Markus 14 - O Evangelio Jezus Kristusester pala Markus 1912 (Sinte)

DEŠŠTARTO KAPITLO.

¹ Pala dui divese has kome i Devlesker divese ta i ciri kola bišutli marenge; ta o barorašaiende ta livro‐sikermangerende panderden, her našte taperen ta maren pen les lenger godsveropenester.

² Jon ta phenden: Foni gar ani kurko ta dela gar tela o čeles i godlopen.

³ Her ta haslo ani Bethanien ani Simonester kher, kai has geralo, ta bešes o chamaskereske, vejes i romni i šuker korester, kai has kuči makepen drin, ta phagerdes kava koro, ta čidesli apo leskr šero.

⁴ Jekender ta phenden midžik telavaverkend: Hoveske hi kava but maklopen kerdo.

⁵ Bikerdomes kaia makapen buteder har trinšel betenge, ta dahas kava love o čorolenge. Ta jon čingerden prala late.

⁶ Jezus ta phendes: Meken la! Hoske pharena tume la? Joi kerdes i lačo kerapen amande.

⁷ Čorele hi tume ha paša tumende, ta kamenas, našte keren penge lačo; man hi tume gar hako ciro.

⁸ Kaja kerdes ho naštela; joi makjes sikeder miro trupeste o paskerpeneske drin.

⁹ Čačo me phenau tumenge, kai velo ani celo phub i sastobičerpen rakerdo, vela nina ho kerdesli gindo, laker nišeske.

¹⁰ Ta Judas Ischariot o jek kola dešduiender gejes koi o barorašaiende, ta phukerelo api Jezuseste.

¹¹ Her ta hunden kala kava, dzivjen pen jon, ta ferrakerden pen les, ta dejen pen les love; job ta roderdes, her našte phukerelo apo leste.

¹² Ta ano ersto dives kala bišutle marenge, kai vel o passa‐ternobakro mardo, phenden o sikermangerenge apo leste: Kai kame tu, ta džahas men ta kerahas tuke o passa‐ternobakro ta chal?

¹³ Pala bičerdeslo dui lesker sikermangerende ta phendes apo lenge: Džan tume ani foro, kote vela i dženo paša tumende, kai hidžerela i paneskerokoro, kandene les!

¹⁴ Ta kai džalo job drin, phenena api rai o kherester: O sikermaskerrai mekel tuke ta phenel: Kai hi miro chamasker‐isma, kai chan me mer sikermangerenca o passa‐ternobakro?

¹⁵ Ta job sikerel tumen i baro šuker chamasker‐isma, koleske kerena menge.

¹⁶ Ta lesker sikermangerenge džejen koi ta vejenle ani foro, ta hacen pen les, her phendeslo lenge, ta keren pen o passa ternobakro.

¹⁷ Kai vejes kome brevul, vejes job kola dešeduienca.

¹⁸ Her ta bešenle paši chamaskero, ta chanele, phendes Jezus: Čačo me phenau tumenge: Jek tumender kai chala manca, phukerela apa mande.

¹⁹ Jon ta kaiden pen le, ta phučen pen le jek i vaverester: Hom les me?

²⁰ Job ta phendes apo lenge: Jek kola dešaduiender, kai čivele manca lesker vast ani čaro drin.

²¹ O dženengerčavo ta džala koi her lester čindo hi; dukedo kova dženeske, drucha vel o dženesker čavo phukerdo. Kaleske vejahas fededer, ta veles job gar phardo.

²² Her ta chajenlen, lejes o Jezus o maro, priserdes les, phagerdes les, dejes les lende ta phendes: Len les koi, kava hi miro trupo.

²³ Job ta lejes nina o koro, parkerdes ta dejes lende; ta jon pijen lauter dran.

²⁴ Job phendes apo lende: Kava hi miro rat o bandlopenester, kai vela butenge ferčordo.

²⁵ Čačo me phenau tumenge: Me piaues buter gar kava mojater, džin kai kove dives, kai piaues ani devlesker them.

²⁶ Ta pala o šardogijepenester džejen pen le vri apo džeteskerbrego.

²⁷ Jezus ta phendes apo lenge: Tume lauter chojaren tumen amande kaja rati; hi les čindo: „Me kamau ta kuraues o beršero, ta o bakrenge velen drani vaverkend.“

²⁸ Pala ta miri preštardopen, džau me tumenge glan vri pala Galilea.

²⁹ Petrus ta phendes apo leste: Mo ta chojaren pen nina lauter an tuke, pala ta kerau les me gar.

³⁰ Jezus phendas ap leste: Čačo, phenau me tuke, kaua dives ani kaja rati, ta dela o bašno dui moli godli, te tu man trin moli bochoste.

³¹ Job ta rakerdes kome buteder: Ta hunte meraues nina tuhe, pala bochorela me tuke kome gar. Keake phenden len lauter.

³² Ta jon vejen ani baromontaia, kai khardes Gethzemani, ta job phendes apo lesker sikermangerende: Bešen tume kai, keake raha ta priseraua.

³³ Ta job lejes o Petrus, Jakobus ta Johanes paša leste, ta job triserdes ta dares peske.

³⁴ Ta job phendes apo lenge: Miro dzi hi trašerdo džin ani merapen. Ačen kai ta džanglena.

³⁵ Ta job džejes bresla dureder, pejes api Phub tele, ta priserdes, ta našte veles, ta džala kaja kori glan leste pralnikli.

³⁶ Ta job phendes: Dad, tu našte kere lauter, le kava koro mander nikli! Kome gar, ho kamaua me, foni ho kame tu!

