Lukas 1 - Pangàlu' Baru Sura'na Puang i laling sua: tu Padang

Sua: ung na pupidolung Lukas

¹ Mampatu: Teopilus ung ku sangadi, Boso:‑mo ti tau ung mangokaꞌ dalang marronno: nasang kadadiang-kadadiang ung tikannaꞌ‑mo i àlaꞌ-àlaꞌta se.

² Na ronno:‑i se sibali ti ung na pakareba tau ung mangita mata‑mo kadadiang to nai pararanna pang na padumallaꞌ‑i se ti kareba to mao i kìta: se.

³ Tòna ku pidalang‑mo tungka nasang ti to nai pararanna, ku pibelo:‑ko ho ti marronno: besa suraꞌ ung mangumpuꞌ nasang to

⁴ mangking ta hela mambasa pang mangìsang moa teꞌ aka ti ung nipipaturo:‑ming mao i kinta:, ìnang tongang.

Aranna Yohanes Pumpudoiꞌ nipupihuyang

⁵ Tòna Herodes ti datu: i Yudea, ara besa imang ung nikonai: Sakaria, nai kalompoꞌ imang Abia. Bahinena nikonai: Elisabet, ung hatiꞌna ho imang.

⁶ Tuhona‑i se sampubahineang to, tongang i heleꞌna Puang. Hari: salaiangna‑i se i laling tuho: mantoroꞌi nasang parentanna pang atorangna Puang.

⁷ Hampoꞌ hang kianak‑i se, sàbaꞌ mikamma ti Elisabet, pang nai iduanna matua:‑mi se.

⁸ Tempona na puumpa: kalompoꞌ Abia mangkamaꞌ kamaꞌangna miluhali imang i heleꞌna Puang,

⁹ na pukauꞌ‑i se ti kabiasaangna mangola: undi. Ara sangàlo, Sakaria ti ung na leo: undi mintama i Tamming Kabussùngang pang mantunu dupa i anto.

¹⁰ Pang mène: kabiasaang tempona kapinombaang mantunu dupa, nasang jamaa musumbayang i sòhongna.

¹¹ Tempo to, besa malaikaꞌna Puang mampingèneꞌi Sakaria, tèdeꞌ mui konangna pantunuang dupa.

¹² Na itanna‑i Sakaria ti malaikaꞌ to, mimàha pang mariaꞌ.

¹³ Hampoꞌ musua: ti malaikaꞌ to teꞌ, “O Sakaria, hau mariaꞌ! Sàbaꞌ na sàding‑mo Puang ti pusumbayangmu, pang bahinemu, dea‑mo Elisabet, mangkianàking besa anaka muane. Pang parallu u konai: Yohanes.

¹⁴ Masannànga tungka ti pinanahammu, pang boso: tau mihakaa sàbaꞌ nikianak‑ing ti anaka to.

¹⁵ Sàbaꞌ miluhalia‑da tau ung lammuꞌ i heleꞌna Puang. Pang ha madìngi: mangenung anggoroꞌ dea‑raka mangenung aka teng ung si mi liling. Songka: aranna i balammangna inanna, na kuasaia‑da Pinanaha Malìsong.

¹⁶ Boso: tu Israel na pupiluhalia mangule:‑ing mao i Puang, dea‑mo Puangna‑i se.

¹⁷ Mampidolùnging Puang silentong Pinanaha Malìsong pang kuasa ung sibali na ampu nabi Elia dolung. Mampupiluhalia pinanahanna ama:-ama: malemu pole mao i anakàna‑i se, pang tau ung dang si manuruꞌ na pupiluhalia mangule:‑ing mao i pantangaꞌ ung belo: pang mahulo:. Na pukauꞌ ti to mangking mampatokana tau to‑i se mao i Puang.”

¹⁸ Sakaria mangkutiki malaikaꞌ to moa teꞌ, “Nai tanda aka ti helaa ku ìsang moa teꞌ aka to jadia? Sàbaꞌ ku matua:‑moko sìnang singkoringku.”

