Jølø 1 - WÄNYI KWËRØ 2011

Thyërø

¹ Møg-ɑ yij wɑ̈nyø men, bɑ kwøbb-ɑ ɑ́köbbi tyëng Isrɑil bënn yi Mosɑ̀, keny-ɑ ɑ́ying gen yij pɑ̈l kì kömi Nɑm Urdun kì wɑɑng cyɑ̈ɑ̈ng mwøl. Ge ɑ́ying-ɑ Töör Urdun kì buti Sup, kɑɑm Pɑrɑn kì tuung, geki kɑ̈ddi Töpel, Lɑbɑn, Kɑdheröt, kí Didhɑɑb kì tung-ɑ kyeelø.

² (Bɑ cyɑ̈ng pyɑ̈rø wïdɑ́kyel ɑ nyi tyëg dhɑnhø ócyɑ̈dhø, e dhwödh ɑ Kïti Sinɑy e kedh-ɑ Kɑdic Berniyɑ̀ ki yuu myërri kïtti Edöm).

³ Kì cyɑ̈ng-ɑ mɑl, kì pyɑ̈rø wïdɑ́kyeel dwɑ̈tt, kì pyɑ̈r ɑ́ngween runni bëëni tyëng Isrɑil wɑ̈g kì Rïp, ɑ ɑ́köbbi tyëng Isrɑil bënn yi Mosɑ̀ ki møg-ɑ ɑ́ceg yi Jwøng-ɑ Ácwɑ̈ɑ̈j bënn i köbbe gï gen,

⁴ kì bɑng keny-ɑ ɑ́rume ki tyɑmi Rɑ̈dh Sïön rɑ̈ɑ̈dh tyëng Amör, ɑ bëëdø kì Kicbön geki Og rɑ̈ɑ̈dh Bɑcɑn, ɑ ɑ́jyɑ̈ɑ̈g kì kɑ̈ddi Actɑröth kí Edrey.

⁵ Bɑ løøg Nɑm Urdun kì wɑɑng cyɑ̈ɑ̈ng mwøl kì piny Moɑb, ɑ ɑ́lwøøb Ciggi Jwøk yi Mosɑ̀ kidøøj, gï kwene kwenø, geki møg-ɑ pwönyi yi ciggɑni bënn. Ákööb kinni,

⁶ “Keny-ɑ ɑ́ying wɑ Kïti Sinɑy, wɑ ɑ́köbbi yi Jwøgee, Jwøng-ɑ Ácwɑ̈ɑ̈j kinni, ‘Wu ɑ́bëëd ki keny me bɑ̈ɑ̈r kì buti kït men.

⁷ Puth wun kɑɑl, kɑ wu kedhu bøli wun. Kedhu myërri kïtti Amör kì Töör Urdun, kí myërri kelli kïttì geki myërri thwørø, kí myërr-ɑ wɑɑng wurlwɑl geki myërri kömi Nɑɑm Omeli Tɑr. Kedhu piny Kɑnɑɑn geki myërri ngɑ̈thi kïtti Lubnɑn. Kɑ wu kedh wun gïti kömi Nɑm Porɑt.

⁸ Pinyɑni bëne, bene en piny-ɑ ɑ́kwøb yi yɑn cøn, yɑ Jwøng-ɑ Ácwɑ̈ɑ̈j kinni ómëggɑ kweyyi wun, Abrɑhɑm, kí Isɑɑk, kí Yɑgob geki kwɑrri gen. Kedh wun, kwɑny wun en.’ ”

Kɑ̈bbi Mosɑ̀ ki Jyɑ̈ggì

⁹ “Kɑ wu köbbɑ keny-ɑ́ nudd wɑ ying-ɑ Ryɑɑng Sinɑy kinni, ‘Wu pɑ lwɑ̈ng yi yɑn ki jɑɑgø yɑ ketɑ.

¹⁰ Jwøøg wun, Jwøng-ɑ Ácwɑ̈ɑ̈j, wu ɑ́gwøge wu ngenyø ni kyelli mɑl.

¹¹ Jwøng-ɑ Ácwɑ̈ɑ̈j, ɑ bɑ Jwøøg kweyyi wun, kwɑnni wun ómed yi en ki tyel ɑ́lïp, kɑ kej wun gwøge o dönye ceth, ni kɑ ɑ́kwøbe gøn!

¹² De men-ɑ́ yɑn, yɑ ketɑ, gønyyi wun ólwɑ̈ng yi yɑn kidï ki lidhø?

¹³ Kɑ̈bbi wun ki jøg mø wɑ̈thi gen pel, ge ngɑ̈ny kwøb o ge dïdø, nyi kwɑɑny dhɑnhø ɑ́kyel kì wïj kɑl, o ge gwøgɑ gɑ jɑggi wun.’

¹⁴ Kɑ wu oyïëyø kinni møgɑni døøj.

