Markus 4 - Pangàlu' Baru Sura'na Puang i laling sua: tu Padang

Rampeang besa tau ung sumahuꞌ

¹ Nai anto, mupaturo: kang ho i minanaꞌ tasiki. Bùruꞌna‑mi ti tau ung dang makàdaꞌ bosona mangkaropo Yesu, dea pùna millanto i lemmang pang mesong i anto, pang dea ti tau boso: one: i kàdaꞌ i minanaꞌ tasiki.

² Pang Yesu mampipaturo:‑ing boso: laoangna pipaturo: mao i tau to‑i se, mampake rampeang. I laling besa pipaturoNa to, mampatidolu moa teꞌ,

³ “Pisàdìngi‑ko se! Ara besa tau ung lumao sumahuꞌ.

⁴ Tempona sumahuꞌ, sinahuꞌ sintàna: toang i dalang. Bùruꞌna‑mi ti kudaꞌ manganne: deaꞌ lòsoꞌ.

⁵ Sintàna: toang i tampo: ung kihatu i hoiꞌna, ung dang boso: tampona, pang sinahuꞌ to tuho: masàraꞌ, sàbaꞌ manipa: ti tampona.

⁶ Hampoꞌ tòna mikehiꞌ‑mo ti kùlaꞌ, malaso pang miluhali màlo, sàbaꞌ hang kaladung‑i ti pioaꞌna.

⁷ Sintàna: kang ho toang i tampo: ung madàli makàrang, pang sa: baraꞌ-baraꞌna ti làmaka to, mangkàràngi, pu dang na hoa:.

⁸ Pang sintàna: toang i tampo: ung malompo:, tuho: belo: pang mahoa:. Haseleꞌna ara ung miluhali itàlu pulona lùpiꞌna, ara ung miluhali ùnung pulona, ara ho ung miluhali sangatuꞌ lùpiꞌna.”

⁹ Pang musua: kang ti Yesu moa teꞌ, “Isai ti ung kitalinga, na pisàdìngi‑i!”

¹⁰ Tòna sisaraka‑mi se tau boso:, tau ung si mangulaꞌ‑Mi pang sampulo: idua pasikolaNa mampingkutik‑ing palleona rampeang to.

¹¹ SùmunNa mène: tee, “Aka ti ung dang niìsang‑kang nai dolung mampatu: mangaka ti Puang muparenta, u nihengi‑ming se, hampoꞌ mao i tau i sòhongna, nasang angkanna nipadeaꞌ i laling rampeang,

¹² mangking ‘na moi‑rika na ita‑i se, hampoꞌ hang na ìsang‑i aka ti ung Ku pukauꞌ. Na moi‑rika na sàding‑i se ti suaKu, hampoꞌ hang na pahang‑i. Àla: na ìsang‑i se, àla: mingkatobaꞌ‑i se pang nipantengkai:‑ing.’*”

¹³ Musuana‑mi ti Yesu mao i dei: se moa teꞌ, “Ha u pahang‑ko se naꞌ ti rampeang tau ung sumahuꞌ? Ìna mène: to, mangakaa u hela se mangìsang ti nasang rampeang sintàna:?

¹⁴ Tau ung sumahuꞌ to, massahuꞌ suana Puang.

¹⁵ Dea ti ung toang i dalang, ung nisahuꞌi suana Puang to, manturo: tau ung massàding suana Puang, hampoꞌ bùruꞌ sahe: ti Datuna dihata bulituku pang marrampaꞌi to suana Puang ung màli: nisahuꞌ mao i dei: se.

¹⁶ Mène: ho ti ung toang i tampo: ung kihatu i hoiꞌna, manturo: tau ung massàding suana Puang pang pàtu: haka:‑i se mantarima,

¹⁷ hampoꞌ suana Puang hang mioaꞌ‑i i pinanahanna, dea pùna hang tàraang‑i masai. Ìna bùruꞌ ti kamasussaang dea‑raka kamaparriꞌang nai padanna sàbaꞌ suana Puang, madàli‑i se mingkeboꞌ.

¹⁸ Pang sintàna:, dea‑mo ung toang i tampo: ung madàli makàrang, manturo: tau ung massàding suana Puang,

¹⁹ hampoꞌ mantangaꞌ teng katuhoang i lino tee, mangkapelai: kasukiꞌang ung mi tangkasi:, pang mangkapelai: sàri aka-aka. Nasang to mintama mangkàràngi suana Puang, pu dang na hoa:.

²⁰ Hampoꞌ sinahuꞌ ung toang i tampo: ung malompo: manturo: tau ung massàding pang mantarima suana Puang. Hoana‑mi, pang haseleꞌna, ara ung miluhali itàlu pulona, ara ung miluhali ùnung pulona, pang ara ung miluhali sangatuꞌ.”