¹⁹ Misùmunna‑mi teꞌ, “Koi:‑mo ti Gabriel, ung mulayani* i heleꞌna Puang. Ku Na pantuyu‑mo matung mampadeaꞌ kareba belo: te.

²⁰ Kalehai! Na rara i latenna u miluhalia bebe. Hang helao: musua: deaꞌ tempona nipaara to ung ku pusua:‑mo, sàbaꞌ ha u patongang‑i ti suaku ung nikannaꞌia i tempona‑mi.”

²¹ To tau i sòhongna mangahong maang Sakaria. Kalle‑i se sàbaꞌ masai rasi i laling Tamming Kabussùngang.

²² Pang dea tòna missòhong‑mo, hang hela‑i musua:, mampitubebe teng. Nai anto, na ìsang‑i se moa teꞌ kaitaang‑moda i laling.

²³ Tòna ladu‑mo ti tempona mulayani i Tamming Kabussùngang, mangule:‑ming mao i lipuna.

²⁴ Hang masai‑i nai anto, kaleang ti singkoringna. Jadiꞌ, singkoringna to mampaku: kalaena i rasangna lima hulangna.

²⁵ Na konai: singkoringna moa teꞌ, “Ku na pulemu‑mo Puang. Pang mangola: ung Na pukauꞌ tee, Na sangki ti kanihele poluangku i heleꞌna tau.”

Aranna Yesu nipupiìsang

²⁶ Tòna ùnung‑mo hulangna kaleang ti Elisabet, Puang mampantuyu malaikaꞌ Gabriel mao i Nasareꞌ, besa lipu: i Galilea.

²⁷ Nipantuyu mao i besa anaka bahine ung dang ara‑kang na sola: muane, ung nikonai: Maria. Bahine to, sikàtui‑mo silopàka besa tau ung nikonai: Yusup, hatiꞌna Datu: Daud.

²⁸ Lumanna‑mi ti malaikaꞌ to i Maria pang musua: teꞌ, “Salamaꞌ matung, dio ung maupaꞌ tungka! Puang manterei‑ko.”

²⁹ Na sàdingna‑i ti sua: to, masussa tungka ti Maria, pang mingkuti-kutiki i laling pinanahanna aka ti palleona sua: to.

³⁰ Musuana‑mi ti malaikaꞌ to teꞌ, “O Maria, hau mariaꞌ! Sàbaꞌ u na patantu‑mo Puang mangkorai: malemunNa.

³¹ Pisàdìngi‑kaꞌ! U kaleànga pang u mangkianàking besa anaka muane, pang u konaia Yesu.

³² Miluhalia‑Da ung lammuꞌ, pang nikonaia Anakàna Puang, dea‑mo Puang ung Kamìnang Iaho. Pang Puang manghengiing esòngang kadatuangna Daud, ampena Anaka to.

³³ Miluhalia datuna hatiꞌna Yakub deaꞌ tùrungna. KadatuangNa harai: katampàkangna.”

³⁴ Misùmunna‑mi ti Maria teꞌ, “Mangakaa ti jadinna aka to? Sàbaꞌ hang ara‑maꞌko sola: muane.”

³⁵ Na sùmuinna‑mi malaikaꞌ to teꞌ, “Pinanaha Malìsong bùruꞌa matung, dea‑mo kuasanna Puang ung Kamìnang Iaho mangkaonei:‑ko. Deanna‑mo to, nikonaia ung malìsong pang Anakàna Puang ti anaka ung nu kianàking.

³⁶ Pang u ku paìsàngi matung moa teꞌ tau deammu Elisabet, ung matua:‑mo, mangkaleang‑ing ho anaka muane. Dea ung nikonai: mikamma, ùnung‑mo hulangna kaleang.

