2 Timotius 1 - Pangàlu' Baru Sura'na Puang i laling sua: tu Padang

Sua: mupasakke

^1-2 Mampatu: Timotius ung ku pulemu, ung ku àna: anakàku. Koi: Paulus, marronno: suraꞌ tee matung. Siulaꞌ pampuinahanna Puang, ku Na pilei miluhali ung na tonnoꞌ Yesu Datu: Pipasalamaꞌ pang Na pantuyu mampakareba katuhoang ung na àluꞌ Puang. Katuhoang to, ta tarima sàbaꞌ ta besa‑ràngi sola: Yesu Datu: Pipasalamaꞌ. Na Puang Ama:‑rangmo pang Puangta Yesu Datu: Pipasalamaꞌ mampasakke pang manghengi‑ingko malemunNa pang kabeloang.

Pukurusumangaꞌ pang pasakiꞌ

³ Mantumpuꞌ ku musumbayang, tontong u ku kalehai pang ku mukurusumangaꞌ mao i Puang, ung ku pinombai mène: ung na pukauꞌ ampe-ampeku dolung, sìnang pinanaha mahulo: ung maritoto.

⁴ Pang i ku kalehai‑i ti uhai matammu ung nu patìtiꞌ, ku palea: tungka mangita‑ko, na kànaꞌ ti kamasannàngangku.

⁵ Ku kalehai ti kapatongangangmu mao i Datu: Pipasalamaꞌ ung nai pinanaha mabusamu, sibali ti kapatongangang ung parrara ara i ampemu bahine Lois pang inammu Eunike. Pang ku tantui, dio ho mupatongang mène: dei: se.

⁶ Deanna‑mo to, u ku pakalehai parere ti kalàbiang nai Puang ung nu tarima‑mo tempona u ku palummàngi palaꞌ.

⁷ Sàbaꞌ Pinanaha ung na hengi‑ingke Puang, handei:‑da pinanaha ung mampupariaꞌ‑ke, sangadinna Pinanaha ung mi pumatotoꞌ, pùno: kamalemuang pang pantangaꞌ ung baraꞌ.

⁸ Jadiꞌ, hau madia: mampusua: passabiimmu mampatu: Puangta, pang hau mi pudia: ti ku nitarungkuꞌ sàbaꞌ Dea, sangadinna, silentong kuasa nai Puang, parallu u pola: maparriꞌ sàbaꞌ Kareba Belo: to.

⁹ Puang mampasalamaꞌ‑ke pang manghàngo‑ke miluhali taunNa ung malìsong. Na pukauꞌ ti to, handei: nai aka ti ung ta kamaꞌ‑mo, sangadinna siulaꞌ pangatoroꞌNa‑da teng, pang malemunNa, ung Na hengi‑ingke mangola: Yesu Datu: Pipasalamaꞌ, ha nitampa‑mi ti lino tee.

¹⁰ Pang i latenna, Na pupiita‑mo ti malemunNa mao i kìta: mangola: kabùruꞌangna Pipasalamaꞌta, dea‑mo Yesu Datu: Pipasalamaꞌ, ung mantaloi kuasanna kamateang pang mangola: Kareba Belo: to, mampumasilao: katuhoang ung tontong.

¹¹ Mao i kamaꞌang mampakareba pang mampipaturo:‑ing Kareba Belo: dea‑mo to, pu ku na tonnoꞌ Puang.

¹² Dea‑mo to ti mangurungang‑ing nasangna tee ku maparriꞌ. Hampoꞌ ha madia:‑kaꞌ, sàbaꞌ ku ìsang tungka isai ti ung ku patongang, pang ku tantui‑ko moa teꞌ aka ti ung ku pasare‑ming,* makuasa‑Da mangkuyaꞌ deaꞌ àlo tampakàna.

¹³ Toroꞌi‑do ti piheleꞌangku mampakareba pipaturo: ung belo:, ung ladu‑mo ku paturo:‑ingko. Pukauꞌ ti to i laling kapatongangang pang kamalemuang ung miluhali‑mo ung ta ampu sàbaꞌ mamesa sola: Yesu Datu: Pipasalamaꞌ.

¹⁴ Mangola: pingkamaꞌna Pinanaha Malìsong ung tuho: i laling pinanahanta, parallu u parakai belo:-belo: ti kaaraang ung kianggaꞌna ung Na patongang‑mingko.

¹⁵ U ìsang‑mo moa teꞌ nasang tau i propinsi Asia ku na patatang‑mi se, mintama ho ti Pigelus pang Hermogenes.

¹⁶ Hampoꞌ Onesiporus, makaraꞌ mai mampakatana‑kaꞌ. Na Puang‑rangmo mampaitaꞌi malemunNa mao i tanandapoꞌna. Moi ku i laling putarungkuꞌang, ha na pudia:‑kaꞌ.

¹⁷ Mala, tempona bùruꞌ i lipu: Roma, ku na okaꞌ tungka deaꞌ ku sikorai:.

¹⁸ Pang u ìsang‑mo moa teꞌ dolung i lipu: Epesus, boso: tungka ti ung na pandului‑ingnaꞌ. Na Puang‑rangmo manghengi‑ing malemunNa i àlo tampakàna.