Yeudɑ̀ 1 - WÄNYI KWËRØ 2011

¹ Bene yɑn Yeudɑ̀ bɑ̈ng Yëso Mesiy, o yɑ bɑ ómï Yɑgob. Yɑ gwëd-ɑ tyëng-ɑ ɑ́cwøl yi Jwøk; gen ɑ tyëng-ɑ bëëdø kì yij mɑ̈ɑ̈dø mi Wïyee Jwøk, ge kor-ɑ yi Yëso Mesiy.

² Wiy Jwøk pyëwe ólɑ̈ɑ̈me ki wun, o wu thödhe ki mër geki mɑ̈ɑ̈dø mø bong cögi gen.

Jøpwönyi Pyed

³ Riɑ ɑ́ceg yi yɑn kɑ pɑ̈nyø ceth, wun ɑ nyiimïɑ, ki gwëdi wun ki wɑ̈nyø kipe kwøbbi yielø men-ɑ nywɑg yi wɑ bënn. Pyëwɑ ɑ́dwɑdd-ɑ cïji wun, o wu nyïɑ̈ggi wun kipe yïëyi wun, kí per jɑmm-ɑ ɑ́muuj yi Jwøk gï mëgge’ jie.

⁴ Mɑ́ e dɑ ji møøgø, mø pɑ wør Jwøk mɑ ɑ́bï kellee ge kwïj yi wɑ. Jiɑni wööni dhwɑ̈ɑ̈ng Jwøk ɑ́wil yi gen, o kyëëwe ki gïgrijjø møg-ɑ gøggi yi gen, o Wë Yëso Mesiy, ngɑn-ɑ cinge di wɑ bɑ ɑbɑny yi gen. Tyëngɑni cɑ́yi gen rumø ki gweed piny kɑ̈ge dööng.

⁵ Cɑgg møgɑni ngɑ̈nyi yi wun, yɑ dwɑdd-ɑ pɑ̈ddi wun ki kër-ɑ ɑ́yieel tyëng Isrɑil yi Wë kì cinggi tyëng Rïp; de tyëng-ɑ ɑ́pëëm kì kelli gen ɑ́nɑ̈ge.

⁶ Nyi pɑrri wun wëywödd-ɑ ɑ́bëëd pëthi gen pɑ med ki lɑ̈ni mø gen, kɑ kɑ̈jji gen wiy yi gen; ge bɑ ɑmɑg ki ɑ́cwecwel, kì yij muudhø kì thɑ piny; kunɑni ɑ mïdhi gen yi Jwøk, ge yïd-ɑ cyɑ̈ng-ɑ óliidh kwøbbi gen.

⁷ Pɑrri wun Sødømɑ̀ kí Gømørɑ̀, kí myërr-ɑ cyɑ̈gi ki gen, ki kër-ɑ ɑ́cɑɑy gen ki mɑc, kì bɑng kɑ ɑ́pëggi gen be orøg, ge gøgg-ɑ gïgrijjø. Ge ɑ́cɑy kinøw kɑ per kinni o tyëng-ɑ kyeelø bwøg gen.

⁸ Jiɑni nyi ceg-ɑ lɑ̈g, kɑ ge nyi göjji orøg ki dëlli gen yi lɑ̈ggɑni; jyɑ̈gø mi Jwøk pɑ wør yi gen, kɑ wëy-ɑ jyɑ̈gø kì mɑl nyi tir ki gwɑddø yi gen.

⁹ Cɑgg ɑ́ men-ɑ́ Mikɑil, jɑngi wëywödd, nuti göögø ki gïn ni menɑni. Keny-ɑ ɑ́wër Mikɑil geki Ngɑnrɑj kì kömi dëël Mosɑ̀, Mikɑil Ngɑnrɑj nuti pɑ̈ny en ki yɑnyø, de gø ɑ́köbbe’ kinni, “Yï ócɑ̈wwi yi Jwøk!”

¹⁰ De tyëngɑni, gïg-ɑ tyelli gen kwïj yi gen nyi ceg kɑ gwɑddø yi gen; o men-ɑ́ gïg-ɑ ngɑ̈nyi yi gen nɑ møg-ɑ ngɑ̈nyi yi lɑ̈yyi pɑ̈l; o bɑ gïgɑni ɑ nyi kɑ̈ni kömi gen ki thøø.

