Markus 5 - O Evangelio Jezus Kristusester pala Markus 1912 (Sinte)

PANČTO KAPITLO.

¹ Ta jon vejene vaver rikeste o baro paneste ani Gerazinesker them.

² Te vejeslo drani bero vri, vejes leske sik drani handakenge i dženo, kones his i čikelo mulo ani leste.

³ Job čejes ani handakenge, ta kenkes našte bandeldes les či, ger i verkliende.

⁴ But kopo vejeslo kliderdo ta bandlo i verklende, ta job cerdeslo o verklia, ta i kliderpenia, ta kenkes vejeslo kerdo lester.

⁵ Ta ha, dives ta rati rikerdeslo pes ani handakenge ta ani brege pre, dejes godlo, ta kurdas pes i barenge.

⁶ Ta dikheslo Jezuses duralester, našeslo apa leste,

⁷ pejeslo lester tele, dejes godlo i zorelo bašester ta phenelo: Me kamau či tuter Jezu o baresker Devlesker čavo! Me dau tuke sovel paše Devel: dukhe man ger!

⁸ Ta job kames ta phendes: Dža nikli kava dženester tu čikalo mulo!

⁹ Job phučeslo nina: Her khare tu? Ta job phendes ape leste: Legion hi miro lab, mare hi but.

¹⁰ Ta job mangdes les, ta tradelo les ger vri kava themester.

¹¹ His kote langs i brege i baro hufka bala, kole chanena.

¹² Ta i mule mangden les ta phenden: Bičervehe men ani kole balende, ta džahas ane lende drin.

¹³ Ta job phendes: Vaške mange! Te kole čikele mule gejen pen vri, ta vejene ani bale drin; kova hufka našena sik i brego tele i baro godlenca ani baro pani, les hin dui šal, jon tasjen ani baro pani.

¹⁴ Ta o balenger valete našjen ta phenden les ani foro ta api gabia, ta o džene gejene vri, ta dikhene ho dejes.

¹⁵ Te jon vejene api Jezuseste ta dikhene koles kai vejes bengester dukdo, bešdo, ridlo ta gosvero, ta jon darene len pen.

¹⁶ Kole kai dikden les, ginden lenge drin, her gejes koles kai his o benges, ta gejes o balenca.

¹⁷ Jon mangden les, ta džal peske lo lender.

¹⁸ Te štejeslo ani bero drin, mangdas kova, kav has o beng ano leste, ta ačelo paše leste.

¹⁹ Job kamelo ger, ta phendeslo leste: Dža tuke an tiro kher paše tire, te phene lenge, ho kerdes o rai bares tuke, ta her kaideslo tuke.

²⁰ Job gejes ta rakerdes ani kole dešforia, ho kerdes bares o Jezus lehe, ta lauter kerdena bare jaka.

²¹ Ta gejes Jezus papele prali baro pani ani bero, has but čel ketene paš leste, ta job his paš o baro paneste.

²² Pala vela jek i moskerender i kangeriender, o labeste Jairus.

²³ Ta dikhes kova les, pejeslo tele lesker čangenca, mangdeslo les ta phendes: Miri čai hi api meripen. Vehe ta kere tiro vast ape late, ta veleli sasti ta džideli.

²⁴ Job gejes paše leste, ta but čel vejen les pale, ta gnobltes les.

²⁵ I romni, kai has dešedui berš i naslepen, ta hasli but naslepangere, joi štejes but dukhepen vri vaške lenge,

²⁶ ta dejes len laker celo love, ta vejesli bute ger sasto, gejes ha čilačeder.

²⁷ Ta šundesli o Jezusester, pale vejesli ta taperdesli palduno lesker ripen.

²⁸ Joi phendes: Ta taperau foni lesker ripen, pala vaua sasti.

²⁹ Ta sik hasli sasti laker naslepenester, ta joi hajerdes ano laker trupo, ta hi laker dukhedo nikli.

³⁰ Ta Jezus kai hajerdes sik ani leste ta gejes o zorelepen lester vri, riserdes pes lo o čelenge ta phendes: Kon taperdes mire kolenge?

³¹ Ta lesker sikermangere phenden ape leste: Tu dikhe ta knoblvela tuke o čel, ta phenehe: „Kon taperdes man?“

³² Ta job dikhes trujum, ta dikhelo kola, kai kerdes les.

³³ Pala vejes i romni, joi dardes lake, džandeli mišto her gejes lake, pejesli glan leste tele, ta phendesli leske i celo čačepen.

³⁴ Job ta phendes ape late: Čai, tiro pacepen hilderdes tuke, ma traše tuke, ta vejal sasto tiri naslepenester!

³⁵ Her te rakerdeslo, pale vejene gadže i kangeriater moskerester ta phenden: Tiri čai mujes, hoske pharele tu o sikerpasker‐raieste.

³⁶ Her ta šundes Jezus o rakerpen her te phenden le, phendeslo api kangeriater moskereste: Ma traše tuke, pace foni.

³⁷ Job mekjeslo ger ta našeslo leske jekes pale, her Petrus, ta Jakobus, ta Johanes o phral o Jakobuseste.

³⁸ Ta jon vejene an o kangeriater moskerester kher, pala dikhes job o godlepen, ta her ta rondenle.

³⁹ Ta job gejes drin, ta phendes ap lenge: Hoske dejene tume keake godlo ta rondenes? O čai hi ger mulo, joi sovele! Ta jon sanden pen les vri.

⁴⁰ Job tradeslo hakene vri, andes o dadeste ta i dajake i čaiater, te kolen kai hin paše leste, ta gejes vrin, kai bašes i čai.

⁴¹ Pala andeslo o čaiakr vast, ta phendes lake: Talitha kumi! kava kharela: Čai me phenau tuke: šte pre!

⁴² Ta sik štejes i čai pre, ta gejesli trujum; joi has dešedui berš phuro.

⁴³ Ta jon kerdenele bare jaka. Job phendes lenge bisermaske, ta vele ger hajerdo, ta phendes, mo ta dejen lake ta chal.