¹⁵ Codhe, ɑkwɑnyɑ jøg-ɑ wɑ̈thi gen pel, ɑ ngɑ̈ny kwøb, jøg-ɑ ɑ́yieny yi wun, kɑ ge gwøgɑ gɑ jɑggi wun. Kwï gen jɑɑg-ɑ ji ɑ́lïp, møøgø jɑɑg-ɑ ji miyø, møøgø jɑɑg-ɑ pyɑ̈r ɑ́bïj, møøgø jɑɑg-ɑ ji pyɑ̈rø, kɑ yɑ ókɑ̈bbø thyew ki jyɑ̈ggi wɑ̈thi kɑ̈lli wun.

¹⁶ “Ge ɑ́köbbɑ kì bøli kenyɑni kinni, ‘Nyi lïngi wun gønyyi jii wun, kɑ kwøbbɑni nyi løøg wun. Nyi løøg wun gøny kidøøj, ying dhɑnhø gönyø kɑ wɑɑd gen, wɑlɑ̀ geki wëdh ɑ gönyø.

¹⁷ Nyi løøgu kwøb yethi wun bong geny, mïdhu ji ge pɑ̈r, cɑgg ge løg møg wɑlɑ̀ møg. Ko di dhɑnhø me böggi yi wun, mɑ́ lögg-ɑ løøg yi wun kɑ̈ɑ̈l-ɑ yï Jwøk. Ke di gøny me teeg, e dhɑl-ɑ wun, muuju en yɑn, óløøg yi yɑn.’

¹⁸ Wu ɑ́cegɑ thyew kipe gïg-ɑ kyeelø møg-ɑ ɑ́gøggi yi wun.

Öri Lyëwwì kì Kɑdic Berniyɑ̀

¹⁹ “Aköbbi wɑ yi Jwøng-ɑ Ácwɑ̈ɑ̈j kinni i dhwödh wɑ. Kɑ wɑ odhwödhø kì buti Kïti Sinɑy, wɑ bɑ̈ɑ̈n-ɑ ryɑng-ɑ dwøng, ryɑng-ɑ ceg ki böggø, wɑ kedh-ɑ myërri kïtti tyëng Amör. Kɑ wɑ wɑ̈dh-ɑ Kɑdic Berniyɑ̀,

^20-21 ɑköbbɑ wun kinni, ‘Anɑn wu ɑ́wɑ̈nhi myërri kïtti tyëng Amör, piny-ɑ ɑ́mëggi wɑ yi Jwøgee, Jwøng-ɑ Ácwɑ̈ɑ̈j, ɑ bɑ Jwøøg kweyyee. Kedh wun, kwɑny wun en ni kɑ ɑ́kööb Jwøng-ɑ Ácwɑ̈ɑ̈j, wu ko lyebbi wɑlɑ̀ wu ko böggi.’

²² “De yɑ ɑ́köbbi yi wun kinni, ‘Wiy wɑ öd wɑ ki ji møg lyeew pinyɑni møti, o wɑ ónyudhi yi gen ki yuu-ɑ ókɑ̈ɑ̈l yi wɑ, o kɑ̈ddi gen lidh, mɑ bëëd gen kidï.’

²³ “Kwøbbɑni ɑ́nënni ge døøj, ɑkɑ̈bbɑ ki jøg-ɑ cwøw pyɑ̈rø wïdɑ́ryew kì wɑ̈thi kɑ̈lli wun bënn, wïj gøl ki dhɑnhø.

²⁴ Kɑ ge kedh-ɑ myërri kelli kïttì, gïti kɑ ɑ́wɑ̈dhi gen Töör Acköl, kɑ yije yɑb yi gen.

²⁵ Kɑ ge ódwöögø ge ókɑ̈ddø ki nywøli yenhi pinyɑni, ge okööbø kinni, ‘Piny-ɑ mëggi wɑ yi Jwøng-ɑ Ácwɑ̈ɑ̈j, bɑ piny me lɑ̈be med cɑrø.’

²⁶ “De dhøg Jwøøg wun, Jwøng-ɑ Ácwɑ̈ɑ̈j ɑ́pyem wun, kɑ wu ocögø wu pɑ kedhi pinyɑni.

²⁷ Wu ɑ́yöd wu ceg-ɑ gøny keti wun kinni ‘Wɑ mɑɑn yi Jwøng-ɑ Ácwɑ̈ɑ̈j! Wɑ ɑ́kɑ̈ɑ̈le wɑ̈g kì Rïp kɑ per kinni, o wɑ cïbe cinggi tyëng Amör, o wɑ nɑ̈g yi gen.

²⁸ Wɑ kedhi kunɑni kɑ per ngø, e wɑ óböggø?’ Kɑ jøg-ɑ ɑ́ör yi wɑ okööbø kinni i tyëng pönhɑni teg, o ge bɑ̈rrø kibølee, i kɑ̈ddi gen bɑ ɑger ki dör mø wɑ̈dhi mɑl, o tyëng pönhɑni bɑ kwɑrri Anɑk, ge ceg bëëdø gɑ jödd bënn!’

²⁹ “De wu ɑ́köbbɑ kinni, ‘Wu ko böggi yi jiɑni.

