Markus 11 - O Evangelio Jezus Kristusester pala Markus 1912 (Sinte)

DEŠJEKTO KAPITLO.

¹ Her ta vejen paši Jeruzalem ta Bethanien o džetesker bregeske, bičerdes job dui lesker sikermangerende nikli,

² Ta phendes apo lenge: Džan tume ani gab, kai bašela glan tumende; ta keake sik, kai vena tume an peske drin, hacena tume i burika anbandelto, kai bešes kenk dženo apo leste; bandena les nikli ta anena les.

³ Ta phenehas tume jekes: Ho kerena tume? pala phenen: O rai kamelo les! ta sik bičerelo les kater palel.

⁴ Ta jon gejena koi, ta hacjen o burika anbandelto glano vuder, an o drom vri; ta jon bandelten les nikli (tele).

⁵ Ta buteder kolender, ta hi kate tarde, phenden apo lenge: Ho kerena tume, ta bandena tume o burika nikli?

⁶ Jon ta phenden, her phendes lenge Jezus, pala mekjenlen jon.

⁷ Pala anden jon o burika o Jezuseske; ta jon čiden lenger ripen pralpre, ta job bešes peske apo leste.

⁸ But ta čiden penger ripen apo drom, vaver kurdena patria o rukender tele ta vicerden len apo drom.

⁹ Ta kolen kai gejen glan vri, ta kolen kai vejen pale, dejen godlo ta phenden: Hoziana.

¹⁰ Priserdo hi kava kai vela ani lab o raieste; priserdo hi o them maro dadester David, kai veles; Hoziana ano pralopen!

¹¹ Ta job cerdes drin pale Jeruzalem ani kangeri; job ta dikhes peske lauteres an, gejeslo, vel ta hi o koro duro pala Bethanien o dešeduiender vri.

¹² O vaver dives kai gejen len o Bethaniester vri has lo bokheles.

¹³ Her ta dikheslo duralester i gibesterruk kai has lo patria, gejeslo koi, ta hacelo čomoni an leske; her ta gejeslo koi haceslo či her patria, has gar kome gibester ciro.

¹⁴ Jezus ta phendes apo leste: Gar kome chala jekes i gib tuter ani hamaskeri! Ta leskr sikermangerende hunden les.

¹⁵ Ta vejena pale Jeruzalem. Her ta vejeslo ani kangeri drin, traderdeslo o bikamangerende drani vri, ta i chamaskere o lovengerender ta i bešamaskere o ponisterenger paremangerender vicerdeslo trujum.

¹⁶ Ta job mekes gar ta hidželo jekes i khereskerkoter druchi kangeri.

¹⁷ Ta job sikerdes ta phendes apo lenge: Štelo gar čindo: „Miro kher mo ta kharela prisermasker kher hake čelenge“? tume kerden les i čoremasker garapeneske.

¹⁸ Her ta hunden o barorašaiende ta o livro‐sikermangerende kova, rakerden pen ketene, her naštena ta maren pen les; ta jon daren pen les, vel ta kerden o celo čel bare jake prala lesker sikerpen.

¹⁹ Her ta vejes pala brevul, gejeslo o forester vri.

²⁰ Her ta gejen len taisarlakero glanpral o gibester rukeste dikhen jon, ta hi lo i drabester vri mulo.

²¹ Pala rikerdes peske Petrus ta phendes apo leste: Sikerpaskerrai, dike, kai košes tu, hi mulo.

²² Ta Jezus rakerdes ta phendes apo lenge: Han tume pacepen i Devleske!

²³ Čačo phenau tume, kon ta phenela kava bregeste: Hader tut, ta vicere tuke ani baro pani, ta job pacelo les ani lesker dzi, ta lauter ho phenelo vela kerdo, keake vela kerdo les.

²⁴ Doleske phenau tume: Ho mangenas tume ha ani priserpen, pacene foni, tume venas.

²⁵ Ta priseren tume, keake mekena, ta hi tumen čomoni jekester, ta mekela nina tumaro dad ani bolepen tumare došjenge.

²⁶ Ta mekena tume gar, keake mekela tume tumaro dad ani bolepen nina tumare došjenge gar.

²⁷ Ta jon vejene papele pale Jeruzalem. Her ta gejeslo ani kangeri trujal štakerden peske o barorašaiende o livrosikermangerende ta i phuriende.

²⁸ Ta phenden apo leste: Hovester zorelopen kere tu kava? Ta kon dejes tuke kava zorelopen ta kerehas tu kava?

²⁹ Jezus rakerdes ta phendes apo lenge: Me kamau ta phučaues tume nina i labeste: Ta phenen mange, pala phenaues tume, hovester zorelopen keraues kava.

³⁰ I boldopen o Johanester, hasli o bolepenester ta o dženender? Phenen mange!

³¹ Jon ta bichen paša lende ta phenden: Phenahas me: „I bolapenester“ pala phenelo job: „Hoske pacjen tume les kome gar?“

³² Phenahas me: „I dženender“, pala darahas o čeles, ta hake rikerden Johanes i čačo profeteske.

³³ Ta jon rakerden Jezu ta phenden: Me džanahas les gar. Jezus ta phendes apo lenge: Pala phenaues tume nina gar, hovester zorelopen keraues kava.