Markus 6 - O Evangelio Jezus Kristusester pala Markus 1912 (Sinte)

ŠOVTO KAPITLO.

¹ Kater gejeslo nikli, ta vejes an lesker dadesker foro, ta leskre sikermangere našen pen leske pale.

² Ta vejes o kurko, sikerdes job ani kangeri, ta but, kai šunden leste, kerden bare jaka prala lesker sikerpen, ta phenden: Kater hilo kava lauter, ta keake bari hi i gosverepen kai vejes les. Ta leskre kova hin keake bares drucho leskre vastenge.

³ Hi kava ger o kaštengero, o Mariater čavo, ta i phral o Jakobusester, Josester, Judas ta Simonester? Ta hin leskre pheja ger kai? Ta len has chojermen lester.

⁴ Ta Jezus phendes ape lenge: I profeto hi ger šardo an lesker dadenger foro, ta an lesker kakopen, ta an lesker kher.

⁵ Ta job našte kerdeslo kenk baro kova kote, foni ger but kai hin i bresla naseli, ta čideslo lesker vast ap lende, ta kerdaslo len saste.

⁶ Ta job kerdes bare jaka prala lenger bipacepen. Ta gejeslo druchi gibia trujum ta sikerdeslo.

⁷ Ta job khardes kola dešedui paš leste, ta bičerdes le dui ta dui vri, ta dejes len zorlepen prale kole čikele mulenge.

⁸ Job phendes lenge nina, ta anden pen len či api dromeste her i kašt: kenk posita, kenk maro ta kenk love an lesker girtlo;

⁹ mo ta hidžerden le kircha, ta cerdenle kenk dui ripen ape lende.

¹⁰ Ta phendes ape lenge: Kai ta džan tume ani kher, kote ačene džin ta džan tume dureder.

¹¹ Kole kai rikerene tume ger pre, ta šunen pen ger, ta kolender džanene vri ta krodlervena o čik tumare pirender, lenge o boteste.

¹² Ta jon gejen vri, ta rakerden len, ta vele len vaverčandes.

¹³ Ta jon tradene nina but bengen vri, ta makjen le buteder nasele i džetester drin, ta vele len saste.

¹⁴ Ta o kralo Herodes šundes les, ta lesker lab has hajerdo; ta job phendes: Johanes o boldeskero štejes o mulender pre, ta keake kerdes lo keake bare kova.

¹⁵ I vaveren phenden: Job h Elias; ta kome vaver phenden: Job hi i profeto her jekes i profetenge.

¹⁶ Her ta šundas kava Herodes phendeslo: Johanes, kai kurdom lesker šero tele, kova štejes pre i mulender.

¹⁷ Kava Herodes bičerdes, ta taperden o Johaneses, ta ta kliderdenle les, ta anden len les ano štilepen, vaška i Herodiasake, lesker phralesker Filipus leskr romni, vel ta andeslo la i romniake.

¹⁸ Ta Johanes phendes api Herodeste: Kava hi ger mišto, ta lejel tu tiro phralesker romni.

¹⁹ Herodias hidžerdes les pale, ta kamel ta marele les, ta joi našte ger.

²⁰ Herodes trašes o Johanes, vel ta džandeslo, te hilo i čačo ta i boldo rom. Ta job rakjes les, ta kerdas but, ta šundes les pale, te job kamel ta šunel les.

²¹ Her te vejes i lačo dives, i pernopester dives o Herodeses, job dejes kole bare dženenge, ta bare kuremangerenge ta railengr gadženge i Galilester i chaben.

²² Pala vejes o Herodias lakr čai drin, te kheldesla, ta feldes o Herodeste, ta nina kolen, kai bešjen drumi chamaskero. Ta phendes o kralo api čaiate: Mange mander ho kamehe, me dau tuke les!

²³ Job dejes lake sovel: Ho kame ha mander, me dau tuke les džin i paš miro kralesker themeste.

²⁴ Joi gejes vri ta phendes laker daiake: Mo ta kamaues me? Joi ta phendes: O boldesker Johanesester šero.

²⁵ Joi gejes sik drin paši kraleste, mangdes les ta phendes: Me kamaua, ta ane mange sik api čaro o boldesker Johanesester šeres.

²⁶ O krales has ger mišto, ta vaške i sovles, ta kolen kai hin paše chamaskero, kamel ta phendeslo gar: na!

