Miikɑ̀ 1 - WÄNYI KWËRØ 2011

¹ Men bɑ wööni Jwøng-ɑ Ácwɑ̈ɑ̈j men-ɑ ɑ́mëgge Miikɑ̀, jɑl Möreceth, kì yethi runn-ɑ ɑ́jyɑ̈ɑ̈g Yöthɑm, kí Akɑɑdh, kí Kedhekiyɑ̀ gɑ rɑ̈nhi Yeudiyɑ̀. Wöönɑni ɑ́kɑ̈lle kì Sɑmɑriyɑ̀ geki Yerusɑlem.

Ywøgi Sɑmɑriyɑ̀ geki Yerusɑlem

² Lïng wun, wu tyëng-ɑ bëëdø kì kömi piny; kyënu yïthhi wun, wu tyëng-ɑ bëëdø kì kömi piny. Rɑ̈ji wun ónyodh yi Wïlɑ̈bø, Jwøng-ɑ Ácwɑ̈ɑ̈j, Lïng wun! Kööbø e ying-ɑ pɑɑre mɑl.

³ Jwøng-ɑ Ácwɑ̈ɑ̈j ódhwönhø kì pɑɑre e bï-ɑ piny. Óbï piny kɑ ócyɑ̈dhø kì wɑ̈thi kïttì.

⁴ Kïttì óleny kì thɑ́ tyelle ni dwɑ̈lø kenyi lenye yi mɑc; Kɑ ge rïng-ɑ yij tör ni pïg rïngi kì wïj ótong.

⁵ Møgɑni ócwöb, mɑ́ gøl Yɑgob ɑ́røngi, kɑ dhø Jwøk pyem yi gen. Á men ɑ ree ówɑɑng kipe orøøg Isrɑil? Pɑth ki Sɑmɑriyɑ̀ kiree! Á men-ɑ ree ówɑɑng kipe kɑ̀ kwɑ̈jji Yeudiyɑ̀ ki jwögg-ɑ pɑth? Pɑth ki Yerusɑlem kiree!

⁶ Bene ɑ bɑnge kööb Jwøng-ɑ Ácwɑ̈ɑ̈j kinni, “Sɑmɑriyɑ̀ ógwøg yi yɑn e nɑ tuggì møg-ɑ óröör piny, tuggɑni ócøørɑ yij tör, kɑ tyelli udde kuunyɑ wɑ̈g. Kɑ kej kɑɑlɑni ogöögø ki pwödh.

⁷ Ngïjji jwögge bënn órɑ̈b ki mɑc, kɑ kwï gen tørri, kɑ ge weddi. Jɑmm-ɑ ɑ́mëggi ɑ́mɑ̈jji keng órɑ̈b ki mɑc. Ge ɑ́mëggi Sɑmɑriyɑ̀ gɑ møg kwɑjji nyöödø, o ge ceg kɑ kɑ̈ɑ̈lø yi tyëng-ɑ mɑɑnii, o ge muuj ɑ́mɑ̈jji keng kì kɑ̈jj-ɑ kyeelø.”

⁸ Codhe kɑ Miikɑ̀ okööbø kinni, “Kì bɑng menɑni yɑ óywöngi ki ywøøg mwög, kɑ yɑ okïïwø ni tulø. Yɑ ócyɑ̈dhi tyellɑ bong wɑr, riɑ bong ógødh.

⁹ Sɑmɑriyɑ̀ ɑ́cyɑ̈ngi ki cɑyø, óni ngɑn ree di kedø mɑ nɑ̈ɑ̈g. Ryɑ̈ngɑni wɑ̈nh-ɑ dïdyëri Yerusɑlem kɑɑl jiɑ.”

Cyɑ̈ngi Tyëngmɑ̈ɑ̈nø ki Yerusɑlem

¹⁰ Tyɑmee ko köbbu tyëngmɑ̈ɑ̈nø kì Gɑth, wu ko ywöngi kinni tek. Wu tyëng Bet Leɑprɑ̀, ngyellu ri wun kì piny gwög, wu nyodh-ɑ bɑɑri nyingi wun.

¹¹ Wu tyëng Sɑpir, töngu yïnø wu cyɑ̈dh-ɑ nøw ki ɑyɑ̈r. Tyëng-ɑ bëëdø kì Dhɑnɑɑn ko pɑ̈nyi kedhi wɑ̈g kì kɑɑl gen. Keny-ɑ ólïngi wun tyëng Betedhel ge óywöngø, ngɑ̈nyu wøw kinni bong keny me yömmi yi wun kì kunɑni.

¹² Tyëng Mɑröth, opɑ̈wi gen ying-ɑ mɑl ge yïd-ɑ yielø, mɑ́ ryɑ̈g ɑ́bï piny e kɑ̈ɑ̈l-ɑ yï Jwøng-ɑ Ácwɑ̈ɑ̈j, kɑ wɑ̈nh-ɑ dïdyëri Yerusɑlem.

¹³ Wu tyëng Lɑkic, twööju kyënyì ri yɑ̈ɑ̈th. Wu ɑ́ngøy-ɑ orøøg Isrɑil, codhe kɑ Yerusɑlem orøngø thyew kì bɑng wun.

¹⁴ Wu tyëng Yeudiyɑ̀, dhwödh wun kì Möreceth Gɑth. Rɑ̈nhi Isrɑil pɑ køny yi kɑɑl Akdhïb.

¹⁵ Wun ɑ tyëng Mɑrecɑ̀, wu ócïb cinggi tyëngmɑ̈ɑ̈nø, kɑ kɑɑl wun mɑg; kɑɑl-ɑ nyodh döngi Isrɑil órengi be pɑ̈nø kì órøngi kït kì Adulɑm.

¹⁶ Wu tyëng Yeudiyɑ̀, nyɑ̈ɑ̈ru yëyyi wun wɑ̈g kì wɑ̈thi wun, o wɑ̈thi wun budh gen ni wïj cor órɑj, mɑ́ nyigi wun møg-ɑ mɑɑr yi wun ókøøl yïnø gɑ ɑmɑgg.