Tïddø 1 - WÄNYI KWËRØ 2011

Bong Gïndøj kì ri Nënnì

¹ Møg bɑ kwøbbi Tïddi kwøb, rɑ̈ɑ̈dh Yerusɑlem, ɑ løg wɑ̈d Debïd.

² Tïddi kwøb ɑ́kööb kinni, i bong gïndøj kì ri bëëdø kì kömi piny, bong gïndøj kì ree, bong gïndøj kì ree kinni tek!

³ Dhɑnhø tyëg-ɑ piny e pïdø yi gwøg kì kömi piny, ɑ́ ngø ɑ óyod yi dhɑnhø kì bɑng gwøngɑni?

⁴ Rïny nyii kedhø, kɑ rïny nyii bëënø, de piny nudd e nɑ keje ceth.

⁵ Cɑ̈ng nyii tuulø, kɑ nyii buddø, nyi jwɑn-ɑ keny-ɑ ɑ́tuule ceth,

⁶ yømø nyii könø kì wɑɑng wurlwɑl, kɑ ree nyi løge wɑɑng wuudø, ree nyi wene’ wenø gïti kenyi døøge keje.

⁷ Nɑ̈mm-ɑ thønhø nyi reng-ɑ yethi nɑ̈mmi omelø, de nɑ̈mmi omelø pɑ pɑ̈ng, codhe kɑ pï nyi døøg-ɑ keny-ɑ ɑ́kɑ̈ɑ̈l yi gen cøn, o ge dɑ̈ri gen piny këti.

⁸ Jɑmmì bënn nyi kɑ̈ɑ̈l-ɑ pïdø; pïdø me dhɑ̈li tïng dhøg. Wɑng pɑ nyi yɑ̈ng yi nënnø, o yïth pɑ nyi wïyi ki lïngø.

⁹ Gïg-ɑ ɑ́cwöb cøn bɑ møg-ɑ ócigi cwöbø. Gïg-ɑ ɑ́gøggi cøn, bɑ møg-ɑ ógøggi këti. Bong gïjø me nyɑ̈n kì kömi piny bëne.

¹⁰ Dɑ gïjø me cuggi kwøbø kinni, “Lidh, gïn nyɑ̈n?” Bong gøn, gïgɑni bënn ɑ́kwøng ki gwøgø cøn, wɑ nuti nywølø.

¹¹ Bong ngɑn rømmi gïg-ɑ ɑ́pöödh, wɑlɑ̀ gïg-ɑ óbï; bong ngɑn-ɑ órømmi gen kì kelli tyëng-ɑ óbï kì bɑngee.

Gïg-ɑ Ádïd yi Tïddi Kwøb

¹² Yɑn yɑ Tïddi kwøb, yɑ ɑ́bëëd yɑn ɑ́ rɑ̈ɑ̈dh Isrɑil kì Yerusɑlem.

¹³ Pyëwɑ ɑ́cïbɑ ri yodi jɑmm-ɑ ɑ́gøggi kì kömi piny bënn. Jwøk kömee ɑ́cïbe ki orɑng me dwøng.

¹⁴ Gïg-ɑ ɑ́gøggi kì kömi piny bënn ɑ́lidhɑ, bong gïndøj kì ri gen. Ge nɑ ngwej kì bɑng yømø.

¹⁵ Gïn-ɑ bɑ ódwøl pɑ cuggi tyenyø, o gïn-ɑ bong gøn pɑ cuggi kwɑnø.

¹⁶ Aköbbɑ riɑ kinni, yɑ ɑ́göög ki jɑl me perɑ teg, wïjɑ ɑ́göög e pel kibøli tyëng-ɑ ɑ́jyɑ̈ɑ̈g kì Yerusɑlem kì bølɑ bënn. Gïn-ɑ ceg ki wɑngø yi peli wïj geki dïdø ngɑ̈nyɑ bënn.

¹⁷ Pyëwɑ ɑ́cïbɑ ri yodi gïn-ɑ bɑ̈ɑ̈n kì kelli ngɑ̈nyi wøw geki dhëëgø, kí peli wïj geki ɑ́nɑ̈gø. De ɑ́yod yi yɑn kinni menɑni nɑ ngwej kì bɑng yømø thyew,

¹⁸ mɑ́ ngënyi peli wïj nyi kɑ̈ɑ̈l-ɑ ɑkørr, o ngënyi dïdø nyi med-ɑ kïïmø.