Rampeang pallita

²¹ Musuana‑mi ti Yesu mao i tau to‑i se moa teꞌ, “Tau ung mambaha pallita, handei: mangking nipatauꞌi dea‑raka niàna: i hoiꞌna paturuang, sangadinna nipatumenneng i kaoneang iaho,

²² sàbaꞌ hari:‑da aka nai Puang ung tihuni ung dang nipupiitaa, pang hari:‑da ung dang niìsang dang nipatumennènga.

²³ Deanna‑mo to, isai ti ung kitalinga, na pisàdìngi‑i!”

Sa: pimboso:-bosona ni massàding pang mantoroꞌi suana Puang, sa: boso:-bosona Na pupiita

²⁴ Musuana‑mi kang ho ti Yesu moa teꞌ, “Tangaꞌ belo:‑ko se aka ti ung nu sàding se! Pisukaꞌ ung nu pake se massàding suana Puang nipakea ho massukaꞌ matung, pang nipakànaꞌia,

²⁵ sàbaꞌ isai-sai ti ung ara‑mo na ampu, nipakànaꞌia kang ho, hampoꞌ isai-sai ti ung mangampu sangkìdoꞌ‑i, niala hèraꞌa nai kalaena.”

Sa: boso:-bosona tau ung miluhalia taunna Puang i kadatuangNa

²⁶ Musuana‑mi ti Yesu moa teꞌ, “Mène:‑mo te ti tau i kadatuangna Puang, Niala rampeang tau ung sumahuꞌ.

²⁷ Ladu sumahuꞌ ti tau to, i pihengi maturu pang i pitàlo tèdeꞌ, mangahong teng tempona, sàbaꞌ lupu tuho: pang sa: baraꞌ-baraꞌna ti sinahuꞌ. Mangaka ti piluhalinnaa hang na ìsang‑ida,

²⁸ sàbaꞌ tuho: kalenanna‑da ti sinahuꞌ nai tampo:, parrara daungna, màli: hatangna, màli: na hoana.

²⁹ Hampoꞌ ìna malea:‑mo ti hoana to, na saeꞌ‑mo, sàbaꞌ tempona‑mo.”

Rampeang hatunna tanammong

³⁰ Musua: kang ho ti Yesu moa teꞌ, “Dea ti tau i kadatuangna Puang, aka ti ung hela nipasikantereànging? Rampeang aka ti ung hela nipadeaꞌ mampumakàso:? Niala rampeang

³¹ hatunna tanammong ung nisahuꞌ i tampo:. Hatunna to ìnang kàle: ung supina nai nasang lamùngang ung ara i lino.

³² Hampoꞌ ìna nisahuꞌ, miluhali lammuꞌ nai nasang sinnaꞌ sintàna: pang mikalidi: lammuꞌ, dea pùna hela na kaonei: kudaꞌ misàrang pang millilong ti karumpenganna.”

³³ I laling boso: rampeang ung mène: to, Yesu mampadeaꞌ suana Puang mao i tau boso: siulaꞌ ung na ìsang‑i se,

³⁴ pang mampake teng lupu rampeang. Hampoꞌ mao i pasikolaNa, Na pumakàso: ti nasangna.

Yesu mampamànaꞌ pasaui mahara

³⁵ I malena àlo to, na konai: Yesu mao i pasikolaNa teꞌ, “Ingke se i heteꞌna.”

³⁶ Jadiꞌ, na baha‑i se mulemmang ti Yesu i lemmang to, ung Na kaonei:, pang pira-pira lemmang sipolaiNa, mampalii: tau boso:.

³⁷ Bùruꞌna‑mi ti pasaui mahara ung lammuꞌ, pang pallintana uhai mantumpa: lemmang pang mimbasse tama i laling, mambùruꞌ‑ing lemmang to, marrara pùno: uhai.

³⁸ Tempo to, Yesu tarrang leto mampake teng olong i ukinna lemmang. Na enangNa‑mi pasikolaNa moa teꞌ, “Tungguru, U mio:‑do naꞌ i ni masolang‑i?”

³⁹ Tèdeꞌna‑mi ti Yesu, marràho pasaui to, pang mamparenta tasiki moa teꞌ, “Mànaꞌ! Rapaꞌ‑ko!” Mantanna‑mi ti pasaui, pang tasiki miluhali mànaꞌ tungka.

⁴⁰ Musuana‑mi ti Yesu moa teꞌ, “Aka pu u mariaꞌ se tungka? Aka dang nu Mi patongang se?”

⁴¹ Sa: mariaꞌ-riaꞌna‑i se pang silàha:-làha: moa teꞌ, “Isai sitongangna ti Tau te? pùna hela‑da ti pasaui sola: tasiki manuruꞌ Na parenta?”