³⁷ Sàbaꞌ pàli i Puang hari:‑da ung balle.”

³⁸ Misùmunna‑mi ti Maria teꞌ, “Koi: tee, kaunangna Puang. Na jadi‑rangmo mao i kalaeku ti aka ung nu pusua:.” Malainna‑mi ti malaikaꞌ to.

Maria mampubelai Elisabet

³⁹ Pira-pira teng àlona nai anto, Maria masàraꞌ lumao i besa lipu: i Yudea, ung one: i mungku.

⁴⁰ I anto, mintama i rasangna Sakaria pang mupasalamaꞌ mao i Elisabet.

⁴¹ Na sàdingna‑i Elisabet ti pupasalamaꞌna Maria, sàhe: mukaenang ti anaka i balammangna, pang Elisabet na kuasai Pinanaha Malìsong.

⁴² Mikakoangna‑mi moa teꞌ, “Dio‑mo ti ung kamìnang nipasakke nai àlaꞌna nasang bahine! Pang nipasakke ti Anaka ung nu kianàking!

⁴³ Isai‑kaꞌ ti te? pùna bùruꞌ ti inanna Puangku mampubelai‑kaꞌ!

⁴⁴ Sàbaꞌ, ku sàdingna‑i ti pupasalamaꞌmu, mukaenang ti anaka i balammangku sàbaꞌ haka:.

⁴⁵ U maupaꞌ, sàbaꞌ u patongang moa teꞌ aka ti ung na pusua:‑mo Puang matung Na kannaꞌia!”

Pukurusumangaꞌna Maria

⁴⁶ Tempo to, musua: ti Maria teꞌ, “Pinanahangku mampalammuꞌ Puang,

⁴⁷ pang lammuꞌ ti pihakaku sàbaꞌ Puang, Pipasalamaꞌku.

⁴⁸ Sàbaꞌ ku Na pusalainahai, na moi ku kaunang ung i hoiꞌ. Na rara i latenna, nasang tulino mangkonaia‑kaꞌ ung nipasakke.

⁴⁹ Sàbaꞌ Puang ung Makuasa mampukauꞌ‑mo kalle-kalleang ung lammuꞌ mao i koi:. Malìsong ti konaNa.

⁵⁰ Nai hatiꞌ sangale: tùrung mao i ale:-alena ung mintoroꞌ, Puang minumpu mampulemu tau ung mangkariaꞌ‑I.

⁵¹ Na pukauꞌ ti kauꞌ ung si lammuꞌ mangola: kuasanNa. Na pasisara-saraka ti tau ung papenge:, ung mangkonai: kalaena‑i se.

⁵² Tau ung si iaho, Na uluꞌ nai esòngang kakuasaangna‑i se, pang tau ung si i hoiꞌ Na lanto‑ing.

⁵³ Tau ung si burorang, Na pabossaꞌi angkanna ung belo:, pang ung si sukiꞌ Na suo: malai mubaba.

⁵⁴ Israel dea‑mo taunNa, Na pulemu. Na kalehai sàbaꞌ malemunNa,

⁵⁵ mène: ti ung Na àluꞌ mao i ampe-ampeta Abraham pang hatiꞌna deaꞌ tùrungna.”

⁵⁶ Maria leta: sola: Elisabet màka: itàlu hulangna masainna, màli: na sumule: mao i lipuna.

Yohanes Pumpudoiꞌ nikianak‑ing

⁵⁷ Bùruꞌ‑mo ti tempona Elisabet mangheleꞌi kakianàkang, pang mangkianak‑ing besa anaka muane.

⁵⁸ To na sàding‑mo sidungkuꞌna pang tau deanna moa teꞌ hang makàdaꞌ‑ida lammuꞌna ti malemunna Puang mao i Elisabet, pola:‑i dasse: ho masannang.

