KUNP 1 - Pangàlu' Baru Sura'na Puang i laling sua: tu Padang

Pinanaha Malìsong niàluꞌ

¹ Mampatu: Teopilus ung ku sangadi, I laling suraꞌku ung parrara* ku mampumakàso: nasang aka ti ung na pukauꞌ Yesu, pang ung Na pipaturo:‑ing,

^2-3 deaꞌ tempona titengke: mao i suruga. Ha nilampiꞌ‑mi ti to, tòna ladu‑mo ti kamaparriꞌang Na ola:, mampupiita‑mo kalaeNa mao i ung Na tonnoꞌ, pang boso: ti ung Na pukauꞌ ung miluhali butti moa teꞌ ìnang tuho:‑mo. I laling ùpaꞌ pulona àlona mampupiita lao kalaeNa pang mampadeaꞌ kadatuangna Puang mao i dei: se. Mampadeaꞌ ho pira-pira pasakiꞌ mangola: Pinanaha Malìsong.

⁴ Ara sangàlo, tempona manne:‑i se sola: Yesu, na apuꞌ Yesu mampalii: i Yerusalem teꞌ, “Ahong‑ko se ti Pinanaha Malìsong ung ladu na àluꞌ AmangKu, ung nu sàding‑mo se nai Koi:.

⁵ Sàbaꞌ Yohanes mudoiꞌ mampake uhai, hampoꞌ hang masaii: hura: u nidoiꞌ se Pinanaha Malìsong.”

Puang Yesu titengke: mao i suruga

⁶ Nai anto, ara ho na sikobu:‑i se i Mungku Saitun. Mingkutikìna‑mi se mao i Yesu moa teꞌ, “O Puang, i latenna naꞌ U mampatèdeꞌa pole ti kadatuang tu Israel?”*

⁷ Na sùmuinna‑mi teꞌ, “AmangKu ti ung makuasa mampatantu tempona. Hang parallu‑i u ìsang se.

⁸ Hampoꞌ u mantarimaa se kuasa, i bùruꞌ‑mi ti Pinanaha Malìsong mao i dio se, pang u miluhalia se sabingKu i Yerusalem pang i lipu:-lipu: i Yudea, pang i Samaria, deaꞌ mao i lìliꞌna lino.”

⁹ Dea tòna ladu‑mo musua: ti Yesu, titengke:‑mo nai heleꞌna‑i se, deaꞌ na sule: kahung nai pihelena‑i se.

¹⁰ Tempona‑i se tumonga: maang, ara idua tau mipakeang mabusa: tèdeꞌ i osokòna‑i se.

¹¹ Musuana‑mi teꞌ, “E tu Galilea, aka pu u tumonga: se tùrung pàli i langiꞌ? Dea ti Yesu ung titengke: mao i suruga mampalii:‑ko se, bùruꞌa‑Da pole mène: ho teng te ung nu ita se i latenna.”

Matias nipilei massònoꞌ Yudas

¹² Mangule:‑ming se mao i Yerusalem nai Mungku Saitun. Mungku to, besa‑i kilo karaona nai Yerusalem.

¹³ Tòna bùruꞌ‑mi se i Yerusalem, millanto‑i se mao i kamaraꞌ iaho ung na kaonei:‑i se midoro. Tau to‑i se dea‑mo Petrus, Yohanes, Yakobus, Andreas, Pilipus, Tomas, Bartolomeus, Matius, Yakobus anakàna Alpeus, Simon nai kalompoꞌ Patriot, pang Yudas anakàna Yakobus.

¹⁴ Lupu‑i se mamesa tangaꞌ i laling kapusumbayàngang, sola: pira-pira bahine, Maria inanna Yesu, pang mantàdi:-tàdina Yesu.

¹⁵ Ara sangàlo, tempona sikobu:-kobu:‑i se, kira-kira sangatuꞌ idua pulona tau, tèdeꞌ ti Petrus musua: moa teꞌ,

¹⁶ “Mantàdi:-tàdiku, suana Puang ung dolung na padeaꞌ Pinanaha Malìsong mangola: Daud, tikannaꞌ sìda‑mo mampatu: Yudas ung mampidolung‑ing tau ung mantingkang Yesu,

¹⁷ na moi‑rika Yudas dea‑mo besa tau nai àlaꞌta se, pang Na pilei‑mo miluhali solata se.”

¹⁸ (Seeng haseleꞌ kakadetuangna Yudas na pake kapala-kapala imang mambalaꞌ tampo:.* Yudas te, mirèneꞌ. Sàpanna‑mi ti balammangna pang sòhong nasang ti isinna.

¹⁹ Aka dea to na ìsang nasang tu Yerusalem, dea pu na konai:‑i se i Hakel Dama ti tampo: to, palleona Tampo: Raa:.)

²⁰ “Sàbaꞌ nironno: i Suraꞌ Masmur moa teꞌ, ‘Eloꞌna‑mo tunini ti pangkaoneina, pang hau na ara ung leta: one:.’* Pang nironno: ho moa teꞌ, ‘Esòngangna, eloꞌna‑mo na ala tau.’*”

²¹ Na patùrungna‑mi Petrus ti musua:-sua: teꞌ, “Deanna‑mo to, parallu ki nipakànaꞌi besa tau nai dei: se ung lupu ki pasipolai: songka: Puang Yesu one: i àlaꞌta se,

²² na rara nai tempona Yohanes mudoiꞌ deaꞌ mao i àlona Yesu titengke: mao i suruga mampalii:‑ke se, mangking miluhali solaki mampakareba katuhoangna Yesu nai kamateang.”

²³ Tau ung sikobu: i anto manturo: idua tau, dea‑mo Yusup Barsabas ung nikonai: ho teng Yustus, sola: Matias.

²⁴ Musumbayang‑i se teꞌ, “O Puang, Dio ti mangìsang pinanahanna si besa-besa tau. Turo:‑ingnang isai ti ung Nu patantu nai idua tau te,

²⁵ miluhali ung Nu tonnoꞌ massònoꞌ Yudas ung lumao‑mo mampalii: kamaꞌangna i kaoneang ung Nu patantu‑ming ung sipatu: na kaonei:.”

²⁶ I àlaꞌna idua tau to, Matias ti ung na leo: undi. Deanna‑mo to, Matias miluhali ung mampakànaꞌi sampulo: besa tau to ung na tonnoꞌ Puang.