¹² Ge kɑ̈ɑ̈l-ɑ ɑyɑ̈r yij tɑɑw wun; mɑ́ ge tyer-ɑ pɑ̈ngi yethi gen ki jɑmm-ɑ tyer yi pëthi gen. Ge korr-ɑ ri gen keti gen. Ge nɑ pøøl mø wøjji yi yømø, de ge pɑ kɑ̈ni ki kødh. Ge nɑ yenh mø pɑ nyi nywøl, cɑgg piny bɑ cwir; gen ɑ yenh-ɑ óputhø ki byerri gen, o ge rum thøø.

¹³ Ge nɑ ɑpɑgø kì nɑɑm omelø, o gïgrijjø møg-ɑ gøggi yi gen nɑ óbööy dhøg ɑpɑngɑni. Ge nɑ kyell mø wɑ̈dhi cyɑ̈dhø, møg-ɑ ówïyø yi Jwøk ki kej gen kì yij muudhø.

¹⁴ Enök, ngɑn-ɑ ɑ́pɑ̈dhi piny kì ri bïryeew rïjj kì bɑng Adɑm, per tyëngɑni ɑ́kwøb yi en kinni, “Wë óbï e olwøngø yi wëywödde mø kwɑnni gen bɑ ɑ́lïp mø ngenyø.

¹⁵ Bï-ɑ be løøgi kwøbbi dhɑnhø bëne, o tyëngrijjø cɑye kipe gïgrijjø møg-ɑ ɑ́gwøg yi gen kì bøli Jwøk, kí gïgrijjø møg-ɑ ɑ́kømmi yi gen kì ree.”

¹⁶ Teenɑni nyi ceg-ɑ køør ge cɑyy-ɑ tyëng-ɑ kyeelø; ge yɑb-ɑ gïgrijjø møg-ɑ tyer yi pëthi gen; ge lejj-ɑ ri gen, o ge thɑbb-ɑ ji ki dhøng yöm kipe gïg-ɑ yɑb yi gen.

Kyëdø geki Cigg

¹⁷ De nyi pɑrri wun møg-ɑ ɑ́köbbi wun cøn yi jøwööni Wë Yëso Mesiy.

¹⁸ Wu ɑ́köbbi yi gen kinni, “Keny-ɑ óbëën cyɑ̈ɑ̈n piny, ódi ji møg-ɑ ócwöb, gɑ møg-ɑ ógwɑddi wun; ge óbëëd gɑ ji mø pɑ wør Jwøk, o ge tyer-ɑ gøggi gïg-ɑ dwɑddi yi pëthi gen.”

¹⁹ Bene tyëngɑni ɑ nyi kɑ̈ɑ̈l dɑ̈ɑ̈ngi ji ri gen, mɑ́ ge nyi cyɑ̈dh-ɑ́ɑ̀ bɑng jɑmmi kömi piny, o ri gen bong Wëy.

²⁰ De wun ɑ nyiimïɑ, nyi dømu ri wun ki yïëy-ɑ́ ree ɑ́kwëër wun. Nyi kwɑ̈jji wun ki tegi Wëykwërø.

²¹ Mïdhu ri wun kì ri mɑ̈ɑ̈dø men-ɑ kɑ̈ɑ̈l yï Jwøk; wu yïd-ɑ bøli keny-ɑ ólɑ̈ɑ̈m pyëw Wë Yëso Mesiy ki wun, kɑ wu thödhe ki nënn-ɑ ɑtheer.

²² Nyi lɑ̈ɑ̈m pëthi wun ki tyëng-ɑ yethi gen pyëër;

²³ kɑ kwï ji møøgø kì kelli gen nyi yiel wun, ge gwɑ̈ɑ̈ru’ wɑ̈g kì yij mɑc. De nyi lɑ̈ɑ̈m pëthi wun ki ji møøgø, e yethi wun óböggø, de mɑɑn wun rɑjji gen, kí men-ɑ́ ógudh-ɑ ywëëdh dëlli gen.

Kwɑ̈ny-ɑ Kwɑjji ki Yïëyø

²⁴ Lenhu ngɑn-ɑ ko wëggi wun pɑ̈ɑ̈dhø, o wu ókïdhe bøli mɑ̈r ki medi pyëw e bong gïn gwɑ̈ɑ̈d kì ri wun.

²⁵ Lenhu Yïënee, ɑ bɑ Jwøk kete, kì ri Wë Yëso Mesiy; eni ngɑn-ɑ yïe di mɑ̈r, kí döng, kí tegø, kí jyɑ̈gø møg-ɑ ɑ́wöni weenø, kí ɑnɑn e gït-ɑ ɑtheer! Amen.