Gɑ́j 1 - WÄNYI KWËRØ 2011

Tegi Per Gɑ́j

¹ Gɑ́ji rɑ̈ɑ̈dh Isrɑil, Sølømøn wɑ̈d Debïd.

² Møg bɑ gɑ́j mø køny yïn ki dïdø ki peli wïj, geki yodi cïïjø men-ɑ dyër, kí bëëndøj.

³ Yï ócuggø pwönyø yi gen ki bëëndøj kí ngenyi rummì. kí bongi ruj geki gøggi dyër.

⁴ Ngɑn wïje nøg ogwøgø yi gen ɑ́ ngɑn wïje pel, o yɑɑg-ɑ thønhø opwönyø yi gɑ́jɑni ki myegi gwøgi gïndøj.

⁵ Wu tyëng-ɑ wɑ̈thi wun pel, lïngu gɑ́jɑni thyew, o wɑ̈thi wun pëddi gen ki pïlø. O gɑ́jɑni nyudh-ɑ wun, wu tyëng-ɑ dïdø ki yëthi peli wïj mø gïïr,

⁶ o wu yod wun gïg-ɑ yethi gɑ́jɑni geki ɑkørr-ɑ tenyi yi tyëng-ɑ wɑ̈thi gen pel.

Cegi Yɑɑg Thønhø

⁷ Keløg yï dwɑdd-ɑ dïdø, wør Jwøng-ɑ Ácwɑ̈ɑ̈j møti. De yï bɑ dhëg keløg yï bɑny-ɑ cïïjø men-ɑ muujø ki peli wïj geki bëëndøj.

⁸ Wɑ̈dɑ, lïngí kwøbb-ɑ pwönyi yïn yi wïyí geki meyí, kɑ kwøbbɑni ko wøy yi yïn.

⁹ Tyer pwöny-ɑ pwönyi yïn yi wïyí geki meyí ni yɑ̈ɑ̈r röny geki tigø ɑ́gør.

¹⁰ Wɑ̈dɑ, keløg yï óthɑb yi tyëngrijjø, yï ko yïëy ki kwøbbi gen.

¹¹ Keny-ɑ óköbbi gen yïn kinni, “Bïí kelli wøn, o wɑ kedhi wɑ be lïbbø kì yöö, o wɑ nɑ̈ɑ̈g wɑ ki ji cɑgg e bong gïjø me órënyø yi gen.

¹² Cɑgg ge teeg o dëlli gen yööd ɑnɑn, ge bɑ møg jwɑn yi wɑ ki gwɑɑr piny!

¹³ Wɑ óyïddi ki kɑ̈r bëne, o uddee pɑ̈ng gen yi jɑmmi tyëng-ɑ nɑ̈g yi wɑ!

¹⁴ Bïí rëbí ki wøn, jɑmm-ɑ ókwɑlli yi wɑ ópɑ̈ngi yi wɑ.”

¹⁵ Yï ko kedh ki ji-ɑ ni møgɑni wɑ̈dɑ. Lɑ̈ɑ̈w rií ki gen,

¹⁶ mɑ́ ge pɑ nyi cwööng ki nɑ̈ggø, ge nyi tyer-ɑ gwøg ki gïgrijjø.

¹⁷ Ákɑ̈llì pɑ nyi ceg ge onennø yi winyy-ɑ dwɑddi ki mɑgø,

¹⁸ de ji møg-ɑ nyi buddi kì yëthi ji møøgø cïg-ɑ ri gen ki ɑ́kɑ̈llì, ɑ́kɑ̈llɑni ɑ yethi gen óthøw gen.

¹⁹ Kur nyi thuw-ɑ kör, tyëng-ɑ nɑ̈nggi ji kipe kwɑnyi jɑmmi gen ólony ki nɑ̈gø.

Peli Wïj Ócwöddø

²⁰ Lïng wun! Peli wïj ócwöddø kì yethi yëëth geki kɑ̈jji ngyew,

²¹ ócwöddø ki cwɑg mø døngø kì dïpɑc geki kɑ̈jj bënn møg-ɑ cugi yi ji kinni,

²² “Wun ɑ dhëgg! Wu gït-ɑ wɑɑng wu tyer-ɑ dhëëgø? Wu gït-ɑ wɑɑng wu bɑny-ɑ dïdø? Wu pɑ cuggi dïdø?

²³ Nyi lïng wun kenyi cɑyɑ wun, wu ócïj yi yɑn ki kwøb mø døøj, kɑ wu odïdø kì yïɑ.

²⁴ Wu ɑ́cwöölɑ yïɑ cingɑ rïjji yɑn wun, o wu ɑ́bɑ̈nyi kønyø yi yɑn.

²⁵ De mɑ́ cwöddɑ ɑ́bɑny yi wun, kɑ wu ódhɑ̈lø tyenyø yi yɑn,

²⁶ wu óngedhi yi yɑn kɑ wu gɑggɑ keny-ɑ óbëën rɑj kömi wun.

²⁷ Yɑ óngedhi ceth keny-ɑ ópɑ̈dhi rɑj kömi wun, kɑ wu ryɑ̈g yi gen ni geew kɑɑl kenyi kedhhii yi ɑtunø.

²⁸ Yɑ óyɑb yi wun kì bøli kenyɑni, kipe kinni o yɑ kønyɑ wun. De cɑgg wu yɑ̈bø kì keny wɑlɑ̀ keny, yɑ pɑ yod yi wun.

²⁹ Wu ɑ́ceg-ɑ bɑ̈nyø dïdø kì yïɑ, kɑ wu óbɑ̈nyø ki wøri Jwøng-ɑ Ácwɑ̈ɑ̈j.

³⁰ Wu ɑ́bɑ̈nyi thyew ki cïjø yi yɑn, kɑ wu ódhɑ̈lø tyenyø.

³¹ Mɑ́ wu ɑ́kwɑny kɑ̈lli yuu-ɑ rɑj, körri gïg-ɑ ɑ́gwøg yi wun pɑ̈dh-ɑ kömi wun.

³² Bɑ dyër, tyëng-ɑ wɑ̈thi gen nøg, ónɑ̈g yi ɑwøøyi gen, o kwøbbi peli wïj tøøk kì pëthi gen.

³³ De ngɑn-ɑ ólïngi kwøbbɑ, bong gïjø me nywɑlii! Bong gïjø men-ɑ óböggi yi en.”