Kolose 1 - Pangàlu' Baru Sura'na Puang i laling sua: tu Padang

Sua: mupasakke

^1-2 Mampatu: mantàdi:-tàdiku taunna Puang i Kolose, ung minumpu i laling Datu: Pipasalamaꞌ. Nai koi: Paulus ung na tonnoꞌ Yesu Datu: Pipasalamaꞌ siulaꞌ pampuinahanna Puang, pang nai mantàdita Timotius. Na Puang Amanta‑rangmo mampasakke pang manghengi‑ingko se kabeloang.

Paulus mampusumbayang‑ing tu Kolose

³ Lupu u ki pusumbayang‑ing se sìnang mukurusumangaꞌ mao i Puang, Amanna Puangta Yesu Datu: Pipasalamaꞌ

⁴ sàbaꞌ ki sàding‑moka teꞌ u mupatongang se mao i Yesu Datu: Pipasalamaꞌ pang u mampulemu se nasang taunna Puang.

⁵ U mupatongang se pang malemu sàbaꞌ u marranung se aka ti ung na patokana‑ingko se Puang i suruga, ung nu sàding‑mo tòna kareba katongangang, dea‑mo Kareba Belo:,

⁶ nipadeaꞌ matung. Kareba to dumallaꞌ ho i lìliꞌna lino urungang sa: boso:-bosona tau mupatongang pang mantoroꞌi pampuinahanna Puang, mène: ung nu ola:‑mo se na rara u massàding se kareba to, pang tongang-tongang mangìsang malemunna Puang.

⁷ Aka to, na pipaturo:‑ing matung Epapras ung ki pulemu, kaunangna Datu: Pipasalamaꞌ sibali kami. Minumpu‑da mallayani Datu: Pipasalamaꞌ i laling mingkamaꞌ mampatu: kaparalluangmu se.

⁸ Nai dea‑mo ho ti ki nipaìsàngi teꞌ mangola: kamaꞌangna Pinanaha Malìsong, u hela se sipulemu.

⁹ Dea‑mo nasang to pùna hari: kàtunna ki mampusumbayang‑ingko se songka: u ki sàding se. Ki palau mao i Puang mangking u Na kapùnoi: se tangaꞌ ung belo: pang kapaìsàngang mangola: Pinanaha Malìsong mangking u mangìsang se tungka pampuinahanna Puang.

¹⁰ Patuna pusumbayangki to dea‑mo mangking tuhomu se sipatu: nikonai: taunna Puang pang mampumasannang pinanahanNa i laling nasang angkanna pang mangking u mangkamaꞌ se nasang ung belo:. Pang patuna ho mangking sa: u mangìsang-ìsangna se Puang

¹¹ pang u nihengi‑ing se nasang kamatotoꞌang siulaꞌ kuasanna Puang ung malabiꞌ. Nai kamatotoꞌang to, u hela se tàraang pang sabaraꞌ mangheleꞌi nasang angkanna. Pang u hela se haka:

¹² pang mukurusumangaꞌ mao i Ama: ung mampasipatu:‑mo: se mangkorai: aka ti ung Na patokana mao i taunNa i laling kadatuangNa ung masilao:.

¹³ Sàbaꞌ Dea‑moda ti ung mampasalamaꞌ‑me: nai kuasa kamakarinnìngang pang mangeliꞌ‑me: mao i kadatuangna AnakàNa ung Na pulemu.

¹⁴ I laling AnakàNa to, ta nitoloꞌ, palleona teꞌ dosa-dosanta Na pantengkai:‑ming.

Kamaꞌangna Datu: Pipasalamaꞌ

¹⁵ Anakàna Puang tongang-tongang marrupai Puang Matua ung dang niita. Nai tempo ung parrara, ara‑mo AnakàNa to, pang iaho‑Da nai nasang ung nitampa.