³⁰ Jwøøg wun, Jwøng-ɑ Ácwɑ̈ɑ̈j ɑ cyɑ̈dhi kì bøli wun, ónyïɑ̈ggi kiper wun, ni kɑ ɑ́nyïɑ̈gge kiper wun kì Rïp, kɑ lidh yi wun ki nyingi wun.

³¹ Kɑ lidh yi wun ki kër-ɑ ɑ́kɑ̈lle wun kì yij pɑ̈l, wu kwɑgge’ kwɑggø ni wɑ̈d, gïti kɑ ɑ́wɑ̈nhi wun keny.’

³² De Jwøng-ɑ Ácwɑ̈ɑ̈j nuti gɑ̈nø yi wun, ngö møgɑni ngɑ̈nyi yi wun ge bënn,

³³ e men-ɑ́ en, nyi cyɑ̈dh-ɑ́ɑ̀ bøli wun, o wu yɑ̈bbe ki keny guddi yi wun ki kɑɑl. Nyi cyɑ̈dhi kì bøli wun ɑ́ lööj mɑc kì wɑ̈r, o bɑ lööj pøølø kì dicɑ̈ng e nyodh-ɑ yöö.

Cɑyi Isrɑil yi Jwøng-ɑ Ácwɑ̈ɑ̈j

³⁴ “Gøøny wun ɑ́lïngi yi Jwøng-ɑ Ácwɑ̈ɑ̈j, kɑ pyëwe órënyø ki mendwøng, ɑkööbe ki rɑ̈ji pyëwe kinni,

³⁵ ‘Bong dhɑnhø ɑ́kyel kì kelli wun, wu rïny-ɑ rɑj èn, men-ɑ ókedhi pinyɑni, piny-ɑ lɑ̈be med, piny-ɑ ɑ́kwøbɑ cøn kinni ómëggɑ kweyyi wun.

³⁶ Dɑ́ Kɑlib wɑ̈d Yepunɑ̀ kete ɑ ókedhi pinyɑni. En ɑ ɑ́mïdhi kwøbbɑ, o piny-ɑ ɑ́lyeewe ómëggɑ en geki wɑ̈dde.’

³⁷ O ki gööj wun thyew, Jwøng-ɑ Ácwɑ̈ɑ̈j pyëwe ɑ́rënyi ki yɑn, ɑkööbe kinni, ‘Cɑgg ɑ́ yïn thyew Mosɑ̀, yï pɑ kedhi pinyɑni.

³⁸ De cïj Jöcwø wɑ̈d Nun, nyel-ɑ nyi køny yïn, bɑ en ɑ ópeej Isrɑil be kwɑnyi pinyɑni.’

³⁹ “Codhe, ɑköbbi wɑ bënn yi Jwøng-ɑ Ácwɑ̈ɑ̈j kinni, ‘Nyigi wun møg-ɑ nudd ge thønhø, ɑ kwïj gïnrɑj kí gïndøj, gen ɑ ókedhi pinyɑni; gen ɑ nywøl-ɑ ɑ́kwøb yi wun kinni i ge ómɑg yi tyëngmɑ̈ɑ̈nø. Pinyɑni ómëggɑ gen, o ókwɑny yi gen ceth.

⁴⁰ De wun, løg wun ri wun, kɑ wu kedhu yij pɑ̈l, wu døøg-ɑ kuni Gøøli Agɑbɑ̀.’

⁴¹ “Kɑ wu ólöggø kinni, ‘Mosɑ̀, wø ɑ́røngi kì bøli Jwøng-ɑ Ácwɑ̈ɑ̈j. De ɑnɑn wø kedh-ɑ be nyɑɑg ni kɑ ɑ́kööb Jwøng-ɑ Ácwɑ̈ɑ̈j.’ Akwɑny wun jɑmmi liny, wu orumø kinni i mɑgi myërri kelli kïttì óbëëd e yööd.

⁴² “De Jwøng-ɑ Ácwɑ̈ɑ̈j yɑ ɑ́köbbe kinni, ‘Kyëddí gen, ge ko kedhi be nyɑɑg, mɑ́ yɑ koo ying me nud kì kelli gen, keløg ge ókedh, ge pɑ tyɑ̈mø.’

⁴³ Møg-ɑ ɑ́kwøb yi Jwøng-ɑ Ácwɑ̈ɑ̈j ɑ́köbbɑ wun ceth, de wu nuti lïngø. Dhøg Jwøng-ɑ Ácwɑ̈ɑ̈j ɑ́pyem wun, kɑ wu kedh-ɑ myërri kelli kïttì wu ótøllø.

⁴⁴ Codhe, kɑ tyëng Amör møg-ɑ bëëdø kì kelli kïttɑni wøøw-ɑ kelli wun ni kïc. Kɑ wu cyeddi yi gen, cɑg kì Seir gïti Órmɑ̀, wu pwööd ge’ piny.

⁴⁵ Codhe, ɑywøøg wun kö Jwøng-ɑ Ácwɑ̈ɑ̈j, o wu køny yi en, de kwøbbi wun nuti lïngø yi en.

Runni Yij Pɑ̈l

⁴⁶ “Kɑ wɑ obëëdø kì Kɑdic ki keny me bɑ̈ɑ̈r.