Jɑgg 1 - WÄNYI KWËRØ 2011

Mɑgi Adönibedhek yi Gøl Yeudɑ̀ geki Gøl Cimeøn

¹ Keny-ɑ ɑ́rum Jöcwø ki thøø, ɑpyëëj Jwøng-ɑ Ácwɑ̈ɑ̈j yi tyëng Isrɑil kinni, “Á tyëng gøl men ɑ ókwöngi ki kedhi be nyɑɑg ki tyëng Kɑnɑɑn?”

² Alöggi Jwøng-ɑ Ácwɑ̈ɑ̈j kinni, “Gøl Yeudɑ̀ ɑ ókwöngi ki kedhø. Piny cïbɑ’ cinggi gen.”

³ Aköbbi gøl Cimeøn yi nyiiwï gen, gøl Yeudɑ̀ kinni, “Bïu, kedhi wɑ piny men-ɑ ɑ́mëggi wøn, o wɑ nyïɑ̈ggi wɑ ki tyëng Kɑnɑɑn. O wø ókedh wøn thyew ki wun keny-ɑ ókedhu be nyɑɑg kipe piny men-ɑ ɑ́mëggi wun.” Codhe, ɑkedh gøl Cimeøn,

⁴ geki gøl Yeudɑ̀. Ge ɑ́kedh kɑ ge ónyïɑ̈ggø ki liny kyeel. Athödhi gen ki tegø yi Jwøng-ɑ Ácwɑ̈ɑ̈j, kɑ tyëng Kɑnɑɑn geki tyëng Perïdh tyɑm yi gen. Ge ɑ́tyɑm kì Bedhek e kwɑnni gen bɑ ɑ́lïp pyɑ̈rø.

⁵ Ayod gen Adönibedhek kì Bedhek, kɑ ge ónyïɑ̈ggø ki gøn.

⁶ Arengi Adönibedhek, kɑ ge reng-ɑ bɑnge, ɑmɑgii yi gen, ɑngøl lwedd-ɑ døngø kì cingge geki tyelle.

⁷ Akööb Adönibedhek kinni, “Rɑ̈nhì pyɑ̈r ɑ́bïryew mø lwedd-ɑ døngø kì cinggi gen geki tyelli gen bɑ ɑngøl, ɑ́bëëd ge nyii gwënø ki thullì kì thɑ tɑrɑbedhɑ̀ kì tɑwɑ. De ɑnɑn Jwøk yɑ ɑ́gögge gïn-ɑ ɑ́göggɑ gen.” Akïdhii Yerusɑlem kɑ othøø kì kunɑni.

Mɑgi Yerusɑlem geki Kibrön yi Gøl Yeudɑ̀

⁸ Jø gøl Yeudɑ̀ ɑ́pɑ̈ɑ̈r kömi Yerusɑlem, kɑ mɑg gen. Anɑ̈g gen jie, kɑ kɑɑlɑni rɑ̈b yi gen.

⁹ Codhe, ɑkedhi gen be nyïɑ̈ggø ki tyëng Kɑnɑɑn møg-ɑ bëëdø kì wɑ̈thi kïttì, kí myërri thɑ́ kïttì, kí tyëng yij ryɑng kì wɑɑng wurlwɑl.

¹⁰ Apödhi gen be nyïɑ̈ggø ki tyëng Kɑnɑɑn møg-ɑ bëëdø kì kɑɑl Kibrön men-ɑ ɑ́bëëd e nyi cwøl ɑ́ Kiriɑt Arbɑ̀. Atyɑɑm Cecɑy, kí Akimɑn, kí Tɑlmɑy yi gøl Yeudɑ̀.

Mɑgi Debir yi Othniel

¹¹ Kɑ ge pödh-ɑ be nyïɑ̈ggø ki tyëng Debir, kì bøli keny-ɑ ɑ́bëëde cwøl ɑ́ Kiriɑt Seper.

