Ibrani 1 - Pangàlu' Baru Sura'na Puang i laling sua: tu Padang

Puang musua: mangola: AnakàNa

¹ Tempo lùlung, pimboso: ti Puang musua: mao i ampe-ampeta mangola: nabi-nabi i laling rupa-rupa dalangna.

² Hampoꞌ tempo i latenna, dea‑mo àlo-àlo katampàkangna lino tee,* Puang musua: mao i kìta: mangola: AnakàNa. Dolung, Puang mantampa nasang angkanna mangola: AnakàNa. Pang AnakàNa ti ung Na patantu‑mo miluhali ampunna nasang to.

³ AnakàNa‑mo ti ung tumpana: sìnang kamalabiꞌangna Puang. AnakàNa‑mo ti ung tongang-tongang mène: nasang aena Puang. AnakàNa ti ung mantuhoi: nasang angkanna mangola: suaNa ung makuasa. Mallìsòngi‑mo tulino nai dosa-dosanna, màli: na mesong i esòngang kadatuang i suruga, mui konangna Puang ung Kamìnang Nitongai:.

Kaiahoangna Anakàna Puang

⁴ Anaka to, iaho tungka nai malaikaꞌ-malaikaꞌ, sibali kona: ung na hengi‑ing Puang mao i Dea làbi nisangadi kang ho nai kona: ung nihengi‑ing malaikaꞌ.

⁵ Ara naꞌ besa malaikaꞌ ung na silàha:‑ing Puang moa teꞌ, “Dio‑mo ti AnakàKu. Àlo i latenna, Ku miluhali AmamMu.”* Pang ara naꞌ Na musua: mampatu: besa malaikaꞌ moa teꞌ, “Ku miluhalia AmanNa, pang Dea miluhalia AnakàKu.”* Hari:‑da. Na pusua: ti to mampatu:‑da teng AnakàNa.

⁶ Pang tempona mampantuyu AnakàNa, ung iaho nai nasang ung nitampa,* mao i lino tee, musua: moa teꞌ, “Nasang malaikaꞌKu parallu mampinombai‑I.”*

⁷ Mampatu: malaikaꞌ-malaikaꞌ, Puang musua: moa teꞌ, “Puang mampupiluhali pasaui malaikaꞌ-malaikaꞌNa, pang mampupiluhali hùrongna api malaikaꞌ ung mangkamaꞌ kamaꞌangNa.”*

⁸ Hampoꞌ mao i AnakàNa, Na pusua: moa teꞌ, “O Puang, U Datu:‑do ung muparenta deaꞌ tùrungna, pang kaparentaangMu dea‑mo kaparentaang ung mahulo:.

⁹ U mangkaraꞌi katongangang, pang mampukàrang kakadetuang. Deanna‑mo to, PuangMu, dea‑mo Puang Matua, mantoloi:‑Ko hingkùrang ung mantannai: kahakaang ung lammuꞌ, pang mantannai: moa teꞌ U nilanto‑ing nai sola:-solaMu.”*

¹⁰ Puang Matua musua: ho mao i AnakàNa moa teꞌ, “O Puang, Dio ti ung mantampa lino tee tempo pararanna, pang Dio kalenanna ti ung mantampa langiꞌ.

¹¹ Ung nitampa to hùlìnga, hampoꞌ Dio, U tontong‑do. Nasang ung nitampa to miluhalia matua:, mène: kayaꞌ miluhali mausang.

¹² U lùpiꞌa mène: kayaꞌ, pang nipasònoꞌia ung màle. Hampoꞌ Dio, hari:‑da mabàliMu, pang tuhoMu harai:‑da katampàkangna.”*

¹³ Ara naꞌ besa malaikaꞌ ung na silàha:‑ing Puang moa teꞌ, “Mesong‑Ko mui konangKu, deaꞌ Ku mampukauꞌ poni:-poniMu one: i hoiꞌna palaꞌ kokoꞌMu.”* Hari:‑da. Na pusua: ti to mao‑da teng i AnakàNa.

¹⁴ Ìna mène: to, aka sitongangna ti malaikaꞌ-malaikaꞌ? Malaikaꞌ dea‑mo pinanaha ung mangkamaꞌ kamaꞌangna Puang, ung Na pantuyu mallayani kaparalluangna‑i se tau ung mantarimaa kasalamaꞌang.