⁵⁹ Tempona karoꞌa:‑mo àlona ti anaka to, mukobu:‑mi se pang anaka to nisinni: siulaꞌ atorang tu Yahudi. Pang na aku:‑i se ti manghengi‑ing kona:, Sakaria, konana amanna.

⁶⁰ Hampoꞌ musua: ti inanna teꞌ, “Hari:! Parallu nikonai: Yohanes.”

⁶¹ Na konaina‑mi se moa teꞌ, “Hari:‑da nai àlaꞌna tau deammu ung mampukona: kona: to.”

⁶² Mampampitubebena‑ming se amanna teꞌ, “Kona: aka ti nihengiing anakàmu?”

⁶³ Mampitubebena‑mida ho ti Sakaria mampalau puronnoang, màli: na muronno: teꞌ, “Nikonai: Yohanes.” Mimàha‑i se nasang.

⁶⁴ Tempo dea ho teng to, hela‑mo musua: pole ti Sakaria, pang musua:-sua: mampudi Puang.

⁶⁵ Nasang sidungkuꞌna miluhali mariaꞌ, pang iaka-aka i pangalanna mungku to i Yudea, aka dea to nisilàhai:.

⁶⁶ Nasang tau ung massàding aka to, mingkuti-kutiki i laling pinanahanna‑i se teꞌ, “Oꞌ miluhalia aka ti anaka to i hunni?” Sàbaꞌ tiꞌ makàso: moa teꞌ Puang manterei‑i.

Sakaria mampadeaꞌ sua: nai Puang

⁶⁷ Tempo to, Sakaria, amanna anaka to, na kuasai Pinanaha Malìsong, pang mampadeaꞌ sua: nai Puang moa teꞌ,

⁶⁸ “Nipudi ti Puang, Puangna Israel! Sàbaꞌ bùruꞌ‑mo mao i taunNa mantoloꞌ‑i se.

⁶⁹ Ta Na pantuyu‑ing se ti besa pipasalamaꞌ ung pabuu:, hatiꞌna Daud, kaunangNa.

⁷⁰ Ìnang Na pusua: ti to nai lùlung mangola: nabi-nabinNa,

⁷¹ moa teꞌ ta nipasalamaꞌa nai ponita, pang nai kuasanna nasang tau ung mampukàrang‑ke se.

⁷² Nasang to, mampupiita malemunNa mao i ampe-ampeta pang mangkannaꞌi pangàluꞌNa ung malìsong,

⁷³ ung Na àluꞌ sìnang musumpa mao i Abraham ampeta,

⁷⁴ mangàluꞌ mampasalamaꞌ‑ke nai ponita mangking hang mariaꞌ‑ke hura: mallayani‑I,

⁷⁵ silentong kamahuloang pang hari: salaiangna i heleꞌNa deaꞌ katampàkangna katuhoangta.

⁷⁶ Pang dio anàku, u nikonaia nabinna Puang ung Kamìnang Iaho sàbaꞌ u mampidolùnging Puang mampumasiloso:‑ing dalang ung Na olaa.

⁷⁷ Dea‑mo, u mampakarebaa mao i taunNa ti dalang kasalamaꞌang mangola: na pantengkai:‑ing Puang ti dosa-dosanna‑i se.

⁷⁸ Hang makàdaꞌ‑ida malemunna ti Puangta, pùna bùruꞌa mampasalamaꞌ‑ke. Mène: kùlaꞌ ung sòhong i miluhengi massilaoi: lino,

⁷⁹ mène:‑da ho ti kamasilaoang ung bùruꞌa massilaoi: tau ung tuho: i laling kamakarinnìngang, ung mate kapatongangang, pang kamasilaoang to mampidolung‑ingke i dalang kabeloang.”

⁸⁰ Dea ti anaka to, sa: baraꞌ-baraꞌna, sa: matotoꞌ-totoꞌna ti pinanahanna. Leta: i padang ung tunini deaꞌ bùruꞌ ti tempona mampakareba suana Puang mao i tu Israel.