Ibru 1 - WÄNYI KWËRØ 2011

Kwøbbi Jwøk kì ri Wɑ̈de

¹ Cøn, Jwøk ɑ́kööb ki kweyyee kì yethi kɑ̈jj bënn ki yëëth mø gïïr kì ri jøtöng møge.

² De kɑ ɑ́thumi bøli kɑ̈jjɑni, ɑkööbe ki wɑ kì ri Wɑ̈de, ngɑn-ɑ ɑ́yieny yi en kipe kinni o jɑmmì bënn cïbe cinge, mɑ́ bene ree ɑ ɑ́cwɑ̈ɑ̈j jɑmmì bënn.

³ O bɑ ree ɑ ɑ́kɑ̈ɑ̈l yi cɑɑr Jwøk, o bɑ en ceth ɑ nyudhi wɑ bëëdi Jwøk. Jɑmmì bënn omïdhø yi en kì kɑ̈jji gen ki tege. Mɑ́ e ɑ́thøw e gøøm-ɑ bøli dhɑnhø bëne, kipe kinni o ge dhïwi gen. Codhe ɑpëgge wïj kyëëj Jwøk kì pɑɑre mɑl.

Döngi Wɑ̈d Jwøk

⁴ Wɑ̈d ɑ́gwøg e dwøng kibøli wëywödd, ni kɑ̀ bëëd nyinge ying-ɑ mɑl kibøli nyingi gen.

⁵ Mɑ́ Jwøk bong ɑ́kyel kì kelli wëywödde mɑ ɑ́köbbe kinni, “Yï bɑ Wɑ̈dɑ, yɑ ɑ́göög ki wïyí dicyɑ̈ngtïn.” Wɑlɑ̀ bong wëywödø mɑ ɑ́kwøb yi Jwøk kinni, “Yɑ ógöögø ki wïye, kɑ ogöögø ki wɑ̈dɑ.”

⁶ Jwøk keny-ɑ ɑ́öre Wɑ̈de, Wɑ̈n-ɑ kɑyø kömi piny, ɑ́kööb kinni, “Mɑlli yi wëywöddi Jwøk bënn.”

⁷ De kì ri wëywödd Jwøk ɑ́kwøb-ɑ kinni, “Jwøk wëywödde ɑ́gwøge gɑ yømø, kɑ bɑ̈ngge gwøge gɑ lebbi mɑc.”

⁸ De møg-ɑ ɑ́kwøb yi Jwøk kì ri Wɑ̈d bɑ kinni, “Yïn ɑ Jwøk, kwømí óbëëdø gïti ɑtheer; jií jɑɑg yi yïn kɑ gøggi dyër.

⁹ Yï mɑɑr-ɑ gïn-ɑ bɑ dyër, o men-ɑ bɑ bɑ̈jjø mɑɑn yi yïn bene ɑ bɑnge ɑ́myeeg yïn yi Jwøgí kɑ yï thödhe ki medi pyëw geki dhwɑ̈ng me dwøng kibøli men-ɑ ɑ́mëgge jøg-ɑ cyɑ̈dhi wun.”

¹⁰ Ákööb thyew kinni, “Wuö, piny ɑ́cwɑ̈j yi yïn kì tyeli mɑl, kɑ mɑl cwɑ̈ɑ̈j ki cinggí.

¹¹ Ge ólɑ̈ɑ̈ny, de yï ódöng yï nud ge órënyi ni ógødh.

¹² Ge óbɑn yi yïn, ni kenyi bɑɑn ɑ́ywödh, o ge ówil yi yïn, ni kenyi wiil ógudh. De yï ócög yï nɑ kejí ceth, o runní bong cögi gen.”

¹³ Bong wëywödø mɑ ɑ́köbbi yi Jwøk kinni, “Bëëd kì wïj kyëjɑ gïti keny-ɑ ócïbɑ tyëng-ɑ mɑɑn yïn, thɑ́ tyellí.”

¹⁴ Mɑ́ wëywöddɑni bënn bɑ wëy, o ge gögg-ɑ Jwøk, o gï nyi öre’ tyëng-ɑ ɑ́yieny gɑ møg-ɑ óyiel.