¹² Akööb Kɑlib kinni, “Ngɑn-ɑ ónyïɑ̈ggi ki Kiriɑt Seper kɑ gø mɑge, ómëggɑ nyɑrɑ Aksɑ̀ ɑ́ dhɑjø.”

¹³ Kɑ kɑɑlɑni mɑg yi Othniel wɑ̈d Kenɑdh. Kenɑdh bɑ ómï Kɑlib nyel-ɑ thinh. Codhe, kɑ Kɑlib nyɑre Aksɑ̀ mëgge Othniel.

¹⁴ Keny-ɑ ɑ́dɑ̈ggi Aksɑ̀ yï Othniel. Kɑ Aksɑ̀ pɑng yi Othniel kinni, i cwödde ki pwödhø kì yï wïye. Keny-ɑ ɑ́yïnhi Aksɑ̀ piny kì kömi ɑdere, ɑpyëjii yi wïye kinni, “Á gïn ɑ dwɑddi yi yïn?”

¹⁵ Alögge kinni, “Nëngí yɑn ki keny me di nyingi pï, mɑ́ piny-ɑ ɑ́mëggí yɑn kì kuni wɑɑng wurlwɑl yije bong pï.” Codhe, ɑmëggii nyingi pï møg-ɑ wïj kwøømø, kí møg-ɑ yij tör yi Kɑlib.

Tyɑ̈mi Gøl Yeudɑ̀ geki Gøl Ben Yɑmïn

¹⁶ Ørri Mosɑ̀, kwɑrri Ken, geki tyëng Yeudiyɑ̀ ɑ́kedh kì Yerikö, kɑɑl benø, ge kedh-ɑ yij ryɑng kì pɑ̈ɑ̈l Yeudiyɑ̀, kɑ ge pëgg-ɑ yij ryɑng-ɑ wɑɑng wurlwɑl kì Arɑd. Ge ɑ́pëggi kelli tyëng Amɑlek.

¹⁷ Kɑ gøl Yeudɑ̀ geki nyiiwï gen, gøl Cimeøn kedh-ɑ yï tyëng Kɑnɑɑn møg-ɑ bëëdø kì kɑɑl Dhepɑth, kɑ gï tyɑm gen, kɑ kɑɑlɑni rënyi gen. Codhe, kɑ kɑɑlɑni cɑg yi gen ɑ́ Órmɑ̀.

¹⁸ De kɑ̈ddi Gɑdhɑ̀, kí Ackelön, kí Ekrön, kí myërri gen nuti mɑɑg gen.

¹⁹ Akøny gøl Yeudɑ̀ yi Jwøng-ɑ Ácwɑ̈ɑ̈j, kɑ myërr-ɑ wɑ̈thi kïttì mɑg yi gen, de tyëng-ɑ bëëdø kì yij tör ɑ́dhɑ̈li cyeed wɑ̈g yi gen, mɑ́ ge ɑ́bëëd yï gen dɑ yɑ̈thi liny mɑ ngyënyø dødø.

²⁰ Amëggi Kibrön Kɑlib ni kɑ ɑ́cïg Mosɑ̀. Acyeed kwɑrri Anɑk wɑ̈g gɑ wɑ̈thi kɑ̈llì ɑ́dɑ̈g yi Kɑlib.

²¹ De tyëng Yebus, møg-ɑ bëëdø kì Yerusɑlem nuti cyeed wɑ̈g yi gøl Ben Yɑmïn, ge ɑ́döng ge obëëdø ki gøl Ben Yɑmïn gïti dicyɑ̈ngtïn.

Mɑgi Betiil yi Gøl Eprɑim geki Gøl Mɑnɑsè

²² Apɑ̈ɑ̈r gøl Eprɑim geki gøl Mɑnɑsè kömi Betiil, kɑ ge køny yi Jwøng-ɑ Ácwɑ̈ɑ̈j.

²³ Kɑɑlɑni ɑ́bëëd e cwøl ɑ́ Ludh kì bøli kenyɑni, kɑ oödø ki lyëwwì.

