Epesus 1 - Pangàlu' Baru Sura'na Puang i laling sua: tu Padang

Sua: mupasakke

¹ Mampatu: mantàdi:-tàdiku taunna Puang ung one: i Epesus, ung minumpu i laling Yesu Datu: Pipasalamaꞌ. Nai koi: Paulus, ung na tonnoꞌ Yesu Datu: Pipasalamaꞌ siulaꞌ pampuinahanna Puang.

² Na Puang Amanta‑rangmo pang Puang Yesu Datu: Pipasalamaꞌ mampasakke pang manghengi‑ingko se kabeloang.

Taunna Puang nipasakke i laling Datu: Pipasalamaꞌ

³ Nipudi ti Puang Matua, dea‑mo Puangna pang Amanna Puangta Yesu Datu: Pipasalamaꞌ! Ta Na pasakke‑mo mangola: nasang pasakke kapatongangang i suruga, ung ta tarima i laling Datu: Pipasalamaꞌ.

⁴ Hang nitampa‑mi ti lino, ta na pirarai:‑mo Puang i laling Datu: Pipasalamaꞌ mangking ta malìsong pang hari: salaiangta i heleꞌNa, pang mangking ta tuho: se sipulemu.

⁵ Na patantu‑mo dolung moa teꞌ mangola: Yesu Datu: Pipasalamaꞌ, ta Na ala miluhali kàle: ana-anakàNa, sàbaꞌ mène:‑mo to ti kahakaangNa pang pampuinahanNa.

⁶ Na pukauꞌ nasang ti to mangking nipudi ti kamalabiꞌangNa ung niita mangola: malemunNa. Ta Na hengi‑ming ti malemunNa to, i laling AnakàNa ung Na pulemu.

⁷ Sàbaꞌ i laling Datu: Pipasalamaꞌ, pang mangola: kamateangNa,* ta nitoloꞌ, palleona teꞌ dosa-dosanta Na pantengkai:‑ming. Mène:‑mo to ti lammuꞌna malemunNa,

⁸ ung milàbi Na hengi‑ingke, silentong nasang tangaꞌ ung belo: pang kapaìsàngang.

⁹ Na pupiìsang‑mo Puang mao i kìta: aka to ung dang na ìsang tulino nai lùlung, dea‑mo pangakuNa ung Na aku: Na pukauꞌ mangola: Datu: Pipasalamaꞌ. I latenna Na pupiìsang‑mo ti to, sàbaꞌ mène:‑mo to ti kahakaangNa.

¹⁰ PangakuNa to dea‑mo mangking nasang angkanna, belo: ung one: i suruga, belo: i lino, Na pamesa i laling Datu: Pipasalamaꞌ ung miluhali baka. Pang aka dea to, na pukauꞌa Puang i na lampiꞌ‑mi ti tempona.

¹¹ I laling Datu: Pipasalamaꞌ, ta nipupiluhali‑mo se nasang ung na ampu Puang. Na patantu‑mo dolung ti to siulaꞌ patuNa, pang mangkamaꞌ nasang angkanna ung Na kàtui‑mo siulaꞌ pampuinahanNa.

¹² Na pukauꞌ ti to mangking nipudi ti kamalabiꞌangNa sàbaꞌ kìta: ung ranung‑mo mao i Datu: Pipasalamaꞌ.

¹³ I laling Datu: Pipasalamaꞌ dio se ho mintama miluhali taunna Puang tempona u massàding se kareba katongangang, dea‑mo Kareba Belo: mampatu: dalang kasalamaꞌangmu se. U mupatongang se pang u nitannai:‑mo se i laling Datu: Pipasalamaꞌ moa teꞌ u na ampu se Puang. U Na tannai: se mangola: u Na hengi‑ing se Pinanaha Malìsong ung Na àluꞌ,

¹⁴ ung ta tarima‑mo miluhali umpa: ung parrara nai nasang manaꞌta kìta: taunna Puang. Pang araa kang ung ta tarima sola: kasalokaꞌang ung kànaꞌ i na lampiꞌ‑mi ti tempona. Nasang to Na pukauꞌ mangking nipudi ti kamalabiꞌangNa.

Paulus mampusumbayang‑ing taunna Puang

¹⁵ Deanna‑mo to, songka: ku massàding moa teꞌ u mupatongang se mao i Puang Yesu pang u mampulemu se nasang taunna Puang,

¹⁶ hari: kàtunna ku musumbayang mukurusumangaꞌ mampatu:‑ko se. Lupu u ku lampiꞌ se tempona ku musumbayang.

¹⁷ Ku palau mao i Puang Matua, dea‑mo Puangna Puangta Yesu Datu: Pipasalamaꞌ, Ama: ung malabiꞌ, mangking manghengi‑ingko se tangaꞌ ung belo:, ung na pupiìsànga matung Pinanaha Malìsong, mangking sa: tipakànaꞌ-kànaꞌinna ti u mangìsang se Puang,

¹⁸ pang pinanahammu se sa: nipumasilao:-laona, mangking u mangìsang se mangaka ti ranùngangmu sàbaꞌ u na hàngo se Puang, pang mangking u mangìsang se ho moa teꞌ aka ti ung na patokana Puang mao i taunNa, hang makàdaꞌ‑ida milàbinna pang malabiꞌ.

¹⁹ Pang ku palau ho mangking u mangìsang se mangaka ti kuasanNa, ung dang ara sibalinna lammuꞌna, ung mingkamaꞌ i katuhoangta kìta: ung mupatongang. Kuasa ung lammuꞌ to

²⁰ ti ung Na pake i laling Datu: Pipasalamaꞌ, tòna mampatuho:‑I pole nai kamateang pang mampaesong‑I mui konangNa, i suruga.

²¹ Esòngangna Datu: Pipasalamaꞌ to, làbi iaho nai nasang laoangna kuasa-kuasa, malaikaꞌ, dihata, pang nasang kona:, handei: teng tempo i latenna, sangadinna tempo ung bùruꞌa ho.

²² Pang Puang mampupiluhali nasang angkanna i hoiꞌna kakuasaangna Datu: Pipasalamaꞌ, ung miluhali baka nai nasang angkanna. Pang Puang manghengi‑ing Datu: Pipasalamaꞌ mao i jamaa,

²³ ung miluhali kalaeNa ung Na pakànaꞌ. Pang Dea kalenanna na pakànaꞌ Puang.*