Markus 3 - Pangàlu' Baru Sura'na Puang i laling sua: tu Padang

Yesu mampumatalete: tau tempona àlo kapillìheang

¹ Nai anto, lumao pole ti Yesu i tamming kapinombaang. I anto ara besa tau ung mate sammaliang kangkangna.

² Na kapupuinna‑mi se tu Parisi ti Yesu, ìna mampumataletea tau to tempo àlo kapillìheang, mangking na pasala:‑i se.

³ Musuana‑mi ti Yesu mao i tau to, ung mate kangkangna moa teꞌ, “Hàmo:, tèdeꞌ‑ko i lummuna jamaa!”

⁴ Musuana‑mi ti Yesu mao i tau to‑i se moa teꞌ, “Umma ti ung mading nipukauꞌ tempo àlo kapillìheang? mampukauꞌ ung belo:? dea‑raka ung kadetu. Mupasalamaꞌ? dea‑raka mupatei.” Hampoꞌ mimmànaꞌ‑i se teng.

⁵ Makadai ti pinanahanna Yesu sàbaꞌ makarraꞌ ti pinanahanna‑i se, pang lalaka mihele pàli i tau ung mampimpalìngi‑I. MusuaNa‑mi mao i tau to moa teꞌ, “Ànaꞌ ti kangkangmu!” Na ànaꞌna‑mi, pang belo:‑mo.

⁶ Missòhongna‑mi ti tu Parisi pang silàha:-làha: tau mui Datu: Herodes mangokaꞌ dalang mangking mampatei Yesu.

Tau boso: mangulaꞌ Yesu

⁷ Nai anto, malai ti Yesu mao i Tasiki Galilea sola: pasikolaNa, pang na ulaꞌ tau boso:, nai Galilea, nai Yerusalem

⁸ pang lipu:-lipu: sintàna: i Yudea, nai Idumea, nai heteꞌna Yordan, nai pangalanna Tirus pang Sidon, sàbaꞌ na sàding‑mi se aka ti ung na pukauꞌ Yesu.

⁹ Na suo: ti pasikolaNa mampatokana‑ing lemmang, mangking ara Na kaonei: mupaturo:, i mènena‑i to moa teꞌ na siopiia tau boso:,

¹⁰ sàbaꞌ boso: tau Na pumatalete:. Dea pùna nasang tau ung mipanaꞌ musiala mao mangerong‑I mangking matalete:.

¹¹ Asalang na ita tau ung na katama dihata bulituku ti Yesu, mukalimuntuꞌ tumunnuku i heleꞌNa, mikakoang moa teꞌ, “Dio‑modo ti Anakàna Puang.”

¹² Hampoꞌ na apuꞌ tungka Yesu ti dihata bulituku mampupiìsang isai‑i ti Dea.

Yesu mampilei sampulo: idua pasikolaNa

¹³ Nai anto, làngang mao i mungku ti Yesu massaràki kalaeNa nai tau boso:. ManghàngoNa‑mi tau ung Na kapelai:, pang tau to‑i se lumao.

¹⁴ MampileinNa‑mi sampulo: idua tau mampasipolai:‑I, pang Na suoa lumao mampadeaꞌ Kareba Belo:

¹⁵ pang sola: kuasa mampasahu dihata bulituku.

¹⁶ Sampulo: idua tau ung Na pilei to dea‑mo Simon ung Na konai: Petrus,

¹⁷ anakàna Sebedeus, dea‑mo Yakobus pang Yohanes (pàli idua tau to, na konai: Yesu, Boanerges, palleona mabaluntuꞌ),

¹⁸ màli: Andreas, Pilipus, Bartolomeus, Matius, Tomas, Yakobus anakàna Alpeus, Tadeus, Simon nai kalompoꞌ Patriot,

¹⁹ pang Yudas tu Kariot ung mambalòka Yesu.

Yesu nitannaꞌ na katama Beelsebul

²⁰ Nai anto, mangule:‑ing ti Yesu mao i besa rasang i lipu: Kapernaung. Hampoꞌ boso: kang ho tau mukobu: i anto, mambùruꞌ‑ing Yesu sola: pasikolaNa, moi manne:, hang na aka‑i se.

²¹ To na sàding‑mi tau deanNa i Nasareꞌ, lumanna‑mi se mangala‑I, sàbaꞌ na tangaꞌ‑i se moa teꞌ, “Nahaiang‑moDa.”

²² Ara ung si manarangna i aluku tu Yahudi ung bùruꞌ nai Yerusalem pang mangkonai: moa teꞌ, “Yesu na katama Beelsebul, Datuna dihata bulituku. Pang dea‑da ti ung mampanghengi‑ing kuasa mampasahu dihata bulituku.”

²³ Na hàngona‑mi Yesu ti nasang tau i anto pang Na pampatidolu‑ing pira-pira rampeang moa teꞌ, “Mangaka ti Datuna dihata bulituku pùna mampasahu solana teng?

²⁴ Ìna besa kadatuang sikeboꞌ-keboꞌi pang siponi:, kadatuang to ha helai:‑da tinna:.

²⁵ Mène: ho, ìna i laling besa tanandapoꞌ hari: kamamesaang, sangadinna sikeboꞌ-keboꞌi sule:, tanandapoꞌ to ha helai:‑da ho tinna:.

²⁶ Mène: ho to ti i kadatuangna Iblisiꞌ. Ìna Datuna dihata bulituku sikeboꞌ-keboꞌi pang siponi:, kadatuang to ha masaii: pang hùlìnga.

²⁷ Hari:‑da besa tau ung hela mintama i tammingna tau ung pabuu: pang marrampaꞌi kasukiꞌangna i dang na pungu‑kàngi ti tau to. Ladu to, màli: na hela marrampaꞌi kasukiꞌangna.

²⁸ Matantu te ung Ku pusua: matung e teꞌ Nasang dosanna tulino, moi sua: ung mampaihoiꞌ Puang, hela nipantengkai:‑ing.

²⁹ Hampoꞌ ìna mantumpaꞌ pingkamaꞌna Pinanaha Malìsong, hari: dalang nipantengkai:‑ing, sangadinna dosa to, nikìling deaꞌ tùrungna.”

³⁰ (Na pusua: Yesu mène: to, sàbaꞌ ara tau ung mangkonai: moa teꞌ, “Yesu na katama dihata bulituku.”)

Inanna pang mantàdina Yesu

³¹ Bùruꞌna‑mi ti inanna pang mantàdi:-tàdina Yesu. Tèdeꞌ i sòhongna, misuo:‑i se manghàngo‑I.

³² Tau boso: mesong mallebo‑I pang mangongi‑ing moa teꞌ, “Hele, inanTa pang mantàdi:-tàdiTa one:‑i se i sòhongna mangokaꞌ‑Ke.”

³³ Na sùmui Yesu moa teꞌ, “Isai ti inangKu pang isai ti mantàdiKu?”

³⁴ Mihele pàli i tau ung mesong mallebo‑I pang musua: moa teꞌ, “Dea‑mi dasse: tee ti inangKu pang mantàdiKu.

³⁵ Sàbaꞌ isai-sai ti ung mampukauꞌ pampuinahanna Puang, dea‑mo to ti mantàdiKu muane, mantàdiKu bahine, pang inangKu.”