³⁷ Ta job vejes ta haceslo len sodes. Ta job phendes apo Petruses: Simon tu sovehe? Gar jek kori našte džange tu?

³⁸ Džangena ta priserena, ta perena tume gar ani midžiko kova. O mulo ta kameles, o mas hi bizorelo.

³⁹ Ta job džejes papele koi ta priserelo, ta phendes komoli kova lab.

⁴⁰ Her ta vejeslo papele pale, haceslo len komoli sodes, (ta lengre jake has len phare), ta jon džanden gar, ho ta phenen leske le.

⁴¹ Ta job vejes o trinto kopo ta phendes apo lende: Sovena ta kinevena foni, hi les doha, i kori vejes! Dikehe, o dženenger čavo veles ani vast o došiender pralbičerdo.

⁴² Štena pre, meken men ta džahas! Dikhehe kova kai phukerelo apa mande hi gar dur.

⁴³ Her ta rakerdeslo kome, vejes Judas Ischariot, jek kola dešduiender, ta i baro hufka paša leste i charenca ta i kaštenea, (bičerdo) o barorašaiender ta o livrosikermangerender ta phurjender.

⁴⁴ Lesker phukamaskero dejes lenge i boto ta phendes: Koles kai čumeraua, kova hi: taperen les ta anen les mišto.

⁴⁵ Her ta vejes job kai, štakerdes job sik paš leste ta phendes: Parkerdo hal, sikerpaskerrai!

⁴⁶ Ta job čumedes les. Jon ta čiden vast apo leste, ta taperden les.

⁴⁷ Jek ta kolender kai štejen kate, cerdes lesker charo ta kurdes o valeto i barorašaieske ta kurdes les i kan tele.

⁴⁸ Ta Jezus phendes apo lenge: Her api marepaskero cerden tume vri i charenca ta kaštenca, ta taperenes man.

⁴⁹ Hako dives homes me paš tumende ani kangeri ta sikerdomes ta tume taperdanes man gar. Tu hunte veles her ani činapen tardo hi.

⁵⁰ Ta mekjen les lauter, ta našen penge.

⁵¹ Ta i raklo kandes les pale i pochtanester api nanges o trupo ridlo.

⁵² Ta jon taperden les. Job ta vicerdes kaja pochtan pester, ta našes peske nanges lender.

⁵³ Ta jon anden Jezuses paša barorašaieste; ta o celo rašaienge, ta livrosikermangerenge, ta phurienge vejen ketene.

⁵⁴ Petrus ta gejes lehe, duralester džin ani trujel o montaiester o barorašaiester; ta job bešdes pes kola valetenca paši jak ta tacerdes pes.

⁵⁵ O barorašaienge kome, ta o celo baro buchli rodjen vaver čačopen o Jezusester, ta anen les i muleske, ta jon hacjen kenk.

⁵⁶ Ta but dejen vaver čačopen prala leste, ta kola čačopenenge his len hakerlai.

⁵⁷ Ta jekender štejen pre, ta čiden vaver čačopen prala leste tele, ta phenden:

⁵⁸ Me hundames ta phendeslo: „Me kamau ta phageraues kaja kangeri tela, kai hi kerdo i vastenca, ta ani trin dives keraues i vaver, kai hi gar kerdo o vastenca.“

⁵⁹ Ta lenger čačopen has gar praldrin štimamen.

⁶⁰ Pala štejes o barorašai pre, štakerdes ani maškeral, phučes Jezuses ta phendes: Rakere tu prala kava či, ho vicerena kala tuke glan?

⁶¹ Job ta has pokoni ta rakerdes či. Komoli phučes les o barorašai ta phendes apo leste: Hal tu Christus o Devlesker čavo, o barošardopaskero?

⁶² Jezus phendes apo leste: Me homes; vela ta dikhen tume o dženengerčavo bešto paši čači o Devlesker zorelopen ta vela lo i felešnodenca o bolapenester.

⁶³ Pala cerdes o barorašai lesker kola ta phendes: Ho kamahas men kome čačopenengere.

⁶⁴ Tume hunden o Devlesker‐prasapen, ho bichena tume? Ta jon lauter plenerden (straften) les, ta job hi o muleske došvalo.

⁶⁵ Ta jekenge čungerden apo leste, čakerden lesker mui, kurden les lenger vastenca, ta phenden apo leste: Durkervehe! Ta i valete dejen les čamadinia.

⁶⁶ Her ta has Petrus tele ani montaia vejes jeka kola valetacender o barorašaiester.

⁶⁷ Her ta dikhes la, ta tacerdes pes Petrus, dikhes joi apo leste ta phendes la: Tu hales nina paša Jezus o Nazareno.

⁶⁸ Job ta chocherdes ta phendes: Me prinšarau les gar, ta džanau nina gar ho rakerehas tu; ta job gejes o montaiester vri, pala dejes o bašno godlo.

⁶⁹ Her ta dikhes les kola valetica, phendes joi apa kolenge kai tarden kate: Kava hi nina jek lender!

⁷⁰ Job ta chocherdes papele. Pala phenden kola kai tarden kate papele apo Petruseste: Tu hal čačopaha jek lender; tu hal nina i Galilearo!

⁷¹ Job ta košes ta dejes sovel: Me prinšeraua kava dženes gar, kolester rakerena tume.

⁷² Ta sik dejes o bašno o duito kopo godli. Petrus ta bichades o labeste her phendes Jezus apo leste: Sikeder, kai dela o bašno dui kopo godli chochervehas tu man trin kopo. Her ta bichedeslo pale, rondes job.