na rara nai Abraham mène: tee,

² Abraham manteme:‑ing Isak, Isak manteme:‑ing Yakub, Yakub manteme:‑ing Yehuda pang mantàdi:-tàdina,

³ Yehuda manteme:‑ing ung rapi: Peres pang Sera nai Tamar, Peres manteme:‑ing Hesron, Hesron manteme:‑ing Ram,

⁴ Ram manteme:‑ing Aminadab, Aminadab manteme:‑ing Nahasson, Nahasson manteme:‑ing Salmon,

⁵ Salmon manteme:‑ing Boas nai Rahab, Boas manteme:‑ing Obed nai Rut, Obed manteme:‑ing Issai,

⁶ pang Issai manteme:‑ing Datu: Daud. Nai Daud deaꞌ tempona tu Israel nipaliꞌ mao i Babel, ampe-ampeNa mène: tee, Daud manteme:‑ing Salomo nai bahinena Uria dolung,

⁷ Salomo manteme:‑ing Rehabeam, Rehabeam manteme:‑ing Abia, Abia manteme:‑ing Asa,

⁸ Asa manteme:‑ing Yosapat, Yosapat manteme:‑ing Yoram, Usia ampe bulaꞌna Yoram,*

⁹ Usia manteme:‑ing Yotam, Yotam manteme:‑ing Ahas, Ahas manteme:‑ing Hiskia,

¹⁰ Hiskia manteme:‑ing Manasse, Manasse manteme:‑ing Amon, Amon manteme:‑ing Yosia,

¹¹ ampena Yekonia pang mantàdi:-tàdina. Nai anto, tu Israel na paliꞌ tantara Babel mao i lipuna.*

¹² Ladu nai anto deaꞌ nikianak‑ing ti Yesu, ampe-ampeNa mène: tee, Yekonia manteme:‑ing Sealtiel, Sealtiel manteme:‑ing Serubabel,

¹³ Serubabel manteme:‑ing Abihud, Abihud manteme:‑ing Elyakim, Elyakim manteme:‑ing Asor,

¹⁴ Asor manteme:‑ing Sadok, Sadok manteme:‑ing Akim, Akim manteme:‑ing Eliud,

¹⁵ Eliud manteme:‑ing Eleasar, Eleasar manteme:‑ing Matan, Matan manteme:‑ing Yakub,

¹⁶ Yakub manteme:‑ing Yusup, muanena Maria. Pang nai Maria dea‑mo to ti Yesu nikianak‑ing, ung nikonai: Datu: Pipasalamaꞌ.

¹⁷ Jadiꞌ, nai Abraham deaꞌ mao i Daud, ara sampulo: ùpaꞌ alena hatiꞌna. Nai Daud deaꞌ tempona tu Israel nipaliꞌ mao i Babel, sampulo: ho ùpaꞌ alena hatiꞌna. Nai tempona tu Israel nipaliꞌ mao i Babel deaꞌ aranna Datu: Pipasalamaꞌ, sampulo: ho ùpaꞌ alena hatiꞌna.

Yesu Datu: Pipasalamaꞌ nikianak‑ing

¹⁸ Patidoluangna aranna Yesu Datu: Pipasalamaꞌ mène: tee, Dea ti inanNa, dea‑mo Maria, sikàtui‑mo silopàka sola: Yusup. Hampoꞌ hang silopaka‑mi se, kaleang‑moda. (Kaleang sàbaꞌ kuasanna Pinanaha Malìsong.)

¹⁹ Jadiꞌ, i laling pinanahanna Yusup, dea‑mo muanenaa Maria, na kàtui teng ti sumuruꞌ, sàbaꞌ tau ung manuruꞌ‑da i alukùna tu Yahudi. Hampoꞌ na aku: ti sumuruꞌ mimmànaꞌ-mànaꞌ, pang hang na ìsang‑i tau, mangking Maria hang mangkorai:‑i madia: nai tau boso:.

²⁰ Hampoꞌ tarrang na tangaꞌ, maturunna‑mi pang mupaturu mangita malaikaꞌna Puang mangongi‑ing teꞌ, “Yusup, hatiꞌna Daud, hau mariaꞌ mampubahine Maria, sàbaꞌ dea ti ung na kaleang‑ing, nai Pinanaha Malìsong‑da.

²¹ Mangkianàking‑da besa anaka muane, pang u konaia Yesu (palleona Pipasalamaꞌ), sàbaꞌ Dea‑mo ti ung mampasalamaꞌa taunNa nai dosanna.”*

²² Nasang to nipaara, mangking tikannaꞌ ti pusuana Puang ung Na padeaꞌ mangola: nabi moa teꞌ,

²³ “Anaka bahine ung dang ara‑kang na sola: muane, kaleànga pang mangkianàking muane. Anaka to, nikonaia Imanuel,”* (palleona Puang mi pasola:).

²⁴ Tòna tèdeꞌ‑mo ti Yusup, na pukauꞌ ti aka ung na pusua: malaikaꞌna Puang, dea‑mo mangala Maria miluhali bahinena.

²⁵ Hampoꞌ hara‑mida na sola:‑i se, deaꞌ kianaka ti Maria. Kianaka‑mo, mangkianak‑ing muane, pang na hengi‑ing Yusup kona:, Yesu. Mène:‑mo to ti patidoluangna Puang Yesu tempona nikianak‑ing.