²⁷ Job bičerdes i kuremaskeres kote, ta phendes, ta andeslo lesker šero api čaro.

²⁸ Kava kurdes leskro šero tele ano štilepen, ta andes lesker šero api čaro, ta dejes les i čaiate, ta i čai dejes les laker dake.

²⁹ Ta šundene leskre sikermangere, vejene len, ta lejen lesker mulo trupes, ta čiden les ani handako.

³⁰ Ta i sikermangere vejen ketene paše Jezuseste, ta phenden leste lauter ho kerden len ta sikerden len.

³¹ Ta job phendes ape lenge: Džan tumenge kokeres ani kokero kunč, ta ačene tume i bisla; ta kolen kai vejene ta čejene his but, ta his len kenk ciro ta chanene.

³² Ta jon gejene ani bero drin, ta gejen paši rik ani fulelo phub.

³³ Ta jon gejen nikli, ta but hajerden les ta našjenle drani hake foria api pirenca ketene ta vejenlen lenge glan.

³⁴ Her ta štejes Jezus vri dikheslo but čel, ta job džiskertelo les prala lende, vel ta his len her bakerenge, kai hi len kenk beršero, ta job sikerdes len but.

³⁵ Vel ta has pale duro vejen leskr sikermangere ta phenden: Kava kunč hi fuleles ta hi nina duro.

³⁶ Mek len, ta gejen pen le ani gabia ta ani montaia, ta kinena pen len chaben, ta našte chan penle.

³⁷ Job ta rakerdes, ta phendes apa lenge: Dejen tume lenge ta chal! Jon ta phenden apa leste: Mo ta džahas koi, ta kinahas i dui šel nikelenge maro, ta me dahas lenge ta chal?

³⁸ Ta job phendes apa lenge: Keci maro hi tumen? Džan tume koi ta dikhena pale! — Ta dikhen pen les, phendenle: Panč maro ta dui mačenge.

³⁹ Ta job phendes lenge, ta bašjen penle koterende tele api zenelo.

⁴⁰ Ta jon mekjen penle tela hufkerende, ta šelenge ta pančmerdešenge.

⁴¹ Ta job andes kola panč marenge ta kola dui mačenge, dikhes api bolepen pre, parkerdeslo ta phages o mareste ta dejes les lesker sikermangerende ta dejenpen lenge les, ta nina kola dui mačenge koterdeslo hakene vri.

⁴² Ta jon chandena lauter džin ta hislen čalo.

⁴³ Ta jon haderden dešedui korčnica perdo koter vri.

⁴⁴ Kola kai chandena has panč šal romen.

⁴⁵ Ta sik phendeslo apa lesker sikermangerenge, ta džalalen ani bero drin, ta gejenpen len pala Betsaida glan leste, ta mekjes job o čeles.

⁴⁶ Ta mekjeslo len, gejeslo api brego ta priservelo.

⁴⁷ Ta has pale duro, has o bero maškeral api baro paneste, ta job has kokeres api phub.

⁴⁸ Ta job dikhes, ta hilen baro butikaben i berenca vaške i bravaleste. Job vejes i štarti ratiakrsanteneleste paša lenge, job našjes api baro paneste, job kamjes gar ta džala pes pašalende.

⁴⁹ Her ta dikhen ta našes pes api baro paneste, bicha jon: kava hi i mulo, ta dejena baro godlo.

⁵⁰ Ta hakene dikhen les ta trašena. Job rakerdes sik lenca ta phendes apa lenge: Me homes! Ma trašena tume!

⁵¹ Ta job gejes ani bero drin, ta o braval bašes peske, jon kerdena bare jaka an penge.

⁵² Jon dikhene les gar drin paši mareste, vel ta hajerden les lenger dzi gar.

⁵³ Her ta bertenle prala verkel, vejenle ani Genezareteskero them, ta štejenlen vri.

⁵⁴ Her ta štejenle drani bero vri, haslo sik prinšerdo.

⁵⁵ Ta jon našen pen ani kola celo themester trujum. Ta hidžerden o naselende trujal kai šunden len ta hilo.

⁵⁶ Kai ta cerdeslo drin ani gabia, ani montaienge ta ani foria, čidenle o nasele api drom, ta mangdes len les, ta taperdenle foni leskr ripen; ta hakene vejenle saste, kai taperden les.