Markus 12 - O Evangelio Jezus Kristusester pala Markus 1912 (Sinte)

DEŠADUITO KAPITLO.

¹ Ta job rakerdes ani parnisia apo lende: I dženo čides i drakeskerbrego, kerdes i kašteskerbeda (oder bareskerbeda) trujum, kerdes i drabesker kher, ta kerdes i tikno džanglesker kher (Turm), čideslo semeti i molenger gadžende ta cerdes pralo them.

² Ta job bičerdes apo molengergadžende, kai vejes i ciri, i valeto, ta vejeslo kola molengergadžende čomoni i gibester o drakesker bregeske.

³ Kala taperden ta kurdenles ta mekjen ta cerdelo čičo tele.

⁴ Ta job bičerdes komoli i vaver valeto apo lende. Kales činden len ano lesker šero ta čingerden pen les.

⁵ Ta job bičerdes papale i vaveres, ta kava marden len, ta buteder vaveren, kai kurden len jekende lender, vaveren ta marden len.

⁶ Kome jek haslo, i kamlo čavo. Kava bičerdeslo palduno apo lenge ta phendes: Jon ta vena dar glan miro čaveste!

⁷ O molenger gadženge ta phenden api vaverkend: Kava hi o loveskero, avena me, ta marahas les, pala vela o love mender.

⁸ Ta jon taperden les, marden les ta vicerden les o drakeskerbrego vri.

⁹ Ho kerelo o rai ka a drakeskerbregeste? Job ta vela ta marelo o molengergadžende ta delo o drakesterbrego vaverende.

¹⁰ Draverden tu me kava činepen gar? „Kava bar kai prasaden kola dženenge, vejes kana i baro bareske.

¹¹ I bolepeneste vejes kava ta les hi bares ani mare jakenge.“

¹² Ta jon roderden ta taperden les, ta jon daren pen o čeles; jon ta hajerden mišto, ta rakerdes job kava parnisa apo lende. Ta jon mekjen les ta gejen pen nikli.

¹³ Ta jon bičerden an peske jekender Farizeare ta Herodianare ta taperden les druchi labeske.

¹⁴ Kala vejen ta phenden apo leske: Sikerpaskerrai, me džanahas, ta hal tu čačo, ta phučehas kenkes pale, tu ta dikhe gar apo dženenge baro kova, tu ta sikerehe o Devlesker drom ani čačopen. Hi proserdo, o baro krales ta del peske plaiserpen, ta mo den men les gar?

¹⁵ Job ta prindžerdes lenger chochapen, ta phendes apo lenge: Hoske midžena tume man? Anen mange i nikili kai, ta dikau les.

¹⁶ Pala anden len jek, ta phendes apo lenge: Hoveske hi kava bildo ta i praločinepen? Jon phenden apo leste: O baro kraleste.

¹⁷ Pala rakerdes Jezus ta phendes apo lenge: Dena tume o baro krales, ho hi o baro kraleske, ta o Devles ho Devleske hi. Ta jon kerden bare jaka prala leste.

¹⁸ Ta vejen les Zaduceare paša leste, kai phenena, dela kenk preštardopen. Kala phučjen les ta phenden:

¹⁹ Sikerpaskerrai, Mozes čindes menge: „Ta merela jekester phral, ta mekelo i romni ta kenk čavenge palel, keake mo ta lelo lesker phraleskerromni ta džangelo gib lesker phraleste.“

²⁰ Efte phralenge has len. O ersto lejes i romni, her ta mujeslo, mekjeslo kenk gib palel.

²¹ Pala lejes joi o duito, ta mujeslo ta nina kava mekjeslo kenk gib palel.

²² Ta nina keake o trinto. Ta kala eftenge mekjen kenk gib palel. Palduno hakonender mujes nina i romni.

²³ Paši preštardopen, kai štenenle pre, kones lender hi kai a romni? Ta kala eftenge has len joi i romiake.

²⁴ Pala rakerdes Jezus ta phendes apolenge: Durina tume gar kai drin vel ta hajven tume gar o činepen, ta o Devlesker zorelopen?

²⁵ Kai ta štejen len o mulender pre, keren pen kenk biab, jon ta hi her i engle ani bolapen.

²⁶ Ho džala pala o mulenge an, ta štejen len pre, draverden tume gar ani Mozesester livro paši kareskerbor kai rakerdes o Devel keake apo leste: Me hom o Devel Abraham, Isaak, ta o Devel Jakobeste.

²⁷ Job hi gar i Devel o mulender, job hi o Devel kolender kai hi džide. Tume durina keake.

²⁸ Pala vejes jek o kala livrosikermangerende kate, kai hundes ta dikhes lenger čingerpen, ta rakerdeslo lenge lačo, kava phučes pes: Kones ta hi o ersto hako phenapenender?

²⁹ Jezus rakerdes: O ersto hi: Hunehe Izrael, o rai tiro Devel hi jek Devel!

³⁰ Tu mo ta kame o rai tiro Devles drani tiro celo dziester, drani tiro celo mulester, drani tiro celo trupester, ta drani hake tire zorelopenester.

³¹ Kava hi o ersto phenapen. O duito hi kava: Tu mo ta kames o vaverenge her tuke. I vaver bareder phenapen her kava dela gar.

³² — Šuker, sikerpaskerrai, pala o čačopen rakerdeles tu, dela foni jek Devel, her job dela kenk vaver.

³³ Ta kava mo ta kames drani celo dziester, drani celo trupester, ta drani hake zorelopenester, ta o vaveres mo ta kameles her tuke: kava hi buteder her hake chačeanapen ta vaver anapen.

³⁴ Her ta dikhes Jezus, ta rakerdeslo godzvero, phendeslo apo leste: Tu hal gar dur o Devlesker themeste! Ta kenkes kames kome ta phučen pen les.

³⁵ Jezus ta rakerdes papele ta phendes, kai sikerdeslo ani kangeri: Her phenena o livrosikermangerenge, Christus ta hi o Davidesker čavo?

³⁶ David phenela ani boldo mulester: „O Rai phendes apo miro raies: Beše tuke api miri čači, džin ta čidaues tiri midžike dženenge tela tire pirenge.“

³⁷ David, ta kharelo les lesker rai. Her ta pala lesker čavo? Ta o čel hundes apo leste.

³⁸ Ta job phendes apo lenge ani lesker sikerpen: Hilderen tume glano livrosikermangerender, kai našena trujum ani baro ripenester ta venela

³⁹ parkemen api kunčenge ani kangerende ta bešenle pral pre, ta rodena glanduni kunčenge paši bare chabenende.

⁴⁰ Kola kai lena kala romniender kher, kai hi len kenk rom, ta priserenle fonci keake raha: prala kalende džala i bareder krisni.

⁴¹ Ta Jezus bešes palavergl o lovenger mochtin, ta dikhes, her ta viceren o čel love ani mochtin, ta but bravele vicerden but drin.

⁴² Pala vejes nina i čoreli romni kai his kenk rom, ta vicerdes dui tikni koter, kava hi i džuvalo, drin.

⁴³ Ta job khardes leskr sikermangerende ketene, ta phendes apo lenge: čačo phenau me tumen, kaja čoreli romni vicerdes buteder kai drin, her hake kai vicerden ani mochtin.

⁴⁴ Ta hake vicerden lenger bravelopenester drin, kaia ta vicerdes laker čorelopenester hako drin, kai has li, laker celo love.