Markus 15 - O Evangelio Jezus Kristusester pala Markus 1912 (Sinte)

DEŠPANČTO KAPITLO.

¹ Ta sik ani taisarlakro keren i barerašaienge ta i phurjenge ta i livrosikermangerenge ta i celi buchli les vri, mekjen ta kliderden Jezuses, ta anen les nikli, ta bičerden les i Pilatuseske.

² Ta Pilatus phučes les: Hal tu o kralo o biboldender? Job ta rakerdes ta phendes apo leste: Tu phene les!

³ Ta o barorašaienge andena but midžiko Kova prala leste glan.

⁴ Pilatus phučes les komoli ta phendes: Rakerehas tu či? Dikhe, havi baro kova anen len prala tute glan!

⁵ Jezus ta phendes či buter, pala kerdes Pilatus bare jaka.

⁶ Api baro kurko mekjeslo lenge jekes kolender kai hin štilde, komes ta kamenlen.

⁷ Pala has jek, Barabas khardeslo, kai vejes štildo kola godlopencer, ta ani godlopen mardeslo jekes.

⁸ Her ta vejes o čel pre, mangeslo, job kamela ta kerelo lenge, her kerdeslo ha.

⁹ Pilatus ta rakerdes lenge ta phendes: Kamena tume, mo ta daues tume piro i kralo o biboldender?

¹⁰ Job ta džandes, ta vela kola barorašaiender i chojater phukerdo.

¹¹ Kola barorašaienge anden o čeles pre, ta dela job lenge o Barabas piro.

¹² Pala rakerdes Pilatus ta phendes apo lenge: Ho kamena tume, ta keraues me i kraleste o biboldender?

¹³ Jon dejen papele godli: Mo ta velo trušuldeni.

¹⁴ Pilatus ta phendes apo lende: Ho kerdeslo ta hi midžiko? Jon ta dejen papele godli: Mo ta velo trušuldeni!

¹⁵ Pilatus ta kames ta hi o čel pokoni, keake dejeslo lenge o Barabas piro, ta job dejes o Jezus, ta velo pala o čupniden ta trušuldeni.

¹⁶ Kola kuremangere anden les ani trujel o montaiester, ta kharden o celo hufke ketene.

¹⁷ Ta čiden i lolo ripen drumoleste, ta kerden i karesker cepani, ta čiden la les pre.

¹⁸ Ta jon parkerden les: Parkerdo hal tu kralo o biboldender!

¹⁹ Ta jon kurden lesker šero i čupenca ta čungerden apo leste, ta pejen apo lenger čang, ta kerden her ta kamjen les.

²⁰ Her ta prasaden pen les, lejen jon les o lolo ripen tele, ta randžerden peske lesker kola, ta anden les vri, ta velo trušuldeni.

²¹ Ta jon taperden jek, kai gejes pašaglan, Simon Kirenester, kai vejes o gibester, i dad o Aleksanderes ta Rufuses, ta hidželo lesker trušul.

²² Ta jon anden les i kunčeske Golgatha, kai kharela: Šeresker kunč.

²³ Pala dejen pen les mol i bigudlo (bitteren) kovenca maškermen ta piel; job ta lejes les gar.

²⁴ Pala ta has lo trušuldeni, koterden jon lesker kola, vicerden o meklopen kater pral; kon mo ta veles čomoni.

²⁵ Has kome i trinto kori, kai trušulden les.

²⁶ Ta has i pralačinepen lesker doš prečindo: O kralo o biboldender.

²⁷ Ta jon trušulden les i dui marepangerenca, jek ap lesker čači, ta o vaver ap lesker zerbi.

²⁸ Kana veles o činepen čačo kerdo, kai phenela: „Job vejes gindo tela i došengerende“.

²⁹ Kola ta gejen pralaglan, praserden les, ta grotlden lenger šere, ta phenden: „Oi, ta phagere tu o kangeri tele, ta kerela papele ani trin dives.

³⁰ Hilderve tuke, ta ve tele i trušulester.“

³¹ Keake praserden nina o barorašaienge ta livrosikermangerende ta phenden tela vaverkend: Vaveren hilderdes job, leske našte hildervelo gar.

³² Christus o kralo o Izraelester, ve kome tele i trušuleste, me ta dikhahas ta pacahas les. Nina kola kai vejen leske trušuldeni praserden les.

³³ Her ta vejes o šobti kori, has i tamelopen api celo phub džin o ejati korieske.

³⁴ Ta dran i ejati korieske dejes Jezus baro godli ta phendes: Eli, Eli lama sabachthani? Kova kharela: Miro Devel, miro Devel, hoske mekehas tu man?

³⁵ Her ta hunden jekenge lender kai hi len kate tardo, phenden jon: Dikhehe, job kharela o Eliaseste.

³⁶ Jek ta našes koi, čides i ješka o šutenca perdo, špildes les i čepeneske ta dejes les ta piel; kai phendeslo: Mekena foni me kamahas ta dikhas, kai ta vela Elias, ta lejeslo les tele.

³⁷ Jezus ta dejes baro godli, ta merdes. —

³⁸ Ta o baro than ani kangeri cerdes preender džin telender.

³⁹ Her ta dikhes o barokuremaskero kai his kate tardo, ta dela lesker mulo pre, keake baro godledo phendes job: Čačo kava dženo has o Devlesker čavo! —

⁴⁰ Has les nina kola romia kate, kai dikhena duralester, tela kalen has Maria Magdalena ta Maria o tikno Jakobusester, ta o Josefester dai, ta Salome.

⁴¹ Kai našen pen les pale, her ta has kome ani Galilea, ta but vaveren, kai džejen pen lehe pale Jeruzalem.

⁴² Kai ta has brevul (has o dives glan o kurko) vejes Josef Arimathiaro,

⁴³ i šuker rai, kai ačjes nina api Devlesker them, ta gejes rišo paša Pilatuseske drin, ta mangjes pes i mulo trupo o Jezusester.

⁴⁴ Pilatus ta kerdes bare jake, ake ta merdeslo, ta job mekjes, ta vela i barokuremaskero,

⁴⁵ ta phučes les, ob ta merdeslo. Her ta džandes job o barokuremaskereste, dejes job o Josefeste i muleskertrupo.

⁴⁶ Josef ta kindes pochtan, lejes la tele, job kerdas kola pochtan drumo leste, ta čides les ani handako; kai has ani baro bar kerdo, ta čides o bar glan i vuder o handakester.

⁴⁷ Ta Maria Magdalena, ta Maria i dai o Josefester dikhen les, kai vejeslo drin čido.