¹⁶ Sàbaꞌ mangola: Dea, nasang angkanna i suruga pang i lino nitampa, ung niita mata pang ung dang niita mata, mintama ti malaikaꞌ, dihata pang kuasa-kuasa sintàna:. Nasangna te nitampa mangola: Dea pang mao i Dea.

¹⁷ Hang ara‑mi nasang ti angkanna, dolu‑moda ara ti Anakàna Puang. Pang mangola: Dea, baꞌ nasang angkanna mangkaonei: pantang-pantang kaoneangna.

¹⁸ Dea‑moda ti bakàna kalae:, dea‑mo jamaa. Dea ho ti toaꞌna katuhoang ung màle, sàbaꞌ Dea‑moda ti anaka lihoa:, ung parrara nipatuho: nai kamateang, mangking miluhali ung kamìnang parallu nai nasang angkanna.

¹⁹ Sàbaꞌ pampuinahanna Puang dea‑mo mangking nasang ung ara i Dea, kànaꞌ‑da ho i AnakàNa.

²⁰ Pang mangola: ho AnakàNa, Puang mampuinaha mampupiluhali nasang angkanna siumpuꞌ pole mao i Dea, belo: ung one: i lino, belo: i suruga. Na pukauꞌ‑mo ti to mangola: raana AnakàNa ung nibolang i oròngang.

²¹ Dolung, u karao: dosse: nai Puang, pang pantangaꞌmu se mamponi:‑I, niita mangola: pangae: kadetummu se.

²² Hampoꞌ i latenna, mangola: kamateangna AnakàNa, Puang mampupiluhali‑mo kasiumpuꞌangmu se belo: pole mao i Dea pang mampadùkuꞌ‑ko se mao i kalaeNa, malìsong pang hari: salaiangmu se i heleꞌNa.

²³ Hampoꞌ parallu u pàraꞌ i kapatongangangmu se, matotoꞌ pang minumpu, pakala‑rang u lòsoꞌi se ti ranùngang ung nu korai:‑mo se tòna u sàding se ti Kareba Belo:. Kareba to nipakareba mao i lìliꞌna lino, pang koi: Paulus nipakohai:‑mo mampakareba kareba to.

Kamaꞌangna Paulus mampakareba Datu: Pipasalamaꞌ

²⁴ I latenna ku haka: i laling kamaparriꞌangku mampatu: kaparalluangmu se. Mangola: kamaparriꞌangna hatang kalaeku, ku mampuumpa: mampakànaꞌ kamaparriꞌang ung parallu maang i laling kamaꞌangna Datu: Pipasalamaꞌ mao i jamaa, dea‑mo kalaeNa.

²⁵ Siulaꞌ pangatoroꞌna Puang, ku Na pantuyu mangking ku mallayani taunNa, mampatu: kaparalluangmu se. Parallu ku mampadeaꞌ nasang ti suana Puang,

²⁶ dea‑mo suaNa ung nai lùlung dang tuhangka‑kang na ìsang tulino, hampoꞌ i latenna nipupiìsang‑mo mao i taunNa.

²⁷ Mao i taunNa to, Puang mangangkaꞌi mampupiìsang mangaka ti belona pang lammuꞌna kareba te mao i nasang tulino, moa teꞌ Datu: Pipasalamaꞌ leta: i laling pantang kalaemu se, urungang u marranung mangkorai: kamalabiꞌang ung na pampatui:‑ing Puang mao i taunNa.

²⁸ Datu: Pipasalamaꞌ‑da ti ung ki pakareba mao i nasang tau. Ki pakahulo: pang ki paturo:‑i se silentong nasang tangaꞌ ung belo: mangking nasang tau miluhali baraꞌ i laling Datu: Pipasalamaꞌ pang hela ki baha mao i heleꞌna Puang.

²⁹ Dea‑mo to pu ku mingkamaꞌ karraꞌ pang mampukaenàngi siulaꞌ kapabuuang nai Datu: Pipasalamaꞌ ung mingkamaꞌ silentong kuasa i laling kalaeku.