Ruth 1 - WÄNYI KWËRØ 2011

Dɑ̈gi Elimelek Moɑb geki Gøle

¹ Kɑ̈ge dööng kì bøli keny-ɑ ɑ́bëëd Isrɑil jɑɑg-ɑ yi jɑgg, ɑ́dɑ kɑ̈j me dwøng kì pönhɑni. Kɑ jɑl megø kì Betleem kì Yeudiyɑ̀, odhwödhø geki cyëge kí wɑ̈dde ɑ́ryew,

² kɑ ge dɑ̈g-ɑ pödhi Moɑb. Nyingi jɑlɑni cwøl ɑ́ Elimelek, cyëge cwøl ɑ́ Nɑomì, o wɑ̈dde ryeet cwølli gɑ Mɑklön kí Kilyön. Ge bɑ tyëng gøl Eprɑtɑ̀ kì Betleem, kì Yeudiyɑ̀. Ge ɑ́wɑ̈dhi Moɑb, kɑ ge obëëdø kì Moɑb.

³ Athøw Elimelek, kɑ Nɑomì odöngø ki wɑ̈dde ryeet.

⁴ Kɑ yɑɑgɑni ónyömø ki nyigi Moɑb, ɑ́kyel cwøl ɑ́ Órpɑ̀, o nyɑn-ɑ kyeelø cwøl ɑ́ Ruth. Kɑ ge obëëdø kì pönhɑni ki gïn ni runn pyɑ̈rø.

⁵ Codhe, kɑ jøgɑni ryeet Mɑklön ki Kilyön othøø thyew. Adöng ngɑnɑni ɑ́ thwöm kì bɑng kɑ ɑ́thøw jɑlgøle kí wɑ̈dde ɑ́ryew bënn.

Dwöögi Nɑomì Betleem geki Ruth

⁶ Kɑ Nɑomì olïngø, e ying-ɑ Moɑb, i Jwøng-ɑ Ácwɑ̈ɑ̈j jie pɑɑr en, kɑ gï thödhe ki gïncɑm. Arume ki kwøbbi døøgø.

⁷ Adhwödhe geki kwɑrre kì keny-ɑ ɑ́bëëd gen, kɑ ge døøg-ɑ Yeudiyɑ̀.

⁸ De kɑ̈ng-ɑ ɑ́nudd ge ócyɑ̈dhø kì kö pönhɑni, Nɑomì kwɑrre ɑ́köbbe kinni, “Døg wun; døøg ngɑɑn gøl meye. Wu ókøny yi Jwøng-ɑ Ácwɑ̈ɑ̈j kipe bëëndøj men-ɑ ɑ́bëëd wun kì bøli cwøwi wun, kí kɑ ɑ́döng wɑ ketee.

⁹ Yɑ kwɑjj-ɑ Jwøng-ɑ Ácwɑ̈ɑ̈j, o wu nywøm kì kɑ̈llì mø døøj!” Kɑ okööbø kinni, “Døj kedh wun.” Aywöngi mɑ̈nni wɑ̈dde.

¹⁰ Kɑ köbbi yi gen kinni, “Pɑth, wø dwɑdd-ɑ kedhi pödhi wun ceth ki yïn.”

¹¹ Alöggi Nɑomì kinni, “Døg wun nyigɑ! Á kipe ngø, ɑ kedh wun ki yɑn? Yɑ ócuggø nywølø ki wɑ̈dd møg døngi, kɑ ge ogöögø ki cwøwi wun?

¹² Døg wun nyigɑ; mɑ́ yɑ ɑ́yöø, yɑ pɑ cuggi nywømø këti. Cɑgg yɑ kööbø kinni, yɑ ócuggø nywømø, wɑlɑ̀ cɑgg yɑ nywøm tïn kì wɑ̈r, kɑ yɑ onywølø ki wɑ̈dd,

¹³ ge ócuggø yïdø yi wun o ge døngi gen? Ri wun mɑ̈ɑ̈n wu nywømø kiper gen? Pöy! Pɑth en, nyigɑ! Pyëwɑ orɑ̈mø ki mendwøng kiper wun, mɑ́ yɑ ɑ́ryɑ̈g yi Jwøng-ɑ Ácwɑ̈ɑ̈j.”

¹⁴ Adøøg gen ki ywøg. Kɑ Órpɑ̀ wønge mɑ̈dhe, ɑdøøge gøl gen. De Ruth ɑ́mɑ̈gi kì ri wønge.

¹⁵ Akööb Nɑomì kinni, “Liidh, nyɑ̈gí ɑ́døøg yï gøl gen, ɑ́døøg yï jwögge. Kedhí bɑng nyɑ̈gí.”

¹⁶ De Ruth ɑ́löggi kinni, “Yɑ ko kwɑjjí kipe wiyi yïn, kinni o yɑ døøgɑ, o yɑ cögɑ yɑ pɑ kedh ki yïn. Mɑ́ yɑ dwɑdd-ɑ kinni, keny-ɑ ókedhi yi yïn, en ɑ kedhɑ, o keny-ɑ óbëëd yi yïn, en ɑ bëëdɑ, wɑddí bɑ wɑddɑ, o Jwøgí bɑ Jwøgɑ.

¹⁷ Wɑ thøw-ɑ kej ɑ́kyel, o wɑ koony-ɑ kej ɑ́kyel ceth. Yɑ lɑm-ɑ riɑ ɑnɑn kinni, wiy yɑ ócɑy yi Jwøng-ɑ Ácwɑ̈ɑ̈j keløg dhøgɑ ódi wilø yi yɑn. Bong gïn dɑ̈ɑ̈ng wɑ den-ɑ́ thøø kete.”

¹⁸ Keny-ɑ ɑ́lidhii yi Nɑomì kinni Ruth pɑ yïëy døøgø, ɑwiye møgɑni.

¹⁹ Codhe, ɑkedh gen. Kɑ ge wɑ̈dh-ɑ Betleem. Keny-ɑ ɑ́wɑ̈dhi gen Betleem, kɑ tyëng kɑɑlɑni yïthhi gen otyegø bënn; tyëng-ɑ mɑ̈nn okööbø kinni, “Men bɑ Nɑomì kidyër?”

²⁰ Akööb Nɑomì kinni, “Yɑ ko cwølli wun yɑn ɑ́ Nɑomì, cwøllu yɑn, yɑn ɑ́ Mɑrɑ̀, mɑ́ Áyïmø, bëëdɑ ɑ́løge me keej ni kenø.

²¹ Yɑ ɑ́kedh köörɑ pɑ̈ng, ɑdwöög yɑn yi Jwøng-ɑ Ácwɑ̈ɑ̈j èn, ki cinggɑ. Yɑ ócwølli yi wun yɑn ɑ́ Nɑomì kidï, yɑ ɑ́ryɑ̈g yi Áyïmø!”

²² Bene dwöng-ɑ ɑ́dwöög Nɑomì ɑnɑn kì piny Moɑb, ge ɑ́dwöög kɑ kwɑre, Ruth nyɑɑr Moɑb. Ge ɑ́wɑ̈nhi Betleem kì ri cɑ̈gi nyɑri ceir.