Markus 6 - Pangàlu' Baru Sura'na Puang i laling sua: tu Padang

Kanabiangna Yesu ha nitarima‑i i Nasareꞌ

¹ Kakarangna‑mi ti Yesu sola: pasikolaNa nai lipu: Kapernaung, pang mao i lipuNa.

² Àlo kapillìheang‑mo, mupaturo: ti Yesu i tamming kapinombaang. Mimàha ti jamaa, to na sàding‑mi se, pang musua:‑i se moa teꞌ, “Nai iaka‑da Na korai:‑i ti nasangna te? Kamanaràngang aka‑da ti ung nihengi‑ing te? Pang mangaka pùna hela‑Da mampukauꞌ kalle-kalleang?

³ Handei:‑Da naꞌ to tukang, anakàna Maria, mantàdina Yakobus, Yoses, Yudas pang Simon? Pang, inne:‑i se ho ti mantàdiNa bahine.” Na tumpaꞌna‑mi se ti Yesu.

⁴ Musuana‑mi ti Yesu mao i tau to‑i se mampingulaꞌi dalang sua: moa teꞌ, “Nabi na sangadi‑da tau iaka-aka. Hampoꞌ i tanandapoꞌna, i àlaꞌna rapunna, pang i lipuna, hari:.”

⁵ Hari: dalang mampukauꞌ kalle-kalleang ti Yesu i anto, sàbaꞌ hang mupatongang‑i se, sangadi mantokaꞌ teng pira-pira tau ung mipanaꞌ pang miluhali matalete:.

^6a Kalle ti Yesu manghele‑i se, ha umma‑i to, ha na patongang‑i moa teꞌ Yesu ìnang nabi‑da.

Yesu mampantuyu sampulo: idua pasikolaNa

^6b Mingkulilingna‑mi ti Yesu* i lipu:-lipu: sintàna: pai anto pang mupaturo:.

⁷ Nai anto, Na hàngo ti sampulo: idua pasikolaNa mukobu:. Na panghenginna‑ming kuasa mampasahu dihata bulituku pang Na pantuyu lumao si idua-dua.

⁸ Na pasakiꞌ ho moa teꞌ, “Hau kabaha-baha se aka i laling pammulaoangmu se, sangadi doke:. Hau mambaha se kinallo, pangànaang aka-aka, dea‑raka seeng.

⁹ Mading u musapatu se, hampoꞌ hau mambaha se pipasònoꞌ.”

¹⁰ Na konai: ho moa teꞌ, “Isai ti ung mantarima‑ko se i rasangna, leta:‑ko se one: deaꞌ u mampalii: se lipu: to.

¹¹ Hampoꞌ ìna u bùruꞌ se mao i besa kaoneang, pang tau pai anto hang mantarima‑ko se pang ha mampisàdìngi‑ko se, tupai: ti ahu nai kokoꞌmu se miluhali pipakalehai moa teꞌ, ‘U masolànga se,’ pang palii: ti kaoneang to.”

¹² Kakarangna‑mi se to sampulo: idua pasikolana Yesu. Lumai: se mampadeaꞌ kareba mao i tau moa teꞌ, “Parallu u mingkatobaꞌ se nai dosa-dosammu se.”

¹³ Pimboso:‑i se mampasahu dihata bulituku nai tau pang marrupaꞌ minnaꞌ saitun mao i tau ung si mipanaꞌ pang na pumatalete:‑i se.

Yohanes Pumpudoiꞌ nipatei

¹⁴ Na sàding‑mo Datu: Herodes ti kalle-kalleangna Yesu, sàbaꞌ makona:‑mo ti konaNa iaka-aka. Ara tau ung mangkonai: moa teꞌ, “Yohanes Pumpudoiꞌ‑Da ti to, tuho: pole. Dea pùna mingkamaꞌ ti kuasa-kuasa i Dea.”

¹⁵ Sintàna: mangkonai: ho moa teꞌ, “Dea ti, nabi Elia‑da, bùruꞌ pole.”* Sintàna: kang ho mangkonai: moa teꞌ, “Dea ti, nabi ung laing‑da, sibali nabi-nabi ung dolung.”

¹⁶ To na sàding‑mo Herodes ti pantangaꞌna‑i se, musuana‑mi moa teꞌ, “Hari:! Yohanes‑Da ti, ung ladu ku lempòki bakàna, màka: tuho: pole.”

¹⁷ Sàbaꞌ tempona Yohanes tuho: maang, Herodes‑da ìnang ti ung mampisuo:‑ing Yohanes nitingkang pang nitarungkuꞌ, ha umma‑i to, kara-kara Herodias, bahinena Pilipus pulengkeꞌna, ung na ala‑mo Herodes miluhali bahinena.