²⁴ Aliidh jɑl megø yi lyëwwɑni e bï-ɑ wɑ̈g kì kɑɑl, kɑ gø köbbi gen kinni, “Nyudhí wøn yuu-ɑ kedhi kɑɑl, o yï ógöggi yi wøn ki gïndøj.”

²⁵ Codhe, ɑnyudhe gïn yöö, kɑ ji bënn kì kɑɑlɑni nɑ̈g yi gøl Eprɑim geki gøl Mɑnɑsè, kɑ jɑlɑni geki gøl gen bëne ör wɑ̈g yi gen kinni kedh gen.

²⁶ Akedhi jɑlɑni pödhi tyëng Kit, ɑgëëde ki kɑɑl kì kunɑni, kɑ nyingi kɑɑlɑni cɑge ɑ́ Ludh, nyingɑni ɑ cöllii gïti dicyɑ̈ngtïn.

Tyëng-ɑ Nuti Cyeed Wɑ̈g yi Isrɑil

²⁷ Tyëng-ɑ ɑ́bëëd kì kɑ̈ddi Betcɑn, kí Tɑɑnɑk, kí Dör, kí Ibleɑm, kí Megidø, kí tyëng myërr-ɑ buti gen nuti cyeed wɑ̈g yi gøl Mɑnɑsè, tyëng Kɑnɑɑn ɑ́cög ge obëëdø kì kunɑni.

²⁸ Keny-ɑ ɑ́yïddi tyëng Isrɑil ki tegø, ɑcir gen tyëng Kɑnɑɑn, kɑ gï løg gen møg göggi gen, de gï nuti cyeed gen wɑ̈g.

²⁹ Tyëng Kɑnɑɑn møg-ɑ ɑ́bëëd kì Gedher nuti cyeed wɑ̈g yi gøl Eprɑim, de tyëng Kɑnɑɑn ɑ́cög ge obëëdø ki gen kì kunɑni.

³⁰ Tyëng-ɑ ɑ́bëëd kì kɑ̈ddi Kitrön geki Nɑɑ̈lɑl nuti cyeed wɑ̈g yi gøl Dhebulun, de tyëng Kɑnɑɑn ɑ́cög ge obëëdø kì kunɑni ki gen, kɑ gï løg gen møg göggi gen.

³¹ Tyëng-ɑ ɑ́bëëd kì kɑ̈ddi Ákö, kí Sïdön, kí Alɑb, kí Akdhïb, kí Kelbɑ̀, kí Ápek, kí Reköb nuti cyeed wɑ̈g yi gøl Aceer.

³² Tyëng gøl Aceer ɑ́bëëd kì kej ɑ́kyel ki tyëng Kɑnɑɑn møg-ɑ pönhɑni, gï nuti cyeed gen wɑ̈g.

³³ Tyëng-ɑ bëëdø kì kɑ̈ddi Bet Cemec geki Betɑnɑth, nuti cyeddø yi gøl Nɑptɑlì, gøl Nɑptɑlì ɑ́bëëd kì kelli tyëng Kɑnɑɑn, kɑ gï løg gen møg göggi gen.

³⁴ Gøl Dɑn ɑ́cyeed myërr-ɑ wɑ̈thi kïttì yi tyëng Amör, ge nuti wiyø yi gen o ge dwöög gen thɑ́ kïttì piny këti.

³⁵ Tyëng Amör ɑ́cög ge obëëdø kì Ayɑlön, kí Cɑɑlbïm kì wïj Kïti Ëres, de ge ɑ́jɑɑg yi gøl Eprɑim geki tyëng gøl Mɑnɑsè, kɑ gï løg gen møg göggi gen.

³⁶ Cɑ̈gi dhøg piny tyëng Amör ying-ɑ keny-ɑ cwøl ɑ́ Ókømi Akrɑbïm kì Selɑ̀, e pödh-ɑ wɑɑng wuudø.