Odhe 1 - WÄNYI KWËRØ 2011

¹ Men bene wööni Jwøng-ɑ Ácwɑ̈ɑ̈j men-ɑ ɑ́köbbe Odheyɑ̀ wɑ̈d Beerì, kì yethi runn-ɑ ɑ́jyɑ̈ɑ̈g Udhiyɑ̀ kí Yöthɑm, kí Akɑɑdh, kí Kedhekiyɑ̀ gɑ rɑ̈nhi Yeudiyɑ̀; yethi runnɑni ɑ ɑ́jyɑ̈ɑ̈g Yeroboɑm wɑ̈d Yöɑc ɑ́ rɑ̈dh kì Isrɑil.

Cï Odheyɑ̀ geki Nyige

² Cɑ̈gi wööni Jwøng-ɑ Ácwɑ̈ɑ̈j men-ɑ ɑ́kwøb yi Odheyɑ̀. Odheyɑ̀ ɑ́köbbi yi Jwøng-ɑ Ácwɑ̈ɑ̈j kinni, “Kedh kɑ̈bbí ki dhɑjø men-ɑ óyɑ̈bø ki cwøw, kɑ ókɑ̈nø ki nywøl kì wɑ̈g, mɑ́ Jwøng-ɑ Ácwɑ̈ɑ̈j ɑ́wiy piny yi pönhï, kɑ ji kedh-ɑ bɑng jwögg møøgø.”

³ Codhe, ɑkedhe kɑ Gömer nyɑɑr Diblɑim kwɑnye, ɑyɑɑje kɑ gø nyödde ki wɑ̈d.

⁴ Kɑ Odheyɑ̀ köbbi yi Jwøng-ɑ Ácwɑ̈ɑ̈j kinni, “Cɑɑg ɑ́ Yidhriil (ɑ wɑngi kinni ókedhhi yi Jwøng-ɑ Ácwɑ̈ɑ̈j,) mɑ́ yɑ óbï be coli rem-ɑ ɑ́dëëm kì Yidhriil kì bɑng nyɑ keny me thinh kì gøl Yeeu, o jyɑ̈gi gøl Yeeu tɑ̈ɑ̈yɑ piny.

⁵ Mɑ́ keny-ɑ óbëën cyɑ̈ngɑni, weth gøl Isrɑil ótor yi yɑn kì töör Yidhriil.”

⁶ Kɑ Gömer cig-ɑ yɑɑjø, ɑnywøle ki nyɑndhɑjø. Kɑ Odheyɑ̀ köbbi yi Jwøng-ɑ Ácwɑ̈ɑ̈j kinni, “Cɑɑg ɑ́ Lö Ruɑ̈mɑ̀ (wɑng-ɑ kinni bong lɑ̈mpyëw,) mɑ́ pyëwɑ pɑ cigi lɑ̈ɑ̈mø kì gøl Isrɑil, wɑlɑ̀ körri orøøg gen pɑ wiy yi yɑn.

⁷ De pyëwɑ ólɑ̈ɑ̈m ki Yeudiyɑ̀ kɑ yiel yi yɑn, de ge pɑ yiel yi yɑn kɑ tøng, wɑlɑ̀ pilø wɑlɑ̀ ki liny, wɑlɑ̀ ki kyënyì, wɑlɑ̀ ki jøliny kyënyì.”

⁸ Apøne Lö Ruɑ̈mɑ̀ kɑ onywølø ki wɑ̈d.

⁹ Kɑ Odheyɑ̀ köbbi yi Jwøng-ɑ Ácwɑ̈ɑ̈j kinni, “Cɑɑg ɑ́ Lö Amì “pɑth ki jiɑ”, mɑ́ wu pɑth ki jiɑ. O yɑ koo bëëdø yɑn ɑ́ Jwøøg wun.”

Isrɑil Ódwøøg Keje

¹⁰ De tyëng Isrɑil óngënyi ni tør. O kì keny-ɑ́ nyi köbbi gen kinni, Lö Amì “pɑth ki jiɑ”, ge ócwølli gɑ nyigi Jwøng-ɑ Nëënø.

¹¹ Tyëng Yeudiyɑ̀ geki tyëng Isrɑil ge órëbi, kɑ ri gen rönyi gen ki jɑgø ɑ́kyel men-ɑ ójɑɑg gen bënn, mɑ́ cyɑ̈ɑ̈ng Yidhriil óbëëd ɑ́ cyɑ̈ng me dwøng.