¹⁸ Sàbaꞌ pimmira-mira‑mo na ràho‑i Yohanes ti Herodes moa teꞌ, “U malahang‑do ti marrampaꞌi adimmu mangala bahinena.”

¹⁹ Deanna‑mo to, bùruꞌ ti piàmaꞌna Herodias mao i Yohanes moa teꞌ, “Arannaa‑mo ku patei.” Hampoꞌ hari: dalang,

²⁰ sàbaꞌ tiulu‑mo ti Yohanes na kuyaꞌ Herodes na patama i putarungkuꞌang. Mariaꞌ-riaꞌ ti Herodes mao i Yohanes, sàbaꞌ na ìsang moa teꞌ Yohanes dea‑mo tau ung mahulo: i heleꞌna Puang. Hampoꞌ ìna na sàding ti Yohanes, muringkèla: ti tangaꞌna, na moi‑rika masannang ho mampisàdìngi‑i.

²¹ Katampàkang, bùruꞌ ho teng ti kanàha: ung belo: mao i Herodias. Tòna àlo jadinna Herodes, mampaara pampukauꞌ mao i nasang tubaraꞌ-tubaraꞌna, komandang-komandang bataliong, pang ung si nipiama: i Galilea.

²² To tempona, anaka bahinena Herodias mintama pang minariꞌ, mampumasannang pinanahanna Herodes pang tubùruꞌna. Musuana‑mi ti Herodes mao i anaka bahine to moa teꞌ, “Palau mao i koi:, aka ti ung nu kapelai:, ku hengi‑ingko!”

²³ Musumpanna‑mi mao i anaka bahine to moa teꞌ, “Aka pòteng ti ung nu palau, u ku hengiing, deaꞌ mulummu: kasukiꞌangku.”

²⁴ Missòhongna‑mi ti anaka to mao mangkutiki inanna moa teꞌ, “Aka ti ung parallu ku palau?” Sùmunna moa teꞌ, “Bakàna Yohanes Pumpudoiꞌ.”

²⁵ Masàraꞌna‑mi mintama pole mao i Herodes moa teꞌ, “Ku kapelai: mangking i latenna ho u mi hengi‑ing bakàna Yohanes Pumpudoiꞌ i baki.”

²⁶ Masussanna‑mi tungka ti pinanahanna Herodes, hampoꞌ tiꞌ sumpanna pang tubùruꞌna, na tarima‑mo teng.

²⁷ Na pantuyunna‑mi ti besa pasukangna moa teꞌ, “Ala mao ti bakàna Yohanes.” Lumanna‑mi ti pasukang to, pang mallempòki bakàna Yohanes i putarungkuꞌang.

²⁸ Na bahanna‑mi ti baka to i baki pang na àdo:‑ing mao i anaka bahine to, pang na àdo:‑ing mao i inanna.

²⁹ To na sàding‑mi pasikolana Yohanes, bùruꞌna‑mi se mangala hatang puntinna, pang na loling‑i se i kaburuꞌ ung niboboko i mungku hatu.

Yesu mampakanne: lima sàbunna tau

³⁰ Pasikolana Yesu mangule:‑ming nai pammulaoang ung nipantuyu‑ing se, lumao pole mampatidolu nasang aka ti ung ladu na pukauꞌ pang ung na pipaturo:‑ing se.

³¹ Boso: tungka tau lumao mai, urungang Yesu sola: pasikolaNa ha na aka‑i ti manne:. Hari: tempo. Tipasua:‑mo ti Yesu mao i pasikolaNa moa teꞌ, “Ingke se i kaoneang ung tunini, ingke: ni pakala millìhe sangkìdoꞌ.”

³² Kakarangna‑mi se mulemmang mao i kaoneang ung tunini.

³³ Hampoꞌ boso: tau ung mangita‑i se kakarang. Na ìsang to‑da ho ti kaoneang ung na patu:‑i se. Jadiꞌ, masàraꞌ-sàraꞌ‑mi se ti tau i nasang lipu: i anto mammulao mampidolùngi‑i se.

³⁴ Minguluꞌna‑i ti Yesu nai lemmang, Na ita ti tau ung dang makàdaꞌ bosona. Malemu manghele‑i se, sàbaꞌ mène: domba ung dang ara pikuyaꞌna. Jadiꞌ, bosona‑mi kara-kara Na pipaturo:‑ing.

³⁵ I malena, mao ti pasikolaNa massilàha:‑ing moa teꞌ, “Hengia‑mo, pang kaoneang te karao: nai lipu:.

