Yöiil 1 - WÄNYI KWËRØ 2011

¹ Men bene wööni Wë, wöön-ɑ ɑ́mëgge Yöiil wɑ̈d Pethuel.

Ywøgi Rënyi Byel yi Ji

² Lïng wun, wun ɑ tyëngdøngø. Kyënu yïthhi wun, wun ɑ tyëng Yeudiyɑ̀. Dɑ gïn ni men mɑ ɑ́pɑ̈nyi cwöbø kɑ lidh yi wun, kì bøli keny-ɑ ɑ́nud kweyyi wun?

³ Köbbu møgɑni nyigi wun, o nyigi gen ólony ki köbbø yi gen, o rïny-ɑ óbï ólony ki köbbø yi gen.

⁴ Dɑɑg bɑ̈nyø ɑ́pëggi kömi byel; kɑ keny-ɑ nyi döng kì bɑng dɑɑng, nyi cɑm yi dɑɑng-ɑ bï kì bɑnge.

⁵ Cyëëw wun, wun ɑ tyëng-ɑ ónɑ̈gø yi møgø; ywöngi wun, wun ɑ tyëngmɑdh ki møgø; oløng-ɑ di gwøøg møng-ɑ nyɑ̈n ɑ́rënyi.

⁶ Dɑɑg bɑ̈nyø ɑ́pɑ̈ɑ̈r kömi pinyee; bɑ bɑ̈nyø me ngenyø, o pɑ cuggi kwɑnø; leggi gen bedh nɑ leggi ngur.

⁷ Bɑ̈ggi oløgee ɑ́rënyi gen, o ólɑm ɑ́nyɑm gen. Pɑ̈ddi yenh ɑ́wej gen, yenh ɑ́döng ge tɑr.

⁸ Ywöngi wun, ni kɑy me ywøg thøwi jɑlgøle ɑ́ wøb, eni jɑl-ɑ di nywømii.

⁹ Bong byëli Jwøng-ɑ Ácwɑ̈ɑ̈j kí møgi oløg me muuj kì yij Kengø; ókwër ceg-ɑ ywøg, mɑ́ e bong gëdhhì mø mëggi gen Jwøng-ɑ Ácwɑ̈ɑ̈j.

¹⁰ Pwödh tɑr; piny ceg-ɑ ywøg mɑ́ byel ɑ́rënyi, oløg ɑ́thwøw, o yenh dhetun ɑ́nɑ̈r.

¹¹ Ywöngi wun, wun ɑ jøpur; ywöngi wun, wun ɑ jøg-ɑ kor bɑ̈ggi oløg, mɑ́ gemè geki ceir, kí gïg-ɑ nyi cyeg bënn ɑ́rënyi.

¹² Oløg ɑ́thwøw, o ólɑm ɑ́nɑ̈r; yenhi bɑ̈gg bënn ɑ́thwøw. Medi pëthi ji ɑ́wɑ̈ɑ̈ny.

¹³ Rug wun ki ocwɑ̈llì kɑ wu ywöngi wun, wun ɑ ókwërr-ɑ nyi göögø kì Kengø. Kɑ wu lɑngu wɑ̈r wu óywöngø kì Kengø! Bong møgi oløg, wɑlɑ̀ byëlø møg mëggu Jwøøg wun.

¹⁴ Muuj wun ki cigg kipe twöni rek; cwøølu ji bënn kej ɑ́kyel! Cøngu jɑgg bënn geki tyëng Yeudiyɑ̀ bënn; Cøngu gen yij Kengi Jwøng-ɑ Ácwɑ̈ɑ̈j, Jwøøg wun, kɑ wu ywøøg wun kööre.

¹⁵ Cyɑ̈ɑ̈ng Jwøng-ɑ Ácwɑ̈ɑ̈j ɑ́cyɑ̈ngi; eni cyɑ̈ng-ɑ ókɑ̈ni Wïlɑ̈bø ki ryɑ̈g, óbëëd ɑ́ cyɑ̈ɑ̈ng rɑj me ni ngø!

¹⁶ Byelli wøn ɑ́rënyi ge onennø yi wøn. Bong medi pëëth kì yij Kengi Jwøøg wun.

¹⁷ Köödh ɑ́kwɑ̈ɑ̈g piny; Bong byel kì yethi óköddì; o óköddì ɑ́rënyi, e bong byel kì yethi gen.

¹⁸ Dhög geki dyëg ceg-ɑ ywøg, bong lum me cɑm yi gen; ge ceg-ɑ orɑng.

¹⁹ Yɑ ywøøg-ɑ köörí yïn ɑ Jwøng-ɑ Ácwɑ̈ɑ̈j, mɑ́ lum geki yenh ɑ́thwøw, ge ce órɑ̈bø kɑ mɑc.

²⁰ Cɑgg ɑ́ lɑ̈yyi pɑ̈l ge ywøøg-ɑ yïí mɑ́ nɑ̈mm-ɑ thønhø ɑ́dwön.