Tïtø 1 - WÄNYI KWËRØ 2011

¹ Wɑ̈nyø men kɑ̈ɑ̈l-ɑ yï Pøøl, bɑ̈ng Jwøk, o bɑ jɑlwööni Yëso Mesiy. Yɑ ɑ́ceg kɑ myegø, kɑ yɑ ör be kønyi tyëng-ɑ ɑ́yieny gɑ jii Jwøk kì bɑng yïëyø, o ge peejɑ yij dyër men-ɑ pwönyi yi kwøbbi Jwøgee,

² dyër menɑni bɑ ngɑ̈dhi nënn-ɑ ɑtheer. Jwøk ngɑn-ɑ pɑ nyi kømmi pyed, bɑ en ɑ ɑ́kööb e piny nuti cɑ̈gø, kinni nënnɑni ómëgge wɑ.

³ Keny-ɑ ɑ́wɑ̈nhi bøli keny-ɑ ɑ́dwɑddi yi Jwøk Yïënee kipe nyodhe møgɑni, ɑnyodhe gïn kì ri pwönyø men-ɑ ɑ́cïbe cingɑ. Mɑ́ yɑ ɑ́ceg yi en kinni, pwönyɑ gen ceth.

⁴ Yɑ gwëd-ɑ yïn, yïn ɑ Tïtø, mɑ́ yï bɑ dïl wɑ̈dɑ kì bɑng yïëyø men-ɑ reb wɑ. Wiy dhwɑ̈ng geki mër, møg-ɑ nyi kɑ̈ɑ̈l yï Jwøk Wïyee geki Yëso Mesiy Yïënee, ying gen kömí.

Gwøøg Tïtø kì Kirit

⁵ Gïn-ɑ́ pere ɑ́wiyɑ yïn kì Kirit bɑ kinni, o gïg-ɑ bɑ̈jjø kì yij kɑnïsɑ̀ kì pönhɑni tyeny yi yïn. Codhe, o yï rööny ki jɑggi kɑnïsɑ̀ kì yethi myërr bënn ni kɑ ɑ́nyudhɑ yïn cøn.

⁶ Bëëd jɑngi kɑnïsɑ̀ köme bong kwøb, kɑ bëëde cyëge bɑ ɑ́kyel, o kwøbbi Jwøk óyïëyø yi nyige, o ge ngɑ̈ny bëëdø, o ge pɑ pëmø.

⁷ Mɑ́ jɑngi kɑnïsɑ̀ mïdh-ɑ gwøøg Jwøk, ko bëëd köme dɑ cɑ́y. Ko bëëd ɑ́ jɑlɑthwøg, o ko bëëd ɑ́ ngɑn nyi mɑngi yi liny, wɑlɑ̀ ngɑn nyi nɑ̈g yi møgø, wɑlɑ̀ ngɑn kwøbbe teeg; kɑ ko bëëd pyëwe dwøøng kipe ngyëny.

⁸ De bëëde ɑ́ jɑl nyi cwøøl wëll gøle, o mɑɑr-ɑ gwøng døj. Bëëde wïje onëënø, e tir, o bɑ ngeti kwër me ngɑ̈ny bëëdø.

⁹ Kɑ bëëde e mïdh-ɑ kwøbb-ɑ dyër møg-ɑ kyëëw ki pwönyee. Møgɑni bɑ kipe kinni, o ócugge pwönyø ki kwøbb-ɑ dyër ceth, o dhøggi tyëng-ɑ pëmø nɑ̈g yi en.

¹⁰ Tyëng-ɑ pëmø gïïr; mɑɑl gen dɑ ji-ɑ ɑ́bëëd gɑ Yeud; ge ceg-ɑ pëmø, o ge wëny-ɑ ji ki kwøbbi pyed.

¹¹ Kyëddí jiɑni, mɑ́ ge rëny-ɑ kɑ̈llì mø gïïr, kɑ̀ pwönyi gen gïg mø pɑ døøj ki pwönyø, kipe kinni o ge yïddi gen ki ngyëny.

¹² Bɑ jɑl Kirit kiree; o bɑ jɑltööng gen ɑ ɑ́kööb kinni, “Tyëng Kirit ceg bëëdø gɑ tyëngpyed; ge bɑ lɑ̈yyi pɑ̈l; ge bɑ rɑj, o ge bɑ cɑ̈mmì.”

¹³ Kwøbbɑni bɑ dyër ceth. De cem nyingi gen ki mendwøng, o yïëyø mi gen óbëëde ɑ́ dyër.

¹⁴ Wiy gen mïdhi kwööng Yeud geki ciggi tyëng-ɑ bɑny kwøbb-ɑ dyër.

¹⁵ Jɑmmì bënn dhïw kì yï tyëng-ɑ dhïw, de bong gïjø me dhïw kì yï tyëng-ɑ ywëdhø, ɑ nuti yïëyø; mɑ́ rummi gen kí pëthi gen ywëdhø.

¹⁶ Ge okööbø ce Jwøk ngɑ̈nyi yi gen, de gïg-ɑ gøggi yi gen nyodh-ɑ kinni, Jwøk bɑɑny gen. Ge bɑ tyëngrijjø mø pëddi pëmø, o bong gïndøj me cuggi gwøgø yi gen.