³⁶ Belo:‑da Ta suo:‑mi se sumule:, na lumai: se mangokaꞌ kinanne: pai lipu: dea‑raka pai kinete:.”

³⁷ Hampoꞌ pisùmunNa moa teꞌ, “Dio‑mo se teng ti ung mampakanne:‑i se.” Na konaina‑mi se pasikolaNa moa teꞌ, “Ki helaa‑ka naꞌ ti mambalaꞌ roti ung idua atuꞌna seeng peraꞌ, nipampakanneing tau tie‑i se?”

³⁸ MusuaNa‑mi moa teꞌ, “Pira ti roti ung ara i dio se? Nao: se manghele.” Na konaina‑mi se moa teꞌ, “Lima, pang idua urung.”

³⁹ Na suona‑mi nasang ti tau mesong sikobu:-kobu: i padang.

⁴⁰ Mesong belo:‑mi se sangesong-esòngang. Ara ung sangatuꞌ. Ara ho ung lima pulona tau sampolaiang.

⁴¹ Na alanna‑mi Yesu ti lima roti pang idua urung to, tumonga:, pang musumbayang mukurusumangaꞌ. Na tòpe-tòpekèna‑mi to roti pang Na àdo:‑ing pasikolaNa, na kàlaꞌ-kàlaꞌ‑ing tau boso:. Mène: ho to ti urung.

⁴² Mannena‑mi se nasang deaꞌ boro.

⁴³ Ladu manne:, na kobu: pasikolaNa ti tàranna ung nianne:, sampulo: idua rota:.

⁴⁴ Bosona tau ung manne:, muane maang, ara lima sàbunna.

Yesu mammulao iahona uhai

⁴⁵ Ladu nai anto, sàhe: na pantuyu Yesu ti pasikolaNa moa teꞌ, “Millanto‑mo: se i lemmang pang kakarang‑mo: se dolung mao i heteꞌna, i Betsaida. Ku massuo:‑kang tau boso: sumule:.”

⁴⁶ Tòna sisaraka‑mi se, lumao‑mo i mungku ti Yesu musumbayang.

⁴⁷ Tòna makarinning‑mo, one:‑mo i lummu: tasiki ti pasikolaNa, pang Yesu leta: na besa‑i i kàdaꞌ.

⁴⁸ Na itanna‑mi Yesu ti pasikolaNa sisantaꞌ mambose lemmangna‑i se, sàbaꞌ pasaui mantadoꞌi, mambùruꞌ‑ing kira-kira jaang itàlu i pihengi, bùruꞌ mammulao iahona uhai mandùkuꞌi pasikolaNa.

⁴⁹ Hampoꞌ to na ita‑mi se moa teꞌ ara Tau mammulao iahona uhai, na kapang‑i se anitu. Mikei:-keina‑mi se,

⁵⁰ sàbaꞌ lòsoꞌ‑i se mangita‑I pang tipadàlaꞌ‑i se tungka. Hampoꞌ musua: sahe: ti Yesu moa teꞌ, “Koi:‑ko te. Matana‑ko se! Hau mariaꞌ se!”

⁵¹ Millantona‑mi i lemmang ti Yesu mampampasikorai:‑ing se pang mànaꞌ ho ti pasaui. Mimàhanna‑mi se tungka,

⁵² sàbaꞌ liung teng to palleona kalle-kalleang roti i maloe pang tangaꞌna‑i se lupu sumpìring.

Yesu mampumatalete: tau ung si mipanaꞌ i Gennesaret

⁵³ Tòna deaꞌ‑mi se i heteꞌna, na pintaꞌinna‑ming se ti lemmangna pang millanto i Gennesaret.

⁵⁴ Tòna minguluꞌ‑mi se nai lemmang, pàtu: na tannai: tau boso: ti Yesu.

⁵⁵ Tipadennekèna‑mi se mao pai lipu:-lipu: i anto mupaìsàngi, pang tau ung massàding kareba dea to, massikohai: tau ung mipanaꞌ i paturuangna lumao iaka-aka na ara karebanna Yesu.

⁵⁶ Iaka Na lumaꞌi, belo: i lipu:-lipu: ung maranga, belo: i lipu:-lipu: ung supi:‑i, na loling‑i se ti tau ung mipanaꞌ i pasaꞌ pang mampalau mao i Yesu mangking tau ung si mipanaꞌ nipatinai mangerong, moi ammerona kayaꞌNa pòteng. Pang nasang tau ung mangerong‑I, moi ammeroNa teng, miluhali matalete:.