Ester 6 - WÄNYI KWËRØ 2011

Pwøji Mordekɑy yi Rɑ̈dh

¹ Rɑ̈dh ɑ́dhɑ̈li nenø kì wɑ̈rɑni. Aköbbe jøgwøg kinni kɑ̈ɑ̈l gen wɑ̈ny-ɑ nyi gweed kwøbb-ɑ per gen teg kì yij pödhø, kɑ rɑ̈ngii.

² Bun-ɑ ɑ́rɑng kööb ɑ ri møg-ɑ ɑ́gwøg yi Mordekɑy, kɑ ɑ́nyodhe kwøbbi dwɑddi rɑ̈dh ki nɑ̈gø yi órøjj-ɑ kor gøldwøng, ɑ løg Bigthɑnɑ̀ geki Terec.

³ Apëjji rɑ̈dh kinni, “Mordekɑy ɑ́pwøj yi wɑ kɑ ngø?” Aløøg møgɑni yi bɑ̈ngge kinni, “Bong gïjø mɑ ɑ́göggii.”

⁴ Apëjji rɑ̈dh kinni, “Dɑ jøgdøngø mø nud kì gøldwøng?” Kedh Ämɑn wɑ̈nh-ɑ ódɑ̈ri gøldwøng, kì bøli kenyɑni ceth. Ábï-ɑ be kwɑjji rɑ̈dh kipe ngɑɑbi Mordekɑy wïj gï ngɑb, men-ɑ ɑ́rum ki cwöödh piny yi en.

⁵ Alöggi bɑ̈nggɑni kinni, “Ämɑn nud kì keny. Dwɑdd-ɑ yïddø ki yïn.” Akööb rɑ̈dh kinni, “Wiy bëe ød.”

⁶ Kɑ Ämɑn bï-ɑ ød. Kɑ köbbi yi rɑ̈dh kinni, “Dɑ dhɑnhø me dwɑddɑ pwøjø ki mendwøng. Á ngø ɑ cuggi gwøgø yi yɑn, kipe jɑl ni menɑni?” Kɑ Ämɑn okööbø ki pyëwe kinni, “Anɑn, ɑ́ men ɑ cuggi dwɑddø yi rɑ̈dh ki pwøjø? Bɑ yɑn ceth.”

^7-8 Aløøge kwøbbi rɑ̈dh kinni, “Cwöddí ki ógudhi rɑ̈ɑ̈dhø, kí yɑ̈r møg ruug jɑlɑni. Kɑ cïb kömi kyenyí.

⁹ Kɑ yï kɑ̈bbí ki dhɑnhø kì kelli jyɑ̈gg-ɑ døngø, o ruuge jɑlɑni. Codhe, o kyeny pyejje kì kelli kɑɑl, e jɑl-ɑ pwøj obëëdø kì kömi kyeny. Kɑ wiy jɑldwøng-ɑ pyejji kyeny cyɑ̈dhe e óryeerø e köbb-ɑ ji kinni, ‘Lidhu kër-ɑ nyi pwøøj dhɑnhø yi rɑ̈dh!’ ”

¹⁰ Aköbbi Ämɑn yi Rɑ̈dh kinni, “Jwɑní kɑ ógudh kɑ̈ɑ̈l geki kyeny, kɑ pwøj møgɑni göggí Mordekɑy wɑ̈d Yeud. Göggí gïg-ɑ ɑ́kwøb yi yïn bënn. Óyuud yi yïn e obëëdø kì dhø gøldwøng.”

¹¹ Akɑ̈ɑ̈l ógudh kí kyeny yi Ämɑn, kɑ Mordekɑy ruuge, kɑ gø cïbe kömi kyeny. Kɑ kyeny pyejji yi Ämɑn kì kelli kɑɑl, e óryeerø e köbb-ɑ ji kinni, “Lidhu kër-ɑ nyi pwøøj dhɑnhø yi rɑ̈dh.”

¹² Codhe, ɑdøøg Mordekɑy dhø gøldwøng, kɑ Ämɑn jwɑn-ɑ gøle e kwiiwø wïje kum en.

¹³ Kɑ cyëge geki mɑ̈dhhe bënn köbbe ki gïg-ɑ ɑ́cwöb kipere. Aköbbii yi cyëge geki mɑ̈dhhe ki kwøbbi peli wïj kinni, “Keløg Mordekɑy men-ɑ cɑ̈gi ki tyɑmi yïn èn bɑ Yeudì kidyër, yï pɑ cuggi cung kì bøle; yï bɑ men tɑ̈ɑ̈ye piny ceth.”

Nɑ̈gi Ämɑn

¹⁴ Kɑ̈ng-ɑ́ nud ge okööbø, kɑ órøjji gøldwøng ówɑ̈nhø, ge dwɑ̈ɑ̈y-ɑ Ämɑn, kinni o kedhe kun-ɑ rëëj yi Ester.